Daa bzani to nool wizeb, biꞌen Chiozaꞌ
21
Naꞌ bleꞌi Jesúzaꞌ ka chgoo beṉꞌ wniꞌakaꞌ mechaꞌ ganaꞌ chgoo beṉꞌ mech c̱he yoodoꞌnaꞌ.
Lucas 21.1-38
2 Naꞌ ḻekzkaꞌ bleꞌileꞌ to nool yeshꞌ, beṉꞌ wizeb, wloꞌe c̱hop sintabdoꞌ.
3 Naꞌ goll Jesúzaꞌ ḻegakeꞌ:
―Dii ḻi niaꞌ leꞌ, ḻaꞌkzi nool wizebi nakeꞌ beṉꞌ yeshꞌ, ba beꞌcheꞌ dii xench aga ka yogꞌte beṉꞌkaꞌ.
4 Ḻaꞌ yogꞌgakeꞌ choeꞌgakeꞌ daa chichooṉan c̱heꞌkaꞌ, naꞌ ḻeꞌ, naktieꞌ beṉꞌ yeshꞌ, wloꞌe doxen daa napeꞌ, ḻaꞌkzi chyalljileꞌn.
Jesúzaꞌ chiꞌe wllin to lla kwiayiꞌ yoodoꞌnaꞌ
5 Naꞌ baḻ beṉꞌkaꞌ choeꞌgakeꞌ xtillꞌ yoodoꞌnaꞌ ka xochi nak yajkaꞌ nongakileꞌn naꞌ diikaꞌ bzani beṉꞌ beꞌgakeꞌn yoodoꞌnaꞌ. Naꞌch cheꞌ Jesúzaꞌ ḻegakeꞌ:
6 ―Ka nak diiki chwiale ṉaa, wllin lla kwiayiꞌ yogaan, ni sto yaj bich kwia kollꞌ ljwellin.
Diikaꞌ gak katꞌ ba zoa te c̱he yell-lioni
7 Naꞌch wṉabgakileꞌ Jesúzaꞌ, cheꞌgakeꞌneꞌ:
―Maestro, ¿batran gak dga ba wnoꞌ? ¿Bera ka ileꞌintoꞌ gak kwenc̱he iṉezintoꞌ nan ba zoa gaoshosh gakan?
8 Naꞌch cheꞌ Jesúzaꞌ ḻegakeꞌ:
―Ḻi wsakꞌ bi weꞌle latj no siyeꞌ leꞌ. Ḻaꞌ beṉꞌ zan zi ichej gonzgakeꞌ ka nadꞌ, naꞌ iṉazgakeꞌ: “Nadaan Crístonaꞌ”, naꞌ ḻekzkaꞌ iṉazgakeꞌ: “Ba bllin lla kwiayiꞌ yell-lioni.” Bi gonle ḻegakeꞌ txen.
9 Naꞌ ka yenile chak no wdiḻ wa chtop chshag ljwell beṉꞌ kwenc̱he soshyiꞌgakeꞌ beṉꞌ wṉabiaꞌkaꞌ, bi illeble. Chonan byen zigaate gak diiki, per aga lii tete c̱he yell-lioni katꞌ ba chakgakan.
10 Naꞌch golleꞌ ḻegakeꞌ:
―Ganga kweꞌ wdiḻaꞌ naꞌ tiḻ yell kon yell.
11 Naꞌ gak no bedxoꞌ wal, naꞌ gatꞌ wbin, naꞌ biya yillweꞌ kweꞌ lo yell-lioni, naꞌ biya dii gak xan yabanaꞌ dii wwall wsheban beṉꞌ.
12 ’Naꞌ ka zi gak diiki, gox̱ꞌgakeꞌ leꞌ naꞌ biya dii gongakileꞌ leꞌ. Naꞌ lljwaꞌgakeꞌ leꞌ ganaꞌ chdop chllagcho choeꞌḻwill-cho Chiozaꞌ naꞌ yiya yiyiljgakeꞌ leꞌ naꞌ koogakeꞌ leꞌ lillya, naꞌ lljwaꞌgakeꞌ leꞌ lao beṉꞌ wṉabiaꞌ xenkaꞌ naꞌ lao beṉꞌ wṉabiaꞌkaꞌ sto ni c̱haꞌ.
13 Naꞌ katꞌ gak c̱hele kaꞌ, naꞌchlə gatꞌ latj weꞌle choꞌa xtillaanaꞌ laweꞌkaꞌ.
14 Naꞌ bi sezle wṉeyi naklə iṉale katꞌ lljsele lao beṉꞌ wṉabiaꞌkaꞌ,
15 ḻaꞌ nadꞌkzan wzajniidꞌ leꞌ nakan iṉale naꞌ goṉꞌ leꞌ yeḻꞌ sinꞌnaꞌ kwenc̱he ni to beṉꞌkaꞌ chakzbangakileꞌ leꞌ bi sogakileꞌ iṉagakeꞌ bi nakan ka nale.
16 Naꞌ no x̱axṉaꞌtezle, no beṉꞌ bishꞌle, no dialla c̱hele, naꞌ no beṉꞌ zoalenle wen gongakeꞌ leꞌ lo naꞌ beṉꞌ wṉabiaꞌkaꞌ, naꞌ witgakeꞌ baḻ-le.
17 Naꞌ ax̱t yogꞌzə beṉꞌ gakzbangakileꞌ leꞌ daa nonḻilallꞌle nadꞌ.
18 Per ḻi koo yic̱hjle, Chiozaꞌ gakleneꞌ leꞌ naꞌ ni tlishꞌ yishꞌ yic̱hjlenaꞌ bi kwiayiꞌ.
19 Naꞌ shi sechale lawi daa yen ileꞌile naꞌ bi gakc̱hoplallꞌle, naꞌchan gatꞌ to yeḻꞌ mban c̱hele dii bi te c̱heyin.
20 ’Naꞌ katꞌ ileꞌile nec̱hj soldadkaꞌ Jerusalénni, kananꞌ iṉezile nan ba zoa kwiayiꞌn.
21 Naꞌch beṉꞌkaꞌ lleꞌ gani mbani Judeani, chiyaḻꞌ wxoṉjgakeꞌ lljakwashꞌgakeꞌ do yaa yaokaꞌ, naꞌ beṉꞌkaꞌ lleꞌ yelli, chiyaḻꞌ wxoṉjgakeꞌ, naꞌ beṉꞌkaꞌ zej lyix̱aa, bichoklə yiyedgakeꞌ yelli.
22 Ḻaꞌ kananꞌ gon Chiozaꞌ yeḻꞌ ziꞌ c̱he yogꞌzeꞌ kwenc̱he yillinin doxen ka na Choꞌa Xtilleenaꞌ.
23 ¡Nyeshꞌlaz wal gak c̱he noolkaꞌ noaꞌ naꞌ noolkaꞌ chwallꞌ chx̱op llanaꞌ gak diiki! Ḻaꞌ dii xen daa yen ileꞌi beṉꞌ Israelki.
24 Baḻgakeꞌ guet lo wdiḻaꞌ naꞌ zi baḻeꞌ wc̱heꞌgakeꞌ pres yell zitꞌkaꞌ. Naꞌ beṉꞌ zitꞌkaꞌ wlej wshoshjgakeꞌ yell Jerusalénni ax̱t katꞌch illin lla yiyoll yido ka llia biaꞌ gongakeꞌ.
Katꞌkaꞌ yiyed Jesúzaꞌ
25 ’Naꞌ lo wbillaꞌ, lo bewaa naꞌch lo beljkaꞌ gak dii gonan ka yibani beṉꞌ. Naꞌ beṉꞌkaꞌ lleꞌ yell-lioni gakshejlallꞌgakeꞌ naꞌ illebgakeꞌ katꞌ gon nisdoꞌnaꞌ sshag wal daa soꞌ kweꞌn.
26 Naꞌ ax̱t ic̱hoḻ-lallꞌ beṉꞌ daa chllebgakeꞌ kwiayiꞌlengakeꞌ yell-lioni, ḻaꞌ ax̱t yogꞌ diikaꞌ llia xan yabanaꞌ iṉibgakan.
27 Naꞌch ileꞌgakileꞌ nadꞌ, Beṉꞌ Bseḻꞌ Chiozaꞌ Yell-lioni, zizaa to lo bej kon yeḻꞌ wak xen naꞌ balaaṉ xen.
28 Naꞌ katꞌ solo gak diiki, ḻi wtipch lallꞌle, ḻaꞌ ba zoa gaoshosh yidslaꞌ lenꞌ.
29 Naꞌ ḻekzkaꞌ bseesꞌ Jesúzaꞌ to jempl chiꞌe:
―Ḻi wwiakachi yag yix̱wewaꞌ wa bichlə yag.
30 Katꞌ chleꞌile ba chibia xḻaguiinkaꞌ, chakbeꞌile ba zoa yiyoo laꞌo linnaꞌ.
31 Kaꞌkzə, katꞌ ileꞌile ba chak diiki ba wniaꞌ, chiyaḻꞌ iṉezile ba zoa gao wliꞌ Chiozaꞌ yeḻꞌ wṉabiaꞌ c̱heꞌnaꞌ.
32 ’Dii ḻi niaꞌ leꞌ, aga ba wit beṉꞌkaꞌ zoa ṉaa katꞌ gak yogꞌ diiki.
33 ’Yabanaꞌ naꞌ yell-lioni te c̱hegakin, san choꞌa xtillaanaꞌ aga wde bi gak ka nan.
34 ’Ḻi wsakꞌ bi weꞌle latj shoꞌ diikaꞌ wxiṉjan yic̱hjlallꞌdoꞌlenaꞌ. Bi wḻanzle yeḻꞌ weezo, naꞌ bi sezle wṉeyi bi chak c̱hele. Ḻi wsakꞌ kwenc̱he aga sha c̱hel-le chon llanaꞌ zizaa.
35 Ḻaꞌ tokonganzan gak diiki yen ileꞌi yogꞌte beṉꞌkaꞌ lleꞌ doxen yell-lioni.
36 Naꞌ leꞌ, ḻi se wṉeyi, ḻi iṉabi Chiozaꞌ toshiizi gakleneꞌ leꞌ kwenc̱he yilale lao yogꞌ diiki llia biaꞌ gak, naꞌ kwenc̱he bi gall illeble sele lawaꞌnaꞌ, nadꞌ, Beṉꞌ Bseḻꞌ Chiozaꞌ Yell-lioni.