Jesúzaꞌ biꞌe dillꞌ yiyiṉj yoodoꞌnaꞌ
24
Naꞌ ka bichej Jesúzaꞌ ḻoo yoodoꞌnaꞌ kwenc̱he yiyajeꞌ gan yoblə, beṉꞌkaꞌ nakgakeꞌneꞌ txen jabigꞌgakeꞌ kwiteꞌnaꞌ naꞌ wzologakeꞌ choeꞌlengakeꞌneꞌ dillꞌ ka xochi nak yoodoꞌnaꞌ.
2 Naꞌch cheꞌ Jesúzaꞌ ḻegakeꞌ:
―Yogꞌ dga chleꞌile ṉaa, dii ḻi niaꞌ leꞌ wllin lla katꞌ yiyiṉj doxenan, ni to yaj bich igaaṉ kollꞌ ljwellin.
Diikaꞌ gak katꞌ ba zoa te c̱he yell-lioni
3 Naꞌch biyajgakeꞌ lo Yaa Olívozaꞌ, naꞌ ka chiꞌ Jesúzaꞌ lo yaanaꞌ naꞌch wbigꞌ beṉꞌkaꞌ nakgakeꞌneꞌ txen naꞌ xochitezə wṉabgakileꞌneꞌ, cheꞌgakeꞌ:
―Cheenintoꞌ iṉoꞌ netoꞌ batran gak daa ba wnoꞌ. ¿Nakran gak katꞌ ba zoa yiyedoꞌ dii yoblə naꞌ katꞌ ba zoa te c̱he yell-lioni?
4 Naꞌch cheꞌ Jesúzaꞌ ḻegakeꞌ:
―Wsakꞌyeṉꞌgale kwenc̱he kono siyeꞌz leꞌ.
5 Ḻaꞌ beṉꞌ zan ichej iṉazgakeꞌ: “Nadaan Crístonaꞌ.” Naꞌ beṉꞌ zan shajḻeꞌ.
6 Naꞌ yenile chak wdiḻ to ni to naꞌ, per bi gakshejlallꞌle. Ḻaꞌ dii chiyaḻꞌkz gakan, per aga ba bllin lla te c̱he yell-lionin katꞌ ba chak kaꞌ.
7 Ḻaꞌ yidiḻ-len ljwell yellkaꞌ naꞌ beṉꞌ wṉabiaꞌkaꞌ yidiḻ-len ljwellgakeꞌ, naꞌ kweꞌ yillweꞌ, kweꞌ wbin, naꞌ zan yell gak bedxoꞌ wal.
8 Katꞌ ba chak diiki, shinz chzolo ka nak daa yen ileꞌi beṉꞌ yell-lioki.
9 ’Naꞌch gongakeꞌ leꞌ lo naꞌ beṉꞌkaꞌ wc̱hiꞌ wsakꞌ leꞌ, naꞌ witgakeꞌ leꞌ, naꞌ yogꞌ beṉꞌ yell-lioki gakzbangakileꞌ leꞌ daa nonḻilallꞌle nadꞌ.
10 Naꞌ katꞌ ba chak diiki beṉꞌ zan bich gonḻilallꞌgakeꞌ nadꞌ, naꞌ gakzbani ljwelleꞌ naꞌ gon ljwellgakeꞌ lo naꞌ beṉꞌ malkaꞌ.
11 Naꞌ ichej zan beṉꞌ gonzgakeꞌ ka beṉꞌ chyix̱jee daa cheꞌ Chiozaꞌ ḻegakeꞌ, naꞌ beṉꞌ zan shajḻeꞌ.
12 Naꞌ daa kweꞌchachga dii malaꞌ, beṉꞌ zan bich gakgakileꞌ Chiozaꞌ ni bishꞌ ljwelleꞌkaꞌ.
13 Per beenaꞌ soac̱hec̱h gonḻilallee nadꞌ ax̱t ka yiyoll diikaꞌ yen ileꞌileꞌ, beenanꞌ gatꞌ to yeḻꞌ mban c̱heꞌ zejḻi kaṉi.
14 Naꞌ ka nak dillꞌ wen dillꞌ kob c̱he yeḻꞌ wṉabiaꞌ c̱he Chiozaꞌ, chonan byen lljtix̱jeegakeꞌn doxen yell-lioni kwenc̱he yogꞌḻoḻ beṉꞌ yengakileꞌn, naꞌ kanaꞌchan te c̱he yell-lioni.
15 ’Dii Danielaꞌ, beenaꞌ wdix̱jee daa goll Chiozaꞌneꞌ, bzejeꞌ c̱heyi daa soa ḻoo yoodoꞌnaꞌ daa wṉitan balaaṉ c̱heyinnaꞌ, naꞌ chiyaḻꞌ sele wṉeyi bin zejin. Naꞌ katꞌ ileꞌileꞌn ḻoo yoodoꞌnaꞌ
16 kananꞌ beṉꞌkaꞌ zoa Judeanaꞌ chiyaḻꞌ wxoṉjgakeꞌ shajgakeꞌ yaa yaokaꞌ.
17 Naꞌ beenaꞌ llia kollꞌ lilleꞌnaꞌ ni bich gaḻꞌ yiyetjeꞌ lljalejeꞌ dii de ḻoo yoo lilleꞌnaꞌ.
18 Naꞌ beenaꞌ chda lyix̱aa ni bich gaḻꞌ yiyajeꞌ lilleꞌnaꞌ lljaxiꞌe xeꞌnaꞌ.
19 ¡Nyeshꞌlaz gak c̱he noolkaꞌ noaꞌ naꞌ noolkaꞌ chwallꞌ chx̱op llanaꞌ gak kaꞌ!
20 Ḻi iṉabi Chiozaꞌ kwenc̱he llanaꞌ wxoṉjile dga bi gakan katꞌkaꞌ chbeꞌ dii zagaꞌ wa to lla sabd, llanaꞌ chombaaṉcho.
21 Ḻaꞌ yeḻꞌ zakꞌziꞌ wal inlleban nak daa yen ileꞌile, daa konoṉꞌ yen ileꞌkzi dezd ka wxe wzil yell-lioni ax̱t ṉaa, naꞌ katꞌ ba wde gokan kochno yen ileꞌi ka ḻen.
22 Naꞌ shi Chiozaꞌ bi wzeshee llakaꞌ gak kaꞌ, kono yila, sheḻꞌkaꞌ. Per wzesheen daa chakileꞌ beṉꞌkaꞌ ba wlejeꞌ kwenc̱he nakgakeꞌ lallꞌ nee.
23 ’Naꞌ llakaꞌ chak kaꞌ shi no iṉa leꞌ: “Ḻi wwia, ni ze Crístonaꞌ”, wa iṉeꞌ leꞌ: “Naꞌ zieꞌ”, bi shajḻeꞌle.
24 Ḻaꞌ wchej beṉꞌ siyeꞌgakeꞌ, iṉazgakeꞌ: “Nadaan Crístonaꞌ”, wa “Nadaan chyix̱jiꞌa daa na Chiozaꞌ”. Naꞌ ḻekzkaꞌ gongakeꞌ dii gonan ka yibani beṉꞌ, naꞌ gongakeꞌ yeḻꞌ wak xen kwenc̱he siyeꞌgakeꞌ beṉꞌ, ax̱t sheḻꞌ wxegakileꞌ siyeꞌgakeꞌ beṉꞌkaꞌ ba wlej Chiozaꞌ nakgakeꞌ lo nee.
25 Naꞌ ṉaa ba bzenidꞌ leꞌ ka nak daa ziꞌ gak.
26 Daan shi no iṉaz leꞌ: “Crístonaꞌ zoeꞌ latjaꞌ ganaꞌ bibi chashj chḻeb”, bi shajle; wa shi no iṉaz leꞌ: “Ḻoo yoonaꞌ zoeꞌ”, bi shajḻeꞌle.
27 Ḻaꞌ katꞌ nadꞌ, Beṉꞌ Bseḻꞌ Chiozaꞌ Yell-lioni, zizaa dii yoblə, gak ka chak katꞌ chep yes naꞌ chzeeniꞌn doxen xan yabanaꞌ.
28 Ḻaꞌ ganaꞌ de ba wetaꞌ nanꞌ chllag llodkaꞌ.
Katꞌ yiyed Jesucrístonaꞌ
29 ’Naꞌ kate yiyoll yeḻꞌ zakꞌziꞌkaꞌ, lii gakte shgasj shc̱hoḻ lao wbillaꞌ naꞌ bewaa bich wzeeniꞌn naꞌ beljkaꞌ ixopgakan, naꞌ yogꞌ diikaꞌ llia xan yabanaꞌ iṉibgakan.
30 Naꞌch yogꞌ beṉꞌ lleꞌ yell-lioni ileꞌgakileꞌ nadꞌ, Beṉꞌ Bseḻꞌ Chiozaꞌ Yell-lioni, zizaa ladj bejkaꞌ kon yeḻꞌ wak naꞌ balaaṉ xen. Naꞌ yogꞌ beṉꞌkaꞌ lleꞌ doxen yell-lioni kwellyeshꞌgakeꞌ.
31 Naꞌ ka kwell trompetaꞌ zillj wseḻaa anjl c̱haꞌkaꞌ zbii zkaaṉ yell-lioni kwenc̱he yitopgakeꞌ beṉꞌkaꞌ wlej Chiozaꞌ nak lallꞌ nee.
32 ’Naꞌ ḻi wwia ka chak c̱he yag yix̱wewaꞌ: katꞌ ba chzolo chibia xḻaguiinnaꞌ, naꞌ chakbeꞌile ba zoa yiyoo laꞌo linnaꞌ.
33 Kaꞌkzan, katꞌ ileꞌile ba chak yogꞌ diikaꞌ ba wniaꞌ leꞌ gakə, naꞌ gakbeꞌile ba zoa gaoshosh te c̱he yell-lioni.
34 Dii ḻi niaꞌ leꞌ, aga ba wit beṉꞌki zoa ṉaa katꞌ gak yogꞌ diiki llia biaꞌ gakə.
35 Yabanaꞌ naꞌ yell-lioni te c̱hegakin, san choꞌa xtillaanaꞌ biga te c̱heyin naꞌ gak ka nan.
36 ’Kono ṉezi bi lla bi gor te c̱he yell-lioni, ni anjlkaꞌ lleꞌ yabanaꞌ, ni nadꞌ nakꞌ Xiiṉ Chiozaꞌ. Toz X̱aꞌ Chiozaꞌ ṉezileꞌn.
37 ’Naꞌ ka gok kanaꞌ wzoa dii Noénaꞌ, kaꞌkzan chak katꞌ nadꞌ, Beṉꞌ Bseḻꞌ Chiozaꞌ Yell-lioni, yiyedꞌ dii yoblə.
38 Ḻaꞌ beṉꞌkaꞌ wzoa kanaꞌ ziꞌ gak yej ziwꞌ walaꞌ, cheej chaogakeꞌ, naꞌ chshagnaꞌgakeꞌ naꞌ no choeꞌgakeꞌ yeḻꞌ wishagnaꞌ c̱he xiiṉeꞌkaꞌ ax̱t llanaꞌ wyoolen dii Noénaꞌ xiiṉ xooleꞌnaꞌ ḻoo barkwaꞌ.
39 Naꞌ beṉꞌkaꞌ bi wyoo bi gokbeꞌgakileꞌ bin gak ax̱t ka wzolo chak yejsiwaa naꞌ biaꞌ nisaꞌ yogꞌgakeꞌ. Naꞌ kaꞌkzan ni to kono gakbeꞌi katꞌ nadꞌ, Beṉꞌ Bseḻꞌ Chiozaꞌ Yell-lioni, zizaa.
40 Kanaꞌn, ganaꞌ lleꞌ c̱hop beṉꞌ lyix̱aa, toeꞌ yic̱hiꞌa naꞌ beenaꞌ sto yigaaṉeꞌ.
41 Naꞌ ganaꞌ lleꞌ c̱hop noolə chotgakeꞌ, toeꞌ yic̱hiꞌa naꞌ stoeꞌ yigaaṉeꞌ.
42 ’Daan ḻi se kwas kwezle nadꞌ nakꞌ X̱anle, ḻaꞌ bi ṉezile bi lla bi gor zizaa.
43 Ḻi shajniꞌkachi dga, sheḻꞌ x̱an yoonaꞌ ṉezileꞌ bi gor illin beṉꞌ wbannaꞌ lilleꞌnaꞌ, aga wes yeleꞌ kwenc̱he bi wiꞌe latj shoꞌ wbannaꞌ lilleꞌnaꞌ.
44 Naꞌ daan, ḻi soatezi soa kwezle nadꞌ, Beṉꞌ Bseḻꞌ Chiozaꞌ Yell-lioni, ḻaꞌ katꞌ bilə nonle lez, tokonganzi zizaa.
Jempl c̱he wen llinkaꞌ, beenaꞌ chon wen naꞌ beenaꞌ bi chon wen
45 ’Naꞌ ḻi gak ka to wen llin beṉꞌ chajnii naꞌ choneꞌ daa chiyaḻꞌ goneꞌ naꞌ katꞌ chzaꞌ x̱aneꞌnaꞌ choneꞌ lallꞌ nee lilleꞌnaꞌ kwenc̱he wiꞌe dii yeej gao wen llinkaꞌ sto gor c̱heyin.
46 Chakomba wen llinnaꞌ daa chilaḻileꞌ choneꞌ daa chidoḻee goneꞌ katꞌ yillin x̱aneꞌnaꞌ.
47 Ḻaꞌ dii ḻi niaꞌ leꞌ, x̱aneꞌnaꞌ goneꞌ lallꞌ nee yogꞌ dii de c̱heꞌ.
48 Per shi wen llinnaꞌ nakeꞌ beṉꞌ mal naꞌ gakileꞌ: “Wllaljachkzi x̱anꞌnaꞌ yilee.”
49 Naꞌ soloeꞌ wit c̱hineꞌ wen llinkaꞌ nak lallꞌ nee naꞌ yeej gaoleneꞌ weezokaꞌ.
50 Naꞌ llanaꞌ bi nonyeṉꞌleꞌ lez, tokonganz yillin x̱aneꞌnaꞌ.
51 Naꞌ daa bi choneꞌ wen, naꞌ wsakꞌziꞌeneꞌ ka sakꞌziꞌ beṉꞌ wxiyeꞌkaꞌ ganaꞌ kwellyeshꞌgakeꞌ naꞌ gaox̱ax̱j ḻeyeꞌkaꞌ daa ḻe gakshejlallꞌgakeꞌ.