Jempl c̱he shi biꞌ nool wewꞌkaꞌ
25
’Yeḻꞌ wṉabiaꞌ c̱he Chiozaꞌ chzaklebin daa gok c̱he shi biꞌ nool wewꞌ wyaj to wishagnaꞌ, naꞌ bex̱ꞌgakbꞌ kandil c̱hebꞌkaꞌ jḻezgakbꞌ biꞌ byonaꞌ lill noolaꞌ.
2 Naꞌ gayꞌgakbꞌ nteyi naꞌ zi gayꞌgakbꞌ bi nteyi.
3 Biꞌkaꞌ bi nteyi konteḻe wzaꞌlen kandil c̱hebꞌkaꞌ, per bich bex̱ꞌgakbꞌ setaꞌ yigaagakbaꞌn.
4 Naꞌ biꞌkaꞌ nteyi, bex̱ꞌgakbꞌ kandil c̱hebꞌkaꞌ naꞌ bex̱ꞌtegakbꞌ setaꞌ yigaagakbaꞌn.
5 Naꞌ biꞌ wishagnaꞌnaꞌ wlleꞌibꞌ naꞌ biꞌ nool wewꞌkaꞌ chbez gokxwesgakbꞌ naꞌ wtesgakbꞌ.
6 Naꞌ do ka chel besyaa to beṉꞌ, chiꞌe: “¡Ba zaꞌ biꞌ wishagnaꞌnaꞌ, ḻi shoꞌ lljatilchobꞌ!”
7 Naꞌ wyas biꞌ nool wewꞌkaꞌ wzologakbꞌ chiyonshaoꞌ kandil c̱hebꞌkaꞌ.
8 Naꞌ biꞌ nool wewꞌkaꞌ bi nteyi gollgakbꞌ biꞌkaꞌ zi gayꞌ: “Ḻi goṉgach netoꞌ latꞌ set c̱helenaꞌ ḻaꞌ ba chibill c̱hentoꞌni.”
9 Per biꞌkaꞌ nox̱ꞌ setaꞌ cheꞌgakbꞌ: “Bi goṉntoꞌn, kwenc̱he ki iyalljichon ganga. Wenlə ḻi shaj ḻi lljx̱iꞌ c̱helenaꞌ ganaꞌ chiteen.”
10 Naꞌ shlak zejgakbꞌ zjx̱iꞌgakbꞌ setaꞌ, bllin biꞌ wishagnaꞌnaꞌ naꞌ biꞌkaꞌ nox̱ꞌ setaꞌ wyoolengakbꞌ beṉꞌkaꞌ ḻoo yoonaꞌ ganaꞌ chak wishagnaꞌnaꞌ, naꞌch wyej puertaꞌ.
11 Naꞌ ka billin biꞌ nool wewꞌkaꞌ jx̱iꞌ setaꞌ, wṉegakbꞌ x̱an yoonaꞌ cheꞌgakbꞌ: “¡Beṉꞌdoꞌ, bsaljgach shoontoꞌ!”
12 Per x̱an yoonaꞌ chiꞌe ḻegakbꞌ: “Bi wsaljꞌ, ḻaꞌ bi nombiꞌa leꞌ.”
13 Naꞌch cheꞌ Jesúzaꞌ beṉꞌkaꞌ:
―Kaꞌkzə leꞌ, chiyaḻꞌ se kwasle, ḻaꞌ aga ṉezile bi lla bi gor zizaa.
Jempl c̱he beṉꞌkaꞌ bgaaṉlen xmech x̱aneꞌkaꞌ
14 ’Yeḻꞌ wṉabiaꞌ c̱he Chiozaꞌ zaklebin dga wseesaa. To beṉꞌ wzee zejeꞌ zitꞌ, naꞌ ka ba zoa see, goxeꞌ wen llin c̱heꞌkaꞌ naꞌ beneꞌ lallꞌ naꞌgakeꞌ xmecheꞌnaꞌ kwenc̱he gonlengakeꞌn delgens.
15 ’Naꞌ toeꞌ biꞌe gayaa mil mech de or, naꞌ stoeꞌ c̱hopa milan, naꞌ beenaꞌ sto biꞌe to milan. Biꞌe to toeꞌ kon ka dii chakileꞌ wak gonlengakeꞌ llinnaꞌ. Naꞌch wzee zejeꞌ.
16 Naꞌ beenaꞌ biꞌe gayaa milan, benleneꞌn llin naꞌ beneꞌ gan zi gayaa milan.
17 Naꞌ ḻekzkaꞌ beenaꞌ biꞌe c̱hopa milan, benleneꞌn llin naꞌ beneꞌ gan zi c̱hopa milan.
18 San beenaꞌ biꞌe to milan, jteneꞌ to yech naꞌ bkwasheen.
19 ’Naꞌ ka ba gok ssha naꞌ billin x̱aneꞌkaꞌ, naꞌ goxeꞌ to togakeꞌ kwenc̱he bidegakeꞌ kwent laweꞌnaꞌ.
20 Naꞌch zigaate beenaꞌ biꞌe gayaa mil mech de or bllineꞌ laweꞌnaꞌ, chiꞌeneꞌ: “X̱anꞌ, ni de de gayaa milaꞌ beṉoꞌ nadꞌ, naꞌ ni de zi gayaa mil daa benlenaꞌn gan.”
21 Naꞌ cheꞌ x̱aneꞌnaꞌneꞌ: “Ḻe wen benoꞌ, to wen llin wen inlleb nakoꞌ, benoꞌ ka chiyaḻꞌ gonoꞌ kon daa bkwaaṉlenꞌ liꞌ latꞌ. Naꞌ dii xench goṉꞌ liꞌ ṉaa. Wyoo kwenc̱he yibaleniloꞌ nadꞌ.”
22 Naꞌch wdenaꞌ bllin wen llinnaꞌ bkwaaṉleneꞌ c̱hopa mil, chiꞌeneꞌ: “X̱anꞌ, ni de de c̱hopa milaꞌ beṉoꞌ nadꞌ, naꞌ ni de zi c̱hopa mil daa benlenaꞌn gan.”
23 Naꞌch cheꞌ x̱aneꞌnaꞌneꞌ: “Ḻe wen benoꞌ, to wen llin inlleb wen nakoꞌ, benoꞌ ka chiyaḻꞌ gonoꞌ kon daa bkwaaṉlenꞌ liꞌ latꞌ. Naꞌ dii xench goṉꞌ liꞌ ṉaa. Wyoo kwenc̱he yibaleniloꞌ nadꞌ.”
24 Per ka bllin wen llinnaꞌ bkwaaṉleneꞌ to mil, naꞌ golleꞌ x̱aneꞌnaꞌ: “X̱anꞌ, ṉezidꞌ nakoꞌ beṉꞌ zṉia, naꞌ to chiziꞌzoꞌ banez daa chon beṉꞌ yoblə.
25 Naꞌchan bllebꞌ gonditjꞌ xmechoꞌnaꞌ, daan wdenꞌ to yech naꞌ bkwashaan. Ni de xmechoꞌnaꞌ, bikaagachan, ḻaꞌ c̱hekzoꞌn.”
26 Naꞌch cheꞌ x̱aneꞌnaꞌneꞌ: “Beṉꞌ lia, bikz bi llin yejniꞌalallii chonoꞌ. Ṉezteiloꞌ to chiziꞌzꞌ banez daa chon beṉꞌ yoblə.
27 Naꞌ daa ṉeziloꞌ kanꞌ chonꞌ, ¿berac̱he ki joo xmechaa ganaꞌ chon yic̱hjin shlak bi wzoaꞌ? Sheḻꞌ benoꞌ kaꞌ, naꞌ ṉaa ba biyedꞌ yiyoṉoꞌn lente yic̱hjinnaꞌ, sheḻꞌkaꞌ.”
28 Naꞌch golleꞌ beṉꞌkaꞌ lleꞌ naꞌ: “Ḻi yikaa mechaꞌ daa bkwaaṉleneꞌ naꞌ ḻi weꞌn beenaꞌ nap shi milan.
29 Ḻaꞌ kanꞌ nakan, beenaꞌ chgoneꞌ llin daa yoo lo nee, goncheꞌ lallꞌ nee dii xench ax̱t gatꞌ kweꞌchileꞌ; san beenaꞌ bi chgoneꞌ llin daa yoo lo nee, ax̱t daa ngoo lo nee latꞌ yidoyo.
30 Naꞌ wen llinni bi yejniꞌalallii, ḻi wzaḻee ganaꞌ shgasj shc̱hoḻ, ganaꞌ kwellyeshee naꞌ gaox̱ax̱j ḻeyeꞌnaꞌ daa ḻe gakshejlallee.”
Ka gak katꞌ wc̱hoglo Jesúzaꞌ c̱he beṉꞌ
31 ’Katꞌ zizaꞌ nadꞌ, Beṉꞌ Bseḻꞌ Chiozaꞌ Yell-lioni, len balaaṉ xen c̱haꞌnaꞌ naꞌ yogꞌ anjl c̱haꞌkaꞌ, naꞌ wliꞌa yeḻꞌ wṉabiaꞌ choo yeḻꞌ wṉabiaꞌ xen c̱haꞌnaꞌ.
32 Naꞌ yogꞌ beṉꞌ lleꞌ doxen yell-lioni yidopgakeꞌ lawaꞌnaꞌ, naꞌ gonꞌ c̱he c̱heləgakeꞌ ka chon to beṉꞌ chapeꞌ bayix̱ꞌ choneꞌ c̱helə xilꞌkaꞌ naꞌ c̱helə shibkaꞌ.
33 Naꞌ wzoaꞌ shḻaa de shḻi c̱haꞌni beṉꞌkaꞌ zaklebi xilꞌkaꞌ daa chonḻilallꞌgakeꞌ nadꞌ, naꞌ beṉꞌkaꞌ zaklebi shibkaꞌ daa bi benḻilallꞌgakeꞌ nadꞌ, wzoagakee shḻaa de robes c̱haꞌni.
34 Naꞌ nadꞌ, beṉꞌ wṉabiaꞌ, yepꞌ beṉꞌkaꞌ lleꞌ shḻaa de shḻi c̱haꞌni: “Ḻi da, ka leꞌ ba ben X̱aꞌ Chiozaꞌ ka gak wen c̱hele, naꞌ siꞌle banez daa ba nonshawee c̱hele ka bx̱e bsiltieꞌ yell-lionaꞌ.
35 Ḻaꞌ ka wdonꞌ, bwaole nadꞌ; naꞌ ka wbiḻidꞌ, beṉle dii weejꞌ; naꞌ ka wdaꞌ ka beṉꞌ zitꞌ, bleble nadꞌ lill-lenaꞌ.
36 Naꞌ ka byallj xalaanaꞌ, beṉle dii gokwꞌ, naꞌ ka bi shawaa, bidwiale nadꞌ; naꞌ ka gotaa lillyanaꞌ, bidwiale nadꞌ.”
37 Naꞌ yogꞌ beṉꞌ ḻi beṉꞌ shaoꞌkaꞌ iṉagakeꞌ nadꞌ: “X̱anꞌ, ¿batran bleꞌintoꞌ liꞌ chdonoꞌ naꞌ bwaontoꞌ liꞌ? ¿Batran bleꞌintoꞌ liꞌ chbiḻiloꞌ naꞌ beṉntoꞌ daa weejoꞌ?
38 ¿Batran bleꞌintoꞌ liꞌ chdoꞌ ka beṉꞌ zitꞌ naꞌ blebntoꞌ liꞌ ḻoo yoo lillntoꞌnaꞌ? ¿Batran bleꞌintoꞌ liꞌ chdoꞌ bibi xalaanoꞌ de naꞌ beṉntoꞌn?
39 Naꞌ ¿batran gokbeꞌintoꞌ bi shawoo wa gotoo lillyanaꞌ naꞌ bidwiantoꞌ liꞌ?”
40 Naꞌ nadꞌ, beṉꞌ wṉabiaꞌ, yepgakee: “Dii ḻi niaꞌ leꞌ, yogꞌ daa benle c̱he beṉꞌkaꞌ byallj bc̱hini, beṉꞌkaꞌ nak beṉꞌ bishaa naꞌ beṉꞌ zanꞌ, ḻaꞌkzi bi nakgakeꞌ beṉꞌ zakii, nadꞌkzan benile kaꞌ.”
41 ’Naꞌch yepꞌ beṉꞌkaꞌ lleꞌ shḻaa de robesi: “Ḻi kwas kaꞌlə, leꞌ wen dii mal. Lo yiꞌ gabiḻaꞌ daa chaḻꞌ zejḻi kaṉi chidoḻꞌle yiyajle ganaꞌ ba non Chiozaꞌ sakꞌziꞌ dii x̱iwaa len anjl c̱heyinkaꞌ.
42 Ḻaꞌ ka wdonꞌ bi beṉle dii gawꞌ; naꞌ ka wbiḻidꞌ bi beṉle dii yeejꞌ.
43 Naꞌ ka wdaꞌ ka beṉꞌ zitꞌ, aga bleble nadꞌ ḻoo yoo lill-le. Naꞌ ka byallj xalaanaꞌ, aga bi beṉle; naꞌ ka bi shawaa wa gotaa lillyanaꞌ, aga bidwiale nadꞌ.”
44 Naꞌ iṉagakeꞌ nadꞌ: “X̱anꞌ, ¿batran wdonoꞌ, wa wbiḻiloꞌ, wa wdoo ka beṉꞌ zitꞌ, wa bibi xalaanoꞌ gotꞌ, wa bi shawoo, wa gotoo lillyanaꞌ naꞌ bi goklenntoꞌ liꞌ?”
45 Naꞌ yepgakee: “Dii ḻi niaꞌ leꞌ, daa bi goklenle beṉꞌkaꞌ byallj bc̱hini, beṉꞌkaꞌ nak beṉꞌ bishaa naꞌ beṉꞌ zanꞌ, ḻaꞌkzi bi nakgakeꞌ beṉꞌ zakii, nadꞌkzan bi goklenle.”
46 Naꞌ beṉꞌ malkanꞌ yiyajgakeꞌ ganaꞌ tegakeꞌ yeḻꞌ sakꞌziꞌnaꞌ zejḻi kaṉi, naꞌ beṉꞌkaꞌ nak beṉꞌ ḻi beṉꞌ shaoꞌ soalengakeꞌ nadꞌ zejḻi kaṉi.