Wloogakeꞌ xṉezin gox̱ꞌgakeꞌ Jesúzaꞌ
26
Naꞌ ka biyoll beꞌ Jesúzaꞌ yogꞌ dillꞌkaꞌ, naꞌch golleꞌ beṉꞌkaꞌ nakgakeꞌneꞌ txen:
2 ―Ba ṉezkzile zi c̱hop llazan chyallj gaḻꞌ lṉi Paskwaꞌ, naꞌ nadꞌ, Beṉꞌ Bseḻꞌ Chiozaꞌ Yell-lioni, gakꞌ lo naꞌ beṉꞌkaꞌ witgakeꞌ nadꞌ ḻee yag cruzaꞌ.
3 Naꞌch bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ naꞌ beṉꞌ golkaꞌ chṉabiaꞌ beṉꞌ Israelkaꞌ bdopgakeꞌ lill bx̱oz choo bx̱oz xennaꞌ, beenaꞌ le Caifás.
4 Naꞌ wloogakeꞌ xṉezin gox̱ꞌgakeꞌ Jesúzaꞌ xochizi, ka ki gakbeꞌi beṉꞌ, naꞌ witgakeꞌneꞌ.
5 Naꞌ cheꞌ ljwelleꞌ:
―Bi gox̱ꞌchoneꞌ shlak chaḻꞌ lṉinaꞌ kwenc̱he bi wta wṉecho beṉꞌ.
To noolə bwazjeꞌ set zix̱aꞌ yic̱hj Jesúzaꞌ
6 Naꞌ ka zoa Jesúzaꞌ Betánianaꞌ len beṉꞌkaꞌ nakgakeꞌneꞌ txen, wyajgakeꞌ lill to beṉꞌ leꞌ Simón, beenaꞌ gok yillweꞌ daa le lepra.
7 Naꞌ shlak chiꞌ Jesúzaꞌ choꞌa mesaꞌ, bllin to noolə nox̱ee to lmet de yaj xochi naꞌ yollan set dii chḻaꞌ zix̱ dii zakꞌ mech xen, naꞌch bwazjeꞌn yic̱hj Jesúzaꞌ.
8 Naꞌ ka bleꞌi beṉꞌkaꞌ nak Jesúzaꞌ txen daa ben noolaꞌ, ḻe bllaagakeꞌ naꞌ cheꞌ ljwelleꞌ:
―¿Bic̱he benditjz beeni setaꞌ?
9 Sheḻꞌ betꞌchokleꞌn, ḻaꞌ dii xen zakaan, naꞌ biꞌe xmechinnaꞌ beṉꞌ yeshꞌkaꞌ, sheḻꞌkaꞌ.
10 Naꞌ beni Jesúzaꞌ ka choeꞌgakeꞌ dillꞌ, naꞌ golleꞌ ḻegakeꞌ:
―¿Bic̱he chṉezle c̱he nooli? Ḻaꞌ daa ba beneꞌ c̱haꞌ nakan dii wen.
11 Ka nak beṉꞌ yeshꞌkaꞌ, toshiizi soagakeꞌ ladjlenaꞌ, san nadꞌ, aga toshiizi soalenꞌ leꞌ.
12 Daa ba bwazj nooli nadꞌ set zix̱aꞌ, beneꞌ kaꞌ kwenc̱he gakshaoꞌzega kwerp c̱haꞌni katꞌ wkwashꞌgakeꞌ nadꞌ.
13 Naꞌ dii ḻi niaꞌ leꞌ, gattezə weꞌgakeꞌ dillꞌ wen dillꞌ kob c̱he Chiozaꞌ lo yell-lioni, ḻekzkaꞌ weꞌgakeꞌ dillꞌ ka nak dii wennaꞌ daa ba ben nooli naꞌ lljadingakileꞌneꞌ.
Judaꞌ bdieꞌ Jesúzaꞌ lo naꞌ bx̱ozkaꞌ chṉabiaꞌ
(Mr. 14:10-11; Lc 22:3-6)
14 Naꞌch beenaꞌ le Jud Scariot, beenaꞌ nak txen beṉꞌkaꞌ shlliṉ, wyajeꞌ lao bx̱ozkaꞌ chṉabiaꞌ.
15 Naꞌ golleꞌ ḻegakeꞌ:
―¿Kaꞌkꞌ c̱hixjle nadꞌ shi gonꞌ Jesúzaꞌ lo naꞌle?
Naꞌch wdixjgakeꞌneꞌ shichoa mech plat.
16 Naꞌch lo llanaꞌtez wzolo Judaꞌ chinoeꞌ nakan goneꞌ kwenc̱he goneꞌ Jesúzaꞌ lo naꞌ beṉꞌkaꞌ.
X̱ancho Jesúzaꞌ wdaoleneꞌ beṉꞌkaꞌ nakgakeꞌneꞌ txen xsheꞌnaꞌ
17 Lla nech c̱he lṉi Paskwaꞌ, llanaꞌ chaogakeꞌ yetxtilaꞌ daa bi nc̱hix̱ levadúranaꞌ, beṉꞌkaꞌ nak Jesúzaꞌ txen wyajgakeꞌ kwiteꞌnaꞌ cheꞌgakeꞌneꞌ:
―¿Ga cheeniloꞌ lljasiniꞌantoꞌ xsheꞌ c̱he lṉi Paskwi?
18 Naꞌch cheꞌ Jesúzaꞌ ḻegakeꞌ:
―Ḻi shaj yell Jerusalénnaꞌ, naꞌ beenaꞌ yillagle yeꞌleneꞌ: “Maestronaꞌ neꞌ ba zoa gak daa llia biaꞌ gak c̱heꞌ, naꞌ lilloꞌnaꞌ cheenileꞌ wsiniꞌantoꞌ daa gaolenntoꞌneꞌ xsheꞌ c̱he lṉi Paskwi.”
19 Naꞌch beṉꞌkaꞌ nakgakeꞌneꞌ txen bengakeꞌ kon ka golleꞌ ḻegakeꞌ, naꞌ jasiniꞌagakeꞌ xsheꞌ c̱he lṉi Paskwaꞌ.
20 Naꞌ ka goḻ, wcheꞌlen Jesúzaꞌ beṉꞌkaꞌ shlliṉ choꞌa mesaꞌ.
21 Naꞌ shlak chaogakeꞌ cheꞌ Jesúzaꞌ ḻegakeꞌ:
―Dii ḻi niaꞌ leꞌ, tole gonle nadꞌ lo naꞌ beṉꞌkaꞌ chakziꞌ chakzbani nadꞌ.
22 Naꞌ ka golleꞌ ḻegakeꞌ kaꞌ ḻe gokyeshꞌgakileꞌ naꞌ to toeꞌ cheꞌgakeꞌneꞌ:
―X̱anꞌ, ¿anadaan gonꞌ kaꞌ, lla?
23 Naꞌch cheꞌ Jesúzaꞌ ḻegakeꞌ:
―Beenaꞌ ba bḻeejleneꞌ nadꞌ yetxtil c̱heꞌnaꞌ ḻoo yeeṉaꞌ, beenaꞌkzanꞌ goneꞌ nadꞌ lo naꞌ beṉꞌkaꞌ chakziꞌ chakzbani nadꞌ.
24 Ka nak nadꞌ, Beṉꞌ Bseḻꞌ Chiozaꞌ Yell-lioni, wit beṉꞌ nadꞌ kon ka na Choꞌa Xtillꞌ Chiozaꞌ, per ¡nyeshꞌlaz gak c̱he beenaꞌ goneꞌ nadꞌ lo naꞌ beṉꞌkaꞌ! ¡Naklan wen sheḻꞌkaꞌ bi goljeꞌ!
25 Naꞌch Judaꞌ, beenaꞌ wdieꞌ Jesúzaꞌ lo naꞌ beṉꞌkaꞌ, chiꞌeneꞌ:
―Maestro, ¿anadaan gonꞌ kaꞌ?
Naꞌch cheꞌ Jesúzaꞌneꞌ:
―Kanꞌ ba wnoꞌz.
26 Naꞌ shlak chaogakeꞌ, bex̱ꞌ Jesúzaꞌ yetxtilaꞌ naꞌ biꞌe Chiozaꞌ yeḻꞌ chox̱ken, naꞌ bxoxjeꞌn naꞌch biꞌen beṉꞌkaꞌ nakgakeꞌneꞌ txen, chiꞌe:
―Ḻi gao dga. Ḻennanꞌ kwerp c̱haꞌni.
27 Naꞌtech bex̱ee to kop dii yoll vino, naꞌ biꞌe Chiozaꞌ yeḻꞌ chox̱ken naꞌ biꞌen ḻegakeꞌ, naꞌ golleꞌ:
―Yogꞌle ḻi yeej dga yoll ḻoo kopi,
28 ḻaꞌ ḻennanꞌ xc̱henꞌnaꞌ daa gon ka gak ḻi dii kobaꞌ bc̱heb Chiozaꞌ goneꞌ. Naꞌ ḻaljan kwenc̱he yiyakxen saaxya c̱he beṉꞌ zan.
29 Naꞌ niaꞌ leꞌ, ni zeelo cheejlenꞌ leꞌ nis uvani. Aga weejchaꞌn ax̱t katꞌch illin lla soacho txen ganaꞌ chṉabiaꞌ X̱aꞌ Chiozaꞌ, kanaꞌchan yeejlenaꞌn leꞌ dii yoblə.
Jesúzaꞌ chiꞌe bi wc̱heb Pédronaꞌ shi nombiꞌeneꞌ
30 Naꞌ ka bidaogakeꞌ, beḻgakeꞌ beꞌlaꞌogakeꞌ Chiozaꞌ naꞌch biyajgakeꞌ lo yaa Olívozaꞌ.
31 Naꞌ ka ziyajgakeꞌ, cheꞌ Jesúzaꞌ ḻegakeꞌ:
―Yogꞌle kwej yic̱hjle nadꞌ ṉaanlleꞌ. Ḻaꞌ kin na Choꞌa Xtillꞌ Chiozaꞌ: “Witꞌ beenaꞌ chap xilꞌkaꞌ naꞌ illeshlesgakb.”
32 Per ka yibanꞌ ladj beṉꞌ wetkaꞌ, yiyaa Galileanaꞌ lljalezꞌ leꞌ.
33 Naꞌch cheꞌ Pédronaꞌneꞌ:
―Ḻaꞌkzi yogꞌ beṉꞌki kwej yic̱hjgakeꞌ liꞌ, nadꞌ bi kwej yic̱hjꞌ liꞌ.
34 Naꞌch cheꞌ Jesúzaꞌneꞌ:
―Dii ḻi niaꞌ liꞌ, ṉaanlleꞌ shoṉ shii bi wc̱heboꞌ shi nombiꞌo nadꞌ ka ziꞌ kwell shikwtezaꞌ.
35 Naꞌ Pédronaꞌ chiꞌeneꞌ:
―Ḻaꞌkzi guetlentiaꞌ liꞌ, biga iṉiaꞌ bi nombiꞌa liꞌ.
Naꞌ kaꞌkzə goll yogꞌḻoḻ beṉꞌkaꞌ nakgakeꞌneꞌ txen.
Jesúzaꞌ beꞌḻwilleꞌ Chiozaꞌ latjaꞌ le Getsemaní
36 Naꞌ ka bllinlen Jesúzaꞌ beṉꞌkaꞌ nakgakeꞌneꞌ txen latjaꞌ le Getsemaní, naꞌch golleꞌ ḻegakeꞌ:
―Nizə ḻi kweꞌ shlak shaa daa kaꞌlə lljeꞌḻwillꞌ Chiozaꞌ.
37 Naꞌ bc̱hiꞌe Pédronaꞌ naꞌ c̱hop bishꞌte xiiṉ Zebedewaꞌ, naꞌ wzolo chakyeshileꞌ dii wal inlleb.
38 Naꞌ golleꞌ ḻegakeꞌ:
―Ax̱t chaklikazidꞌ lii guettiaꞌ daa ḻe chakyeshii yic̱hjlallꞌdawaani. Ḻi igaaṉ nizə naꞌ bi guesle.
39 Naꞌ bḻee ḻegakeꞌ zi latꞌ naꞌ bc̱hekꞌ yic̱hjeꞌnaꞌ lo yonaꞌ naꞌ beꞌḻwilleꞌ Chiozaꞌ, chiꞌe:
―X̱adawaa, shi wakan, bengach ka ikwas dga yen ileꞌidꞌ, per aga gak ka cheenidꞌ, san gak ka cheeniloꞌ.
40 Naꞌch biyajeꞌ ganaꞌ lleꞌ beṉꞌkaꞌ shoṉ, naꞌ bleꞌileꞌ ba chesgakeꞌ. Naꞌ golleꞌ Pédronaꞌ:
―¿Abikzə bchejlatꞌgaile ḻaꞌc̱hꞌ tgor kwezle nadꞌ bi guesle?
41 Bi guesle. Ḻi weꞌḻwill Chiozaꞌ kwenc̱he bi weꞌzle latj gon beli chennaꞌ leꞌ gan. Aga ki cheeni yic̱hjlallꞌdoꞌlenaꞌ gonlen per beli chennaꞌ bi chizoin.
42 Naꞌch wyajeꞌ de wchop shii jeḻwilleꞌ Chiozaꞌ, chiꞌe:
―X̱adawaa, shi ba nakten idiḻ illagꞌ dga, gakkzə ka cheeniloꞌ.
43 Naꞌ ka billineꞌ dii yoblə ḻekzkaꞌ chesləgakeꞌ daa bi wzogakileꞌ bishgalaꞌ.
44 Naꞌ bikzə bisbaneꞌ ḻegakeꞌ, naꞌ wzee sto shii jeḻwilleꞌ Chiozaꞌ de wyoṉ shii naꞌ golleꞌneꞌ ka ba gollkzeꞌneꞌ.
45 Naꞌch biyajeꞌ ganaꞌ bgaaṉ beṉꞌkaꞌ, naꞌ golleꞌ ḻegakeꞌ:
―¿Ani chestkile? Ba bllin gor nadꞌ, Beṉꞌ Bseḻꞌ Chiozaꞌ Yell-lioni, gakꞌ lo naꞌ beṉꞌ saaxyakaꞌ.
46 Ḻi c̱has naꞌ ḻi shoꞌ. Ba zaꞌ beenaꞌ wdieꞌ nadꞌ lo neekaꞌ.
Bex̱ꞌgakeꞌ Jesúzaꞌ
47 Bilaṉꞌ yiyoll yee Jesúzaꞌ kaꞌ ka bllin Judaꞌ beenaꞌ nak txen beṉꞌkaꞌ shlliṉ, nc̱hiꞌe beṉꞌ zan beṉꞌkaꞌ bseḻꞌ bx̱ozkaꞌ chṉabiaꞌ len beṉꞌ golkaꞌ chṉabiaꞌ beṉꞌ Israelkaꞌ. Naꞌ nox̱ꞌgakeꞌ no spad naꞌ no yag.
48 Naꞌ Judaꞌ ba bzajniileꞌ beṉꞌkaꞌ nc̱hiꞌe nakan goneꞌ wliꞌe beenaꞌ gox̱ꞌgakeꞌ, golleꞌ: “Kon beenaꞌ wnopꞌ, ḻen gox̱ꞌle.”
49 Naꞌ ka bllinleneꞌ beṉꞌkaꞌ kwit Jesúzaꞌ, lii wbigꞌtieꞌ laweꞌnaꞌ chiꞌeneꞌ:
―¡Chiox ṉaa, maestro!
―Bishꞌdawaa, ben daa zidyenoꞌ.
Naꞌch lii wbigꞌte beṉꞌkaꞌ bex̱ꞌgakeꞌ Jesúzaꞌ.
51 Naꞌ ka bex̱ꞌgakeꞌneꞌ, to beenaꞌ nakeꞌneꞌ txen wlejeꞌ spad c̱heꞌnaꞌ naꞌ wdineꞌn xmos bx̱oz choo bx̱oz xennaꞌ, bc̱hogtieꞌ tḻaa nagueꞌnaꞌ.
52 Naꞌch goll Jesúzaꞌneꞌ:
―Bigooshaoꞌ spad c̱hoꞌnaꞌ, ḻaꞌ yogꞌ beṉꞌkaꞌ chitgakileꞌ beṉꞌ yesya, ḻekzkaꞌ ḻen guetgakileꞌ.
53 ¿Achakile bi gak iṉabidꞌ X̱aꞌnaꞌ gakleneꞌ nadꞌ naꞌ lii wseḻꞌtieꞌ anjl zan inlleb, sheḻꞌkaꞌ?
54 Per shi kaꞌ gonꞌ, ¿nakra gak yillini Choꞌa Xtillꞌ Chiozaꞌ ganaꞌ nan chonan byen gak ki?
55 Naꞌch goll Jesúzaꞌ beṉꞌkaꞌ ba nox̱ꞌgakeꞌneꞌ:
―¿Achakileꞌ no wban no nadꞌ zaꞌlenzle no spad no yag kwenc̱he gox̱ꞌle nadꞌ? Yogꞌ lla bliꞌ bsedidꞌ beṉꞌ ḻoo yoodoꞌnaꞌ, ¿bic̱he bi bex̱ꞌle nadꞌ shlak bliꞌ bsedidꞌ beṉꞌ naꞌ?
56 Per daa chonle ki, chillinin ka na Choꞌa Xtillꞌ Chiozaꞌ daa bzej dii beṉꞌkaꞌ wdix̱jee daa golleꞌ ḻegakeꞌ.
Naꞌch yogꞌḻoḻ beṉꞌkaꞌ nak Jesúzaꞌ txen bxoṉjgakeꞌ naꞌ bkwaaṉꞌgakeꞌ tozeꞌ.
Jwaꞌgakeꞌ Jesúzaꞌ lao beṉꞌkaꞌ chṉabiaꞌ beṉꞌ Israelkaꞌ
57 Naꞌ beṉꞌkaꞌ bex̱ꞌgakeꞌ Jesúzaꞌ jwaꞌgakeꞌneꞌ lill Caifázaꞌ, beenaꞌ nak bx̱oz choo bx̱oz xen, naꞌ lilleꞌnaꞌ ba ndop nllag beṉꞌkaꞌ chliꞌ chsedi leyaꞌ naꞌ beṉꞌ golkaꞌ chṉabiaꞌ.
58 Naꞌ Pédronaꞌ janoeꞌ Jesúzaꞌ de zitꞌlə, bllintieꞌ leshꞌ chyoo c̱he bx̱oz choo bx̱oz xennaꞌ naꞌ jc̱heꞌleneꞌ beṉꞌkaꞌ chap yoodoꞌnaꞌ kwenc̱he ileꞌileꞌ ka gak c̱he Jesúzaꞌ.
59 Naꞌ bx̱ozkaꞌ chṉabiaꞌ len beṉꞌkaꞌ chṉabiaꞌ beṉꞌ Israelkaꞌ wdiljgakeꞌ beṉꞌ c̱hiljlallee c̱he Jesúzaꞌ kwenc̱he wc̱hoglogakeꞌ gueteꞌ.
60 Naꞌ ḻaꞌkzi beṉꞌ zan beṉꞌkaꞌ biya dii biyiljlallꞌgakeꞌ c̱he Jesúzaꞌ, aga bidiḻi choꞌa dillꞌ c̱heꞌkaꞌ, ax̱t ki bllin c̱hop beṉꞌ
61 beꞌgakeꞌ toz dillꞌ, cheꞌgakeꞌ:
―Ki wna beeni: “Nadꞌ wak yic̱hinjꞌ yoodoꞌ c̱he Chiozaꞌ naꞌ shoṉ llazə yiyontiaꞌn dii yoblə.”
62 Naꞌch wzollaꞌ bx̱oz choo bx̱oz xennaꞌ, golleꞌ Jesúzaꞌ:
―¿Abikz bi iṉoꞌ c̱heyi dga nagakeꞌ c̱hoꞌ?
63 Naꞌ Jesúzaꞌ bikzə wṉieꞌ. Naꞌch cheꞌ bx̱oz choo bx̱oz xennaꞌneꞌ:
―Chios yaa Chios bannaꞌ soeꞌ de tasc̱hiw. Wnashki netoꞌ shi linꞌ Crístonaꞌ, beenaꞌ nak Xiiṉeꞌ.
64 Naꞌ goll Jesúzaꞌneꞌ:
―Awe, kanꞌ nakan. Naꞌ ḻekzkaꞌ niaꞌ leꞌ, wleꞌile nadꞌ, Beṉꞌ Bseḻꞌ Chiozaꞌ Yell-lioni, kwiꞌa shḻaa de shḻi c̱he Chiozaꞌ, beenaꞌ zeelo nap yeḻꞌ wak choo yeḻꞌ wak xennaꞌ, naꞌ ḻekzkaꞌ ileꞌile nadꞌ zizaa ladj bejkaꞌ ze xan yabanaꞌ.
65 Naꞌch bshoꞌ bc̱hezꞌ xa bx̱oz choo bx̱oz xennaꞌ. Naꞌ daa beneꞌ kaꞌ, bliꞌe nan ḻe bllee, naꞌ wne:
―¡Kwinle ba benile naz beeni nakeꞌ Xiiṉ Chiozaꞌ! Bich chyalljicho beṉꞌ gao xya c̱heꞌ.
66 ¿Bi ka iṉale?
Naꞌch gollgakeꞌneꞌ:
―Chiyaḻꞌ gueteꞌ.
―Shi linꞌ Crístonaꞌ, wnashki non wdap wlallꞌ liꞌ.
Pédronaꞌ bi bc̱hebeꞌ shi nombiꞌe Jesúzaꞌ
69 Naꞌ shlak chak kaꞌ, Pédronaꞌ chiꞌe leshꞌ chyoonaꞌ ka bllin to noolə wen mandad kwiteꞌnaꞌ chiꞌeneꞌ:
―Lenonꞌ nakoꞌ txen Jesúzaꞌ, beṉꞌ Galileanaꞌ.
70 Naꞌ lao yogꞌ beṉꞌkaꞌ lleꞌ naꞌ, aga bc̱heb Pédronaꞌ shi nakeꞌ Jesúzaꞌ txen, naꞌ golleꞌ noolaꞌ:
―Bi ṉezidꞌ bin noꞌ.
71 Naꞌ ka ziyajeꞌ choꞌa puertaꞌ bizleꞌi sto beṉꞌ yoblə ḻeꞌ naꞌ chiꞌe beṉꞌkaꞌ lleꞌ naꞌ:
―Len beenin nakeꞌ txen Jesúzaꞌ, beṉꞌ Nazaretaꞌ.
72 Naꞌ ḻekzkaꞌ aga bizc̱heb Pédronaꞌ shi nakeꞌ Jesúzaꞌ txen, bzoatieꞌ Chiozaꞌ de tasc̱hiw, chiꞌeneꞌ:
―Bi nombiꞌa beenaꞌ.
73 Naꞌ gokzə xtit naꞌ jabigꞌ beṉꞌkaꞌ lleꞌ naꞌ kwit Pédronaꞌ naꞌ cheꞌgakeꞌneꞌ:
―Dii ḻikzan lenonꞌ nakoꞌ ḻegakeꞌ txen, ḻaꞌ lii nakbiaꞌte ka chshaljoꞌ.
74 Naꞌch wzolo Pédronaꞌ choneꞌ zṉia, chiꞌe:
―¡Dii baḻkzan niaꞌ bi nombiꞌaneꞌ! ¡Chiozaꞌ wsakꞌziꞌe nadꞌ shi chziyeꞌzanꞌ!