Wdib Jesúzaꞌ ṉiꞌa beṉꞌkaꞌ nakgakeꞌneꞌ txen
13
Ka ba zoa gaḻꞌ lṉi Paskwaꞌ, naꞌ ṉezi Jesúzaꞌ ba zoa gao yizee yell-lioni kwenc̱he yiyajeꞌ kwit X̱eꞌnaꞌ. Naꞌ chakchgaileꞌ beṉꞌkaꞌ nonḻilallꞌgakeꞌneꞌ yell-lioni, naꞌ kaꞌ gokileꞌ ḻegakeꞌ ax̱t ga zeelo.
2 Naꞌ ka chaogakeꞌ xsheꞌnaꞌ, ba wloolə dii x̱iwaa ḻoo yic̱hjlallꞌdoꞌ Jud Scariotaꞌ, xiiṉ Simónnaꞌ, goneꞌ Jesúzaꞌ lo naꞌ beṉꞌ malkaꞌ.
Jesús lava los pies de los discipulos (Juan 13.1-17)
3 Naꞌ ṉezi Jesúzaꞌ X̱eꞌnaꞌ beneꞌ lallꞌ nee yogꞌ dii de, naꞌ ṉezileꞌ wzee ganaꞌ zoa Chiozaꞌ naꞌ kwiteꞌnaꞌkzə yillineꞌ dii yoblə.
4 Naꞌ lo zej chaogakeꞌ xsheꞌnaꞌ, wzollaꞌ Jesúzaꞌ naꞌ bkwaseꞌ xeꞌ dii toṉaꞌ kaꞌlə, naꞌ bc̱heḻeꞌ to lechꞌ lsineenaꞌ.
5 Naꞌch wdee nisaꞌ to ḻoo shaꞌ naꞌ wzoloeꞌ chyibeꞌ ṉiꞌa to to beṉꞌkaꞌ nakgakeꞌneꞌ txen, naꞌ bisbillileꞌn lechaa nc̱hejeꞌ lsineenaꞌ.
6 Naꞌ ka bidoḻꞌ c̱hibeꞌ ṉiꞌa Simón Pédronaꞌ, naꞌch cheꞌ Pédronaꞌneꞌ:
―X̱anꞌ, ¿aliꞌlə c̱hibzoꞌ ṉiꞌani?
7 Naꞌ cheꞌ Jesúzaꞌneꞌ:
―Aga chajniiloꞌ dga chonꞌ ṉaa, per techlə shajniiloꞌn.
8 Naꞌch cheꞌ Pédronaꞌneꞌ:
―Bat wiꞌa latj c̱hiboꞌ ṉiꞌani.
Naꞌch cheꞌ Jesúzaꞌneꞌ:
―Shi bi c̱hibꞌ ṉiꞌonaꞌ, bich gakoꞌ nadꞌ txen.
9 Naꞌch chizeꞌ Pédronaꞌneꞌ:
―Shi kanꞌ nakan, X̱anꞌ, aga toz ṉiꞌani c̱hiboꞌ san ḻen yic̱hji naꞌ naꞌki.
10 Naꞌch cheꞌ Jesúzaꞌneꞌ:
―Beenaꞌ noshꞌ nazjeꞌ, toz ṉiꞌenanꞌ chiyaḻꞌ shech, ḻaꞌ ba nechkz kwerp c̱heꞌnaꞌ. Kaꞌkzan leꞌ, ba nxi nyechle, ḻaꞌkzi aga yogꞌle.
11 Daa ṉezi Jesúzaꞌ non gon ḻeꞌ lo naꞌ beṉꞌ malkaꞌ, daan chiꞌe ḻegakeꞌ: “Aga yogꞌle ba nxi nyech.”
12 Naꞌ ka biyoll wdibeꞌ ṉiꞌekaꞌ, naꞌch biyakweꞌ xeꞌ dii toṉaꞌ naꞌ jachiꞌe choꞌa mesaꞌ sto shii. Naꞌ chiꞌe ḻegakeꞌ:
―¿Aṉezile bi zejin dga ba benꞌ?
13 Leꞌ nale nadꞌ Maestro naꞌ X̱anꞌ, naꞌ lekzile, ḻaꞌ kanꞌ nakan.
14 Naꞌ shi nadꞌ, naktiaꞌ Maestro c̱hele naꞌ X̱anle, ba wdibꞌ ṉiꞌalenaꞌ, ḻekzkaꞌ leꞌ chiyaḻꞌ c̱hib ṉiꞌa ljwell-le.
15 Ba benꞌ dga kwenc̱he bliidꞌ leꞌ kanꞌ chiyaḻꞌ gon c̱he ljwell-le.
16 Dii ḻi niaꞌ leꞌ, aga zakꞌchi to mos ka x̱aneꞌnaꞌ, naꞌ to beṉꞌ zej mandad aga zakꞌcheꞌ ka beenaꞌ bseḻeeneꞌ.
17 Shi chajniile diiki ba wniaꞌ naꞌ gonlen, naꞌ soale mbalaz.
18 ’Naꞌ aga yogꞌlen niaꞌ kaꞌ. Ṉezidꞌ nolen ba wlejꞌ kwenc̱he nonḻilallꞌle nadꞌ. Naꞌ chiyaḻꞌ gak ka na Choꞌa Xtillꞌ Chiozaꞌ, ganaꞌ na: “Beenaꞌ chaolentieꞌ nadꞌ txen ba chiyec̱hjeꞌ nadꞌ goneꞌ mal c̱haꞌ.”
Jesús predice la traición (Juan 13.18-38)
19 Ṉaa niaꞌ leꞌ dga ziꞌ gak, kwenc̱he katꞌ ba chakan shajḻeꞌle nakꞌ beenaꞌ ba wniaꞌ nakꞌ.
20 Naꞌ dii ḻi niaꞌ leꞌ, beenaꞌ wlebeꞌ nottezə beenaꞌ wseḻaa, nadꞌkzan chlebeꞌ. Naꞌ beenaꞌ chlebeꞌ nadꞌ, lenkz beenaꞌ bseḻꞌ nadaan chlebeꞌ.
Wdix̱jee Jesúzaꞌ ka gon Judaꞌ wdieꞌneꞌ lo naꞌ beṉꞌ malkaꞌ
(Mt 26:20-25; Mr. 14:17-21; Lc 22:21-23)
21 Naꞌ biyoll wna Jesúzaꞌ kaꞌ, ḻe gokyeshii ḻoo yic̱hjlallꞌdoꞌenaꞌ, naꞌ biꞌe dillꞌ kwasḻoḻ, chiꞌe:
―Dii ḻi niaꞌ leꞌ, tole gonle nadꞌ lo naꞌ beṉꞌ malkaꞌ.
22 Naꞌch beṉꞌkaꞌ nakgakeꞌneꞌ txen chwia ljwellgakeꞌ chakgakileꞌ nogakenꞌ chiꞌe kaꞌ.
23 Naꞌ to beenaꞌ nak Jesúzaꞌ txen, beenaꞌ chakchgaileꞌ, chiꞌe kwiteꞌnaꞌ.
24 Naꞌ Simón Pédronaꞌ beneꞌ seṉ kwenc̱he iṉabi beenaꞌ chiꞌ kwit Jesúzaꞌ noenꞌ chiꞌe kaꞌ.
25 Naꞌch jabigꞌch beenaꞌ gaoch kwit Jesúzaꞌ naꞌ wṉabileꞌneꞌ, chiꞌeneꞌ:
―¿Noran gon kaꞌ, X̱anꞌ?
26 Naꞌch cheꞌ Jesúzaꞌneꞌ:
―Wḻeejchꞌ latꞌ yetxtili ḻoꞌi dga yoll ḻoo yeeṉi, naꞌ kon beenaꞌ wiꞌan, ḻenꞌ gon kaꞌ.
Naꞌch bḻeejeꞌ latꞌ yetxtilaꞌ naꞌ biꞌen Jud Scariotaꞌ, xiiṉ beenaꞌ le Simón.
27 Naꞌ kon ka biyoll beꞌ Jesúzaꞌ Judaꞌ yetxtilaꞌ, lii wyoote Satanázaꞌ ḻoo yic̱hjlallꞌdoꞌenaꞌ. Naꞌch cheꞌ Jesúzaꞌneꞌ:
―Daa ba ngoo yic̱hjoꞌ gonoꞌ, bentegan.
28 Naꞌ ni to beṉꞌkaꞌ chaolengakeꞌneꞌ bi wyajniꞌgakileꞌ bic̱he gollzeꞌneꞌ kaꞌ.
29 Baḻeꞌ gokgakileꞌ goll Jesúzaꞌ Judaꞌ lljx̱iꞌe bi dii chyalljgakileꞌ c̱he xsheꞌ c̱heꞌkaꞌ, wa wiꞌe latꞌ mech beṉꞌ yeshꞌkaꞌ. Ḻaꞌ ḻenꞌ nak lallꞌ nee xmecheꞌkaꞌ.
30 Naꞌ ka wde wdao Judaꞌ yetxtilaꞌ daa beꞌ Jesúzaꞌneꞌ, lii wzaꞌtieꞌ. Naꞌ ba goḻ ka wzee.
Dii kobaꞌ daa nllia Chiozaꞌ biaꞌ
31 Naꞌ ka wde wzaꞌ Judaꞌ, naꞌch cheꞌ Jesúzaꞌ:
―Ba bllin lla shoꞌa balaaṉ, nadꞌ, Beṉꞌ Bseḻꞌ Chiozaꞌ Yell-lioni, naꞌ ḻekzkaꞌ dga gonꞌ, gonan ka shoꞌ Chiozaꞌ balaaṉ.
32 Naꞌ daa gonꞌ ka shoꞌ Chiozaꞌ balaaṉ, ḻekzkaꞌ kwin Chiozaꞌ goneꞌ kwenc̱he nadꞌ, Beṉꞌ Bseḻꞌ Chiozaꞌ Yell-lioni, shoꞌa balaaṉ, naꞌ lii gontieꞌn.
33 Leꞌ xiiṉdawaa, zi shlollchga zoalenꞌ leꞌ. Naꞌ yiyiljle nadꞌ, naꞌ chizniaꞌ leꞌ ka goshꞌ beṉꞌkaꞌ chṉabiaꞌ beṉꞌ Israelkaꞌ: Ganaꞌ yiyaa, bi gak saꞌle.
34 Naꞌ to dii kob chlliaꞌ biaꞌ gonle ṉaa: Ḻi gaki ljwell-le. Ka chakidꞌ leꞌ, kanꞌ chiyaḻꞌ gaki ljwell-le.
35 Shi gaki ljwell-le, naꞌch iṉezi yogꞌḻoḻte beṉꞌ nakle nadꞌ txen.
Wdix̱jee Jesúzaꞌ bi wc̱heb Pédronaꞌ shi nombiꞌeneꞌ
36 Naꞌch Simón Pédronaꞌ wṉabileꞌ Jesúzaꞌ, chiꞌeneꞌ:
―X̱anꞌ, ¿garan yiyajoꞌ?
Naꞌ cheꞌ Jesúzaꞌneꞌ:
―Aga wak soo ganaꞌ yiyaa ṉaa, per wllin lla soo.
37 Naꞌch cheꞌ Pédronaꞌneꞌ:
―X̱anꞌ, ¿berac̱he bi gak saꞌlenꞌ liꞌ ṉaa? Ba nc̱hoglallaa guetꞌ ni c̱hoꞌ.
38 Naꞌ Jesúzaꞌ chiꞌeneꞌ:
―¿Achakiloꞌ ba nc̱hoglalloo guetoꞌ ni c̱haꞌ? Dii ḻi niaꞌ liꞌ, shoṉ shii bi wc̱heboꞌ shi nombiꞌo nadꞌ ka ziꞌ kwell-lə shikwtezaꞌ.