Wloogakeꞌ xṉezin gox̱ꞌgakeꞌ Jesúzaꞌ
14
Chyallj zi c̱hop llazə gaḻꞌ lṉi Paskwaꞌ, kanaꞌ chaogakeꞌ yetxtilaꞌ bi yoo levadúranaꞌ, naꞌ bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ biyiljlallꞌgakeꞌ naklə siyeꞌgakeꞌ Jesúzaꞌ kwenc̱he gox̱ꞌgakeꞌneꞌ naꞌ witgakeꞌneꞌ.
San Marcos 14:1-21
―Bi gox̱ꞌchoneꞌ lo lṉinaꞌ kwenc̱he bi wsees wc̱heeṉcho beṉꞌ yell.
Bwazj to noolə set zix̱aꞌ yic̱hj Jesúzaꞌ
3 Ka zoa Jesúzaꞌ Betánianaꞌ, wyajeꞌ lill beenaꞌ le Simón, beenaꞌ gok yillweꞌ daa le lepra. Naꞌ shlak chiꞌe choꞌa mesaꞌ, bllin to noolə nox̱ee to lmet de yaj xochi yoollan set zix̱ de nardo naꞌ dii xen zakaan. Naꞌ wdishjeꞌ yen lmetaꞌ naꞌ bwazjeꞌ set zix̱aꞌ yic̱hj Jesúzaꞌ.
4 Naꞌ baḻ beṉꞌkaꞌ lleꞌ naꞌ bllaagakeꞌ, naꞌ cheꞌ ljwellgakeꞌ:
―¿Berac̱he benditjz nooli set zix̱aꞌ?
5 Sheḻꞌ betꞌchokleꞌn naꞌ biꞌe mechaꞌ beṉꞌ yeshꞌkaꞌ, ḻaꞌ zakaan c̱he shoṉ guiyoa lla c̱he laxj beṉꞌ.
Naꞌ bsheshlengakeꞌ noolaꞌ daa beneꞌ kaꞌ.
6 Naꞌ cheꞌ Jesúzaꞌ:
―Bibi yeꞌleneꞌ. ¿Berac̱he chsheshlenzleneꞌ? Daa ba beneꞌ c̱haꞌ nakan dii wen.
7 Ka nak beṉꞌ yeshꞌkaꞌ, toshiizi soagakeꞌ ladjlenaꞌ, naꞌ wak gaklenle ḻegakeꞌ katꞌkaꞌ cheenileꞌ; san nadꞌ, aga toshiizin soalenꞌ leꞌ.
8 Ka nak nooli ba beneꞌ daa zeelo gok beneꞌ. Ba bwazjeꞌ nadꞌ set zix̱aꞌ kwenc̱he gakshaoꞌzega kwerp c̱haꞌni katꞌ wkwashꞌgakeꞌ nadꞌ.
9 Dii ḻi niaꞌ leꞌ, gattezə weꞌgakeꞌ dillꞌ wen dillꞌ kob c̱he Chiozaꞌ lo yell-lioni, ḻekzkaꞌ weꞌgakeꞌ dillꞌ ka nak dii wennaꞌ daa ba ben nooli naꞌ lljadingakileꞌneꞌ.
Judaꞌ chc̱hebeꞌ goneꞌ Jesúzaꞌ lo naꞌ beṉꞌ malkaꞌ
10 Naꞌ Jud Scariotaꞌ, beenaꞌ nakeꞌ txen beṉꞌkaꞌ shlliṉ, wyajeꞌ lao bx̱ozkaꞌ chṉabiaꞌ kwenc̱he goneꞌ Jesúzaꞌ lo naꞌgakeꞌ.
11 Naꞌ ka golleꞌ kaꞌ, bibagakileꞌ naꞌ bc̱hebgakeꞌ weꞌgakeꞌneꞌ mech. Naꞌ wzolo Judaꞌ chinoeꞌ nakan goneꞌ kwenc̱he goneꞌ Jesúzaꞌ lo naꞌgakeꞌ.
Lleꞌnaꞌ zeelo wdaolengakeꞌ Jesúzaꞌ
12 Naꞌ lla nech c̱he lṉinaꞌ katꞌ chaogakeꞌ yetxtilaꞌ daa bi nc̱hix̱ə levadúranaꞌ, llanaꞌ chitgakeꞌ xilꞌdoꞌnaꞌ chaogakeꞌ lṉi Paskwaꞌ, beṉꞌkaꞌ nak Jesúzaꞌ txen wṉabgakileꞌneꞌ:
―¿Ga cheeniloꞌ lljasiniꞌantoꞌ xsheꞌ c̱he lṉi Paskwi?
13 Naꞌ bseḻee c̱hopgakeꞌ, chiꞌe ḻegakeꞌ:
―Ḻi shaj yell Jerusalénnaꞌ naꞌ yillagle to beṉꞌ byo zinoꞌe to chee nis, naꞌ lljanóleneꞌ.
14 Naꞌ ganaꞌ yiyoꞌe, ḻi yee x̱an yoonaꞌ: “Maestronaꞌ neꞌ: ¿Garan zoa yoonaꞌ ganaꞌ gaoleneꞌ beṉꞌkaꞌ nakgakeꞌneꞌ txen lleꞌ lṉi Paskwi?”
15 Naꞌ wliileꞌ leꞌ to yoo xen dii llia shkwia chaꞌlə ga ba nonshaoꞌtieꞌ. Naꞌ nanꞌ wsiniꞌale daa gaocho xsheꞌnaꞌ.
16 Naꞌ wzaꞌ beṉꞌkaꞌ bseḻee, wyajgakeꞌ yellaꞌ. Naꞌ gok kon kayeṉꞌ golleꞌ ḻegakeꞌ. Naꞌ bsiniꞌagakeꞌ daa gaogakeꞌ lleꞌ lṉi Paskwaꞌ.
17 Naꞌ ka goḻ billinlen Jesúzaꞌ beṉꞌkaꞌ shlliṉ yoonaꞌ.
18 Naꞌ shlak chiꞌgakeꞌ choꞌa mesaꞌ chaogakeꞌ, goll Jesúzaꞌ ḻegakeꞌ:
―Dii ḻi niaꞌ leꞌ, tole chiꞌle ni chaolenle nadꞌ gonle nadꞌ lo naꞌ beṉꞌkaꞌ chakziꞌ chakzbani nadꞌ.
19 Naꞌ gokyeshꞌgakileꞌ, naꞌ wzolo to togakeꞌ chṉabgakileꞌneꞌ:
―¿Anadaan gonꞌ kaꞌ, lla?
20 Naꞌ cheꞌ Jesúzaꞌ ḻegakeꞌ:
―Ladjleni, ka leꞌ nakle shlliṉ chḻeejlenle nadꞌ yetxtilaꞌ ḻoo yeeṉi, len beenaꞌ gon kaꞌ.
21 Ka nak nadꞌ, Beṉꞌ Bseḻꞌ Chiozaꞌ Yell-lioni, wit beṉꞌ nadꞌ ka na Choꞌa Xtillꞌ Chiozaꞌ. Per nyeshꞌlaz gak c̱he beenaꞌ goneꞌ nadꞌ lo naꞌ beṉꞌkaꞌ. Naklan wen sheḻꞌkaꞌ bi goljeꞌ.
22 Naꞌ shlak chaogakeꞌ, bex̱ꞌ Jesúzaꞌ yetxtilaꞌ naꞌ biꞌe Chiozaꞌ yeḻꞌ chox̱ken, naꞌ bxoxjeꞌn naꞌ biꞌen ḻegakeꞌ, chiꞌe:
―Ḻi gao dga. Ḻennanꞌ kwerp c̱haꞌni.
San Marcos 14:22-45
23 Naꞌ bex̱ee kopaꞌ, naꞌ biꞌe Chiozaꞌ yeḻꞌ chox̱ken naꞌ bdieꞌn laweꞌkaꞌ naꞌ yogꞌḻoḻgakeꞌ weejgakeꞌ daa yollan.
24 Naꞌ chiꞌe ḻegakeꞌ:
―Ḻennanꞌ xc̱henꞌnaꞌ daa gon ka gak ḻi dii kobaꞌ bc̱heb Chiozaꞌ goneꞌ. Naꞌ ḻaljan kwenc̱he gaklenan beṉꞌ zan.
25 Dii ḻi niaꞌ leꞌ, bichga yeejꞌ x̱is uvanaꞌ ax̱t ki illin lla yeejaꞌn ganaꞌ chṉabiaꞌ Chiozaꞌ.
Jesúzaꞌ golleꞌ bi wc̱heb Pédronaꞌ shi nombiꞌeneꞌ
26 Naꞌ ka biyoll beḻgakeꞌ beꞌlaꞌogakeꞌ Chiozaꞌ, naꞌch wyajgakeꞌ lo Yaa Olívozaꞌ.
27 Naꞌ cheꞌ Jesúzaꞌ ḻegakeꞌ:
―Yogꞌle leꞌ kwej yic̱hjle nadꞌ. Ḻaꞌ Choꞌa Xtillꞌ Chiozaꞌ nan: “Witꞌ beenaꞌ chap xilꞌkaꞌ, naꞌ guesles xilꞌkaꞌ chapeꞌ.”
28 Per katꞌ ba bibanꞌ ladj beṉꞌ wetkaꞌ, naꞌ yiyaa Galileanaꞌ lljalezꞌ leꞌ.
29 Naꞌ cheꞌ Pédronaꞌneꞌ:
―Ḻaꞌkzi yogꞌ beṉꞌki c̱hooṉlallꞌgakeꞌ liꞌ, nadꞌ bi gonꞌ kaꞌ.
30 Naꞌ cheꞌ Jesúzaꞌneꞌ:
―Dii ḻi niaꞌ liꞌ, ṉaanyel ka ziꞌ kwell tezaꞌ de wchop shii, shoṉ shii wiꞌo dillꞌ nan bi nombiꞌo nadꞌ.
31 Naꞌ zeyid Pédronaꞌ chiꞌeneꞌ:
―Ḻaꞌ guetlentiaꞌ liꞌ, biga iṉiaꞌ bi nombiꞌa liꞌ.
Naꞌ yogꞌzgakeꞌ cheꞌgakeꞌneꞌ kaꞌ.
Beꞌḻwill Jesúzaꞌ Chiozaꞌ ganaꞌ le Getsemaní
32 Naꞌ wyajgakeꞌ to latj ganaꞌ le Getsemaní, naꞌ cheꞌ Jesúzaꞌ beṉꞌkaꞌ nakgakeꞌneꞌ txen:
―Nizə ḻi kweꞌ shlak lljeꞌḻwillꞌ Chiozaꞌ.
33 Naꞌ bc̱hiꞌe Pédronaꞌ, Jacóbonaꞌ, naꞌch Juannaꞌ, naꞌ wzoloeꞌ chakyeshileꞌ naꞌch chakchgaileꞌ dii wal inlleb.
34 Naꞌ chiꞌe ḻegakeꞌ:
―Ax̱t chaklikazidꞌ lii guettiaꞌ daa ḻe chakyeshii yic̱hjlallꞌdawaani. Ḻi igaaṉ nizə naꞌ bi guesle.
35 Naꞌ wzee zi latꞌ kwiteꞌkaꞌ, naꞌ bc̱hekꞌ xibeꞌnaꞌ lo yonaꞌ naꞌ beꞌḻwilleꞌ Chiozaꞌ chiꞌeneꞌ shi wak ten kaꞌzə daa wtiḻeꞌ.
36 Naꞌ chiꞌe:
―X̱adawaa, aga bi dii lallj c̱hoꞌ liꞌ de. Bislagach nadꞌ lawi dga ba zoa idiḻ illagꞌ. Per aga gak ka cheenidꞌ, san gak ka cheeniloꞌ liꞌ.
37 Naꞌ biyajeꞌ ganaꞌ lleꞌgakeꞌ naꞌ bleꞌileꞌ ba chesgakeꞌ. Naꞌ chiꞌe Pédronaꞌ:
―Simón, ¿Aba chesonꞌ? ¿Abikzə bchejlatꞌgailoꞌ ḻaꞌc̱hꞌ tgor bi guesoꞌ?
38 Bi guesle, ḻi weꞌḻwill Chiozaꞌ kwenc̱he bi weꞌzle latj gon beli chennaꞌ leꞌ gan. Aga ki cheeni yic̱hjlallꞌdoꞌchonaꞌ gonchon per beli chennaꞌ bi chizoin.
39 Naꞌ wyajeꞌ sto shii jeḻwilleꞌ Chiozaꞌ, naꞌ toz ka golleꞌneꞌ.
40 Naꞌ ka billineꞌ ganaꞌ lleꞌgakeꞌ, naꞌ bizleꞌileꞌ chizesgakeꞌ, ḻaꞌ jalaweꞌkaꞌ bi chizoyin bishgalaꞌ. Naꞌ bibi billelgakileꞌ yeꞌgakeꞌneꞌ.
41 Naꞌ ka billineꞌ de wyoṉ shii, chiꞌe ḻegakeꞌ:
―¿Ani cheskzle? Ba gok. Ba bllin gor nadꞌ, Beṉꞌ Bseḻꞌ Chiozaꞌ Yell-lioni, gakꞌ lo naꞌ beṉꞌ saaxyakaꞌ.
42 Ḻi c̱has. Ḻi shoꞌ. Ba zaꞌ beenaꞌ goneꞌ nadꞌ lo naꞌgakeꞌ.
Bex̱ꞌgakeꞌ Jesúzaꞌ
43 Ni choeꞌte Jesúzaꞌ dillꞌ ka bllin Judaꞌ, beenaꞌ wlen beṉꞌkaꞌ shlliṉ, leneꞌ beṉꞌ zan beṉꞌkaꞌ bseḻꞌ bx̱ozkaꞌ chṉabiaꞌ len beṉꞌkaꞌ chliꞌ chsedi leyaꞌ naꞌch beṉꞌ golkaꞌ chṉabiaꞌ, nox̱ꞌgakeꞌ spad, naꞌ no yag.
44 Naꞌ Judaꞌ, beenaꞌ beneꞌneꞌ lo naꞌ beṉꞌkaꞌ, ba beꞌleꞌ dillꞌ, chiꞌe:
―Beenaꞌ wnopꞌ, ḻenꞌ gox̱ꞌle, naꞌ wc̱heꞌleneꞌ.
45 Naꞌ ka bllingakeꞌ, jabiguee lao Jesúzaꞌ naꞌ chiꞌeneꞌ:
―¡Maestro!
San Marcos 14:46-72
47 Naꞌ to beenaꞌ len naꞌ wlejeꞌ spad c̱heꞌnaꞌ bc̱hogueꞌ shḻaa nag xmos bx̱oz choo bx̱oz xennaꞌ.
48 Naꞌ cheꞌ Jesúzaꞌ ḻegakeꞌ:
―¿Berac̱he zaꞌzle nox̱ꞌle no spad no yag kwenc̱he gox̱ꞌle nadꞌ ka to no beṉꞌ wban?
49 Yogꞌ lla wzoaꞌ ladjlenaꞌ bliꞌ bsedidꞌ ḻoo yoodoꞌnaꞌ, naꞌ biga bex̱ꞌle nadꞌ. Per chonan byen gak ka na Choꞌa Xtillꞌ Chiozaꞌ.
50 Naꞌ yogꞌḻoḻ beṉꞌkaꞌ ben Jesúzaꞌ txen wchooṉlallꞌgakeꞌneꞌ naꞌ bxoṉjgakeꞌ.
Biꞌ xkwidaa bixoṉj
51 Naꞌ to biꞌ xkwidꞌ nobꞌ ḻeꞌ ndobbꞌ to lechꞌ. Naꞌ ka bex̱ꞌgakeꞌbꞌ
52 bsamꞌ lechaa ndobbꞌ naꞌ bxoṉjbꞌ gaḻꞌyidzbꞌ.
Bdegakeꞌ Jesúzaꞌ lao beṉꞌkaꞌ chṉabiaꞌ beṉꞌ Israelkaꞌ
53 Naꞌ jwaꞌgakeꞌ Jesúzaꞌ lao bx̱oz choo bx̱oz xennaꞌ, naꞌ bdiꞌa yogꞌḻoḻ bx̱ozkaꞌ chṉabiaꞌ naꞌ beṉꞌ golkaꞌ chṉabiaꞌ naꞌch beṉꞌkaꞌ chliꞌ chsedi leyaꞌ.
54 Naꞌ zitꞌ zitꞌlə jano Pédronaꞌneꞌ bllintieꞌ leshꞌ lill bx̱oz choo bx̱oz xennaꞌ. Naꞌ wcheꞌleneꞌ beṉꞌkaꞌ chap yoodoꞌnaꞌ chbillgakeꞌ choꞌa yiꞌnaꞌ.
55 Naꞌ bx̱ozkaꞌ chṉabiaꞌ naꞌ yogꞌḻoḻ beṉꞌkaꞌ chṉabiaꞌ beṉꞌ Israelkaꞌ lleꞌ naꞌ chiyiljyollgakeꞌ ga siꞌ sengakeꞌ kwenc̱he wc̱hoglogakeꞌ c̱he Jesúzaꞌ gueteꞌ, per bi bllel dii gao xya c̱heꞌ.
56 Ḻaꞌkzi beṉꞌ zan chiya de wxiyeꞌ cheꞌgakeꞌ c̱heꞌ, bi bidiḻi choꞌa dillaa choeꞌgakeꞌ.
57 Baḻgakeꞌ wzollaꞌgakeꞌ chziyeꞌgakeꞌ naꞌ chaogakeꞌ xya c̱heꞌ, cheꞌgakeꞌ:
58 ―Netoꞌ ba benintoꞌ neꞌ: “Nadꞌ wc̱hiṉj yoodoꞌni dga ben beṉꞌ yell-lioki. Naꞌ ka gak shoṉ lla yiḻisꞌ ston naꞌ aga beṉꞌ yell-lionichan goneꞌn.”
59 Naꞌ ḻaꞌkzi wxiyeꞌgakeꞌ, bi bidiḻi choꞌa xtilleekaꞌ.
60 Naꞌ bx̱oz choo bx̱oz xennaꞌ wzollee ladj beṉꞌkaꞌ naꞌ chiꞌe Jesúzaꞌ:
―¿Abikz bi iṉoꞌ c̱heyi dga na beṉꞌki c̱hoꞌ?
61 Naꞌ Jesúzaꞌ wzieꞌ lliz bibi gollkzeꞌ. Naꞌ bx̱oz choo bx̱oz xennaꞌ chiziꞌeneꞌ:
―¿Alinꞌ Crístonaꞌ, Xiiṉ Chiozaꞌ?
62 Naꞌ cheꞌ Jesúzaꞌneꞌ:
―Awe, nadaan. Naꞌ ileꞌile nadꞌ, Beṉꞌ Bseḻꞌ Chiozaꞌ Yell-lioni, chiꞌa de shḻi c̱he Chiozaꞌ, beṉꞌ yeḻꞌ wak choo beṉꞌ yeḻꞌ wak xennaꞌ, naꞌ ḻekzkaꞌ ileꞌileꞌ zizaa ladj bejkaꞌ ze xan yabanaꞌ.
63 Naꞌ bx̱oz choo bx̱oz xennaꞌ bshoꞌ bc̱hezꞌ xeꞌnaꞌ kwenc̱he chliꞌn nan ḻe chllee. Naꞌ chiꞌe:
―Bich chyalljicho beṉꞌ gaweꞌ xya c̱he beeni.
64 Kwinle ba benile ka chṉieꞌ c̱he Chiozaꞌ. ¿Nakra gonchon?
Naꞌ yogꞌḻoḻgakeꞌ bc̱hoglogakeꞌ c̱heꞌ nan chiyaḻꞌ gueteꞌ.
65 Naꞌ baḻgakeꞌ wzologakeꞌ chllaꞌgakeꞌneꞌ x̱eneekaꞌ. Naꞌ bsejgakeꞌ jalaweꞌnaꞌ naꞌch chgapꞌ chballꞌgakeꞌneꞌ, naꞌ cheꞌgakeꞌneꞌ:
―Wnashki, non bet liꞌ.
Naꞌ beṉꞌkaꞌ chap yoodoꞌnaꞌ wdapꞌgakeꞌ x̱agueꞌnaꞌ.
Bi bc̱heb Pédronaꞌ shi nombiꞌe Jesúzaꞌ
66 Naꞌ Pédronaꞌ zieꞌ leshꞌ chyoonaꞌ de lliꞌlə ka bllin to noolə, beṉꞌ nak xmos bx̱oz choo bx̱oz xennaꞌ.
67 Naꞌ ka bleꞌileꞌ Pédronaꞌ chbilleꞌ choꞌa yiꞌnaꞌ, naꞌ wzieꞌ chwieꞌneꞌ chiꞌe:
―Lenonꞌ nakoꞌ txen Jesús, beṉꞌ Nazaretaꞌ.
68 Naꞌ bi bc̱heb Pédronaꞌ, san chiꞌe:
―Bi nombiꞌa beenaꞌ, ni bi ṉezidꞌ bi dillaan choo.
Naꞌ bichejeꞌ naꞌ jazieꞌ choꞌa leejaꞌ. Naꞌ wchell to tez.
69 Naꞌ bleꞌi noolaꞌneꞌ sto shii, naꞌ golleꞌ beṉꞌkaꞌ sto:
―Beenin leneꞌ beṉꞌkaꞌ nak Jesúzaꞌ txen.
70 Naꞌ sto shii bi bc̱hebeꞌ nakeꞌneꞌ txen. Naꞌ ka gok zi shloll, beṉꞌkaꞌ lleꞌ naꞌ gollgakeꞌneꞌ sto shii:
―Dii ḻi lenonꞌ nakoꞌneꞌ txen, ḻaꞌ nakbiaꞌ nakoꞌ beṉꞌ Galilea.
71 Naꞌ Pédronaꞌ wzoloeꞌ choneꞌ zṉia, chiꞌe:
―Chiozaꞌ goneꞌ yeḻꞌ ziꞌ c̱haꞌ shi chziyeꞌzan niaꞌ bi nombiꞌaneꞌ.
72 Naꞌ katenaꞌ lii wchellte tezaꞌ de wchop shii. Naꞌ jadini Pédronaꞌ daa goll Jesúzaꞌneꞌ: “Ka ziꞌ kwell tezaꞌ de wchop shii, naꞌ gak shoṉ shii bi wc̱heboꞌ shi nombiꞌo nadꞌ.” Naꞌ wzoloeꞌ chbelleꞌ.