Bdegakeꞌ Jesúzaꞌ lao Pilátonaꞌ
15
Naꞌ ka wyeeniꞌ bidiꞌa bx̱ozkaꞌ chṉabiaꞌ len beṉꞌ golkaꞌ chṉabiaꞌ, naꞌ beṉꞌkaꞌ chliꞌ chsedi leyaꞌ naꞌch yogꞌḻoḻ beṉꞌkaꞌ chṉabiaꞌgakeꞌ yell Israelaꞌ. Naꞌ bc̱hejgakeꞌ Jesúzaꞌ jwaꞌgakeꞌneꞌ lao Pilátonaꞌ.
San Marcos 15:1-24
―¿Alinꞌ nakoꞌ beṉꞌ wṉabiaꞌ c̱he beṉꞌ Israelkaꞌ?
Naꞌ cheꞌ Jesúzaꞌneꞌ:
―Kanꞌ ba wnoꞌ.
―¿Abibi iṉakzoꞌ? Bwialatꞌ, dii zan dii chaogakeꞌ xya c̱hoꞌ.
5 Naꞌ bibi goll Jesúzaꞌneꞌ. Naꞌ bibani Pilátonaꞌ daa bibi golleꞌneꞌ.
Bc̱hoglogakeꞌ guet Jesúzaꞌ
6 Naꞌ katꞌ chaḻꞌ lṉinaꞌ, Pilátonaꞌ chisaneꞌ to beṉꞌkaꞌ nsejeꞌ lillyanaꞌ, beenaꞌ iṉab beṉꞌ yellkaꞌ wsaneꞌ.
7 To beṉꞌ le Barrabás dieꞌ lillyanaꞌ len beṉꞌkaꞌ benleneꞌ xyanaꞌ daa bx̱egakeꞌ wdiḻaꞌ.
8 Naꞌ bdiꞌa bllag beṉꞌ yellkaꞌ, naꞌ cheꞌgakeꞌ Pilátonaꞌ goneꞌ ka chonkzeꞌ yogꞌ yiz.
9 Naꞌ cheꞌ Pilátonaꞌ ḻegakeꞌ:
― ¿Acheenile yisanꞌ beṉꞌ wṉabiaꞌ c̱heleni, leꞌ nakle beṉꞌ Israel?
10 Ḻaꞌ chakbeꞌileꞌ nan bx̱ozkaꞌ chṉabiaꞌ daa chakxeꞌzgakileꞌnenꞌ jwaꞌgakeꞌneꞌ laweꞌnaꞌ.
11 Naꞌ bx̱ozkaꞌ chṉabiaꞌ bta bṉegakeꞌ beṉꞌkaꞌ lleꞌ naꞌ kwenc̱he iṉabgakeꞌ yisaneꞌ Barrabázaꞌ.
12 Naꞌ cheꞌ Pilátonaꞌ ḻegakeꞌ:
―Naꞌ bera cheenileꞌ gonidꞌ beenaꞌ nale nakeꞌ beṉꞌ wṉabiaꞌ c̱hele, leꞌ beṉꞌ Israel.
13 Naꞌ besyaagakeꞌ cheꞌgakeꞌ:
―¡Bdee ḻee yag cruzaꞌ!
14 Naꞌ cheꞌ Pilátonaꞌ ḻegakeꞌ:
―¿Bera dii malanꞌ beneꞌ?
Naꞌ zizikli besyaagakeꞌ cheꞌgakeꞌ:
―¡Bdee ḻee yag cruzaꞌ!
15 Naꞌ daa goklallꞌ Pilátonaꞌ yigaaṉeꞌ wen lao beṉꞌkaꞌ lleꞌ naꞌ, bisaneꞌ Barrabázaꞌ. Naꞌ beneꞌ mandad wit c̱hingakeꞌ Jesúzaꞌ, naꞌtech beneꞌneꞌ lo naꞌ beṉꞌkaꞌ wdaꞌgakeꞌneꞌ ḻee yag cruzaꞌ.
16 Naꞌ bc̱heꞌ soldadkaꞌ Jesúzaꞌ leshꞌ chyoonaꞌ ganaꞌ chon Pilátonaꞌ yeḻꞌ josc̱hisaꞌ, naꞌ bitiꞌa bishaggakeꞌ yogꞌ soldadkaꞌ lleꞌ naꞌ.
17 Naꞌ bwakwgakeꞌneꞌ to lechꞌ xṉa, naꞌ bengakeꞌ to bxooṉ de xis yeshꞌ naꞌ bllingakeꞌn yic̱hjeꞌnaꞌ ka to corona.
18 Naꞌ wzologakeꞌ chosyaagakeꞌ nagakeꞌ:
―¡Soashga beṉꞌ wṉabiaꞌ c̱he beṉꞌ Israelkaꞌ mbalaz!
19 Naꞌ wdingakeꞌ xisaꞌ yic̱hjeꞌnaꞌ, naꞌ bllaa x̱eneekaꞌ ḻeꞌ, naꞌ bc̱hekꞌ xibeꞌkaꞌ laweꞌnaꞌ bengakeꞌ ka beṉꞌ chgwee balaaṉ.
20 Ka biyoll btitjgakileꞌneꞌ, bikwasgakeꞌ lechꞌ xṉanaꞌ daa bx̱oagakeꞌ kolleenaꞌ naꞌ biwakwgakeꞌneꞌ xeꞌnaꞌkzə. Naꞌ wlejgakeꞌneꞌ kwenc̱he lljadaꞌgakeꞌneꞌ ḻee yag cruzaꞌ.
Bdaꞌgakeꞌ Jesúzaꞌ ḻee yag cruzaꞌ
21 To beṉꞌ yell Cirene lieꞌ Simón, x̱a Alejándronaꞌ naꞌ Rúfonaꞌ, zizee lyix̱aa. Naꞌ ka billagueꞌ ḻegakeꞌ, bengakeꞌ byen biꞌe yag cruz c̱he Jesúzaꞌ.
22 Naꞌ bc̱heꞌgakeꞌ Jesúzaꞌ latjaꞌ le Gólgota, naꞌ zejin: Latj c̱he llit yic̱hj beṉꞌ wet.
23 Naꞌ bshabgakileꞌneꞌ vino daa nc̱hix̱ə mírranaꞌ, per bi weejeꞌn.
24 Naꞌ bdaꞌgakeꞌneꞌ ḻee yag cruzaꞌ. Naꞌ soldadkaꞌ bengakeꞌ to wyitj kwenc̱he yiḻaagakeꞌ xeꞌnaꞌ naꞌ ikaagakeꞌ daa yidoḻꞌ to togakeꞌ.
25 Naꞌ chida ga kanaꞌ bdaꞌgakeꞌneꞌ ḻee yag cruzaꞌ.
San Marcos 15:25-47
26 Naꞌ yic̱hj yag cruz c̱heꞌnaꞌ bdaꞌgakeꞌ to dii choꞌen dillꞌ bic̱he ndaꞌgakeꞌneꞌ ḻee yag cruzaꞌ, nan: “Beenin beṉꞌ wṉabiaꞌ c̱he beṉꞌ Israelkaꞌ.”
27 Naꞌ bdaꞌlengakeꞌneꞌ c̱hop beṉꞌ wban, toeꞌ wdaꞌ kwiteꞌ de shḻinaꞌ, naꞌ stoeꞌ kwiteꞌ de robesaꞌ.
28 Naꞌ billinin ka na Choꞌa Xtillꞌ Chiozaꞌ daa nan: “Bleꞌgakileneꞌ ka to beṉꞌ mal.”
29 Naꞌ beṉꞌkaꞌ chde naꞌ, chṉeḻegakileꞌneꞌ, naꞌ chta yic̱hjeꞌkaꞌ cheꞌgakeꞌ:
―¡Linꞌ wnazoꞌ yic̱hiṉjoꞌ yoodoꞌnaꞌ naꞌ lo shoṉ llazə yiyonoꞌn,
30 bislashki kwinoꞌ naꞌ biyetj ḻee yag cruzaꞌ!
31 Naꞌ ḻekzkaꞌ chon bx̱ozkaꞌ chṉabiaꞌ len beṉꞌkaꞌ chliꞌ chsedi leyaꞌ, chṉeḻegakileꞌneꞌ, cheꞌgakeꞌ:
―Beṉꞌ yoblə gok bisleꞌ, naꞌ bi chak yisla kwineꞌ.
32 Shi leileꞌ ḻenꞌ Crístonaꞌ, beṉꞌ wṉabiaꞌ c̱hechonaꞌ, choꞌ beṉꞌ Israel, yiyetjshkileꞌ ḻee yag cruzaꞌ ṉaa kwenc̱he ileꞌteicho naꞌ shajḻeꞌcho c̱heꞌ.
Naꞌ ax̱t len beṉꞌkaꞌ daꞌleneꞌ ḻee yag cruzaꞌ chṉeḻegakileꞌneꞌ.
Ka wit Jesúzaꞌ
33 Ka bllin gobill, doxen yell-lionaꞌ bic̱hoḻ, bllinte chida shoṉ.
34 Naꞌ chida shoṉ besyaa Jesúzaꞌ zillj, chiꞌe:
―Eloí, Eloí, ¿lama sabactani?a ―naꞌ zejin: Chios c̱haꞌ, Chios c̱haꞌ, ¿bic̱he ba wlej yic̱hjzoꞌ nadꞌ?
35 Naꞌ baḻ beṉꞌkaꞌ lleꞌ naꞌ bengakileꞌ daa wneꞌ naꞌ cheꞌgakeꞌ:
―Ḻi wzenag, ba chaxeꞌ Elíazaꞌ.
36 Naꞌ zejdo toeꞌ naꞌ bḻeejeꞌ to dii chziꞌ nisaꞌ ganaꞌ yollə vino daa zic̱hj zḻaꞌ naꞌ bzoeꞌn to lo xis kwenc̱he bzoeꞌn choꞌenaꞌ x̱opeꞌn, naꞌ chiꞌe:
―Jwayishkileꞌnaꞌ, wwiashkicho shi wid Elíazaꞌ yiḻetjeꞌneꞌ.
37 Naꞌ besyaadia Jesúzaꞌ, naꞌch witeꞌ.
38 Naꞌ ka witeꞌ, lechaa ze ḻoo yoodoꞌnaꞌ bchezaꞌn gokan c̱hoplə.
39 Naꞌ beenaꞌ chṉabiaꞌ soldadkaꞌ zieꞌ lao Jesúzaꞌ, ka benileꞌ besyee naꞌ bleꞌileꞌ ka gok witeꞌ, naꞌ chiꞌe:
―Dii ḻi beenin Xiiṉ Chiozaꞌ.
40 Ḻekzkaꞌ zi baḻ noolkaꞌ lleꞌgakeꞌ de zitꞌlə chwiagakeꞌ. Naꞌ ladjeꞌkaꞌ len María beṉꞌ Magdálanaꞌ, naꞌ Saloménaꞌ, naꞌch María, beenaꞌ nak x̱naꞌ Josénaꞌ len Jacóbonaꞌ, beṉꞌ neshaa.
41 Noolkin wnogakeꞌ Jesúzaꞌ naꞌ goklengakeꞌneꞌ kanaꞌ zoeꞌ ganaꞌ mbani Galileanaꞌ. Naꞌ ḻekzkaꞌ len zanch noolkaꞌ beṉꞌkaꞌ wyajlengakeꞌneꞌ Jerusalénnaꞌ.
Bkwashꞌgakeꞌ Jesúzaꞌ
42 Naꞌ llanaꞌ gok kaꞌ nakan llanaꞌ chsiniꞌa beṉꞌ Israelkaꞌ c̱he llanaꞌ chombaaṉgakeꞌ. Naꞌ ka goḻ,
43 bllin José beṉꞌ Arimatéanaꞌ, beenaꞌ nak txen beṉꞌkaꞌ chṉabiaꞌ beṉꞌ Israelkaꞌ, naꞌ leneꞌ noneꞌ lez beenaꞌ wseḻꞌ Chiozaꞌ iṉabiꞌe. Naꞌ biyaxjileꞌ wyajeꞌ lao Pilátonaꞌ jaṉabeꞌ lsens yiḻetjeꞌ kwerp c̱he Jesúzaꞌ.
44 Naꞌ bibani Pilátonaꞌ daa ba witeꞌ. Naꞌ goxeꞌ beenaꞌ chṉabiaꞌ soldadkaꞌ kwenc̱he iṉabileneꞌ shi dii ḻikzan ba witenꞌ.
45 Naꞌ ka cheꞌ beenaꞌ chṉabiaꞌ soldadkaꞌ ba witeꞌ naꞌ wxenlallee, naꞌ biꞌe lsens biḻetj Josénaꞌ kwerp c̱heꞌnaꞌ.
46 Naꞌ wxiꞌ Josénaꞌ to lechꞌ de lino naꞌ biḻetjeꞌ kwerp c̱he Jesúzaꞌ naꞌ bitobeꞌneꞌ lechaa. Naꞌ jḻoꞌeneꞌ to ḻoo blej, naꞌ bisejileꞌn to yaj xen.
47 Naꞌ María beṉꞌ yell Magdálanaꞌ, naꞌ María, xṉaꞌ Josénaꞌ, chwiayeṉꞌgakeꞌ ganaꞌ jḻoꞌeneꞌ.