19
Naꞌ kaꞌ gok ben Pilátonaꞌ mandad bet wdingakeꞌ Jesúzaꞌ.
2 Naꞌ soldadkaꞌ bengakeꞌ to bxooṉ de xis yeshꞌ naꞌ bllingakeꞌn yic̱hjeꞌnaꞌ ka corona naꞌ bwakwgakeꞌneꞌ to lechꞌ de morad.
Jesús condenado a muerte (Juan 19.1-16)
―¡Toshiizi sechgayi c̱he beeni chṉabiaꞌ beṉꞌ Israelkaꞌ!
Naꞌ wdapgakeꞌ x̱agueenaꞌ.
4 Naꞌch bizchej Pilátonaꞌ, chiꞌe beṉꞌ Israelkaꞌ:
―Ḻi wwia, ni kwejee kwenc̱he iṉezile ni to dii mal bi chillelidꞌ beneꞌ.
5 Naꞌ bchej Jesúzaꞌ mbinte bxooṉ de xis yeshaa yic̱hjeꞌnaꞌ naꞌ nakwtieꞌ lechꞌ moradaꞌ. Naꞌch cheꞌ Pilátonaꞌ ḻegakeꞌ:
―Ni ze beeni chaole xya c̱heyin.
6 Naꞌ bx̱ozkaꞌ chṉabiaꞌ naꞌ beṉꞌkaꞌ chap yoodoꞌnaꞌ ka bleꞌgakileꞌneꞌ, naꞌch wzologakeꞌ chosyaagakeꞌ zillj, cheꞌgakeꞌ:
―¡Bdee ḻee yag cruzaꞌ! ¡Bdee ḻee yag cruzaꞌ!
Naꞌ cheꞌ Pilátonaꞌ ḻegakeꞌ:
―Ḻi yic̱hiꞌe, shkaꞌ. Naꞌ ḻi wdee, leꞌ. Ḻaꞌ nadꞌ, ni to dii mal bi chillelidꞌ beneꞌ.
7 Naꞌ beṉꞌ wṉabiaꞌ c̱he beṉꞌ Israelkaꞌ cheꞌgakeꞌneꞌ:
―De to ley c̱hentoꞌ daa na chiyaḻꞌ gueteꞌ daa nalzeꞌ nakeꞌ Xiiṉ Chios.
8 Naꞌ ka gollgakeꞌ Pilátonaꞌ kaꞌ, zizikchli bllebeꞌ.
9 Naꞌch biyoꞌe sto shii ganaꞌ choneꞌ yeḻꞌ josc̱hisaꞌ naꞌ chiꞌe Jesúzaꞌ:
―¿Gara beṉꞌ liꞌ?
Naꞌ Jesúzaꞌ bikzə bi dillꞌ billiꞌe.
10 Naꞌch cheꞌ Pilátonaꞌneꞌ:
―¿Berac̱he ki chilliꞌo xtillii? ¿Abi ṉeziloꞌ napꞌ yeḻꞌ wṉabiaꞌ kwenc̱he wdaa liꞌ ḻee yag cruzaꞌ naꞌ naptiaꞌ yeḻꞌ wṉabiaꞌ kwenc̱he yisanꞌ liꞌ?
11 Naꞌch cheꞌ Jesúzaꞌneꞌ:
―Aga bi yeḻꞌ wṉabiaꞌ napoꞌ bi goniloꞌ nadꞌ sheḻꞌ bi noṉ Chiozaꞌn liꞌ. Daan, beenaꞌ bdieꞌ nadꞌ lawoꞌ ni, doḻꞌ xench napeꞌ aga ka liꞌ.
12 Naꞌch ka beni Pilátonaꞌ wneꞌ kaꞌ, biyiljlallee naklə ka goneꞌ kwenc̱he yisaneꞌ Jesúzaꞌ, per beṉꞌkaꞌ chṉabiaꞌ beṉꞌ Israelkaꞌ ax̱t chosyaayigakeꞌ, cheꞌgakeꞌneꞌ:
―Shi yisanoꞌneꞌ bi nakoꞌ txen Césaraꞌ, ḻaꞌ nottez beenaꞌ iṉa nakeꞌ beṉꞌ wṉabiaꞌ, Césaranꞌ chizoshyiꞌe.
13 Naꞌ ka beni Pilátonaꞌ gollgakeꞌneꞌ kaꞌ, bizchejeꞌ nc̱hiꞌe Jesúzaꞌ. Naꞌch jc̱hiꞌe ganaꞌ choneꞌ yeḻꞌ josc̱hisaꞌ, ganaꞌ le Gábata de dillꞌ hebreo, naꞌ zejin latj ga ntaogakeꞌ yaj.
14 Naꞌ gok dga llanaꞌ chsiniꞌagakeꞌ c̱he lṉi Paskwaꞌ. Naꞌ ka do gobill goll Pilátonaꞌ beṉꞌ Israelkaꞌ:
―Ni ze beṉꞌ wṉabiaꞌ c̱heleni.
15 Naꞌch ḻegakeꞌ chosyaagakeꞌ. Zeyidgakeꞌ, cheꞌgakeꞌ:
―¡Wdoyo beenaꞌ! ¡Bdee ḻee yag cruzaꞌ!
Naꞌch cheꞌ Pilátonaꞌ ḻegakeꞌ:
―¿Acheenile wiꞌa lsens wdaꞌgakeꞌ beṉꞌ wṉabiaꞌ c̱heleni ḻee yag cruzaꞌ?
Naꞌ bx̱ozkaꞌ chṉabiaꞌ cheꞌgakeꞌneꞌ:
―Toz Césaranꞌ chṉabiꞌe netoꞌ. Koch no beṉꞌ yoblə zoa.
16 Naꞌch Pilátonaꞌ beneꞌ Jesúzaꞌ lo naꞌgakeꞌ kwenc̱he wdaꞌgakeꞌneꞌ ḻee yag cruzaꞌ, naꞌch bc̱heꞌgakeꞌneꞌ.
La crucifixión (Juan 19.17-37)
Bdaꞌgakeꞌ Jesúzaꞌ ḻee yag cruzaꞌ
(Mt 27:32-44; Mr. 15:21-32; Lc 23:26-43)
17 Naꞌch bwaꞌgakeꞌ Jesúzaꞌ yag cruz c̱heꞌnaꞌ, naꞌ bc̱heꞌgakeꞌneꞌ ganaꞌ le Gólgota de dillꞌ hebreo, naꞌ zejin Latj c̱he llit yic̱hj beṉꞌ wet.
18 Naꞌ naꞌ bdaꞌgakeꞌ Jesúzaꞌ ḻee yag cruzaꞌ, naꞌ ḻekzkaꞌ bdaꞌgakeꞌ zi twej beṉꞌ shḻaa wej.
19 Naꞌ Pilátonaꞌ bzejeꞌ to dii bdaꞌgakeꞌ yic̱hj yag cruz c̱he Jesúzaꞌ, naꞌ nan ki: “Jesús, beṉꞌ Nazaret, beṉꞌ wṉabiaꞌ c̱he beṉꞌ Israelkaꞌ.”
20 Naꞌ bzejeꞌn dillꞌ hebreo, dillꞌ latín naꞌ dillꞌ griego. Naꞌ zan beṉꞌ Israelkaꞌ blabgakeꞌ daa daꞌ yic̱hj yag cruzaꞌ, ḻaꞌ ganaꞌ bdaꞌgakeꞌ Jesúzaꞌ ḻee yag cruzaꞌ chgaaṉan gaozə yell Jerusalénnaꞌ.
21 Daan bx̱ozkaꞌ chṉabiaꞌ beṉꞌ Israelkaꞌ gollgakeꞌ Pilátonaꞌ:
―Bi chiyaḻꞌ iṉan “Beṉꞌ wṉabiaꞌ c̱he beṉꞌ Israelkaꞌ”; san iṉan “Beenin nalzeꞌ nakeꞌ beṉꞌ wṉabiaꞌ c̱he beṉꞌ Israelkaꞌ.”
22 Naꞌ Pilátonaꞌ chiꞌe ḻegakeꞌ:
―Kon ka ba bzejaꞌn, kaꞌkzan igaaṉan.
23 Naꞌ biyoll bdaꞌ soldadkaꞌ Jesúzaꞌ ḻee yag cruzaꞌ, naꞌch bex̱ꞌgakeꞌ xeꞌnaꞌ naꞌ bengakeꞌn taplə kweṉche bikaa twej c̱hegakeꞌ. Naꞌ ḻekzkaꞌ bex̱ꞌgakeꞌ xeꞌ dii toṉaꞌ daa nak to shwiḻizə.
24 Naꞌ cheꞌ ljwellgakeꞌ:
―Bi wxoxjchon, san goncho to wyitj kwenc̱he ilaꞌshki nocho ikaan.
Naꞌ kaꞌ ben soldadkaꞌ. Naꞌ daa bengakeꞌ kaꞌ, billinin ka na Choꞌa Xtillꞌ Chiozaꞌ ganaꞌ na: “Biḻaagakeꞌ xaꞌnaꞌ, naꞌ bengakeꞌ to wyitj kwenc̱he gotꞌbiaꞌ nogakeꞌ wkaan.”
25 Naꞌ kwit yag cruz c̱he Jesúzaꞌ ze xṉeenaꞌ len beṉꞌ bileꞌnaꞌ, naꞌ len María, xool Cleófazaꞌ, naꞌ María beṉꞌ yell Magdálanaꞌ.
26 Naꞌ ka bleꞌi Jesúzaꞌ xṉeenaꞌ, naꞌ ḻekzkaꞌ bleꞌileꞌ gaozə ze to beenaꞌ nakeꞌneꞌ txen, beenaꞌ ḻe chakileꞌ, naꞌch chiꞌe xṉeenaꞌ:
―Beenin yiyoni xiiṉoꞌ ṉaa.
27 Naꞌch chiꞌe beenaꞌ nakeꞌneꞌ txen:
―Beenin yiyoni xṉoo ṉaa.
Naꞌ lo llanaꞌ bic̱hiꞌe xṉaꞌ Jesúzaꞌ wzoeꞌ lilleꞌnaꞌ.
Wit Jesúzaꞌ
28 Naꞌ ka wde, ṉezi Jesúzaꞌ ba gok yogꞌ daa llia biaꞌ gakə, naꞌ kwenc̱he yillinin ka na Choꞌa Xtillꞌ Chiozaꞌ, wneꞌ:
―Chbiḻidꞌ.
29 Naꞌ naꞌ zoa to xwag nakan tollaꞌ vino dii nak zic̱hj zḻaꞌ. Naꞌch bḻeejgakeꞌn to dii chziꞌ nisaꞌ naꞌ bzoagakeꞌn to lo xisa kwenc̱he bzoagakeꞌn choꞌenaꞌ.
30 Naꞌ wde weej Jesúzaꞌ daa nak zic̱hj zḻaꞌ, naꞌch wneꞌ:
―Ba gok yogꞌ daa llia biaꞌ gak ṉaa.
Naꞌ bc̱hekꞌ yic̱hjeꞌnaꞌ, naꞌ witeꞌ.
To soldad wllibeꞌ to ya dii nlaꞌ lawinnaꞌ kwit ḻee Jesúzaꞌ
31 Naꞌ beṉꞌkaꞌ chṉabiaꞌ beṉꞌ Israelkaꞌ bi goongakileꞌ yigaaṉ kwerp c̱he beṉꞌkaꞌ ḻee yag cruzkaꞌ llanaꞌ chombaaṉgakeꞌ. Daan gollgakeꞌ Pilátonaꞌ goneꞌ mandad lljtishjgakeꞌ ṉiꞌa beṉꞌkaꞌ daꞌ ḻee yag cruzaꞌ kwenc̱he yob guetgakeꞌ naꞌ yiḻetjgakeꞌ kwerp c̱heꞌkaꞌ ḻee yag cruzkaꞌ.
32 Naꞌch bseḻee soldad c̱heꞌkaꞌ, naꞌ jtishjgakeꞌ c̱hop ḻaate ṉiꞌa beṉꞌ nechaꞌ daꞌ kwit Jesúzaꞌ, naꞌ ḻekzkaꞌ bengakeꞌ c̱he beenaꞌ sto daꞌ zi shḻaa kwiteꞌnaꞌ.
33 Naꞌ ka jabigꞌgakeꞌ ganaꞌ daꞌ Jesúzaꞌ bleꞌgakileꞌ ba witeꞌ, naꞌ bi wdishjgakeꞌ ṉiꞌenaꞌ.
34 Naꞌ to soldadaꞌ wllibeꞌ to ya lo toshꞌ kwit ḻiꞌenaꞌ naꞌ lii bchejten chen len nis.
35 Naꞌ beenaꞌ choeꞌ dillꞌ c̱heyi diiki, ḻenꞌ bleꞌileꞌ ka gok, naꞌ choꞌe dillꞌ kwenc̱he lenle shajḻeꞌle. Naꞌ ḻeꞌ ṉezileꞌ dillꞌ ḻin choꞌe.
36 Gok diiki kwenc̱he billinin ka na Choꞌa Xtillꞌ Chiozaꞌ ganaꞌ na: “Ni to llitkaꞌ yoꞌe bi c̱hishjgakeꞌ.”
37 Naꞌ gan yoblə ḻee Choꞌa Xtillꞌ Chiozaꞌ chiznan: “Wwiagakeꞌ beenaꞌ wllibgakeꞌ yanaꞌ.”
Bkwashꞌgakeꞌ Jesúzaꞌ
38 Naꞌ ka wde gok diiki, José beṉꞌ yell Arimatéanaꞌ, wṉabileꞌ Pilátonaꞌ wiꞌe latj yikee kwerp c̱he Jesúzaꞌ. Josénaꞌ gokeꞌ txen Jesúzaꞌ do ngashꞌzə daa bllebeꞌ beṉꞌkaꞌ chṉabiaꞌ beṉꞌ Israelkaꞌ. Naꞌ Pilátonaꞌ biꞌe latj, naꞌch wyaj Josénaꞌ bikee kwerp c̱he Jesúzaꞌ.
La resurrección (Juan 19.38-20.18)
39 Naꞌ wyajleneꞌ Nicodémonaꞌ, beenaꞌ wyaj jawia Jesúzaꞌ waḻ-lə. Naꞌ noꞌe ka do shichoa kil dii chḻaꞌ zix̱ daa nongakeꞌ de mirra naꞌ nc̱hix̱an daa le áloe.
40 Naꞌch btobgakeꞌ kwerp c̱he Jesúzaꞌ to lechꞌ toṉ naꞌ bllaꞌgakeꞌn daa chḻaꞌ zix̱, kon ka chon beṉꞌ Israelkaꞌ katꞌ chkwashꞌgakeꞌ to beṉꞌ wet.
41 Naꞌ gaozə ganaꞌ bdaꞌgakeꞌ Jesúzaꞌ ḻee yag cruzaꞌ de to latj ga nazgakeꞌ yag dii chbia dii zix̱, naꞌ naꞌ zoa to blej kob dii biṉꞌ koogakeꞌ ni tlishꞌ beṉꞌ wet.
42 Naꞌ daa chakbyengakileꞌ wsiniꞌagakeꞌ c̱he llanaꞌ chombaaṉgakeꞌ, lii wlootegakeꞌ kwerp c̱he Jesúzaꞌ ḻoo blejaꞌ zoa gaozə naꞌ.