Biban Jesúzaꞌ ladj beṉꞌ wetkaꞌ
20
Naꞌ lla nech c̱he xmannaꞌ, ni shtedoꞌ, wyaj María nool Magdálanaꞌ choꞌa banaꞌ. Naꞌ bleꞌileꞌ bich nkwashꞌ yajaꞌ choꞌa banaꞌ.
2 Naꞌch bizee ziyajdoeꞌ ganaꞌ zoa Simón Pédronaꞌ naꞌ sto beenaꞌ nak Jesúzaꞌ txen, beenaꞌ ḻe gokileꞌ, jayelleꞌ ḻegakeꞌ:
―Ba jalejgakeꞌ X̱anchonaꞌ ḻoo banaꞌ naꞌ bi ṉezintoꞌ galə jaloogakeꞌneꞌ.
3 Naꞌch wzaꞌ Pédronaꞌ len beenaꞌ sto zejgakeꞌ choꞌa banaꞌ.
4 C̱hoptieꞌ zejdogakeꞌ, per beenaꞌ to bxoṉjcheꞌ aga ka Pédronaꞌ naꞌ zigaate ḻeꞌ bllineꞌ choꞌa banaꞌ.
5 Naꞌ bchekee bwieꞌ ḻoo banaꞌ naꞌ bleꞌileꞌ lechꞌkaꞌ chiꞌ naꞌ, per bi wyoꞌe.
6 Naꞌ ka bllin Simón Pédronaꞌ naꞌ wyoꞌe ḻoo banaꞌ naꞌ ḻekzkaꞌ bleꞌileꞌ lechꞌkaꞌ chiꞌ naꞌ.
7 Naꞌ lechaꞌ bdob yic̱hjeꞌnaꞌ aga lenan chiꞌ kwit lechꞌkaꞌ, san ndoban chiꞌn kaꞌlə.
8 Naꞌch ḻekzkaꞌ wyoo beenaꞌ bllin dii nech choꞌa banaꞌ, naꞌ ka bleꞌileꞌ diikaꞌ naꞌ wyajḻiꞌe dii ḻi biban Jesúzanꞌ.
9 Ḻaꞌ kanaꞌ aga ba wyajniꞌyeṉꞌgakileꞌ Choꞌa Xtillꞌ Chiozaꞌ ganaꞌ choꞌen dillꞌ yiban Jesúzaꞌ ladj beṉꞌ wetkaꞌ.
10 Naꞌch beṉꞌkaꞌ c̱hop non Jesúzaꞌ txen biyajgakeꞌ ganaꞌ zoagakeꞌ.
Jaliꞌlao Jesúzaꞌ María, beṉꞌ yell Magdálanaꞌ
11 Naꞌ Maríanaꞌ bigaaṉeꞌ choꞌa banaꞌ chbelleꞌ. Naꞌ lo zej chbelleꞌ bchekee kwenc̱he bwieꞌ ḻoo banaꞌ.
12 Naꞌ bleꞌileꞌ c̱hop anjl zoagakeꞌ do xtil, chiꞌgakeꞌ ḻoo banaꞌ, toeꞌ chiꞌ yic̱hjinnaꞌ naꞌ stoeꞌ chiꞌ xṉiꞌalin ganaꞌ gotꞌ kwerp c̱he Jesúzaꞌ.
13 Naꞌch cheꞌgakeꞌ Maríanaꞌ:
―¿Berac̱he chbellzoꞌ, noolə?
Naꞌ golleꞌ ḻegakeꞌ:
―Chbellꞌ daa ba bidḻejgakeꞌ kwerp c̱he X̱anꞌnaꞌ, naꞌ bi ṉezidꞌ galə jaloogakeꞌneꞌ.
14 Shintg wneꞌ kaꞌ, ka bllii jalaweꞌnaꞌ naꞌ bleꞌileꞌ ze Jesúzaꞌ kolleenaꞌ, per bi biyombiꞌe shi Jesúzanꞌ.
15 Naꞌch cheꞌ Jesúzaꞌneꞌ:
―¿Berac̱he chbellzoꞌ, noolə? ¿Nodaa chiyiljoꞌ?
Naꞌ Maríanaꞌ chakileꞌ beenaꞌ chap yag zix̱kanꞌ, naꞌ chiꞌeneꞌ:
―Beṉꞌdoꞌ, shi ba bibejoꞌneꞌ, wnagach nadꞌ galə jadix̱joꞌneꞌ kwenc̱he yic̱hiꞌaneꞌ.
16 Naꞌch cheꞌ Jesúzaꞌneꞌ:
―¡María!
Naꞌ biyec̱hjeꞌ naꞌ wṉieꞌneꞌ dillꞌ hebreo, chiꞌeneꞌ:
―¡Raboni! ―naꞌ zejin: beṉꞌ chliꞌ chsedi beṉꞌ.
17 Naꞌ cheꞌ Jesúzaꞌneꞌ:
―Bi gox̱oo nadꞌ, ḻaꞌ biṉꞌ yiyepꞌ kwit X̱aꞌnaꞌ. Ḻete biyaj, jaṉe beṉꞌkaꞌ nak nadꞌ txen jayellgakeꞌ ba ziyaa kwit X̱aꞌnaꞌ, beenaꞌ ḻekzkaꞌ nak X̱ale. Lljazoalenꞌ Chios c̱haꞌnaꞌ, beenaꞌ ḻekzkaꞌ nak Chios c̱hele.
18 Naꞌch bizaꞌ María, beṉꞌ yell Magdálanaꞌ, jayelleꞌ beṉꞌkaꞌ nak Jesúzaꞌ txen nan ba bleꞌileꞌ X̱ancho Jesúzaꞌ. Naꞌ golleꞌ ḻegakeꞌ diikaꞌ goll Jesúzaꞌ ḻeꞌ.
Jaliꞌlao Jesúzaꞌ beṉꞌkaꞌ nakgakeꞌneꞌ txen
(Mt 28:16-20; Mr. 16:14-18; Lc 24:36-49)
19 Naꞌ ka goḻ lo llanaꞌ bibaneꞌ, lla nech c̱he xmannaꞌ, ba ndop nllag beṉꞌkaꞌ nak Jesúzaꞌ txen naꞌ nsejtegakeꞌ yoonaꞌ daa chllebgakeꞌ beṉꞌkaꞌ chṉabiaꞌ beṉꞌ Israelkaꞌ, ka gokbeꞌgakileꞌ ba ze Jesúzaꞌ ladjeꞌkaꞌ, naꞌ chiꞌe ḻegakeꞌ:
―Soashgale mbalaz.
Jesús se aparece a los discípulos (Juan 20.19-31)
20 Naꞌ ka biyoll golleꞌ ḻegakeꞌ kaꞌ, naꞌch bliileꞌ ḻegakeꞌ c̱hop ḻaate neenaꞌ naꞌ kwit ḻiꞌenaꞌ. Naꞌ beṉꞌkaꞌ nakgakeꞌneꞌ txen ḻe bibagakileꞌ bleꞌgakileꞌneꞌ.
21 Naꞌch wizeꞌ Jesúzaꞌ ḻegakeꞌ:
―Soashgale mbalaz. Ka bseḻꞌ X̱aꞌnaꞌ nadꞌ kwenc̱he zidsoaꞌ yell-lioni, kaꞌkzan chseḻaa leꞌ lljeꞌle choꞌa xtillaanaꞌ yell-lioni.
22 Naꞌ ka wde golleꞌ ḻegakeꞌ kaꞌ, naꞌch blobeꞌ ḻegakeꞌ, naꞌ chiꞌe:
―Ḻi ikaa Espíritu Sántonaꞌ.
23 Naꞌ beṉꞌkaꞌ yiziꞌxenle saaxya c̱heꞌkaꞌ, wiyakxenan. Naꞌ beṉꞌkaꞌ bi yiziꞌxenle c̱heyin, bi yiyakxen c̱hegakeꞌ.
Tomázaꞌ bi wyajḻiꞌe shi biban Jesúzaꞌ ladj beṉꞌ wetkaꞌ
24 Tomázaꞌ, beenaꞌ cheꞌgakeꞌ Dídimo nakeꞌ txen beṉꞌkaꞌ shlliṉ, naꞌ bi leneꞌ ka jaliꞌlao Jesúzaꞌ ḻegakeꞌ.
25 Naꞌ cheꞌgakeꞌneꞌ:
―Ba bleꞌintoꞌ X̱anchonaꞌ.
Naꞌ Tomázaꞌ chiꞌe ḻegakeꞌ:
―Shi bi ileꞌidꞌ neenaꞌ naꞌ wde xbenꞌni ganaꞌ wde klabkaꞌ, naꞌ wde naꞌni kwit ḻiꞌenaꞌ, aga wyajḻiꞌa.
26 Naꞌ ka wde x̱onꞌ lla, dii yoblə bidop beṉꞌkaꞌ nongakeꞌ Jesúzaꞌ txen ḻoo yoonaꞌ naꞌ len Tomázaꞌ. Naꞌ ḻaꞌkzi nsejtegakeꞌ yoonaꞌ, wyoo Jesúzaꞌ jsieꞌ ladjeꞌkaꞌ. Naꞌ chiꞌe ḻegakeꞌ:
―Soashgale mbalaz.
27 Naꞌch chiꞌe Tomázaꞌ:
―Bwia naꞌni, naꞌ bṉeꞌn xbenoꞌnaꞌ; naꞌ bṉeꞌ noonaꞌ kwit ḻiꞌani. Bi gakc̱hoplalloo, san wyajḻeꞌ.
28 Naꞌch cheꞌ Tomázaꞌneꞌ:
―¡Linꞌ nakoꞌ X̱anꞌ naꞌ naktioꞌ Chios c̱haꞌ!
29 Naꞌ cheꞌ Jesúzaꞌneꞌ:
―Galj bleꞌiloꞌ nadꞌ naꞌch chajḻiꞌo. Chakomba beṉꞌkaꞌ chajḻeꞌgakeꞌ ḻaꞌkzi biṉꞌ ileꞌgakileꞌ nadꞌ.
Bzej Juannaꞌ libri kwenc̱he shajḻeꞌ beṉꞌ Jesúzaꞌ nakeꞌ Xiiṉ Chios