Jaliꞌlao Jesúzaꞌ beṉꞌkaꞌ nakgakeꞌneꞌ txen
21
Ka wde, Jesúzaꞌ jaliꞌlaweꞌ sto shii beṉꞌkaꞌ nakgakeꞌneꞌ txen choꞌa Nisdoꞌ c̱he Galileanaꞌ daa ḻekzkaꞌ le Nisdoꞌ c̱he Tiberias. Naꞌ ki gok:
Jesús en el mar de Galilea (Juan 21.1-25)
2 Simón Pédronaꞌ len Tomázaꞌ, beenaꞌ nsiꞌgakeꞌ Dídimo, naꞌ Natanaelaꞌ, beṉꞌ yell Canánaꞌ daa llia ganaꞌ mbani Galileanaꞌ, naꞌ c̱hopte xiiṉ Zebedewaꞌ naꞌ zi c̱hop beṉꞌkaꞌ nongakeꞌ Jesúzaꞌ txen lleꞌgakeꞌ Galileanaꞌ.
3 Naꞌ Simón Pédronaꞌ chiꞌe ḻegakeꞌ:
―Shaꞌchꞌ lljx̱enꞌ beḻaꞌ.
Naꞌ ḻegakeꞌ gollgakeꞌneꞌ:
―Ḻekzkaꞌ wzaꞌlenntoꞌ liꞌ.
Naꞌch wyoogakeꞌ to ḻoo barkw zejgakeꞌ wxen beḻaꞌ, naꞌ ni tlishꞌ kono wxengakeꞌ do yel.
4 Naꞌ cheeniꞌḻesdoꞌ bllin Jesúzaꞌ choꞌa nisdoꞌnaꞌ, naꞌ beṉꞌkaꞌ nakgakeꞌneꞌ txen aga chakbeꞌgakileꞌ shi ḻenꞌ.
5 Naꞌch Jesúzaꞌ wṉieꞌ ḻegakeꞌ, chiꞌe:
―Leꞌ beṉꞌ bishꞌdawaa, ¿abiṉꞌ senle beḻaꞌ gaocho?
Naꞌ cheꞌgakeꞌneꞌ:
―Aga no de.
6 Naꞌch cheꞌ Jesúzaꞌ ḻegakeꞌ:
―Ḻi wzaḻꞌ yix̱j c̱helenaꞌ shḻaa de shḻi c̱he barkwaꞌ naꞌ idoḻꞌgakb.
Naꞌ bengakeꞌ ka golleꞌ, naꞌ ka nan yigoyogakeꞌ yix̱jaꞌ ḻoo nisaꞌ aga chizogakileꞌn daa nyichachgan beḻkaꞌ.
7 Naꞌ beenaꞌ ḻe chaki Jesúzaꞌneꞌ, golleꞌ Pédronaꞌ:
―¡X̱anchonanꞌ!
Naꞌ kon ka beni Pédronaꞌ golleꞌneꞌ kaꞌ, lii biyakwte xeꞌnaꞌ, naꞌ bxitee ḻoo nisaꞌ.
8 Naꞌ beṉꞌkaꞌ sto biyajlengakeꞌ barkwaꞌ choꞌa nisdoꞌnaꞌlə, zingoyon yix̱jaꞌ daa zinyichachga beḻkaꞌ, ḻaꞌ aga nakchan zitꞌ, ka sto guiyoa metrzan.
9 Naꞌ ka bichejgakeꞌ ḻoo barkwaꞌ, bleꞌgakileꞌ ba chiꞌ yiꞌnaꞌ xṉa naꞌ xoa to beḻ lawinnaꞌ, naꞌ dete yetxtil.
10 Naꞌ cheꞌ Jesúzaꞌ ḻegakeꞌ:
―Ḻi yiyox̱ꞌto beḻkaꞌ ziꞌ wxenle.
11 Naꞌch wyoo Simón Pédronaꞌ ḻoo barkwaꞌ kwenc̱he jaselleꞌ yix̱j beḻaꞌ naꞌ bigoyoeꞌn ax̱t choꞌa nisdoꞌnaꞌ. Naꞌ ḻaꞌkzi tollaꞌcha nak yix̱jaꞌ daa ziyoon to guiyoa shiiṉiyon beḻ yeḻkaꞌ, bi bchezaꞌn.
12 Naꞌch cheꞌ Jesúzaꞌ ḻegakeꞌ:
―Ḻi da gaole xsilaꞌ.
Naꞌ ni to beṉꞌkaꞌ nakgakeꞌneꞌ txen bi biyaxjgakileꞌ yeꞌgakeꞌneꞌ: “¿Nora liꞌ?” Ḻaꞌ gokbeꞌgakileꞌ X̱ancho Jesúzaꞌkzanꞌ.
13 Naꞌch wbigꞌ Jesúzaꞌ naꞌ bex̱ee yetxtilaꞌ len beḻaꞌ naꞌ biꞌe c̱he c̱hegakeꞌ.
14 Naꞌ dga gok de wyoṉ shii jaliꞌlao Jesúzaꞌ beṉꞌkaꞌ nakgakeꞌneꞌ txen ka wde bibaneꞌ ladj beṉꞌ wetkaꞌ.
Bshaljlen Jesúzaꞌ Simón Pédronaꞌ
15 Naꞌ ka bidaogakeꞌ xsilaꞌ, naꞌch cheꞌ Jesúzaꞌ Simón Pédronaꞌ:
―Simón, xiiṉ Jonás, ¿achakchiloꞌ nadꞌ aga ka to chaki beṉꞌki nadꞌ?
Naꞌ Pédronaꞌ chiꞌeneꞌ:
―X̱anꞌ, ṉezkziloꞌ chakidꞌ liꞌ.
Naꞌch cheꞌ Jesúzaꞌneꞌ:
―Naꞌlen wdap bwia beṉꞌkaꞌ chonḻilallꞌgakeꞌ nadꞌ, beṉꞌkaꞌ nak ka xilꞌdoꞌ c̱haꞌ.
16 Naꞌ de wchop shii wizṉabileꞌneꞌ, chiꞌeneꞌ:
―Simón, xiiṉ Jonás, ¿achakiloꞌ nadꞌ?
Naꞌ Pédronaꞌ chiꞌeneꞌ:
―X̱anꞌ, ṉezkziloꞌ chakidꞌ liꞌ.
Naꞌch cheꞌ Jesúzaꞌneꞌ:
―Naꞌlen wdap bwia beṉꞌkaꞌ chonḻilallꞌgakeꞌ nadꞌ, beṉꞌkaꞌ nak ka xilꞌ c̱haꞌ.
17 Naꞌ de wyoṉ shii wizṉabileꞌneꞌ, chiꞌeneꞌ:
―Simón, xiiṉ Jonás, ¿anaꞌ chakiloꞌ nadꞌ?
Naꞌ gokyeshii Pédronaꞌ daa ba gok shoṉ shii chṉab Jesúzaꞌ shi chakileꞌneꞌ, naꞌ chiꞌeneꞌ:
―X̱anꞌ, ṉez nḻeꞌiloꞌ yogꞌḻoḻte, naꞌ ṉezkziloꞌ chakidꞌ liꞌ.
Naꞌch cheꞌ Jesúzaꞌneꞌ:
―Naꞌlen wdap bwia beṉꞌkaꞌ chonḻilallꞌgakeꞌ nadꞌ, beṉꞌkaꞌ nak ka xilꞌdoꞌ c̱haꞌ.
18 Dii ḻi niaꞌ liꞌ, ka gokoꞌ beṉꞌ wewꞌ, gokw xalaanoꞌ to kwinzoꞌ naꞌ wyajoꞌ kon ga wnan c̱hoꞌ. Per katꞌ ba gox̱oo, wḻi nookaꞌ naꞌ yiwakw beṉꞌ yoblə xalaanoꞌnaꞌ, naꞌ wc̱hiꞌe liꞌ ga bi cheeniloꞌ shajoꞌ.
19 Naꞌ daa goll Jesúzaꞌneꞌ kaꞌ, bzajniileꞌ ḻegakeꞌ ka guet Pédronaꞌ, naꞌ daa gueteꞌ kaꞌ shoꞌ Chiozaꞌ balaaṉ. Naꞌ ka wde golleꞌ Pédronaꞌ kaꞌ, chiꞌeneꞌ:
―Btiplalloo benḻilallꞌ nadꞌ toshiizi.
Beenaꞌ ḻe chaki Jesúzaꞌneꞌ
20 Naꞌ biyec̱hj Pédronaꞌ naꞌ bleꞌileꞌ beenaꞌ sto, beenaꞌ ḻe chaki Jesúzaꞌneꞌ, noeꞌ ḻegakeꞌ. Ḻenꞌ wchiꞌe kwit Jesúzaꞌ kanaꞌ zeelo wdaogakeꞌ xsheꞌnaꞌ kanaꞌ wṉabileꞌneꞌ, chiꞌeneꞌ: “X̱anꞌ, ¿norakzntonꞌ gon liꞌ lo naꞌ beṉꞌ malkaꞌ?”
21 Naꞌ ka bleꞌi Pédronaꞌneꞌ, naꞌch chiꞌe Jesúzaꞌ:
―X̱anꞌ, ¿shera beeni?
22 Naꞌ cheꞌ Jesúzaꞌneꞌ:
―Shi cheenidꞌ, ni mbankz beeni katꞌ yiyedꞌ. Bi sioꞌ beenaꞌ wṉeyi. Linꞌ btiplalloo benḻilallꞌ nadꞌ toshiizi.
23 Naꞌ daa golleꞌ kaꞌ, wze dillꞌ ladj beṉꞌkaꞌ chonḻilallꞌ Jesúzaꞌ nan aga wet beenaꞌ. Per bi goll Jesúzaꞌ Pédronaꞌ bi guet beenaꞌ, san chiꞌeneꞌ: “Shi cheenidꞌ, ni mbankzeꞌ katꞌ yiyedꞌ. Bi sioꞌ beenaꞌ wṉeyi.”
24 Naꞌ beenaꞌ nakeꞌ Jesúzaꞌ txen, beenaꞌ ḻe chakileꞌ, choꞌe dillꞌ kon ka gokə naꞌ bzejeꞌn ḻee libri. Naꞌ ṉezintoꞌ dillaa choꞌe nakan dii ḻi.
25 Dii zanch dii ben Jesúzaꞌ naꞌ bi nyojan. Sheḻꞌ nyoj yogꞌ diikaꞌ beneꞌ, chakidꞌ bi gaki yell-lioni ikwaꞌ librkaꞌ sheḻꞌkaꞌ.