Diikaꞌ ben postlkaꞌ
Bc̱heb Jesúzaꞌ wseḻee Espíritu Sántonaꞌ
1
Teófilo, ḻee libr nechaꞌ bzejꞌ, naꞌ bzejꞌ yogꞌ dii wenkaꞌ ben Jesúzaꞌ naꞌ diikaꞌ bliꞌ bsedileꞌ dezd ka wzoloeꞌ
2 ax̱t ka bllin lla biyepeꞌ yabanaꞌ. Naꞌ ka ziꞌ yizee, bzajniileꞌ postlkaꞌ wlejeꞌ daa goll Espíritu Sántonaꞌneꞌ kwenc̱he gongakeꞌ llinnaꞌ daa beneꞌ lallꞌ naꞌgakeꞌ.
3 Naꞌ ka wde witeꞌ naꞌ bibaneꞌ ladj beṉꞌ wetkaꞌ, jaliꞌlaweꞌ ḻegakeꞌ naꞌ dii zan dii beneꞌ kwenc̱he iṉezgakileꞌ nan mbankzenꞌ. Naꞌ lo c̱hoa lla jaliꞌlaweꞌ ḻegakeꞌ, naꞌ bzajniileꞌ ḻegakeꞌ c̱he yeḻꞌ wṉabiaꞌ c̱he Chiozaꞌ.
4 Naꞌ shlak wzoalen Jesúzaꞌ postlkaꞌ, golleꞌ ḻegakeꞌ:
―Bi illeshle Jerusalénni. Ḻi kwez gak ka bc̱heb X̱acho Chiozaꞌ goneꞌ, kon ka ba wniakzꞌ.
5 Dii ḻi Juannaꞌ bchoeꞌ beṉꞌ nisaꞌ, per leꞌ, aga chllach yidsoa Espíritu Sántonaꞌ ḻoo yic̱hjlallꞌdoꞌlenaꞌ.
Biyep Jesúzaꞌ yabanaꞌ
6 Naꞌ beṉꞌkaꞌ ndop nllag kwit Jesúzaꞌ, wṉabgakileꞌneꞌ:
―X̱anꞌ, ¿awibejoꞌ choꞌ beṉꞌ Israel lo ṉiꞌa naꞌ beṉꞌ zitꞌkaꞌ ṉaa kwenc̱he iṉabiꞌo netoꞌ?
7 Naꞌ Jesúzaꞌ golleꞌ ḻegakeꞌ:
―Bi chidoḻꞌle iṉezile bi lla bi gor gon X̱acho Chiozaꞌ daa goneꞌ, ḻaꞌ tozeꞌ ḻenꞌ chṉabiꞌe naꞌ ba bllieꞌ biaꞌ batan goneꞌn.
8 Naꞌ ka yidsoa Espíritu Sántonaꞌ ḻoo yic̱hjlallꞌdoꞌlenaꞌ naꞌ goṉeꞌ leꞌ yeḻꞌ wak, naꞌ weꞌle xtillaanaꞌ yell Jerusalénnaꞌ, naꞌ doxen gani mbani Judeani naꞌ ḻekzkaꞌ ganaꞌ mbani Samárianaꞌ, naꞌ doxen zbii zkaaṉ yell-lioni.
9 Naꞌ ka biyoll golleꞌ kaꞌ, wzolo biyepeꞌ yabanaꞌ chwiate beṉꞌkaꞌ, naꞌ wze to bej bkwashaan ḻeꞌ naꞌ bich bleꞌgakileꞌneꞌ.
10 Naꞌ ka lleꞌgakeꞌ chwiagakeꞌ yabanaꞌ ganaꞌ biyep Jesúzaꞌ, lii bllinte c̱hop anjl kwiteꞌkaꞌ, naꞌ zoagakeꞌ do xtil.
11 Naꞌ gollgakeꞌ:
―Leꞌ beṉꞌ Galilea, ¿berac̱he chwiazle yabanaꞌ? Kwin Jesúzaꞌ, beenaꞌ bleꞌile bichej ladjleni naꞌ biyepeꞌ yabanaꞌ, kakzan ileꞌileneꞌ yiyedeꞌ.
Wlejgakeꞌ Matíazaꞌ bizoeꞌ lo laz Judaꞌ
12 Naꞌch biyetjgakeꞌ lo Yaa Olívozaꞌ ziyajgakeꞌ Jerusalénnaꞌ. Nakan gaozə, ka to daa nllia ley c̱heꞌkaꞌ biaꞌ koogakeꞌ nez llanaꞌ chombaaṉgakeꞌ.
13 Naꞌ ka billingakeꞌ Jerusalénnaꞌ, biyepgakeꞌ yoonaꞌ llia shkwianaꞌ chaꞌlə ganaꞌ zoagakeꞌ. Naꞌ beṉꞌkin billin: Pédronaꞌ, Jacóbonaꞌ, Juannaꞌ, Andrézaꞌ, Felípenaꞌ, Tomázaꞌ, Bartoloménaꞌ, Matewaꞌ, Jacóbonaꞌ xiiṉ Alfewaꞌ, Simón, beenaꞌ cheꞌgakeꞌ Zelote, naꞌ Judas beṉꞌ bishꞌ Jacóbonaꞌ.a
14 Yogꞌ beṉꞌki chdopgakeꞌ yogꞌ lla kon beṉꞌkaꞌ nak beṉꞌ bishꞌ Jesúzaꞌ kwenc̱he choeꞌḻwillgakeꞌ Chiozaꞌ, naꞌ len Maríanaꞌ xṉa Jesúzaꞌ naꞌ ziꞌ baḻ noolkaꞌ.
15 Naꞌ llakaꞌ wzoagakeꞌ naꞌ, Pédronaꞌ wzieꞌ ladj beṉꞌkaꞌ chonḻilallꞌgakeꞌ Jesucrístonaꞌ, nakgakeꞌ ka do to guiyoa gaḻjə, naꞌ golleꞌ ḻegakeꞌ:
16 ―Leꞌ beṉꞌ bishꞌ, benan byen billinin ka goll Espíritu Sántonaꞌ dii Davinaꞌ naꞌ bzejeꞌn ḻee Choꞌa Xtillꞌ Chiozaꞌ. Biꞌe dillꞌ nakan gon Judaꞌ, beenaꞌ bc̱hiꞌe beṉꞌkaꞌ bex̱ꞌgakeꞌ Jesúzaꞌ.
17 Judaꞌ gokeꞌ netoꞌ txen nakntoꞌ postl, naꞌ lenenꞌ nan goneꞌ netoꞌ txen dga ngoo lo naꞌntoꞌ chonntoꞌ.
18 Naꞌ mechaꞌ daa bex̱ee c̱he dii malaꞌ daa beneꞌ, ḻennanꞌ biziileꞌ to yell-lio ganaꞌ bxopeꞌ de gozyic̱hjlə naꞌ goshj ḻiꞌenaꞌ naꞌ bchej yogꞌ xjloeꞌnaꞌ.
19 Naꞌ ka wṉezi beṉꞌ Jerusalénkaꞌ ka gok c̱he Judaꞌ, naꞌ bsiꞌgakeꞌ yell-lionaꞌ daa biziꞌe Acéldama de xtillꞌgakeꞌ, naꞌ zejin Yell-lio Chen.
20 Ḻaꞌ ḻee libr c̱he Sálmokaꞌ nan:
Yidesh yiloashga lill xḻatjeꞌnaꞌ,
naꞌ ni sto kochno soan.
Naꞌ ḻekzkaꞌ nan:
Beṉꞌ yoblə yiyakshga lo nee daa nan gok lo nee goneꞌ.
21 ’Naꞌ chonan byen kwejcho to beṉꞌki bengakeꞌ choꞌ txen toshiizi kanaꞌ wzoalen X̱ancho Jesúzaꞌ choꞌ,
22 beṉꞌki nakgakeꞌ choꞌ txen dezd ka bchoa Juannaꞌ Jesúzaꞌ nisaꞌ ax̱t ka biyepeꞌ yabanaꞌ, kwenc̱he goneꞌ choꞌ txen weꞌcho dillꞌ nakan gok biban Jesúzaꞌ ladj beṉꞌ wetkaꞌ.
23 Naꞌch wlejgakeꞌ c̱hopeꞌ: toeꞌ le Matías, naꞌ sto beṉꞌ yoo shoṉə leyin, José, Barsabás, naꞌch Justo.
24 Naꞌ beꞌḻwillgakeꞌ Chiozaꞌ, cheꞌgakeꞌ:
―Chios, beṉꞌ nak X̱anntoꞌ, liꞌ nombiꞌo yic̱hjlallꞌdoꞌ yogꞌ beṉꞌ. Bliyi netoꞌ no beṉꞌki c̱hop ba wlejoꞌ
25 kwenc̱he gakeꞌ netoꞌ txen nakntoꞌ postl, ḻaꞌ Judaꞌ ba bṉiteꞌ daa ndoḻee yeḻꞌ wen dii mal c̱heꞌnaꞌ naꞌ ziyajeꞌ latjaꞌ ganaꞌ chidoḻee.
26 Naꞌch bengakeꞌ to wyitj kwenc̱he wṉezgakileꞌ noran ba wlej Chiozaꞌ, naꞌ bidoḻꞌ Matíazaꞌ, naꞌ wleneꞌ postlkaꞌ shnej.