Kart daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Rómanaꞌ
1
Nadꞌ Pablo, nakꞌ wen llin c̱he Cristo Jesúzaꞌ. Chiozaꞌ gox wṉabeꞌ nadꞌ gakꞌ postl c̱heꞌ, naꞌ beneꞌ lallꞌ naꞌ wiꞌa dillꞌ wen dillꞌ kob c̱heꞌnaꞌ
2 c̱heyi daa bc̱hebeꞌ goneꞌ, naꞌ dii beṉꞌkaꞌ wdix̱jee daa golleꞌ ḻegakeꞌ kaniꞌyi bzejgakeꞌn ḻee Choꞌa Xtilleenaꞌ.
3-4 Naꞌ choꞌen dillꞌ c̱he Xiiṉeꞌ Jesucrístonaꞌ, beenaꞌ nak X̱ancho, daa gokeꞌ beṉec̱h, naꞌ gokeꞌ xiiṉ dia c̱he dii rey Davinaꞌ. Naꞌ Espíritu Sántonaꞌ bliꞌe nan nakeꞌ Xiiṉ Chiozaꞌ, beenaꞌ nak beṉꞌ yeḻꞌ wak choo yeḻꞌ wak xen daa bibaneꞌ ladj beṉꞌ wetkaꞌ.
5 Naꞌ daa nonḻilallꞌntoꞌ Jesucrístonaꞌ, Chiozaꞌ ba gokleneꞌ netoꞌ, naꞌ nzoeꞌ netoꞌ nakntoꞌ postl c̱he Jesucrístonaꞌ, naꞌ beneꞌ lallꞌ naꞌntoꞌ lljtix̱jeꞌntoꞌ xtilleenaꞌ kwenc̱he doxen yell-lioni soa beṉꞌ gonḻilallꞌgakeꞌneꞌ naꞌ wzenaggakeꞌ c̱heꞌ, naꞌ shoꞌe balaaṉ.
6 Naꞌ lenle ba gox wṉab Chiozaꞌ kwenc̱he gakle lallꞌ naꞌ Jesucrístonaꞌ.
7 Chzejꞌ yogꞌḻoḻ-le, leꞌ lleꞌle yell Rómanaꞌ, leꞌ ba gox wṉab Chiozaꞌ nakle lallꞌ nee naꞌ chakileꞌ leꞌ. X̱acho Chiozaꞌ naꞌ X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
8 Zigaate niaꞌ leꞌ, ni c̱heyi daa ben Jesucrístonanꞌ chak wiꞌa Chiozaꞌ yeḻꞌ chox̱ken c̱he yogꞌḻoḻtele, ḻaꞌ doxen choeꞌ beṉꞌ dillꞌ ba nonḻilallꞌle Jesucrístonaꞌ.
9 Chios, beenaꞌ chonꞌ xshineꞌnaꞌ do yic̱hj do lallaa daa chyix̱jiꞌa dillꞌ wen dillꞌ kob c̱he Xiiṉeꞌnaꞌ, ṉez nḻeꞌileꞌ tḻizi chṉabidee gakleneꞌ leꞌ katꞌ choeꞌḻwillee.
10 Naꞌ toshiizi chṉabidee wiꞌe latj yidwiaꞌ leꞌ, naꞌ shi cheenileꞌ yidꞌ, ḻekzeꞌ kwee xṉezin.
11 Ḻe chzelallaa yidwiaꞌ leꞌ naꞌ weꞌlenꞌ leꞌ dillꞌ daa gaklenan leꞌ soac̱hec̱hchle gonḻilallꞌchle Jesucrístonaꞌ.
12 Ḻaꞌ cheenidꞌ wtipch lallꞌ ljwellcho daa nonḻilallꞌchoneꞌ.
13 Leꞌ beṉꞌ bishꞌ naꞌ leꞌ beṉꞌ zanꞌ, cheenidꞌ iṉezile zan shii ba goklallaa yidwiaꞌ leꞌ per ax̱t ṉaa bikzaṉꞌ gakan. Cheenidꞌ yidwiaꞌ leꞌ kwenc̱he gakchachle gonḻilallꞌle Jesucrístonaꞌ naꞌ soach beṉꞌ gonḻilallꞌgakeꞌneꞌ ladjlenaꞌ, ka ba gok c̱he beṉꞌkaꞌ bi nak beṉꞌ Israel yellkaꞌ ganaꞌ ba wyaa.
14 Ṉezidꞌ chonan byen weꞌlenꞌ yogꞌ beṉꞌ xtillꞌ Crístonaꞌ, ka beṉꞌ griego naꞌ ka beṉꞌ bi nak beṉꞌ griego, ka beṉꞌ sinꞌ naꞌ ka beṉꞌ bi nteyi.
15 Daan, cheenidꞌ ḻekzkaꞌ c̱hix̱jeꞌidꞌ leꞌ dillꞌ wen dillꞌ kob c̱heꞌnaꞌ, leꞌ zoale Rómanaꞌ.
16 Bi chiyii chidoꞌidꞌ wiꞌa dillꞌ wen dillꞌ kob c̱he Jesucrístonaꞌ, ḻaꞌ nsaꞌn yeḻꞌ wak c̱he Chiozaꞌ kwenc̱he yislan nottez beṉꞌ gonḻilalleeneꞌ, zigaate beṉꞌ Israelkaꞌ, naꞌ ḻekzkaꞌ beṉꞌkaꞌ bi nak beṉꞌ Israel.
17 Naꞌ dillꞌ wen dillꞌ kob c̱heꞌnaꞌ chliin choꞌ nakan goncho yiyakcho beṉꞌ ḻi beṉꞌ shaoꞌ lao Chiozaꞌ. Naꞌ chzajniin choꞌ chiyaḻꞌ gonḻilallꞌchoneꞌ naꞌ bich bi de sto dii gaklenan choꞌ. Kon ka na Choꞌa Xtilleenaꞌ: “Beenaꞌ nak beṉꞌ ḻi beṉꞌ shaoꞌ daa nonḻilallee nadꞌ, beenanꞌ ibaneꞌ.”
18 Yeḻꞌ zakꞌzi c̱he Chiozaꞌ zaꞌn yabanaꞌ ni c̱he beṉꞌkaꞌ bi chzenag c̱heꞌ naꞌ chongakeꞌ chiya dii mal, diikaꞌ chsej chllongakan gombiaꞌgakeꞌ daa nak dii ḻi.
19 Daa cheeni Chiozaꞌ iṉezgakileꞌ c̱heꞌ, ba ṉezkzgakileꞌn, ḻaꞌ Chiozaꞌkzan ba bliileꞌn ḻegakeꞌ.
20 Ḻaꞌkzi bi chleꞌicho Chiozaꞌ, chleꞌicho diikaꞌ beneꞌ naꞌ chakbeꞌicho ka nakeꞌ. Daa bx̱e bsileꞌ yell-lioni nakbiaꞌcha nakeꞌ Chios naꞌ yeḻꞌ wak c̱heꞌnaꞌ biga te c̱heyin. Naꞌ bibi de dii wdaꞌi beṉꞌ iṉagakeꞌ bi ṉezgakileꞌ shi zoeꞌ.
21 Ḻaꞌ ḻaꞌkzi ṉezgakileꞌ zoa Chiozaꞌ, bi choeꞌlaꞌogakeꞌneꞌ ni bi choeꞌgakeꞌneꞌ yeḻꞌ chox̱ken. San yoolə yic̱hjgakeꞌ diikaꞌ bi zakii naꞌ nc̱hoḻ nniti yic̱hjlallꞌdoꞌekaꞌ daa bi ntegakileꞌ.
22 Ḻaꞌkzi nazgakeꞌ nakgakeꞌ beṉꞌ sinꞌ, daa chongakeꞌ chliꞌn nakgakeꞌ beṉꞌ bi nteyi.
23 Lwaa dii nan koogakeꞌ Chiozaꞌ balaaṉ, beenaꞌ biga te c̱heyin, lwaa lsakꞌ beṉec̱haꞌlə, beṉꞌkaꞌ chde c̱heyin, wloogakeꞌ balaaṉ, naꞌ ax̱t no lwaa lsakꞌ ba ze xan yabanaꞌ, naꞌ lwaa lsakꞌ ba zoa tap ṉiꞌa naꞌyin, naꞌ lwaa lsakꞌ ba chx̱ob ḻeꞌin.
24 Naꞌ daa chongakeꞌ kaꞌ, Chiozaꞌ ba wchooṉlallee ḻegakeꞌ kwenc̱he gonchgakeꞌ dii zbankaꞌ cheeni beli chen c̱heꞌkaꞌ, naꞌ benlen ljwellgakeꞌ diikaꞌ nak zban.
25 Lwaa dii nan shajḻeꞌgakeꞌ daa nak dii ḻi c̱he Chiozaꞌ, wyazlallꞌchgakeꞌ daa nak de wxiyeꞌ. Beꞌlaꞌogakeꞌ diikaꞌ bx̱e bsil Chiozaꞌ naꞌ wloogakeꞌn balaaṉ lwaa dii nan koogakeꞌ ḻeꞌ balaaṉ daa bx̱e bsileꞌ ḻegakan naꞌ chidoḻee weꞌlaꞌochoneꞌ toshiizi. Kanꞌ nakan.
26 Daan, Chiozaꞌ ba wchooṉlallee ḻegakeꞌ kwenc̱he gonchgakeꞌ dii zbankaꞌ cheeni beli chen c̱heꞌkaꞌ, naꞌ ax̱t noolkaꞌ chiyatꞌlen ljwell noolgakeꞌ naꞌ chongakeꞌ daa bi noeꞌ Chiozaꞌ latj gongakeꞌ.
27 Naꞌ kaꞌkzə beṉꞌ byokaꞌ, lwaa dii nan soalengakeꞌ noolə, chibalgakileꞌ chiyatꞌlen ljwell beṉꞌ byogakeꞌ, naꞌ chonlen ljwellgakeꞌ daa nak dii zban. Naꞌ chzakꞌziꞌlen beli chen c̱heꞌkaꞌ yeḻꞌ zakꞌziꞌnaꞌ daa chidoḻꞌgakeꞌ daa chongakeꞌ dii malkaꞌ.
28 Naꞌ daa bi goklallꞌgakeꞌ wzenaggakeꞌ c̱he Chiozaꞌ, wlej yic̱hjeꞌ ḻegakeꞌ kwenc̱he gontegagakeꞌ dii malaꞌ kon ka nan ḻoo yic̱hjlallꞌdoꞌekaꞌ daa nxiṉj.
29 Shgaḻꞌ dii bi yejniꞌalallii chongakeꞌ, choeꞌgakeꞌ choꞌa xbayi beli chen c̱heꞌkaꞌ, chzelallꞌgakeꞌ gatꞌ kweꞌgakileꞌ, chibagakileꞌ gongakeꞌ dii malkaꞌ. Nakgakeꞌ beṉꞌ xeꞌ beṉꞌ xgaꞌ, beṉꞌ wen xya, beṉꞌ wishagdiḻə, beṉꞌ wxiyeꞌ, beṉꞌ chibayi gon mal c̱he beṉꞌ, beṉꞌ wic̱hitj dillꞌ,
30 beṉꞌ chyilj chzan xtillꞌ beṉꞌ, beṉꞌ chakzbani Chiozaꞌ, beṉꞌ bibi nalli, beṉꞌ chaꞌsibə naꞌ beṉꞌ chshalj chshon. Chiyiljlallꞌgakeꞌ bi dii mal gongakeꞌ, bi chzenaggakeꞌ c̱he x̱axṉaꞌgakeꞌ,
31 bi ntegakileꞌ, bi chongakeꞌ daa chc̱hebgakeꞌ, bi chakgakileꞌ beṉꞌ, ni bi chiyeshꞌgakileꞌ beṉꞌ.
32 Ḻaꞌkzi ṉezgakileꞌ ba bc̱hoglo Chiozaꞌ chiyaḻꞌ guet beṉꞌkaꞌ chon kaꞌ, zizikchli chongakeꞌn, naꞌ ax̱t chiba chizakꞌgakileꞌ katꞌ chon beṉꞌ yoblan.