2
Naꞌ liꞌ ṉaa, nottezə nakoꞌ, katꞌ chc̱hogloꞌ c̱he beṉꞌ napeꞌ doḻꞌ lao Chiozaꞌ, ḻekzkaꞌ c̱he kwinonꞌ chṉioꞌ, ḻaꞌ lenkzoꞌ chonoꞌ diikaꞌ chongakeꞌ, naꞌ bibi de wdaꞌiloꞌn iṉoꞌ bibi xtoḻoo de.
2 Naꞌ ṉezicho Chiozaꞌ choneꞌ kon ka chiyaḻꞌ goneꞌ katꞌ chc̱hogloeꞌ sakꞌziꞌ beṉꞌkaꞌ chon dii malkaꞌ nak kaꞌ.
3 Naꞌ liꞌ noꞌ c̱he beṉꞌkaꞌ chon dii malkaꞌ napgakeꞌ doḻꞌ, bi gakziloꞌ wiloꞌ lo yeḻꞌ zakꞌziꞌ c̱he Chiozaꞌ, ḻaꞌ kaꞌkzan chonoꞌ.
4 ¿Achakziloꞌ bi wsakꞌziꞌ Chiozaꞌ liꞌ ni c̱he daa chonoꞌ? ¿Abi chakbeꞌiloꞌ ni c̱he yeḻꞌ beṉꞌ wen c̱heꞌnanꞌ chiyeshꞌlallileꞌ choꞌ naꞌ chapeꞌ yeḻꞌ chxenlallꞌ c̱hecho, daa cheenileꞌ yiyaj yilenicho c̱he dii malkaꞌ choncho?
5 Per daa nakoꞌ yic̱hjlallꞌdoꞌ c̱hec̱h naꞌ bi cheeniloꞌ yiyaj yileniloꞌ, kwintezoꞌ chkwaꞌ chtiꞌazoꞌ yeḻꞌ zakꞌziꞌkaꞌ illagloꞌ katꞌ illin lla wc̱hoglo Chiozaꞌ c̱he beṉꞌ kon ka chiyaḻꞌ goneꞌ.
6 Ḻaꞌ Chiozaꞌ goneꞌ ka gak c̱he to to beṉꞌ kon ka chidoḻee.
7 Beṉꞌkaꞌ zoatezi zoagakeꞌ chongakeꞌ daa nak wen kwenc̱he shoꞌgakeꞌ balaaṉ, wiꞌe yeḻꞌ mban c̱hegakeꞌ zejḻi kaṉi naꞌ biga llia ileꞌgakileꞌ yeḻꞌ witaꞌ.
8 Naꞌ beṉꞌ yaalallꞌkaꞌ, beṉꞌkaꞌ chzoagakeꞌ kaꞌlə daa nak dii ḻi naꞌ nogakeꞌ diikaꞌ bi yejniꞌalallii, wsakꞌziꞌe ḻegakeꞌ daa ḻe chllee ḻegakeꞌ.
9 Yeḻꞌ zakꞌziꞌ wal yen ileꞌi yogꞌ beṉꞌkaꞌ chon dii malaꞌ, zigaate beṉꞌ Israelkaꞌ naꞌtech beṉꞌkaꞌ bi nak beṉꞌ Israel.
10 Per beṉꞌkaꞌ chon dii wennaꞌ, shoꞌgakeꞌ balaaṉ naꞌ soagakeꞌ mbalaz, zigaate beṉꞌ Israelkaꞌ naꞌtech beṉꞌkaꞌ bi nak beṉꞌ Israel.
11 Ḻaꞌ Chiozaꞌ, tlap choneꞌ yeḻꞌ josc̱his, aga nakzi beṉꞌ chakileꞌ.
12 Yogꞌ beṉꞌkaꞌ bi nombiaꞌ ley daa bzej dii Moisézaꞌ kwiayiꞌgakeꞌ shi bengakeꞌ dii malaꞌ, ḻaꞌkzi bi ṉezgakileꞌ daa nan. Naꞌ yogꞌ beṉꞌkaꞌ ben dii malaꞌ naꞌ ṉeztegakileꞌ daa na leyaꞌ, c̱hoglo c̱hegakeꞌ kon ka na leyaꞌ gak c̱hegakeꞌ.
13 Ḻaꞌ kono yiyak beṉꞌ ḻi beṉꞌ shaoꞌ lao Chiozaꞌ daa nombiaꞌzeꞌ leyaꞌ, san beenaꞌ chon kon ka nan, ḻenꞌ yiyakeꞌ beṉꞌ ḻi beṉꞌ shaoꞌ laweꞌnaꞌ.
14 Ka nak beṉꞌkaꞌ bi nak beṉꞌ Israel naꞌ bi ṉezgakileꞌ bin na ley c̱he dii Moisézaꞌ, shi tobiaꞌlozgakeꞌ chongakeꞌ ka na leyaꞌ, nakbiaꞌ yoo to ley ḻoo yic̱hjlallꞌdoꞌekaꞌ.
15 Naꞌ daa chongakeꞌ kaꞌ, chliꞌn yoo ḻoo yic̱hjlallꞌdoꞌekaꞌ daa cheeni leyaꞌ gongakeꞌ. Naꞌch yic̱hjlallꞌdoꞌekaꞌkzə chonan ka chakbeꞌgakileꞌ shi dii wen wa shi dii malan bengakeꞌ.
16 Kanꞌ gak llanaꞌ gon Chiozaꞌ lo naꞌ Jesucrístonaꞌ wc̱hogloeꞌ c̱he diikaꞌ yoo ḻoo yic̱hjlallꞌdoꞌ beṉꞌ yell-lioni, kon ka na dillꞌ wen dillꞌ kob c̱heꞌnaꞌ daa choꞌa dillꞌ.
17 Naꞌ liꞌ nakoꞌ beṉꞌ Israel, chakiloꞌ nakoꞌ beṉꞌ wen lao Chiozaꞌ daa ṉeziloꞌ daa na ley c̱he dii Moisézaꞌ naꞌ chep chaꞌlalloo daa nombiꞌo Chiozaꞌ.
18 Chakiloꞌ ṉeziloꞌ daa cheeni Chiozaꞌ gonoꞌ daa chliꞌ chsedi leyaꞌ liꞌ gonoꞌ daa nakch wen.
19 Chakiloꞌ wak koo beṉꞌ lo nez ḻi c̱he Chiozaꞌ naꞌ gaktioꞌ ka beeniꞌ lao beṉꞌkaꞌ chda lo yel c̱hoḻaꞌ.
20 Naꞌ chakiloꞌ wak wzajniiloꞌ beṉꞌ bi nteyi naꞌ wakte wliꞌ wsediloꞌ beṉꞌkaꞌ biṉꞌ shajniꞌyeṉii daa nombiꞌo leyaꞌ daa nsaꞌ do ka nak yeḻꞌ chajnii naꞌ daa nak dii ḻi.
21 Naꞌ shi liꞌ chliꞌ chsediloꞌ beṉꞌ yoblə, ¿berac̱he bi chliꞌ chsedi kwinoꞌ? Naꞌ shi chsediloꞌ beṉꞌ bi kwaneꞌ, ¿berac̱he liꞌlə chbanzoꞌ?
22 Naꞌ liꞌ chsediloꞌ beṉꞌ bi chiyaḻꞌ soaleneꞌ nool bi nak nool c̱heꞌ, wa beṉꞌ byo beṉꞌ bi nak beṉꞌ c̱heꞌ, ¿berac̱he liꞌlə chonzoꞌ kaꞌ? Naꞌ liꞌ chwiiloꞌ lwaa lsakꞌ diikaꞌ choeꞌlaꞌo beṉꞌ, ¿berac̱he chziꞌ chbanzoꞌ bi de ḻoo lill xḻatjinkaꞌ?
23 Chshalj chshonoꞌ daa nombiꞌo leyaꞌ, per chṉit chdioꞌ Chiozaꞌ daa bi chonoꞌ ka nan.
24 Dii ḻiyeṉꞌnan na Choꞌa Xtillꞌ Chiozaꞌ: “Beṉꞌkaꞌ bi nak beṉꞌ Israel chṉegakeꞌ zban c̱he Chiozaꞌ ni c̱hele daa chonle mal.”
25 Dii ḻi seṉ daa le circuncisión daa yoo kwerp c̱hoꞌnaꞌ zakꞌkzin shi chzenagoꞌ daa na leyaꞌ, per shi bi chzenagoꞌn bibi zjanayi daa yoo seṉnaꞌ.
26 Naꞌ shi beenaꞌ bi yoo seṉnaꞌ choneꞌ ka na leyaꞌ, lao Chiozaꞌ nakeꞌ ka beṉꞌ yoo seṉ.
27 Naꞌ beenaꞌ chon ka na leyaꞌ ḻaꞌkzi bi yoꞌe seṉnaꞌ, yiliꞌe lawoꞌ napoꞌ doḻꞌ daa bi chonoꞌ ka na leyaꞌ ḻaꞌkzi nombiꞌon naꞌ yootioꞌ seṉnaꞌ.
28 Bi gakziloꞌ nakoꞌ dowalj beṉꞌ Israel daa chonoꞌ yogꞌ diikaꞌ yoolocho choncho choꞌ beṉꞌ Israel, ni daa yoo kwerp c̱hoꞌnaꞌ seṉnaꞌ.
29 San dowalj beṉꞌ Israel nak beenaꞌ nonḻilallꞌ Chiozaꞌ do yic̱hj do lallee, naꞌ daa ba bikob Espíritu c̱heꞌnaꞌ yic̱hjlallꞌdoꞌenaꞌ nakan ka seṉnaꞌ daa chliꞌn nakeꞌ lallꞌ naꞌ Chiozaꞌ. Naꞌ c̱he beenin weꞌ Chiozaꞌ xtillee choneꞌ wen, aga beṉꞌ yell-lionin.