3
Naꞌ ¿bera yeḻꞌ goklen c̱he beṉꞌ Israelkaꞌ de? Naꞌ ¿bera banez siꞌgakeꞌ daa yoogakeꞌ seṉ daa le circuncisión?
2 Dii xen wal banez c̱hegakeꞌ de. Ḻaꞌ zigaate, ḻegakenꞌ beꞌ Chiozaꞌ Choꞌa Xtilleenaꞌ.
3 ¿Anti chakile ni c̱heyi daa bi chajḻeꞌ baḻ beṉꞌ Israelkaꞌ c̱heꞌ, ba wlej yic̱hjeꞌ ḻegakeꞌ?
4 ¡Bi nakan kaꞌ! Chiozaꞌ toshiizi choneꞌ ka ba bc̱hebeꞌ goneꞌ ḻaꞌkzi yogꞌ beṉꞌ yell-lioki nakgakeꞌ beṉꞌ wxiyeꞌ. Choꞌa Xtilleenaꞌ nan:
Daa nc̱hogbiꞌo gak c̱he beṉꞌ saaxyanaꞌ nakbiaꞌchan zejan shḻi,
naꞌ gakbeꞌgakileꞌ chonoꞌ yeḻꞌ josc̱his kon ka chiyaḻꞌ gakan.
5 Naꞌ shi dii malaꞌ choncho chliꞌn Chiozaꞌ nakeꞌ beṉꞌ ḻi beṉꞌ shaoꞌ, ¿bera iṉacho, lla? ¿Aiṉacho Chiozaꞌ bi nakeꞌ beṉꞌ wen daa chsakꞌziꞌe beṉꞌkaꞌ chon mal? (Niaꞌ kaꞌ daa chaki beṉꞌ yell-lioki kaꞌ.)
6 Per ¡bi nakan kaꞌ! Ḻaꞌ, sheḻꞌkaꞌ Chiozaꞌ bi nakeꞌ beṉꞌ ḻi beṉꞌ shaoꞌ, aga wak goneꞌ yeḻꞌ josc̱his c̱he beṉꞌ yell-lioni.
7 Naꞌ zoa beṉꞌ nagakeꞌ, shi yeḻꞌ wxiyeꞌ c̱hechonaꞌ chliꞌn yeḻꞌ ḻi c̱he Chiozaꞌ naꞌ chisgolan balaaṉ c̱heꞌnaꞌ, ¿bic̱he nazeꞌ nakcho beṉꞌ saaxya, shkaꞌ?
8 Naꞌ daa chakgakileꞌ kaꞌ, wnaljagakeꞌ: “Goncho dii malaꞌ kwenc̱he shoꞌcheꞌ balaaṉ.” Zoa beṉꞌ nagakeꞌ kanꞌ chliꞌ chsedintoꞌ, per bi nakan kaꞌ. Naꞌ beṉꞌkaꞌ naz kaꞌ chidoḻꞌgakeꞌ yeḻꞌ zakꞌziꞌ c̱he Chiozaꞌ.
9 ¿Nakra lla? ¿Anakchntoꞌ netoꞌ beṉꞌ Israel beṉꞌ wench aga ka beṉꞌ yoblə, lla? ¡Bi nakan kaꞌ! Ḻaꞌ ba wniakzꞌ yogꞌcho, ka netoꞌ beṉꞌ Israel naꞌ kaꞌkzə beṉꞌkaꞌ bi nak beṉꞌ Israel, toz ka napcho doḻꞌ lao Chiozaꞌ daa ba bencho dii malaꞌ.
10 Ḻaꞌ Choꞌa Xtillꞌ Chiozaꞌ nan:
Kono beṉꞌ ḻi beṉꞌ shaoꞌ zoa, ni tlishee.
11 Ni to beṉꞌ bi chajniileꞌ daa nak dii ḻi,
ni kono zoa beṉꞌ chiyilj Chiozaꞌ.
12 Yogꞌz beṉꞌ ba wlaagakeꞌ lo nez ḻinaꞌ,
naꞌ yogꞌzgakeꞌ nxiṉj yic̱hjlallꞌdoꞌekaꞌ.
Ni togagakeꞌ bi chon dii wen.
Ni tlishꞌ beṉꞌ chon wen bi zoa.
13 Ka zban chḻaꞌ to ḻoo ba c̱he beṉꞌ wet dii nyalj, kanꞌ nak dillꞌ zbankaꞌ chchej choꞌa ḻolleekaꞌ.
Kon choꞌa ḻolleekaꞌ chziyeꞌgakeꞌ.
Naꞌ ka yierb c̱he beḻ nak dillꞌkaꞌ choeꞌgakeꞌ.
14 Lillinzə chyishjgakeꞌ biaꞌ blagꞌ c̱he beṉꞌ naꞌ choeꞌgakeꞌ dillꞌ ziꞌbiaꞌ.
15 Bi nallgakileꞌ chittezgakeꞌ beṉꞌ.
16 Gattezə zejgakeꞌ chlliayiꞌ chlliadegakeꞌ naꞌ chgoogakeꞌ yeḻꞌ ziꞌ yeḻꞌ yeshꞌ.
17 Bi nombiaꞌgakeꞌ bi daa neꞌ soalengakeꞌ beṉꞌ mbalaz.
18 Bi chall chllebgakeꞌ gon Chiozaꞌ xya c̱hegakeꞌ.
19 Naꞌ ṉezicho beṉꞌkaꞌ nagakeꞌ chongakeꞌ daa na ley c̱he Chiozaꞌ chiyaḻꞌ gongakeꞌ doxen ka nan. Naꞌ daa kono gok gonan, ba bc̱hoglo Chiozaꞌ c̱he yogꞌḻoḻcho, choꞌ beṉꞌ yell-lio, ka netoꞌ beṉꞌ Israel naꞌ ka beṉꞌ bi nak beṉꞌ Israel, napcho doḻꞌ, naꞌ ni to kono gak iṉa: “Bibi doḻꞌ napꞌ.”
20 Daan, ni to beṉꞌ bi gak iṉeꞌ nakeꞌ beṉꞌ ḻi beṉꞌ shaoꞌ lao Chiozaꞌ daa choneꞌ ka na leyaꞌ. Ḻaꞌ leyaꞌ chonan ka chakbeꞌicho nakcho beṉꞌ saaxya.
21 Naꞌ ṉaa Chiozaꞌ ba bliileꞌ choꞌ nakan goncho kwenc̱he yiyakcho beṉꞌ ḻi beṉꞌ shaoꞌ laweꞌnaꞌ, naꞌ aga daa goncho ka na leyanꞌ. Ḻaꞌ ka leyaꞌ, naꞌ ka diikaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ, toz ka choeꞌgakan dillꞌ c̱heyin.
22 Chiozaꞌ neꞌ yogꞌḻoḻ beṉꞌ gonḻilallee Jesucrístonaꞌ yiyakeꞌ beṉꞌ ḻi beṉꞌ shaoꞌ laweꞌnaꞌ, nottezə nakeꞌ.
23 Ḻaꞌ yogꞌḻoḻzə beṉꞌ bx̱iṉj bḻengakeꞌ naꞌ ni to kono nak dowalj beṉꞌ wen ka nak Chiozaꞌ.
24 Per daa nak Chiozaꞌ beṉꞌ wen, chiyoneꞌ beṉꞌ beṉꞌ ḻi beṉꞌ shaoꞌ daa wdixj Cristo Jesúzaꞌ saaxya c̱heꞌkaꞌ, naꞌ bibi zakꞌgakileꞌn.
25 Chiozaꞌ bseḻee Crístonaꞌ blalj xc̱heneꞌnaꞌ naꞌ witeꞌ ni c̱he saaxyakaꞌ bencho. Naꞌ ni c̱he xc̱heneꞌnaꞌ, nottezə beṉꞌ gonḻilalleeneꞌ, Chiozaꞌ yiziꞌxeneꞌ saaxya c̱heꞌnaꞌ. Naꞌ kaꞌ chliꞌe nan nakeꞌ beṉꞌ chon daa nak shḻi. Ḻaꞌ daa napeꞌ yeḻꞌ chxenlallꞌ, beneꞌ kaꞌz saaxyakaꞌ ben beṉꞌ kanaꞌ biṉꞌ wseḻee Crístonaꞌ.
26 Naꞌ ṉaa, daa bseḻee Jesucrístonaꞌ chliꞌe nakeꞌ beṉꞌ chon daa nak shḻi daa neꞌ nottezə beṉꞌ gonḻilallee Jesúzaꞌ nakeꞌ beṉꞌ ḻi beṉꞌ shaoꞌ laweꞌnaꞌ.
27 Kono gak wshalj wshon iṉeꞌ nakeꞌ beṉꞌ ḻi beṉꞌ shaoꞌ lao Chiozaꞌ ni c̱he ba beneꞌ ka na leyaꞌ. Ḻaꞌ aga no chon doxen ka nan, san Chiozaꞌ neꞌ nottezə beṉꞌ gonḻilallee Crístonaꞌ nakeꞌ beṉꞌ ḻi beṉꞌ shaoꞌ laweꞌnaꞌ.
28 Naꞌ ba ṉezicho chiyakcho beṉꞌ ḻi beṉꞌ shaoꞌ lao Chiozaꞌ daa chonḻilallꞌcho Jesucrístonaꞌ naꞌ aga daa choncho daa na leyanꞌ.
29 ¿Achakile Chiozaꞌ nakeꞌ Chios c̱he to beṉꞌ Israelkaꞌzə? ¡Bi nakan kaꞌ! Ḻekzkaꞌ nakeꞌ Chios c̱he beṉꞌkaꞌ bi nak beṉꞌ Israel.
30 Ḻaꞌ toz Chiozanꞌ zoa, beenaꞌ chiyoneꞌ beṉꞌ ḻi beṉꞌ shaoꞌ beṉꞌkaꞌ chonḻilallꞌ Crístonaꞌ. Naꞌ toz ka choneꞌ c̱he nottezə beṉꞌ chonḻilalleeneꞌ, ka beṉꞌ Israel, beṉꞌkaꞌ yoo seṉ daa le circuncisión, naꞌ ka beṉꞌ bi nak beṉꞌ Israel.
31 ¿Achakile daa chonḻilallꞌcho Jesúzaꞌ chzoacho leyaꞌ kaꞌlə? ¡Bi nakan kaꞌ! Ḻaꞌ ṉezicho nakan to dii zakii.