4
¿Bera ka iṉacho c̱he dii x̱ozxtoꞌcho Abrahamaꞌ? Nak gok biyakeꞌ beṉꞌ ḻi beṉꞌ shaoꞌ lao Chiozaꞌ.
2 Sheḻꞌkaꞌ biyak dii Abrahamaꞌ beṉꞌ ḻi beṉꞌ shaoꞌ lao Chiozaꞌ ni c̱heyi diikaꞌ beneꞌ, zaklja bshalj bshoneꞌ lao beṉꞌ yell-lioni, per aga lao Chiozaꞌ.
3 Ḻaꞌ Choꞌa Xtillꞌ Chiozaꞌ nan: “Dii Abrahamaꞌ wyajḻiꞌe c̱he Chiozaꞌ, naꞌ Chiozaꞌ wneꞌ nakeꞌ beṉꞌ ḻi beṉꞌ shaoꞌ laweꞌnaꞌ.”
4 Katꞌ to wen llin chkaa laxjeꞌ, bi nakan to dii chzani beṉꞌ choꞌeneꞌ, san nakan dii chiyaḻꞌkz wiꞌeneꞌ.
5 Per shi to beṉꞌ shajḻiꞌe c̱he Chios, beenaꞌ chiyon beṉꞌ saaxyanaꞌ beṉꞌ ḻi beṉꞌ shaoꞌ, Chiozaꞌ ileꞌileꞌneꞌ beṉꞌ ḻi beṉꞌ shaoꞌ daa gonḻilalleeneꞌ, ḻaꞌkzi bibi beneꞌ kwenc̱he idoḻee yeḻꞌ goklen c̱he Chiozaꞌ.
6 Dii Davinaꞌ biꞌe dillꞌ c̱he yeḻꞌ mbalaz c̱he beenaꞌ na Chiozaꞌ nakeꞌ beṉꞌ ḻi beṉꞌ shaoꞌ ḻaꞌkzi bibi beneꞌ kwenc̱he bdoḻileꞌn.
7 Ki wna dii Davinaꞌ:
Chakomba beenaꞌ ba biyakxen xtoḻeenaꞌ,
naꞌ ba biyol binit saaxya c̱heꞌnaꞌ.
8 Chakomba beenaꞌ bi yiziꞌ X̱ancho Chiozaꞌneꞌ kwent.
9 ¿Achakile to beṉꞌkaꞌ yoozgakeꞌ seṉ daa le circuncisión wak soagakeꞌ mbalaz? Bi nakan kaꞌ, san ḻekzkaꞌ beṉꞌkaꞌ bi yoo seṉnaꞌ wak soagakeꞌ mbalaz. Ḻaꞌ ba wniakzꞌ Chiozaꞌ wneꞌ dii Abrahamaꞌ gokeꞌ beṉꞌ ḻi beṉꞌ shaoꞌ laweꞌnaꞌ daa wyajḻiꞌe c̱heꞌ.
10 Naꞌ ¿batran wna Chiozaꞌ kaꞌ? ¿Aba wyoo dii Abrahamaꞌ seṉnaꞌ kanaꞌ wna Chiozaꞌ nakeꞌ beṉꞌ ḻi beṉꞌ shaoꞌ? ¿Awa biṉꞌ shoꞌen? Chiozaꞌ wneꞌ kaꞌ kanaꞌ biṉꞌ shoꞌen.
11 Naꞌtechlə wloo kwineꞌ seṉ daa le circuncisión naꞌ seṉnaꞌ bliꞌn ba nakeꞌ beṉꞌ ḻi beṉꞌ shaoꞌ lao Chiozaꞌ daa benḻilalleeneꞌ. Daan, dii Abrahamaꞌ nakeꞌ x̱ozxtoꞌ yogꞌ beṉꞌ nak beṉꞌ ḻi beṉꞌ shaoꞌ lao Chiozaꞌ daa nonḻilallꞌgakeꞌneꞌ, ḻaꞌkzi bi yoogakeꞌ seṉnaꞌ.
12 Naꞌ dii Abrahamaꞌ ḻekzkaꞌ nakeꞌ x̱ozxtoꞌ netoꞌ yoontoꞌ seṉ daa le circuncisión. Per aga daa yoontoꞌ seṉnaꞌzan, san daa nonḻilallꞌntoꞌ Chiozaꞌ, beenaꞌ ba nonḻilallꞌ dii Abrahamaꞌ kanaꞌ ziꞌ shoꞌe seṉnaꞌ.
13 Chiozaꞌ bc̱hebeꞌ gaki c̱he dii Abrahamaꞌ len xiiṉ dia c̱heꞌkaꞌ doxen yell-lioni. Naꞌ bc̱hebeꞌ wiꞌen ḻegakeꞌ aga daa bengakeꞌ doxen ka na ley c̱he dii Moisézanꞌ, san daa benḻilallꞌ dii Abrahamaꞌ Chiozanꞌ, wna Chiozaꞌ nakeꞌ beṉꞌ ḻi beṉꞌ shaoꞌ laweꞌnaꞌ.
14 Ḻaꞌ sheḻꞌ to beṉꞌkaꞌ chonz ka na leyanꞌ gaki c̱hegakeꞌ daa bc̱heb Chiozaꞌ wiꞌe dii Abrahamaꞌ, bibi zjanayin gonḻilallꞌcho Chiozaꞌ naꞌ aga bi zakii daa bc̱hebeꞌ goneꞌ, sheḻꞌkaꞌ.
15 Leyaꞌ nsaꞌn yeḻꞌ zakꞌziꞌ c̱he beṉꞌkaꞌ bi chon ka nan. Per shi bibi ley de, aga bi de dii iṉan napgakeꞌ doḻꞌ.
16 Ka nak daa bc̱heb Chiozaꞌ goneꞌ c̱he dii Abrahamaꞌ, nakan to goklen daa choneꞌ c̱he nottez beṉꞌ nonḻilalleeneꞌ kwenc̱he yogꞌzə xiiṉ dia c̱heꞌkaꞌ ikaagakeꞌ daa weꞌ Chiozaꞌ ḻegakeꞌ. Bi nakan c̱he to beṉꞌkaꞌ chonz ka na leyaꞌ, san ḻekzkaꞌ nakan c̱he nottezə beṉꞌ chonḻilallꞌ Chiozaꞌ ka benḻilallꞌ dii Abrahamaꞌ ḻeꞌ. Ḻaꞌ dii Abrahamaꞌ nakeꞌ x̱ozxtoꞌ yogꞌcho choꞌ nonḻilallꞌchoneꞌ.
17 Ka na Choꞌa Xtillꞌ Chiozaꞌ: “Ba nzoaꞌ liꞌ kwenc̱he gakoꞌ x̱axṉaꞌ beṉꞌ zan inlleb.” Naꞌ Chiozaꞌ, beenaꞌ benḻilallꞌ dii Abrahamaꞌ, napeꞌ yeḻꞌ wak yisbaneꞌ beṉꞌ wetkaꞌ naꞌ wx̱e wsileꞌ diikaꞌ biṉꞌ gak.
18 Kanaꞌ bich non dii Abrahamaꞌ lez soa xiiṉeꞌ, wyajḻiꞌe daa goll Chiozaꞌneꞌ naꞌ beneꞌ lez gak ka golleꞌneꞌ. Kaꞌ gok biyakeꞌ x̱ozxtoꞌ beṉꞌ zan inlleb, kon ka goll Chiozaꞌneꞌ, chiꞌe: “Kanꞌ shesh shan xiiṉ dia c̱hoꞌkaꞌ.”
19 Biga gokc̱hoplallee c̱he Chiozaꞌ, ḻaꞌkzi chakbeꞌileꞌ ba nakeꞌ beṉꞌ golə par soa xiiṉeꞌ, ḻaꞌ ba zoa gakileꞌ to guiyoa yizan. Naꞌ ni bi gokc̱hoplallee ḻaꞌkzi gok dii Sáranaꞌ nool will.
20 Bi gokc̱hoplallee, san zizikli benḻilallee gak daa bc̱heb Chiozaꞌ goneꞌ naꞌ beꞌlaweeneꞌ.
21 Ḻaꞌ wṉezileꞌ kwasḻoḻ Chiozaꞌ napeꞌ yeḻꞌ wak kwenc̱he goneꞌ yogꞌ diikaꞌ chc̱hebeꞌ.
22 Daan bleꞌi Chiozaꞌneꞌ beṉꞌ ḻi beṉꞌ shaoꞌ daa wyajḻiꞌe c̱heꞌ.
23 Naꞌ daa nan “Chiozaꞌ bleꞌileꞌneꞌ beṉꞌ ḻi beṉꞌ shaoꞌ”, aga c̱he tozenꞌ nan kaꞌ,
24 san ḻekzkaꞌ choꞌen dillꞌ c̱hecho choꞌ nonḻilallꞌcho Chiozaꞌ, beenaꞌ bisbaneꞌ X̱ancho Jesucrístonaꞌ ladj beṉꞌ wetkaꞌ, ḻaꞌ lenchon chleꞌi Chiozaꞌ beṉꞌ ḻi beṉꞌ shaoꞌ daa nonḻilallꞌchoneꞌ.
25 Bzani Chiozaꞌ X̱ancho Jesucrístonaꞌ witeꞌ ni c̱he saaxya c̱hechokaꞌ naꞌ bisbaneꞌneꞌ ladj beṉꞌ wetkaꞌ kwenc̱he biyakcho beṉꞌ ḻi beṉꞌ shaoꞌ laweꞌnaꞌ.