5
Chiozaꞌ ba biyoneꞌ choꞌ beṉꞌ ḻi beṉꞌ shaoꞌ daa ba nonḻilallꞌchoneꞌ, naꞌ ba bizoalenchoneꞌ wen daa wit X̱ancho Jesucrístonaꞌ ni c̱hecho.
2 Naꞌ daa ba nonḻilallꞌcho Crístonaꞌ, Chiozaꞌ toshiizi chonileꞌ choꞌ wen naꞌ chibaicho daa noncho lez lljazoalenchoneꞌ.
3 Naꞌ aga to dgazan yibaicho, san ḻekzkaꞌ yibaicho yeḻꞌ zakꞌziꞌkaꞌ chleꞌicho yell-lioni, daa ṉezicho chongakan ka soac̱hec̱hcho gonḻilallꞌchoneꞌ.
4 Naꞌ shi zoac̱hec̱hcho chonḻilallꞌchoneꞌ shlak chllaglocho yeḻꞌ zakꞌziꞌkaꞌ, naꞌ chliꞌn nakchacho lao Chiozaꞌ. Naꞌ shi nakchacho lao Chiozaꞌ naꞌ noncho lez lljazoalenchoneꞌ.
5 Naꞌ ka nak daa noncho lez, bi te bi ḻa ki gakan, ḻaꞌ Chiozaꞌ ba bliileꞌ choꞌ yeḻꞌ chaki c̱heꞌnaꞌ daa ba nzoeꞌ Espíritu Santo c̱heꞌnaꞌ ḻoo yic̱hjlallꞌdoꞌchoni.
6 Kanaꞌ ni nakcho beṉꞌ wen dii mal naꞌ aga bi gok goncho kwenc̱he bi kwiayiꞌcho, kanaꞌyeṉꞌ bid Crístonaꞌ witeꞌ ni c̱hecho choꞌ nakcho beṉꞌ saaxya.
7 Aga ga zoa to beṉꞌ lii izanteyi kwineꞌ gueteꞌ ni c̱he to beṉꞌ nak beṉꞌ ḻi beṉꞌ shaoꞌ. Kayaadia shi yiyaxji to beṉꞌ izani kwineꞌ gueteꞌ lwaa to beṉꞌ wen.
8 San Chiozaꞌ bliꞌe ka chakileꞌ choꞌ daa bzanileꞌ Crístonaꞌ witeꞌ ni c̱hecho kanaꞌ ni nakcho beṉꞌ saaxya.
9 Daa blalj xc̱hen Crístonaꞌ witeꞌ ni c̱hecho, ba biyon Chiozaꞌ choꞌ beṉꞌ ḻi beṉꞌ shaoꞌ laweꞌnaꞌ. Naꞌ daa witeꞌ ni c̱hecho, ¿alechlin ki yisleꞌ choꞌ lao yeḻꞌ zakꞌziꞌnaꞌ katꞌ illin lla wc̱hoglo Chiozaꞌ c̱he yogꞌḻoḻ beṉꞌ?
10 Shi kanaꞌ chakzbanicho Chiozaꞌ, bseḻee Xiiṉeꞌnaꞌ witeꞌ ni c̱hecho kwenc̱he bizoalenchoneꞌ wen, ¿alechlin ṉaa ba bisbaneꞌneꞌ ladj beṉꞌ wetkaꞌ ki yisleꞌ choꞌ daa ba zoalenchoneꞌ wen?
11 Naꞌ aga diikaꞌz chibaicho, san ḻekzkaꞌ daa nombiaꞌcho Chiozaꞌ, ḻaꞌ ni c̱he X̱ancho Jesucristonanꞌ bizoalencho Chiozaꞌ wen.
12 Ni c̱he yeḻꞌ widenag c̱he toz beṉaan golj wxe saaxyanaꞌ yell-lioni, naꞌ ni c̱he saaxyanaꞌ wyoo yeḻꞌ witaꞌ. Kaꞌ gok wzolo chet yogꞌ beṉꞌ, ḻaꞌ yogꞌzə beṉꞌ chongakeꞌ dii malaꞌ.
13 Kanaꞌ ziꞌ weꞌ Chiozaꞌ dii Moisézaꞌ ley c̱heꞌnaꞌ, ba chonkzə beṉꞌ yell-lioni dii malaꞌ. Per shi bibi ley de, aga bi de dii gawan xya c̱hegakeꞌ.
14 Ḻaꞌkzi aga bi ley gotꞌ dii gawan xya c̱hegakeꞌ, yeḻꞌ witaꞌ wṉabiaꞌn lao yogꞌḻoḻ beṉꞌkaꞌ ben dii malaꞌ wzololenzan dii Adánnaꞌ bllinten kanaꞌ wban dii Moisézaꞌ, ḻaꞌkzi bi wdishjgakeꞌ choꞌa xtillꞌ Chiozaꞌ ka ben dii Adánnaꞌ. Ni c̱he dii Adánnaꞌ wyoo yeḻꞌ witaꞌ yell-lioni, san Jesucrístonaꞌ, beenaꞌ wloo Chiozaꞌ xṉezin wseḻee kaniꞌteyi, bx̱ieꞌ yeḻꞌ mban zejḻi kaṉi.
15 Per ka nak dii malaꞌ ben dii Adánnaꞌ, bi gak wsaklebichon ka dii wennaꞌ ben Chiozaꞌ c̱hecho, dii xen wal nllaꞌn. Daa bx̱iṉj bḻen dii Adánnaꞌ yogꞌzə beṉꞌ chet, san daa bseḻꞌ Chiozaꞌ Jesucrístonaꞌ kwenc̱he witeꞌ ni c̱hecho, beneꞌ to dii wen inlleb c̱he yogꞌ beṉꞌ gonḻilalleeneꞌ.
16 Bi gak wsaklebicho daa ben dii Adánnaꞌ kon yeḻꞌ goklen daa ben Chiozaꞌ c̱hecho. Ḻaꞌ wchogbiaꞌ c̱he yogꞌḻoḻ beṉꞌ guetgakeꞌ ni c̱he toz dii malaꞌ daa ben dii Adánnaꞌ; san yeḻꞌ goklen c̱he Chiozaꞌ daa choneꞌ c̱hecho chiyoneꞌ choꞌ beṉꞌ ḻi beṉꞌ shaoꞌ laweꞌnaꞌ, ḻaꞌkzi nakcho beṉꞌ saaxya nlleb.
17 Shi yeḻꞌ witaꞌ wṉabiaꞌn daa bx̱iṉj bḻen dii Adánnaꞌ, ¿alechlin ki iṉabiaꞌ beṉꞌkaꞌ ba biyon Chiozaꞌ beṉꞌ ḻi beṉꞌ shaoꞌ daa nakeꞌ beṉꞌ wen inlleb, ni c̱he Jesucrístonaꞌ, beenaꞌ beꞌ to yeḻꞌ mban kob c̱hegakeꞌ?
18 Dii malaꞌ ben dii Adánnaꞌ benan ka bc̱hoglo Chiozaꞌ c̱he yogꞌ beṉꞌ guetgakeꞌ, naꞌ kaꞌkzə dii wennaꞌ daa ben Jesucrístonaꞌ benan ka yogꞌ beṉꞌkaꞌ gonḻilallꞌgakeꞌneꞌ yiyakgakeꞌ beṉꞌ ḻi beṉꞌ shaoꞌ naꞌ gatꞌ yeḻꞌ mban c̱hegakeꞌ daa bi te c̱heyin.
19 Daa gok dii Adánnaꞌ widenag, wchoglo c̱he yogꞌ beṉꞌ nakgakeꞌ beṉꞌ saaxya, per daa gok Crístonaꞌ beṉꞌ wizoa dillꞌ, beṉꞌ zan yiyak beṉꞌ ḻi beṉꞌ shaoꞌ.
20 Chiozaꞌ biꞌe ley c̱heꞌnaꞌ kwenc̱he wyanch xtoḻꞌ beṉꞌ yell-lioni daa bi bzenaggakeꞌ c̱heyin. Per ḻaꞌkzi wyanch xtoḻeekaꞌ, Chiozaꞌ bliꞌcheꞌ yeḻꞌ chiyeshꞌlallii c̱heꞌnaꞌ.
21 Naꞌ daa chet yogꞌ beṉꞌ, chliꞌn saaxyanaꞌ napan yeḻꞌ wak wsi wc̱hogan choꞌ. Per ḻekzkaꞌ yeḻꞌ chiyeshꞌlallii c̱he Chiozaꞌ chliꞌn napan yeḻꞌ wak yiyonan choꞌ beṉꞌ ḻi beṉꞌ shaoꞌ naꞌ goṉan yeḻꞌ mban c̱hecho zejḻi kaṉi ni c̱he Jesucrístonaꞌ, beenaꞌ nak X̱ancho.