6
¿Beran iṉacho ṉaa, lla? ¿Agonchcho saaxyanaꞌ kwenc̱he wliꞌch Chiozaꞌ yeḻꞌ chiyeshꞌlallii c̱heꞌnaꞌ?
2 ¡Aga kanꞌ goncho! Ḻaꞌ choꞌ ba nakcho ka beṉꞌ ba wit lao saaxyanaꞌ daa bich chṉabiꞌan choꞌ. Daan, bich chiyaḻꞌ gonchon txen.
3 ¿Abi ṉezile ka wchoacho nisaꞌ daa nakcho Cristo Jesúzaꞌ txen, ḻekzkaꞌ zejin witlenchonenꞌ?
4 Daa wchoacho nisaꞌ zejin witlenchoneꞌ naꞌ bgashꞌlenchoneꞌ kwenc̱he gatꞌ to yeḻꞌ mban kob c̱hecho ka gok c̱he Crístonaꞌ kanaꞌ bisban X̱acho Chiozaꞌ ḻeꞌ kon yeḻꞌ wak xen c̱heꞌnaꞌ.
5 Naꞌ daa ba witlenchoneꞌ, kaꞌkzan yibancho ka bibaneꞌ ladj beṉꞌ wetkaꞌ.
6 Ṉezicho yeḻꞌ mbannaꞌ nsaꞌcho kanaꞌ, wlliayiꞌn ka wit Crístonaꞌ ḻee yag cruzaꞌ kwenc̱he bich weꞌcho choꞌa xbayi beli chennaꞌ naꞌ bich iṉabiaꞌ dii malaꞌ choꞌ.
7 Ḻaꞌ katꞌ to beṉꞌ ba witeꞌ, bich chṉabiaꞌ dii malaꞌ ḻeꞌ.
8 Naꞌ shi ba witlencho Crístonaꞌ, ba nxenlallꞌcho ḻekzkaꞌ ibanlenchoneꞌ.
9 Ṉezicho biban Crístonaꞌ ladj beṉꞌ wetkaꞌ naꞌ bich gueteꞌ dii yoblə, ḻaꞌ bich so saki yeḻꞌ witaꞌ ḻeꞌ.
10 Naꞌ ka wit Crístonaꞌ, shlin shlax̱jzan bsol bṉiteꞌ yeḻꞌ wak c̱he saaxyanaꞌ. Naꞌ daa mbaneꞌ ṉaa, zoeꞌ choneꞌ ka cheeni Chiozaꞌ.
11 Naꞌ kaꞌkzə leꞌ, chiyaḻꞌ gakbeꞌile ba nakle ka beṉꞌ ba wit lao saaxyanaꞌ daa bich chṉabiaꞌn leꞌ, per mbanle lao Chiozaꞌ naꞌ zoale chonle ka cheenileꞌ daa nakle X̱ancho Cristo Jesúzaꞌ txen.
12 Daan bi chiyaḻꞌ weꞌle latj iṉabiaꞌ dii malaꞌ leꞌ kwenc̱he weꞌzle choꞌa xbayi beli chen c̱helenaꞌ daa ileꞌi yeḻꞌ witaꞌ.
13 Bi chiyaḻꞌ gon kwerp c̱helenaꞌ lallꞌ naꞌ saaxyanaꞌ kwenc̱he gonle dii malaꞌ, san chiyaḻꞌ gon kwinle do ka nakle lallꞌ naꞌ Chiozaꞌ kwenc̱he gonle ka cheenileꞌ. Ḻaꞌ wak iṉacho Chiozaꞌ ba bisbaneꞌ leꞌ ladj beṉꞌ wetkaꞌ daa ba beṉeꞌ leꞌ to yeḻꞌ mban kob.
14 Bich chiyaḻꞌ iṉabiaꞌ dii malaꞌ leꞌ, ḻaꞌ bich zoale xṉiꞌa leyaꞌ, san daa biyeshꞌlallii Chiozaꞌ leꞌ, ba zoalenle yeḻꞌ goklen c̱heꞌnaꞌ.
15 ¿Nakrazə, lla? Ṉaa ba biyeshꞌlallii Chiozaꞌ choꞌ, naꞌ bich zoacho xṉiꞌa leyaꞌ, ¿agonchcho dii malaꞌ? ¡Bi chiyaḻꞌ goncho kaꞌ!
16 Ṉezkzile shi ba ben kwincho lo naꞌ beṉꞌ kwenc̱he goncho bittez daa neꞌ, choeꞌcho latj chṉabiꞌe chonꞌ. Kaꞌkzan, shi chzenagcho c̱he dii malaꞌ, naꞌ iṉabiaꞌn choꞌ naꞌ wlliayiꞌn choꞌ. Naꞌ shi weꞌcho latj iṉabiaꞌ Chiozaꞌ choꞌ, wiyoneꞌ choꞌ beṉꞌ ḻi beṉꞌ shaoꞌ.
17 Per chox̱ken Chiozaꞌ, ḻaꞌkzi kanaꞌ wṉabiaꞌ dii malaꞌ leꞌ naꞌ benle ka nan, ṉaa do yic̱hj do lallꞌle ba chzoale xtilleenaꞌ daa bliꞌ bsedgakileꞌ leꞌ.
18 Ṉaa ba biyell bilaꞌle lao dii malaꞌ, naꞌ ba biyakle lallꞌ naꞌ Chiozaꞌ kwenc̱he gonle ka cheenileꞌ.
19 Ba biꞌa dillꞌ c̱he daa chak c̱hecho choꞌ beṉec̱h kwenc̱he shajniile dga niaꞌ leꞌ. Kanaꞌ ben kwinle lallꞌ naꞌ saaxyanaꞌ len dii zbankaꞌ cheeni beli chen c̱helenaꞌ kwenc̱he benle dii malkaꞌ. Naꞌ ṉaa, ḻi gon kwinle lallꞌ naꞌ Chiozaꞌ kwenc̱he soale gonle ka cheenileꞌ.
20 Shlak beꞌle latj wṉabiaꞌ dii malaꞌ leꞌ, aga bzenagle c̱he Chiozaꞌ naꞌ bi benle ka cheenileꞌ.
21 Naꞌ aga bi banez wxiꞌle c̱he dii malaꞌ benle naꞌ ṉaa chiyii chidoꞌlenileꞌn, ḻaꞌ yeḻꞌ witchokzan nsaꞌn.
22 San ṉaa ba bisell biḻaꞌ Chiozaꞌ leꞌ lo ṉiꞌa naꞌ dii malaꞌ naꞌ ba chonle ka cheenileꞌ, de banez c̱heyin daa zejch chonle daa nak wen, naꞌ gatꞌ yeḻꞌ mban c̱hele zejḻi kaṉi.
23 Laxj beenaꞌ chon saaxyanaꞌ nakan yeḻꞌ wit, san daa chzani Chiozaꞌ wiꞌe beenaꞌ gonḻilallee X̱ancho Cristo Jesúzaꞌ nakan to yeḻꞌ mban zejḻi kaṉi.