7
Leꞌ beṉꞌ bishꞌ naꞌ leꞌ beṉꞌ zanꞌ, nombiaꞌle leyaꞌ naꞌ ṉezile leyaꞌ chṉabiꞌan beṉꞌ shlak mbaneꞌ.
2 Naꞌ ka nak leyaꞌ, choꞌen dillꞌ nan noolaꞌ nshagnaꞌ chiyaḻꞌ soaleneꞌ beṉꞌ c̱heꞌnaꞌ shlak mbaneꞌ, per shi guet beṉꞌ c̱heꞌnaꞌ, wak yikee beṉꞌ yoblə.
3 Shi lljsoaleneꞌ beṉꞌ yoblə shlak ni mban beṉꞌ c̱heꞌnaꞌ, nakan xya. Per shi ba wit beṉꞌ c̱heꞌnaꞌ, leyaꞌ nan wak yikee beṉꞌ yoblə, naꞌ bi nakan xya.
4 Naꞌ kaꞌkzan c̱hele leꞌ, nakcho txen nonḻilallꞌcho Crístonaꞌ, leꞌ beṉꞌ bishꞌdawaa naꞌ leꞌ beṉꞌ zandawaa. Daa nonḻilallꞌle Crístonaꞌ, beenaꞌ wit ni c̱hecho, zejin ḻekzkaꞌ ba nakle ka beṉꞌ ba wit lao leyaꞌ naꞌ bich chṉabiꞌan leꞌ. Naꞌ ṉaa ba biyakle lallꞌ naꞌ beṉꞌ yoblə, beenaꞌ witeꞌ naꞌ bibaneꞌ ladj beṉꞌ wetkaꞌ, kwenc̱he goncho ka cheeni Chiozaꞌ.
5 Kanaꞌ wzoacho beꞌcho choꞌa xbayi beli chennaꞌ, leyaꞌ wloochan ltip beli chen c̱hechokaꞌ naꞌ benchcho dii malaꞌ, naꞌ saaxyanaꞌ daa bencho bsaꞌn yeḻꞌ wit.
6 Per ṉaa, ba nakcho ka beṉꞌ ba wit lao leyaꞌ daa btakw bc̱hejan choꞌ, naꞌ ba biyell bilaꞌcho kwenc̱he goncho ka cheeni Chiozaꞌ daa ba bikob Espíritu Sántonaꞌ yic̱hjlallꞌdoꞌchoni, naꞌ bich chṉabiaꞌ leyaꞌ choꞌ.
7 Bi chiyaḻꞌ iṉacho leyaꞌ nakan dii mal. Ḻaꞌ ḻennanꞌ bzajniin nadꞌ nan malanꞌ chonꞌ. Aga ṉezidꞌ shi nakan mal selallaa bi de c̱he beṉꞌ sheḻꞌkaꞌ ki leyaꞌ nan: “Bi selalloo bi de c̱he beṉꞌ.”
8 Per dii malaꞌ yoo ḻoo yic̱hjlallꞌdawaani bc̱hinan dga bllia Chiozaꞌ biaꞌ kwenc̱he wloochan ltip beli chen c̱haꞌni naꞌ chiya dii wzelallaa. Ḻaꞌ sheḻꞌ bibi leyaꞌ gotꞌ, bibi de daa iṉan nakcho beṉꞌ wix̱iṉj wiḻen, sheḻꞌkaꞌ.
9 Kanaꞌ biṉꞌ iṉezidꞌ daa na leyaꞌ, gokidꞌ ḻe wen nsaꞌ c̱haꞌ, per ka wṉezidꞌ daa nllia leyaꞌ biaꞌ, zizikli benzꞌ dii malaꞌ daa wlliayiꞌ nadꞌ.
10 Daa bllia Chiozaꞌ biaꞌ goncho kwenc̱he gaklenan choꞌ gatꞌ yeḻꞌ mban c̱hecho, bc̱hoglolan c̱haꞌ nan chiyaḻꞌ guetꞌ.
11 Ḻaꞌ dii malaꞌ yoo ḻoo yic̱hjlallꞌdawaani bc̱hinan leyaꞌ naꞌ wxiyeꞌn nadꞌ kwenc̱he blliayiꞌn nadꞌ.
12 Leyaꞌ dii ḻicha nakan c̱he Chiozaꞌ, naꞌ yogꞌ daa nllian biaꞌ nakan dii wna Chiozaꞌ, nakan dii ḻi dii shaoꞌ naꞌ dii wen.
13 Leyaꞌ nakan wen naꞌ aga ḻennanꞌ benan ka kwiayaa. San dii malaꞌ yoo ḻoo yic̱hjlallꞌdawaꞌnin bc̱hinan leyaꞌ daa nak dii wen kwenc̱he blliayiꞌn nadꞌ. Naꞌ daa nakan kaꞌ, ni c̱he leyaꞌ bliꞌlao saaxyanaꞌ nakan dii mal inlleb.
14 Ṉezicho leyaꞌ nakan c̱he Chiozaꞌ, san nadꞌ, ḻega beṉꞌ de beli chen chonꞌ, naꞌ chṉabiaꞌ dii malaꞌ nadꞌ daa chonꞌ ka nan.
15 Bi chajniidꞌ ka chonꞌ, ḻaꞌ bi chonꞌ dii wennaꞌ daa cheenidꞌ gonꞌ, san dii malaꞌ daa chakzbanidꞌ, ḻelan chonzꞌ.
16 Naꞌ katꞌ chonꞌ daa bi cheenidꞌ gonꞌ, chakbeꞌidꞌ leyaꞌ nakan wen.
17 Naꞌ aga iṉacho nadaan chonꞌ kaꞌ, san dii malaꞌ daa daa yoo ḻoo yic̱hjlallꞌdawaanin chlligaan nadꞌ kwenc̱he chonꞌ dii malaꞌ.
18 Nadꞌ ṉezidꞌ aga bi dii wen cheeni beli chenni gonan. Naꞌ ḻaꞌkzi ḻe llialallaa gonꞌ dii wennaꞌ, bi chak gonaꞌn.
19 Bi chizoidꞌ gonꞌ dii wennaꞌ daa cheenidꞌ gonꞌ, san dii malaꞌ daa bi cheenidꞌ gonꞌ, ḻelan chonzꞌ.
20 Naꞌ daa chonꞌ daa bi cheenidꞌ gonꞌ, zejin aga nadaan chonaꞌn, san dii malaꞌ daa chṉabiaꞌ ḻoo yic̱hjlallꞌdawaanin chonan daa.
21 Chakbeꞌyeṉidꞌ ḻaꞌkzi cheenidꞌ gonꞌ daa nak wen, dii malalə chonꞌ.
22 Ḻaꞌkzi chibayi ḻoo yic̱hjlallꞌdawaani ley c̱he Chiozaꞌ,
23 chakbeꞌidꞌ de daa chsej chllonan gonꞌ daa ṉezidꞌ nak wen, ḻaꞌ dii malaꞌ daa chṉabiaꞌ nadꞌ chtakw chc̱hejan nadꞌ kwenc̱he gonꞌ daa bi nak wen.
24 ¡Ḻe nyeshꞌ chak c̱haꞌ! ¿Notgui yisell yiḻaꞌ nadꞌ lao beli chenni dga ba nchogbiaꞌ kwiayiꞌ?
25 Choꞌa Chiozaꞌ yeḻꞌ chox̱ken daa wit X̱ancho Jesucrístonaꞌ naꞌ bisleꞌ nadꞌ lo naꞌ dii malaꞌ. Naꞌ kin chajniidaꞌn: chibaidꞌ gonꞌ ka na ley c̱he Chiozaꞌ, per beli chen c̱haꞌni chlligaan nadꞌ kwenc̱he gonꞌ dii malaꞌ.