8
Naꞌ ṉaa, bich bi yeḻꞌ zakꞌziꞌ c̱he Chiozaꞌ yen ileꞌi beṉꞌkaꞌ nak Cristo Jesúzaꞌ txen, beṉꞌkaꞌ bich chongakeꞌ ka na beli chen c̱heꞌkaꞌ, san ba chongakeꞌ ka cheeni Espíritu c̱he Chiozaꞌ.
2 Ḻaꞌ daa nonḻilallꞌcho Cristo Jesúzaꞌ, Espíritu c̱he Chiozaꞌ ba beṉeꞌ yeḻꞌ mban kob c̱hecho, naꞌ daa chṉabiaꞌ Espíritunaꞌ choꞌ, bich chṉabiaꞌ saaxyanaꞌ choꞌ daa nsaꞌ yeḻꞌ witaꞌ.
3 Ley daa bzej dii Moisézaꞌ bi gok yislan choꞌ lao saaxyanaꞌ daa choncho ka na beli chennaꞌ. Daan Chiozaꞌ bseḻee X̱iineꞌnaꞌ gokeꞌ beṉꞌ de beli chen ka choꞌ per bi gokeꞌ beṉꞌ saaxya, naꞌ wdixjeꞌ saaxya c̱hechokaꞌ ka witeꞌ kwenc̱he bich iṉabiaꞌn choꞌ.
4 Chiozaꞌ bseḻee Crístonaꞌ ni c̱hecho kwenc̱he so sakicho goncho wen laweꞌnaꞌ ka na ley c̱heꞌnaꞌ. Naꞌ bich soacho goncho ka cheeni beli chennaꞌ san soacho goncho ka cheeni Espíritu c̱he Chiozaꞌ.
5 Beṉꞌkaꞌ ni chzenag c̱he dii malaꞌ yoo ḻoo yic̱hjlallꞌdoꞌekaꞌ, toz ḻen zegakeꞌ wṉeyi chongakeꞌ; san beṉꞌkaꞌ chzenag c̱he Espíritu c̱he Chiozaꞌ, zegakeꞌ wṉeyi gongakeꞌ daa cheenileꞌ.
6 Beṉꞌkaꞌ yoo yic̱hjgakeꞌ gongakeꞌ dii malaꞌ, kwiayiꞌgakeꞌ; san beṉꞌkaꞌ yoo yic̱hjgakeꞌ gongakeꞌ ka na Espíritu c̱he Chiozaꞌ, gatꞌ yeḻꞌ mban c̱hegakeꞌ zejḻi kaṉi naꞌ soagakeꞌ mbalaz.
7 Beṉꞌkaꞌ chibayi chon dii malaꞌ, chakzbangakileꞌ Chiozaꞌ, ḻaꞌ bi chzenaggakeꞌ ka na ley c̱heꞌnaꞌ, ni bi chak gongakeꞌ ka nan.
8 Beṉꞌkaꞌ ni chibayi chon dii malaꞌ, Chiozaꞌ bi chazlallee ka chongakeꞌ.
9 Per leꞌ, bich chzenagle c̱he dii malaꞌ san chzenagle c̱he Espíritu c̱he Chiozaꞌ, shi ba zoeꞌ ḻoo yic̱hjlallꞌdoꞌlenaꞌ. Naꞌ shi no bi zoa Espíritu c̱he Crístonaꞌ ḻoo yic̱hjlallꞌdoꞌenaꞌ, bi nakeꞌ lallꞌ naꞌ Crístonaꞌ.
10 Ḻaꞌkzi ba nakan guet kwerp c̱helenaꞌ daa nakle beṉꞌ saaxya, per shi nakle Crístonaꞌ toz, Espíritu c̱heꞌnaꞌ zoeꞌ ḻoo yic̱hjlallꞌdoꞌlenaꞌ naꞌ dekzə yeḻꞌ mban kob c̱hele daa ba biyakle beṉꞌ ḻi beṉꞌ shaoꞌ lao Chiozaꞌ.
11 Naꞌ shi Espíritu c̱he Chiozaꞌ, beenaꞌ bisbaneꞌ Jesúzaꞌ ladj beṉꞌ wetkaꞌ, zoeꞌ ḻoo yic̱hjlallꞌdoꞌlenaꞌ, Chiozaꞌ ḻekzkaꞌ goṉeꞌ to yeḻꞌ mban kob c̱he kwerp c̱helenaꞌ daa guet, daa zoa Espíritu c̱heꞌnaꞌ ḻoo yic̱hjlallꞌdoꞌlenaꞌ.
12 Daan, leꞌ beṉꞌ bishꞌ naꞌ leꞌ beṉꞌ zanꞌ, chonan byen goncho ka cheeni Chiozaꞌ naꞌ bi goncho kon daa nazan c̱he beli chenni.
13 Ḻaꞌ shi weꞌchcho choꞌa xbayi beli chenni, naꞌ guetcho; san shi weꞌcho latj gaklen Espíritu c̱he Chiozaꞌ choꞌ kwenc̱he kwej yic̱hjcho dii malaꞌ daa nan goncho, naꞌ gatꞌ yelꞌ mban c̱hecho zejḻi kaṉi.
14 Yogꞌ beṉꞌkaꞌ chzenaggakeꞌ c̱he Espíritu c̱he Chiozaꞌ naꞌ chongakeꞌ ka cheenileꞌ, ḻegakenꞌ nakgakeꞌ xiiṉ Chios.
15 Choꞌ ba zoa Espíritu c̱he Chiozaꞌ ḻoo yic̱hjlallꞌdoꞌchoni, bich chak c̱hecho ka chak c̱he beenaꞌ zoa beṉꞌ chṉabiꞌeneꞌ naꞌ chall chllebeꞌneꞌ, san daa zoa Espíritu c̱heꞌnaꞌ ḻoo yic̱hjlallꞌdoꞌchonanꞌ, zejin ba wkaa Chiozaꞌ choꞌ ka xiiṉeꞌ. Naꞌ daa zoalen Espíritunaꞌ chonꞌ, chak cheꞌchoneꞌ: “X̱adawaa.”
16 Naꞌ Espíritu c̱heꞌnaꞌ ḻekzkaꞌ chzajniileꞌ choꞌ kwenc̱he chṉezicho nakcho xiiṉ Chios.
17 Naꞌ daa nakcho xiiṉ Chiozaꞌ, ḻekzkaꞌ wllin lla ikaalencho Crístonaꞌ daa goṉeꞌ, ḻaꞌ shi goncho banez yeḻꞌ zakꞌziꞌkaꞌ ka diikaꞌ ben bleꞌi Crístonaꞌ, naꞌ gakchoneꞌ txen shoꞌlenchoneꞌ balaaṉ.
18 Naꞌ ka nak yeḻꞌ zakꞌziꞌkaꞌ chen chleꞌicho yell-lioni, aga wllinlebin ka balaaṉ xennaꞌ shoꞌlenchoneꞌ.
19 Naꞌ yogꞌ diikaꞌ bx̱e bsil Chiozaꞌ chbezgakan yob illin lla wliꞌlao ba nakcho xiiṉ Chiozaꞌ.
20 Ḻaꞌ yogꞌ diikaꞌ bx̱e bsil Chiozaꞌ bich nakshaoꞌgakan ka gokgakan dii nech. Naꞌ aga ḻegakannanꞌ goklallꞌgakan gakgakan kaꞌ, ḻaꞌ Chiozanꞌ bllieꞌ biaꞌ gakgakan kaꞌ, per ḻekzkaꞌ beneꞌ kwenc̱he chbezgakan yiyakshaoꞌgakan.
21 Ḻaꞌ wllin lla katꞌ yogꞌ diikaꞌ bx̱e bsileꞌ bich gakgakan dii kwiayiꞌ, san yiyakgakan mbalaz inlleb ka gak c̱hecho, choꞌ nakcho xiiṉeꞌ.
22 Naꞌ ṉezicho ax̱t ṉaanlla yogꞌ diikaꞌ bx̱e bsileꞌ chak c̱hegakin ka chak c̱he to nool chllagloeꞌ saneꞌ biꞌdoꞌ c̱heꞌnaꞌ.
23 Naꞌ aga toz diikaꞌ ben Chiozanꞌ chak c̱hegakin kaꞌ, kaꞌkzan chak c̱hecho, choꞌ ba yoocho Espíritu c̱heꞌnaꞌ, beenaꞌ chon ka noncho lez gonch Chiozaꞌ dii wen c̱hecho, chbellyeshꞌcho shlak chbezcho yiyoneꞌ kwerp c̱hechoni to dii kob naꞌ wliꞌlao ba noneꞌ choꞌ xiiṉeꞌ.
24 Kon ka bisla Chiozaꞌ choꞌ lo ṉiꞌa naꞌ dii malaꞌ, noncho lez yikobeꞌ kwerp c̱hechoki. Aga daa ba den noncho lez, ḻaꞌ daa ba gok bich nakan dii goncho lez.
25 Per shi ni noncho lez ileꞌicho daa ziꞌ gak, chiyaḻꞌ gapcho yeḻꞌ chxenlallꞌ shlak ni chbezcho gakan.
26 Naꞌ ḻekzkaꞌ Espíritu c̱he Chiozaꞌ chakleneꞌ choꞌ choncho daa bi chak goncho. Ḻaꞌ aga ṉezicho nakan chiyaḻꞌyeṉꞌ weꞌḻwillcho Chiozaꞌ, per kwin Espíritu c̱heꞌnaꞌ chbellyeshee chṉabeꞌ c̱hecho laweꞌnaꞌ. Naꞌ ḻaꞌkzi aga bi dillꞌ chc̱hineꞌ,
27 Chiozaꞌ, beenaꞌ nombiꞌe yic̱hjlallꞌdoꞌ yogꞌcho, ṉezileꞌ bin chṉab Espíritu c̱heꞌnaꞌ c̱hecho. Ḻaꞌ daa chaklallꞌ Chiozanꞌ chṉabeꞌ c̱hecho, choꞌ nakcho lallꞌ nee.
28 Naꞌ ṉezicho Chiozaꞌ chc̱hineꞌ yogꞌ diikaꞌ chen chleꞌicho kwenc̱he gaklengakan choꞌ, choꞌ ba chakichoneꞌ, choꞌ ba wlejeꞌ kwenc̱he gakcho lallꞌ nee kon ka goklallee.
29 Kanaꞌ biṉꞌ soatecho, Chiozaꞌ bleꞌshiileꞌ choꞌ naꞌ wlejeꞌ choꞌ kwenc̱he yiyoneꞌ choꞌ beṉꞌ wen ka nak Xiiṉeꞌ Jesucrístonaꞌ, kwenc̱he Jesucrístonaꞌ gakeꞌ beṉꞌ llialo ladjchoni, choꞌ nakcho beṉꞌ bishee naꞌ beṉꞌ zaneꞌ.
30 Chiozaꞌ wlejeꞌ choꞌ kaniꞌteyi, naꞌ ḻekzkaꞌ gox wṉabeꞌ choꞌ kwenc̱he gokcho lallꞌ nee, naꞌ biyoneꞌ choꞌ beṉꞌ ḻi beṉꞌ shaoꞌ laweꞌnaꞌ. Naꞌ choꞌ ba biyoneꞌ beṉꞌ ḻi beṉꞌ shaoꞌ, ba nakan shoꞌcho to balaaṉ xen.
31 ¿Bera dech iṉacho c̱heyi dga ba ben Chiozaꞌ c̱hecho, lla? Ḻaꞌ shi Chiozaꞌ zoaleneꞌ choꞌ, ¿nora gak bi goni choꞌ?
32 Shi Chiozaꞌ ax̱t ni Xiiṉeꞌnaꞌ bi biyeshileꞌ san bzanileꞌneꞌ witeꞌ ni c̱hecho, ¿alechlin ki goṉeꞌ choꞌ yogꞌḻoḻ diikaꞌ bc̱hebeꞌ?
33 Aga no gak gao xya c̱hecho lao Chiozaꞌ, ḻaꞌ ḻenꞌ ba wlejeꞌ choꞌ naꞌ biyoneꞌ choꞌ beṉꞌ ḻi beṉꞌ shaoꞌ.
34 Naꞌ aga no gak wc̱hoglo c̱hecho guetcho. Ḻaꞌ Cristo Jesúzaꞌ witeꞌ ni c̱hecho, naꞌ bibantieꞌ ladj beṉꞌ wetkaꞌ. Naꞌ chiꞌe kwit de shḻi c̱he Chiozaꞌ, chṉabeꞌ gakleneꞌ choꞌ.
35 Aga bi de dii gonan ka bich gaki Crístonaꞌ choꞌ. Ni yeḻꞌ ziꞌ daa chen chleꞌicho, ni dii lalljkaꞌ chak c̱hecho, ni daa chsakꞌziꞌ beṉꞌ choꞌ, ni daa chbiḻ chdoncho, ni daa bi de xalaancho, ni daa zoacho dii nxoll, wa shi wit beṉꞌ choꞌ.
36 Chak ka na Choꞌa Xtillꞌ Chiozaꞌ daa na:
Daa chzoantoꞌ xtilloonaꞌ toshiizi de dii nxoll c̱hentoꞌ witgakeꞌ netoꞌ.
Chongakileꞌ netoꞌ ka xilꞌdoꞌkaꞌ, bakaꞌ nzoagakeꞌ witgakeꞌ.
37 Per Crístonaꞌ, beenaꞌ chakileꞌ choꞌ, chakleneꞌ choꞌ kwenc̱he goncho gan lao yogꞌḻoḻte diikaꞌ chen chleꞌicho.
38 Naꞌ daan ṉezidꞌ aga bi de dii gonan ka bich gaki Chiozaꞌ choꞌ: ni yeḻꞌ witaꞌ, ni yeḻꞌ mbannaꞌ, ni anjlkaꞌ, ni dii x̱iwꞌkaꞌ, ni daa chak ṉaa, ni daa ziꞌ gakə,
39 ni dii chak ganaꞌ zeelo nak sib wal, ni dii chak ganaꞌ zeelo nak zitj wal, ni bittez dii yoblə dii bx̱e bsil Chiozaꞌ bi gak gonan ka bich gakileꞌ choꞌ, ḻaꞌ ba bliꞌe ḻe chakileꞌ choꞌ daa wit X̱ancho Cristo Jesúzaꞌ ni c̱hecho.