Páblonaꞌ wzoeꞌ Máltanaꞌ
28
Naꞌ ka biyoll billin yogꞌntoꞌ shiꞌa shaoꞌ lo yo billaꞌ, naꞌ wṉezintoꞌ yell-lionaꞌ len Malta.
2 Naꞌ beṉꞌkaꞌ lleꞌ naꞌ ḻe wen bengakileꞌ netoꞌ, naꞌ daa chak zag naꞌ leyi chakte yejaꞌ, bxengakeꞌ yiꞌnaꞌ xen naꞌch goxgakeꞌ yogꞌntoꞌ kwenc̱he bishaantoꞌ.
3 Naꞌch Páblonaꞌ btopeꞌ x̱onj xis bill, naꞌ ka bzaḻeen lo yiꞌnaꞌ bichej to beḻ ladjinnaꞌ naꞌ wdiṉyaab neenaꞌ.
4 Naꞌ ka bleꞌi beṉꞌ Máltakaꞌ naḻꞌ beḻaꞌ naꞌ Páblonaꞌ, naꞌch cheꞌ ljwelleꞌ:
―Beṉꞌ wen xyalja beeni. Ḻaꞌkzi bileꞌ lo nisdoꞌnaꞌ, Chiozaꞌ aga wiꞌe latj ibaneꞌ.
5 Naꞌch Páblonaꞌ wllib neenaꞌ kwenc̱he bxop beḻaꞌ lo yiꞌnaꞌ, naꞌ aga bi gokileꞌ.
6 Naꞌ yoggakeꞌ chbezgakeꞌ saꞌ neenaꞌ yinaꞌ, wa tokonganzi yilliꞌe naꞌ gueteꞌ. Naꞌ ka ba gok ssha chbezgakeꞌ naꞌ bleꞌgakileꞌ bibi chakileꞌ, naꞌch wzolo nagakeꞌ:
―Chioslja beeni.
7 Naꞌ gaozə ganaꞌ bllinntoꞌ de yell-lio c̱he beenaꞌ chṉabiaꞌ doxen ganaꞌ mbani Máltanaꞌ, naꞌ lieꞌ Publio. Naꞌ blebeꞌ netoꞌ lilleꞌnaꞌ naꞌ wzoalenntoꞌneꞌ shoṉ lla naꞌ benshiꞌe netoꞌ.
8 Naꞌ x̱a Públionaꞌ dieꞌ yoꞌe dii ḻa naꞌ chaktieꞌ besaꞌ. Naꞌch wyaj Páblonaꞌ jawieꞌneꞌ, naꞌ ka biyoll beꞌḻwilleꞌ Chiozaꞌ bx̱oa neenaꞌ yic̱hjeꞌnaꞌ naꞌ biyakileꞌ.
9 Naꞌ ka wṉezi beṉꞌ Máltakaꞌ daa ben Páblonaꞌ, naꞌch wyaj yogꞌ beṉꞌkaꞌ bi shaoꞌ laweꞌnaꞌ naꞌ biyakgakileꞌ.
10 Naꞌ beṉꞌkaꞌ ḻe benshiigakeꞌ netoꞌ, naꞌ ka bizaꞌntoꞌ, dii zan dii beṉgakeꞌ netoꞌ, diikaꞌ iyalljintoꞌ.
Ka bllin Páblonaꞌ Rómanaꞌ
11 Shoṉ beoꞌ wzoantoꞌ Máltanaꞌ. Naꞌ ka bizaꞌntoꞌ biyoontoꞌ to ḻoo barkw dii bchej Alejandríanaꞌ daa ḻekzkaꞌ bigaaṉan Máltanaꞌ shlak wde dii zagaꞌ. Naꞌ xinꞌ barkwaꞌ daꞌ c̱hop lwaa lsakꞌ chios c̱he beṉꞌ griegokaꞌ, beṉꞌkaꞌ le Cástor naꞌ Pólux.
12 Naꞌ ka bllinntoꞌ yell Siracúsanaꞌ, naꞌ wzoantoꞌ shoṉə lla.
13 Naꞌ bizzaꞌntoꞌ Siracúsanaꞌ bllintentoꞌ yell Régionaꞌ. Naꞌ betiyo wzolo chak beꞌnaꞌ daa zaꞌ lliꞌlə naꞌch gok wzaꞌchntoꞌ, naꞌ bichop lla bllinntoꞌ yell Puteólinaꞌ ganaꞌ bichejntoꞌ ḻoo barkwaꞌ.
14 Naꞌ Puteólinaꞌ billagntoꞌ baḻ beṉꞌkaꞌ nak netoꞌ txen chonḻilallꞌntoꞌ Jesúzaꞌ, naꞌ wṉabigakeꞌ netoꞌ yigaaṉlenntoꞌ ḻegakeꞌ to xman. Naꞌ ka wde xmannaꞌ, naꞌch bizaꞌntoꞌ zejntoꞌ Rómanaꞌ.
15 Naꞌ beṉꞌ Rómakaꞌ nonḻilallꞌ Jesúzaꞌ, ka wṉezgakileꞌ ba zoa illinntoꞌ, naꞌch wyajgakeꞌ jḻezgakeꞌ netoꞌ yellaꞌ le Apio, ganaꞌ chak yaanaꞌ, naꞌ ganaꞌ le Shoṉ Yoo Ga Chigaaṉ Beṉꞌ. Naꞌ ka bleꞌi Páblonaꞌ ḻegakeꞌ, biꞌe yeḻꞌ chox̱ken Chiozaꞌ naꞌ biyondiplallee.
16 Naꞌ ka bllinntoꞌ Rómanaꞌ, x̱an soldadkaꞌ beneꞌ preskaꞌ lallꞌ naꞌ beenaꞌ chṉabiaꞌ soldadkaꞌ zoa naꞌ, san Páblonaꞌ, biꞌe latj wzoeꞌ c̱heleꞌ, naꞌ toz soldadaꞌ wdapeꞌneꞌ.
Páblonaꞌ biꞌe xtillꞌ Jesúzaꞌ Rómanaꞌ
17 Naꞌ ka gok shoṉ lla zoa Páblonaꞌ naꞌ, naꞌch goxeꞌ beṉꞌ Israelkaꞌ zakii, beṉꞌkaꞌ lleꞌ Rómanaꞌ. Naꞌ ka bdopgakeꞌ naꞌ golleꞌ ḻegakeꞌ:
―Leꞌ beṉꞌ bishꞌ, shlak wzoaꞌ Jerusalénnaꞌ beṉꞌ wlall c̱hechokaꞌ lleꞌ naꞌ bex̱ꞌgakeꞌ nadꞌ naꞌ bengakeꞌ nadꞌ lo naꞌ beṉꞌ Rómaki ḻaꞌkzi aga bi benꞌ c̱hegakeꞌ naꞌ biṉꞌ c̱hishjꞌ diikaꞌ wna dii x̱ozxtoꞌchokaꞌ chiyaḻꞌ goncho.
18 Naꞌ biyoll wṉabyollgakileꞌ nadꞌ bin benꞌ, beṉꞌ wṉabiaꞌkaꞌ goklallꞌgakeꞌ wsangakeꞌ nadꞌ, ḻaꞌ aga bi benꞌ kwenc̱he wc̱hogbiaꞌgakeꞌ guetꞌ.
19 Per beṉꞌ wlall c̱hechokaꞌ lleꞌ Jerusalénnaꞌ aga beꞌgakeꞌ latj yisangakeꞌ nadꞌ. Naꞌ benan byen wṉabꞌ tiaꞌ lao beṉꞌ wṉabiaꞌ Césaraꞌ kwenc̱he goneꞌ yeḻꞌ josc̱his c̱haꞌnaꞌ. Per aga gawꞌ xya daa ben beṉꞌ wlall c̱hechokaꞌ c̱haꞌ.
20 Naꞌ ni c̱heyi dga chak c̱hanꞌ ba goxꞌ leꞌ kwenc̱he ileꞌidꞌ leꞌ naꞌ weꞌlenꞌ leꞌ dillꞌ. Ḻaꞌ ni c̱heyi daa noncho lez, choꞌ beṉꞌ Israelan, nc̱hejgakeꞌ nadꞌ gdenki.
21 Naꞌch cheꞌgakeꞌ Páblonaꞌ:
―Aga biṉꞌ yish ilaꞌ laontoꞌni dii zaꞌ Judeanaꞌ dii weꞌn dillꞌ c̱hoꞌ. Naꞌ ni to beṉꞌ wlall c̱hechokaꞌ biṉꞌ ilaꞌ biz gon iṉagakeꞌ c̱hoꞌ.
22 Naꞌ cheenintoꞌ wzenagntoꞌ bi dillaan wiꞌo, ḻaꞌ ṉezintoꞌ doxenz chṉegakeꞌ zban c̱he beṉꞌkaꞌ nakgakeꞌ txen dii kobaꞌ chliile.
23 Naꞌch bzoagakeꞌ to lla kwenc̱he idopgakeꞌ. Naꞌ ka bllin llanaꞌ blliagakeꞌ biaꞌ, beṉꞌ zan bdop ganaꞌ zoa Páblonaꞌ. Naꞌ beꞌleneꞌ ḻegakeꞌ dillꞌ do lla, bzajniileꞌ ḻegakeꞌ c̱he yeḻꞌ wṉabiaꞌ c̱he Chiozaꞌ. Naꞌ beneꞌ to dii byen kwenc̱he shajḻeꞌ beṉꞌkaꞌ c̱he Jesúzaꞌ. Bzajniileꞌ ḻegakeꞌ diikaꞌ nyoj c̱he Jesúzaꞌ ḻee ley c̱he dii Moisézaꞌ naꞌ diikaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ.
24 Naꞌ baḻeꞌ wyajḻeꞌgakeꞌ diikaꞌ goll Páblonaꞌ ḻegakeꞌ, naꞌ zi baḻeꞌ bi wyajḻeꞌ.
25 Naꞌ daa bi gok toz xtilleekaꞌ, naꞌ wzolo chilleshgakeꞌ. Ka gokbeꞌi Páblonaꞌ ba chilleshgakeꞌ, stoz dga golleꞌ ḻegakeꞌ:
―Shḻichakzan goll Espíritu Sántonaꞌ dii Isaíazaꞌ, daa biꞌe dillꞌ lao dii x̱ozxtoꞌchokaꞌ chiꞌe ḻegakeꞌ:
26 Wyaj naꞌ jellsha beṉꞌ Israelkaꞌ:
Ḻaꞌkzi wzenagle bi shajniꞌkzile
Naꞌ ḻaꞌkzi chleꞌteile bi gakbeꞌkzile bin zejin.
27 Bikzə bi rson c̱hazle, daa naklikzle lallꞌdoꞌ wal,
naꞌ chonle ka kwell lc̱hoḻ,
ni bi cheenile wzenagle,
ni bi cheenile ileꞌile,
naꞌ ni bi cheenile shajniile
kwenc̱he yiyaj yilenile
naꞌ gonꞌ ka yiyakshaoꞌ yic̱hjlallꞌdoꞌlenaꞌ.
28 Chiyaḻꞌ iṉezile Chiozaꞌ ba ngwee xṉezi yisleꞌ beṉꞌkaꞌ bi nak beṉꞌ Israel kwenc̱he bi kwiayiꞌgakeꞌ, naꞌ ḻelgakeꞌ wlebgakeꞌ choꞌa xtilleenaꞌ.
29 Ka biyoll goll Páblonaꞌ ḻegakeꞌ kaꞌ, naꞌch ziyajgakeꞌ chakdiḻ-len ljwellgakeꞌ.