Bseḻꞌgakeꞌ Páblonaꞌ yell Rómanaꞌ
27
Naꞌch ka bc̱hoglallꞌgakeꞌ wseḻꞌgakeꞌ netoꞌ Itálianaꞌ ḻoo barkwlə, bengakeꞌ Páblonaꞌ kon sto c̱hop pres yoblə lo naꞌ beenaꞌ le Julio, nakeꞌ x̱an to guiyoa soldadkaꞌ beṉꞌkaꞌ nziꞌ soldad c̱he beenaꞌ chṉabiaꞌ Rómanaꞌ.
2 Naꞌch wyoontoꞌ to ḻoo barkw dii zaꞌ yell Adramítionaꞌ naꞌ zejan Ásianaꞌ. Naꞌ wzaꞌlen to beṉꞌ le Aristarco netoꞌ. Nakeꞌ beṉꞌ Tesalónica, daa llia ganaꞌ mbani Macedónianaꞌ.
3 Naꞌ betiyo bllinntoꞌ yell Sidónnaꞌ, naꞌ Júlionaꞌ ḻe wen benileꞌ Páblonaꞌ naꞌ biꞌe latj jawieꞌ beṉꞌkaꞌ nombiꞌe yellaꞌ kwenc̱he beꞌgakeꞌneꞌ bi dii byalljileꞌ.
4 Naꞌ ka bizaꞌntoꞌ Sidonnaꞌ naꞌ wdetezntoꞌ yic̱hjlə yell-lio Chíprenaꞌ daa llia lo nisdoꞌnaꞌ kwenc̱he bkweejan netoꞌ daa ḻe ze beꞌnaꞌ.
5 Naꞌ wdetentoꞌ lo nisdoꞌnaꞌ daa de tchoꞌa yell-lio ganaꞌ mbani Cilícianaꞌ naꞌ Panfílianaꞌ, naꞌ bllinntoꞌ choꞌa yell Míranaꞌ, daa llia ganaꞌ mbani Lícianaꞌ.
6 Naꞌ yell Míranaꞌ x̱an soldadkaꞌ bllelileꞌ to barkw dii zaꞌ Alejandríanaꞌ naꞌ zejan Itálianaꞌ, naꞌ bidieꞌ netoꞌ ḻoꞌinnaꞌ.
7 Naꞌ zan lla wyajlenntoꞌ barkwaꞌ shoꞌlallꞌzə, naꞌ kaṉi bllinntoꞌ choꞌa yell Gnídonaꞌ. Naꞌ daa ze beꞌnaꞌ klelə, naꞌ wyec̱hjntoꞌ yell-lio Crétanaꞌ daa llia lo nisdoꞌnaꞌ, wdetezntoꞌ choꞌa yell Salmónnaꞌ.
8 Naꞌ kaṉi gok zejntoꞌ tchoꞌa nisdoꞌnaꞌ ax̱t ni bllintentoꞌ ganaꞌ le Buenos Puertos, gaozə yell Laseanaꞌ.
9 Zan llate ba wllaintoꞌ naꞌ ba chonan dii nxoll shajchntoꞌ lo nisdoꞌnaꞌ daa ba zoa yiḻen dii zagaꞌ. Naꞌ goll Páblonaꞌ ḻegakeꞌ:
10 ―Chakbeꞌidꞌ shi shajchcho nxoll kwiayiꞌ barkwi naꞌ kwiayiꞌte yoaꞌnaꞌ nsaꞌn, naꞌ aga toz diiki san lenkzcho ḻe nxoll kwiayiꞌcho.
11 Per naꞌ x̱an soldadkaꞌ, bzenagcheꞌ c̱he beenaꞌ chsaꞌ barkwaꞌ naꞌ c̱he x̱aninnaꞌ, naꞌ bi bzenagueꞌ daa goll Páblonaꞌ ḻegakeꞌ.
12 Naꞌ daa bi nak latjaꞌ wen yigaaṉntoꞌ naꞌz shlak chiꞌ dii zagaꞌ, zangakeꞌ bc̱hoglallꞌgakeꞌ shajchntoꞌ kwenc̱he illinntoꞌ yell Fenícenaꞌ ganaꞌ yigaaṉntoꞌ shlak te dii zagaꞌ. Nakan to latj ga mbani Crétanaꞌ, ganaꞌ choo barkwkaꞌ, naꞌ bitek choon beꞌnaꞌ daa zaꞌ chaꞌlə ni daa zaꞌ lliꞌlə.
Wze to beꞌ wal lo nisdoꞌnaꞌ
13 Naꞌch wzolo ze to beꞌḻes dii zaꞌ lliꞌlə, naꞌ beṉꞌkaꞌ chsaꞌ barkwaꞌ gokgakileꞌ wakkzə shajgakeꞌ. Naꞌch wdegakeꞌ tchoꞌazi yell-lio c̱he Crétanaꞌ daa llia lo nisdoꞌnaꞌ.
14 Ka gok shloll, wzolo to beꞌ wal dii zaꞌ chaꞌlə.
15 Naꞌch wzolon chlligaan barkwaꞌ naꞌ bikzə bi gok gonntoꞌ, naꞌ bsanlallꞌchokləntoꞌn nlligꞌ beꞌnaꞌ ḻen.
16 Naꞌ ka wdentoꞌ gaozə to yell-liodoꞌ le Clauda daa llia lo nisdoꞌnaꞌ, naꞌ bich zetek beꞌnaꞌ. Naꞌch barkwdoꞌnaꞌ ngoyo barkw xennaꞌ biḻepntoꞌn ḻoo barkw xennaꞌ, per kaṉi gokan.
17 Naꞌ ka biyoll biḻepntoꞌn, naꞌch bc̱hejgakeꞌ barkw xennaꞌ rietkaꞌ kwenc̱he goklenan daa. Naꞌ daa bllebgakeꞌ lljshia barkwaꞌ lo yoxaꞌ latjaꞌ le Sirte, naꞌ bitobgakeꞌ lechꞌkaꞌ daa chonan ka chzaꞌ barkwaꞌ naꞌ beꞌgakeꞌ latj blligꞌ beꞌnaꞌ barkwaꞌ kwenc̱he shajan kon ga wlligaꞌn ḻen.
18 Naꞌ betiyo, daa zizikli wzech beꞌnaꞌ, naꞌ wzologakeꞌ bsheshgakeꞌ yoaꞌnaꞌ nsaꞌ barkwaꞌ naꞌ bzaḻꞌgakeꞌn ḻoo nisdoꞌnaꞌ kwenc̱he bichtek gok barkwaꞌ zii.
19 Naꞌ ka gok shoṉ lla, ax̱t len xshinḻaz barkwaꞌ bzaḻꞌntoꞌ ḻoo nisdoꞌnaꞌ.
20 Naꞌ zan lla bi bliꞌlao wbillaꞌ ni beljkaꞌ, naꞌ daa zechga beꞌnaꞌ, bich benntoꞌ lez yilantoꞌ.
21 Naꞌ ka ba gok zan lla biṉꞌ gaontoꞌ, naꞌch Páblonaꞌ wzieꞌ ladj beṉꞌkaꞌ naꞌ chiꞌe ḻegakeꞌ:
―Sheḻꞌ bzenagle c̱haꞌ kanaꞌ zoacho Crétanaꞌ, ka wniaꞌ leꞌ bich shajcho, aga bi bṉitcho ni bi zoacho dii nxoll, sheḻꞌkaꞌ.
22 Naꞌ ṉaa bikzə gonc̱hoplallꞌzle, ḻaꞌ ni tole bi guet. Toz barkwi kwiayiꞌ.
23 Ḻaꞌ daa nlleꞌyi Chios c̱haꞌnaꞌ beenaꞌ chonḻilallaa bseḻee to anjl bliꞌlaweꞌ nadꞌ.
24 Naꞌ anjlaꞌ wneꞌ nadꞌ: “Bi illeboꞌ Pablo. Chonan byen illinoꞌ lao beṉꞌ wṉabiaꞌ Césaraꞌ, naꞌ ni c̱hoꞌ liꞌ yiyeshꞌlallii Chiozaꞌ yogꞌ beṉꞌkaꞌ zejlenoꞌ txen ḻoo barkwi naꞌ bi guetgakeꞌ.”
25 Naꞌ ṉaa, ḻi wtiplallꞌle, ḻaꞌ nx̱enilallaa Chiozaꞌ naꞌ ṉezyeṉidꞌ kon ka wna anjlaꞌ nadꞌ kayeṉꞌnan gak.
26 Per chonan byen wwiacho naklə goncho kwenc̱he yichooṉan choꞌ to lo yell-liodoꞌ dii llia lo nisdoꞌni.
27 Naꞌ ba gok shdaꞌ wbill ka bllinntoꞌ ganaꞌ de Nisdoꞌ Adriáticonaꞌ, naꞌ ni chlligꞌ beꞌnaꞌ barkwaꞌ to ki to kaꞌlə lo nisdoꞌnaꞌ. Naꞌ ka bllin chel, beṉꞌkaꞌ chsaꞌ barkwaꞌ gokbeꞌgakileꞌ ba chllinntoꞌ ganaꞌ de yo billaꞌ.
28 Naꞌch bḻetjgakeꞌ to ya kwenc̱he bchix̱gakeꞌ kaꞌkꞌ zitj nisaꞌ, naꞌ ka bchix̱gakeꞌn zitjan shinꞌtoyichoa metr. Naꞌch ka wzaꞌn zilatꞌ naꞌch bizchix̱gakeꞌn dii yoblə naꞌ zitjan gallichoa metr.
29 Naꞌ daa bllebgakeꞌ lljshoꞌ barkwaꞌ ḻee yajkaꞌ, bḻetjgakeꞌ tap ya xen dii llia xoziin kwenc̱he kweꞌ barkwaꞌ tozga, sheḻꞌ wxegakileꞌ lii sheeniꞌte.
30 Naꞌ beṉꞌkaꞌ chsaꞌ barkwaꞌ gokgakileꞌ yixoṉjgakeꞌ. Naꞌch wzologakeꞌ chḻetjgakeꞌ barkwdoꞌnaꞌ daa yoo ḻoo barkw xennaꞌ, chontezgakeꞌ ka chḻetj sto ya xen c̱he barkwaꞌ.
31 Naꞌch Páblonaꞌ golleꞌ x̱an soldadkaꞌ naꞌ soldad c̱heꞌkaꞌ:
―Shi beṉꞌki bich yigaaṉgakeꞌ ḻoo barkwi, aga wilalatꞌle shi ṉaa.
32 Naꞌch soldadkaꞌ bc̱hoggakeꞌ rietkaꞌ daa nchej barkwdoꞌnaꞌ naꞌ bxopan ḻoo nisaꞌ.
33 Naꞌ ka ba zoa sheeniꞌ Páblonaꞌ golleꞌ ḻegakeꞌ:
―Ḻi gaolatꞌ. Ba gok shdaꞌ wbill bi chaole daa chall chlleble.
34 Naꞌ niaꞌ chonan byen gaolatꞌle kwenc̱he yiyakshaoꞌlallꞌle, ḻaꞌ ni tole bi kwiayiꞌ.
35 Naꞌ ka biyoll wna Páblonaꞌ kaꞌ, naꞌ bex̱ee to yetxtil naꞌ biꞌe Chiozaꞌ yeḻꞌ chox̱ken lao beṉꞌkaꞌ leneꞌ naꞌ bxoxjeꞌn naꞌ wzoloeꞌ chaweꞌ.
36 Naꞌ ka bleꞌgakileꞌ chaweꞌ, naꞌch yoguee bendiplallꞌgakeꞌ wdaogakeꞌ.
37 Yogꞌḻoḻ netoꞌ yoontoꞌ ḻoo barkwaꞌ nakntoꞌ c̱hop guiyoa guiyonshinꞌto.
38 Naꞌ ka beljgakileꞌ, naꞌch bzaḻꞌgakeꞌ trígonaꞌ daa nsaꞌ barkwaꞌ ḻoo nisaꞌ kwenc̱he bich goktek barkwaꞌ zii.
Wcheꞌ barkwaꞌ yel
39 Naꞌ ka wyeeniꞌ, beṉꞌkaꞌ chsaꞌ barkwaꞌ aga biyombiaꞌgakeꞌ yell-lionaꞌ, per bleꞌgakileꞌ to ladj lc̱hi ga choo xozꞌ nisaꞌ ganaꞌ gokgakileꞌ wak shoꞌ barkw c̱heꞌkaꞌ. Naꞌ bc̱hoglallꞌgakeꞌ lljḻekwgakeꞌn lo yoxaꞌ.
40 Naꞌ bc̱hoggakeꞌ riet c̱he ya xenkaꞌ daa chzagaan barkwaꞌ naꞌ wchooṉlallꞌgakeꞌn ḻoo nisaꞌ. Naꞌch bisellgakeꞌ yagaꞌ daa chaklenan chzec̱hj chlliin barkwaꞌ, naꞌ bizeshgakeꞌ lechaa daa ze yic̱hjinnaꞌ kwenc̱he blligꞌ beꞌnaꞌn, naꞌ wzolo barkwaꞌ zjabigaan choꞌa nisaꞌ.
41 Naꞌ jshia xinꞌ barkwaꞌ to ga zoayaa yoxaꞌ ḻoo nisdoꞌnaꞌ naꞌ gogaan, naꞌ aga gokch yichejan. Naꞌch bḻi c̱he nisdoꞌnaꞌ wzolon bxoxj btinan xan barkwaꞌ.
42 Naꞌch soldadkaꞌ nan witgakeꞌ preskaꞌ kwenc̱he ni toeꞌ bi x̱oa yelaꞌ lo nisaꞌ naꞌ yixoṉjgakeꞌ.
43 Per x̱aneꞌkaꞌ bi biꞌe latj witgakeꞌ ḻegakeꞌ daa goklallee yisleꞌ Páblonaꞌ. Naꞌ beneꞌ mandad zigaate beṉꞌkaꞌ chak x̱oa yelaꞌ wxitꞌgakeꞌ ḻoo nisaꞌ kwenc̱he yillingakeꞌ lo yo billaꞌ,
44 naꞌ beṉꞌkaꞌ bi chak x̱oagakeꞌ yelaꞌ wc̱hingakeꞌ yaglaꞌkaꞌ wa diikaꞌ ba goxj c̱he barkwaꞌ kwenc̱he gak yillingakeꞌ lo yonaꞌ. Naꞌ kaꞌ benntonꞌ, naꞌ yogꞌḻoḻntoꞌ billinntoꞌ shiꞌa shaoꞌ lo yo billaꞌ.