Biban Jesúzaꞌ ladj beṉꞌ wetkaꞌ
24
Naꞌ lla nechaꞌ chizolo xmannaꞌ, wizaj noolkaꞌ ni baḻ choꞌa banaꞌ, nox̱ꞌgakeꞌ diikaꞌ chḻaꞌ zix̱ daa benshaoꞌgakeꞌ, naꞌ wyaj zi baḻ noolə yoblə kon ḻegakeꞌ.
Lucas 24.1-53
2 Naꞌ bleꞌgakileꞌ aga chiꞌch yajaꞌ choꞌa banaꞌ.
3 Naꞌ wyoogakeꞌ ḻoo blejaꞌ, naꞌ bleꞌgakileꞌ aga bich bi kwerp c̱he X̱ancho Jesúzaꞌ de naꞌ.
4 Naꞌ shlak chakgakileꞌ bera zejin dga, katꞌkzali bleꞌgakileꞌ c̱hop beṉꞌ byo, nakwgakeꞌ lechꞌ dii chey cheeniꞌ, zegakeꞌ kwiteꞌkaꞌ.
5 Naꞌ noolkaꞌ bllebchgagakeꞌ naꞌ bc̱hekꞌ yic̱hjeꞌkaꞌ ax̱t lo yonaꞌ. Naꞌch beṉꞌkaꞌ zenaꞌ cheꞌgakeꞌ:
―¿Berac̱he chiyiljzle beenaꞌ mban ladj beṉꞌ wetki?
6 Kochno de ni. Ba bibaneꞌ ladj beṉꞌ wetki. Ḻi lljadini daa wneꞌ leꞌ kanaꞌ zoaleneꞌ leꞌ Galileanaꞌ.
7 Wneꞌ chonan byen Beenaꞌ Bseḻꞌ Chiozaꞌ Yell-lioni gakeꞌ lo naꞌ beṉꞌ malkaꞌ, naꞌ witgakeꞌneꞌ ḻee yag cruzaꞌ, naꞌ ka yiyoṉ lla yibaneꞌ ladj beṉꞌ wetkaꞌ.
8 Naꞌch jadini noolkaꞌ daa goll Jesúzaꞌ ḻegakeꞌ.
9 Naꞌ bizaꞌgakeꞌ biyajgakeꞌ ganaꞌ lleꞌ postlkaꞌ shnej len yogꞌ beṉꞌkaꞌ sto gokgakeꞌneꞌ txen, naꞌ beꞌgakeꞌ dillꞌ yogꞌ daa gok c̱hegakeꞌ.
10 Naꞌ noolkin jayellgakeꞌ postlkaꞌ daa gok c̱hegakeꞌ: María beṉꞌ yell Magdálanaꞌ, Juánanaꞌ, María xṉaꞌ Jacóbonaꞌ, naꞌ len zi baḻ nool yoblə.
11 Naꞌ postlkaꞌ ni latꞌ bi wyajḻeꞌgakeꞌ daa goll noolkaꞌ ḻegakeꞌ daa gokgakileꞌ bizan chon chnagakeꞌ.
12 Naꞌ Pédronaꞌ wzee zejdoeꞌ choꞌa banaꞌ, naꞌ ka bllineꞌ, bwieꞌ ḻoo blejaꞌ naꞌ bleꞌileꞌ lechꞌkaꞌ chiꞌgakan kaꞌlə. Naꞌch bizee zjadeꞌ ganaꞌ zoeꞌ chibanileꞌ ka nak daa ba gok.
Bliꞌlao Jesúzaꞌ c̱hop beṉꞌ tnez Emaúzaꞌ
13 Naꞌ lo llanaꞌ gok kaꞌ, c̱hop beṉꞌkaꞌ nak Jesúzaꞌ txen wyajgakeꞌ to yell dii le Emaús, naꞌ nḻaa ljwellin ka do shnej kilometro kon Jerusalénnaꞌ.
14 Naꞌ lo zej ngoogakeꞌ nez choeꞌgakeꞌ dillꞌ c̱heyi diikaꞌ ba gok.
15 Naꞌ shlak choeꞌgakeꞌ dillꞌ c̱heyi diikaꞌ gok, naꞌ jabigꞌ kwin Jesúzaꞌ kwiteꞌkaꞌ naꞌ zejleneꞌ ḻegakeꞌ txen.
16 Naꞌ ḻaꞌkzi chwiagakeꞌneꞌ, aga gokbeꞌgakileꞌ no beenaꞌ.
17 Naꞌch wṉabi Jesúzaꞌ ḻegakeꞌ:
―¿Bera dillaan choeꞌle zaꞌle ni? ¿Berac̱he chakyeshꞌzile?
18 Naꞌ toeꞌ, beenaꞌ le Cleofas, chiꞌeneꞌ:
―Yogꞌzə beṉꞌ ṉezgakileꞌ daa ba gok Jerusalénnaꞌ llaki ba wde. ¿Astozoꞌ liꞌ bi ṉeziloꞌ daa ba gok?
19 Naꞌch chiꞌe ḻegakeꞌ:
―¿Beran gok?
Naꞌch cheꞌgakeꞌ:
―Diikaꞌ gok c̱he Jesús, beṉꞌ Nazaretaꞌ. Gokeꞌ to beṉꞌ wdix̱jee daa cheꞌ Chiozaꞌneꞌ, naꞌ beneꞌ yeḻꞌ wak naꞌ biꞌe dillꞌ zakii dii nak shḻi lao Chiozaꞌ naꞌ lao beṉꞌ.
20 Naꞌ bx̱ozkaꞌ chṉabiaꞌ naꞌ beṉꞌkaꞌ chṉabiaꞌgakeꞌ choꞌ beṉꞌ Israel bengakeꞌneꞌ lo naꞌ josc̱hiskaꞌ kwenc̱he bc̱hoglogakeꞌ c̱heꞌ gueteꞌ, naꞌ bdaꞌgakeꞌneꞌ ḻee yag cruzaꞌ.
21 Netoꞌ nonntoꞌ lez nan ḻenꞌ yibejeꞌ choꞌ beṉꞌ Israel lo naꞌ beṉꞌ zitꞌkaꞌ. Naꞌ ba gok shoṉ lla gok diiki.
22 Naꞌ baḻ noolkaꞌ nak netoꞌ txen wyajgakeꞌ choꞌa banaꞌ daa baabaḻi, naꞌ ḻe bibanintoꞌ ka wnagakeꞌ
23 bich bleꞌgakileꞌ kwerp c̱heꞌnaꞌ ganaꞌ bkwashꞌgakeꞌneꞌ. Naꞌch bilaꞌgakeꞌ nagakeꞌ bleꞌgakileꞌ c̱hop anjl, beṉꞌ goll ḻegakeꞌ mbankzə Jesúzaꞌ.
24 Naꞌch wyaj baḻ beṉꞌ byokaꞌ nonlenntoꞌ txen choꞌa blejaꞌ, naꞌ nakan kon ka wna noolkaꞌ, per aga no Jesúzaꞌ bleꞌgakileꞌ.
25 Naꞌch cheꞌ Jesúzaꞌ ḻegakeꞌ:
―¡Leꞌ beṉꞌ bi chajnii! ¡Bi llabiaꞌ bat shajḻeꞌle daa bzej dii beṉꞌkaꞌ wdix̱jee daa goll Chiozaꞌ ḻegakeꞌ!
26 ¿Abi ṉezile lliakzə biaꞌ biya daa yen ileꞌi beenaꞌ nak Crístonaꞌ ka ziꞌ yiyoꞌe ganaꞌ shoꞌe balaaṉ xennaꞌ?
27 Naꞌch wzoloeꞌ chzajniileꞌ ḻegakeꞌ Choꞌa Xtillꞌ Chiozaꞌ ganaꞌ choꞌen dillꞌ c̱he kwineꞌ, wzoloeꞌ zigaate kon daa bzej dii Moisézaꞌ, naꞌtech diikaꞌ bzej yogꞌ beṉꞌkaꞌ wdix̱jee daa goll Chiozaꞌ ḻegakeꞌ.
28 Naꞌ ka bllingakeꞌ yellaꞌ ganaꞌ zejgakeꞌ, bentezə Jesúzaꞌ ka beṉꞌ shaj gan yoblə.
29 Naꞌ beṉꞌkaꞌ bengakeꞌ byen yigaaṉleneꞌ ḻegakeꞌ, cheꞌgakeꞌneꞌ:
―Bigaaṉlen netoꞌ, ḻaꞌ ba wlleꞌ ṉaa, naꞌ ba chaḻ.
Naꞌch wyoo Jesúzaꞌ bigaaṉleneꞌ ḻegakeꞌ.
30 Naꞌ ka ba chiꞌgakeꞌ choꞌa mesaꞌ, bex̱ee to yetxtil naꞌ biꞌe yeḻꞌ chox̱ken Chiozaꞌ, naꞌtech bxoxjeꞌn naꞌ biꞌen ḻegakeꞌ.
31 Naꞌch biyombiaꞌyeṉꞌgakeꞌ nan ḻenꞌ Jesúzaꞌ, naꞌ to binitlozeꞌ.
32 Naꞌch cheꞌ ljwelleꞌ:
―¡Bera daan, ax̱t mbalaz inlleb chibayi lallꞌdoꞌchonaꞌ kanaꞌ zaꞌcho tnezaꞌ choeꞌleneꞌ choꞌ dillꞌ chzajniileꞌ choꞌ Choꞌa Xtillꞌ Chiozaꞌ!
33 Naꞌch lii bizaꞌtegakeꞌ ziyajgakeꞌ Jerusalénnaꞌ. Naꞌ ka billingakeꞌ, ndop nllag postlkaꞌ shnej naꞌ nochlə beṉꞌkaꞌ nakgakeꞌneꞌ txen,
34 naꞌ gollgakeꞌ ḻegakeꞌ:
―Dii ḻikzan ba biban X̱anchonaꞌ ladj beṉꞌ wetkaꞌ. Ba bliꞌlaweꞌ Simónni.
35 Naꞌch beṉꞌkaꞌ c̱hop gollgakeꞌ ḻegakeꞌ ka gok c̱hegakeꞌ tnezaꞌ, naꞌ ka biyombiaꞌgakeꞌ Jesúzaꞌ ka bxoxjeꞌ yetxtilaꞌ biꞌen ḻegakeꞌ.
Jaliꞌlao Jesúzaꞌ beṉꞌkaꞌ nakgakeꞌneꞌ txen
36 Naꞌ shlak ni choeꞌgakeꞌ dillaa, tokonganzi jaze Jesúzaꞌ ladjeꞌkaꞌ naꞌ bwapeꞌ ḻegakeꞌ chiox, chiꞌe ḻegakeꞌ:
―Soashgale mbalaz.
―¿Berac̱he chllebzle? ¿Bic̱he chak c̱hoplallꞌzle?
39 Ḻi wwia ṉiꞌa naꞌki kwenc̱he iṉezile nadꞌkzan. Ḻi gox̱ꞌ nadꞌ kwenc̱he iṉezile aga nakꞌ to yel bx̱en, ḻaꞌ to yel bx̱en bibi belꞌ bibi llit yoon ka nakꞌ nadꞌ.
40 Naꞌ ka golleꞌ ḻegakeꞌ kaꞌ, bliileꞌ ḻegakeꞌ ṉiꞌa neenaꞌ.
41 Naꞌ yeḻꞌ chiba chizaki c̱heꞌkaꞌ naꞌ yeḻꞌ chibaninaꞌ, ni bi chakbeꞌgakileꞌ shi ḻekzenꞌ. Naꞌch chiꞌe ḻegakeꞌ:
―¿Abi de latꞌ dii gaocho?
42 Naꞌch beꞌgakeꞌneꞌ latꞌ beḻ ba bweyꞌgakeꞌ lo yiꞌnaꞌ.
43 Naꞌ bex̱eeb wdaweꞌb chwiategakeꞌ.
44 Naꞌ chiꞌe:
―Ka nak daa ba gok c̱haꞌ, ḻennanꞌ wniaꞌ leꞌ kanaꞌ ni zoalenꞌ leꞌ, kanaꞌ wniaꞌ llia biaꞌ yillinin gak c̱haꞌ yogꞌ diikaꞌ bzej dii Moisézaꞌ, naꞌ diikaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ naꞌ diikaꞌ daꞌ ḻee sálmokaꞌ.
―Choꞌa Xtillꞌ Chiozaꞌ nan: chonan byen Crístonaꞌ, biya dii yen ileꞌileꞌ naꞌ witgakeꞌneꞌ naꞌ yiyoṉ lla yibaneꞌ ladj beṉꞌ wetkaꞌ.
47 Naꞌ ḻekzkaꞌ nan: ides choꞌa xtilleenaꞌ daa nan shi yiyaj yileni beṉꞌ dii malkaꞌ chongakeꞌ naꞌ yiyakxen c̱hegakeꞌ. Naꞌ solozan Jerusalénni naꞌ illiljan doxente.
48 Naꞌ leꞌ chiyaḻꞌ yeꞌle beṉꞌ yogꞌ diiki ba bleꞌile gok c̱haꞌ.
49 Naꞌ nadꞌ wseḻaa beenaꞌ bc̱heb X̱aꞌ Chiozaꞌ goṉeꞌ gakleneꞌ leꞌ, naꞌ ḻi soatezə Jerusalénni ax̱t katꞌch X̱aꞌnaꞌ goṉeꞌ leꞌ yeḻꞌ wakaꞌ daa zaꞌ yabanaꞌ.
Biyep Jesúzaꞌ yabanaꞌ
50 Naꞌch bc̱heꞌ Jesúzaꞌ ḻegakeꞌ wyajgakeꞌ yell Betánianaꞌ. Naꞌ bḻis neenaꞌ benḻeeyeꞌ ḻegakeꞌ.
51 Naꞌ ni chonḻeeytieꞌ ḻegakeꞌ, ka bikwaseꞌ kwiteꞌkaꞌ naꞌ biyepeꞌ yabanaꞌ.
52 Naꞌ beṉꞌkaꞌ nakgakeꞌneꞌ txen, biyoll beꞌlaꞌogakeꞌneꞌ, bizaꞌgakeꞌ ziyajgakeꞌ Jerusalénnaꞌ chiba chizakgakileꞌ.
53 Naꞌ wzoatezi wzoagakeꞌ beꞌlaꞌogakeꞌ Chiozaꞌ yoodoꞌnaꞌ.