Biban Jesúzaꞌ ladj beṉꞌ wetkaꞌ
28
Naꞌ ka wde lla sabdaꞌ, llanaꞌ chombaaṉgakeꞌ, ni baḻ lla nech c̱he xmannaꞌ sto, wyaj María nool Magdálanaꞌ, len Maríanaꞌ sto jawiagakeꞌ choꞌa banaꞌ.
2 Naꞌ wzolo to bedxoꞌ xen wal daa betj to anjl c̱he X̱ancho Chiozaꞌ yabanaꞌ, naꞌ ka bllineꞌ choꞌa banaꞌ naꞌ bikwaseꞌ yajaꞌ daa nsejan choꞌa banaꞌ naꞌ wllieꞌ lawinnaꞌ.
3 Naꞌ anjlaꞌ chey cheeniꞌe kakzə ga chep yes naꞌ xeꞌnaꞌ nakan xtil inlleb.
4 Naꞌ ka bleꞌi soldadkaꞌ ḻeꞌ ax̱t bxiztitgakeꞌ daa ḻe bllebgakeꞌ naꞌ ax̱t witgakeꞌ shlet.
5 Naꞌch cheꞌ anjlaꞌ noolkaꞌ:
―Bi illeble. Ṉezidꞌ Jesúzanꞌ chiyiljle, beenaꞌ wit ḻee yag cruzaꞌ.
6 Koch no de ni. Ba bibaneꞌ kon ka wneꞌ. Ḻi dakachi wwiale gani wdix̱jgakeꞌneꞌ.
7 Naꞌ ḻi yiyajdo ḻi lljayell beṉꞌkaꞌ nakgakeꞌneꞌ txen: “Ba bibaneꞌ ladj beṉꞌ wetkaꞌ naꞌ ba ziyajeꞌ Galileanaꞌ lljalezeꞌ leꞌ, naꞌ naꞌkzə ileꞌileneꞌ.” Naꞌ ba wniaꞌ leꞌ kaꞌ.
8 Naꞌch bizaꞌdo noolkaꞌ choꞌa banaꞌ chllebgakeꞌ naꞌ ḻe chibagakileꞌ zjadix̱jeꞌgakileꞌ beṉꞌkaꞌ nak Jesúzaꞌ txen daa goll anjlaꞌ ḻegakeꞌ.
9 Naꞌ ka ziyajgakeꞌ, bliꞌlao Jesúzaꞌ ḻegakeꞌ naꞌ bwapeꞌ ḻegakeꞌ chiox. Naꞌ jabigꞌgakeꞌ kwiteꞌnaꞌ naꞌ wdeḻꞌgakeꞌ ṉiꞌenaꞌ beꞌlaꞌogakeꞌneꞌ.
10 Naꞌ cheꞌ Jesúzaꞌ ḻegakeꞌ:
―Bi illeble. Ḻi lljayell beṉꞌ bishaakaꞌ shajgakeꞌ Galileanaꞌ naꞌ ileꞌgakileꞌ nadꞌ naꞌ.
Wxiꞌ laxj soldadkaꞌ kwenc̱he bi weꞌgakeꞌ dillꞌ biban Jesúzaꞌ
11 Naꞌ ka bizaꞌ noolkaꞌ, baḻ soldadkaꞌ wdap ganaꞌ bkwashꞌgakeꞌ Jesúzaꞌ biyajgakeꞌ yell Jerusalénnaꞌ jayellgakeꞌ bx̱ozkaꞌ chṉabiaꞌ yogꞌ diikaꞌ gok.
12 Naꞌch wyaj bx̱ozkaꞌ chṉabiaꞌ jeꞌlengakeꞌ beṉꞌ golkaꞌ chṉabiaꞌ dillꞌ naklə ka gongakeꞌ daa goll soldadkaꞌ ḻegakeꞌ. Naꞌ ka biyoll beꞌgakeꞌ dillaa, naꞌch beꞌgakeꞌ soldadkaꞌ mech xen,
13 cheꞌgakeꞌ:
―Iṉatezle waḻ chel shlak chesle, beṉꞌkaꞌ nak Jesúzaꞌ txen bidḻejgakeꞌ kwerp c̱heꞌnaꞌ.
14 Naꞌ shi ba biṉezi Pilátonaꞌ dga, netoꞌkzə lljazajniintoꞌneꞌ nakan gok kwenc̱he bibi gonileꞌ leꞌ.
15 Naꞌch soldadkaꞌ bex̱ꞌgakeꞌ mechaꞌ naꞌ bizaꞌgakeꞌ jazegakeꞌn dillꞌ kon ka gollgakeꞌ ḻegakeꞌ. Naꞌ ax̱t ṉaanlla beṉꞌ Israelkaꞌ ni nagakeꞌ kaꞌ.
Jesúzaꞌ golleꞌ ḻegakeꞌ weꞌgakeꞌ xtilleenaꞌ doxen yell-lioni
16 Naꞌ wyaj beṉꞌkaꞌ shnej, beṉꞌkaꞌ nak Jesúzaꞌ txen, Galileanaꞌ kwenc̱he yillaggakeꞌ Jesúzaꞌ lo yaanaꞌ ganaꞌ golleꞌ ḻegakeꞌ.
17 Naꞌ ka bleꞌgakileꞌ Jesúzaꞌ, beꞌlaꞌogakeꞌneꞌ, per baḻgakeꞌ gokc̱hoplallꞌgakeꞌ.
18 Naꞌch jabigꞌ Jesúzaꞌ kwiteꞌkaꞌ, chiꞌe ḻegakeꞌ:
―Ba non Chiozaꞌ lo naꞌ iṉabiꞌa yabanaꞌ naꞌ yell-lioni.
19 Daan, ḻi shaj doxen yell-lioni, ḻi lljaliꞌ lljasedi yogꞌ beṉꞌ kwenc̱he gakgakeꞌ nadꞌ txen. Naꞌ wchoale ḻegakeꞌ nis daa ba nonḻilallꞌgakeꞌ X̱acho Chiozaꞌ, naꞌ nadꞌ, Xiiṉeꞌ, len Espíritu Sántonaꞌ.
20 Naꞌ wliꞌ wsedile ḻegakeꞌ gongakeꞌ yogꞌ diikaꞌ ba benꞌ mandad gonle. Naꞌ nadꞌ soalenꞌ leꞌ toshiizi ax̱t ka te c̱he yell-lioni.