Jesúzaꞌ biꞌe dillꞌ wllin lla kwiayiꞌ yoodoꞌnaꞌ
13
Ka chichej Jesúzaꞌ leshꞌ chyoodoꞌnaꞌ, to beṉꞌkaꞌ nakgakeꞌneꞌ txen chiꞌeneꞌ:
―Maestro, bwiakachi ka xochi nak yajki naꞌ yooki.
San Marcos 13:1-23
2 Naꞌ cheꞌ Jesúzaꞌ ḻeꞌ:
―Ka nak yooki chwiale ṉaa, wllin lla kwiayiꞌ yogaan naꞌ ni sto yaj bich kwia kollꞌ ljwellin.
Diikaꞌ gak katꞌ ba zoa te c̱he yell-lioni
3 Naꞌ ziyajgakeꞌ lo Yaa Olívozaꞌ ganaꞌ nḻaꞌ yoodoꞌnaꞌ. Naꞌ shlak chiꞌ Jesúzaꞌ naꞌ, Pédronaꞌ, Jacóbonaꞌ, Juannaꞌ, naꞌch Andrézaꞌ wṉabgakileꞌneꞌ to ḻezgakeꞌ:
4 ―Cheenintoꞌ iṉoꞌ netoꞌ batran gak daa ba wnoꞌ. ¿Bera ka ileꞌintoꞌ gak kwenc̱he iṉezintoꞌ nan ba zoa gaoshosh gakan?
5 Naꞌ cheꞌ Jesúzaꞌ ḻegakeꞌ:
―Bi weꞌle latj no siyeꞌ leꞌ.
6 Ḻaꞌ beṉꞌ zan ichej naꞌ iṉazgakeꞌ: “Nadaan Crístonaꞌ”, naꞌ beṉꞌ zan shajḻeꞌ.
7 ’Naꞌ ka yenile chak wdiḻ to ni to naꞌ, bi illeble. Ḻaꞌ chonan byen gakgakan, per aga ba bllin lla te c̱he yell-lionin.
8 Ḻaꞌ yidiḻ-len ljwell yellkaꞌ naꞌ beṉꞌ wṉabiaꞌkaꞌ yidiḻ-len ljwellgakeꞌ. Naꞌ zan latj gak bedxoꞌ, naꞌ gatꞌ wbin, naꞌ kweꞌ wdiḻ wishesh. Katꞌ ba chak diiki shinz chzolo ka nak daa yen ileꞌi beṉꞌ yell-liokin.
9 ’Wsakꞌgale, ḻaꞌ gongakeꞌ leꞌ lallꞌ naꞌ beṉꞌkaꞌ chṉabiaꞌ choꞌ beṉꞌ Israel, naꞌ wit c̱hingakeꞌ leꞌ ganaꞌ chdop chllagcho choeꞌḻwillcho Chiozaꞌ. Naꞌ daa nakle nadꞌ txen, lljwaꞌgakeꞌ leꞌ lao beṉꞌ wṉabiaꞌ xenkaꞌ naꞌ lao nochlə beṉꞌkaꞌ chṉabiaꞌ, naꞌ kaꞌ gak weꞌle xtillaanaꞌ laweꞌkaꞌ.
10 Naꞌ ka ziꞌ te c̱he yell-lioni, chiyaḻꞌ illilj dillꞌ wen dillꞌ kob c̱haꞌnaꞌ doxen yell-lioni.
11 Naꞌ katꞌ ba zjwaꞌgakeꞌ leꞌ lao beṉꞌkaꞌ chṉabiaꞌ, bi sele wṉeyi bin yeꞌle ḻegakeꞌ, san daa wzajnii Chiozaꞌ lenꞌ iṉele, ḻaꞌ aga tobiaꞌlallꞌzlen iṉele, san Espíritu Sántonanꞌ iṉe.
12 Beenaꞌ zoa beṉꞌ bishꞌ goljeꞌ, ḻetezeꞌ goneꞌneꞌ lo naꞌ beṉꞌkaꞌ witgakeꞌneꞌ, naꞌ beenaꞌ zoa xiiṉeꞌ, ḻetezeꞌ goneꞌ xiiṉeꞌna lo naꞌ beṉꞌkaꞌ witgakeꞌneꞌ, naꞌ baḻ beṉꞌ, xiiṉeꞌkaꞌtezə gongakeꞌ x̱axṉeekaꞌ lo naꞌ beṉꞌkaꞌ witgakeꞌ ḻegakeꞌ.
13 Naꞌ yogꞌzə beṉꞌ gakzbangakileꞌ leꞌ daa nonḻilallꞌle nadꞌ. Per beenaꞌ so saki bittez dii yen ileꞌileꞌ ax̱t ka yiyoll diikaꞌ yen ileꞌileꞌ, beenanꞌ gatꞌ to yeḻꞌ mban c̱heꞌ zejḻi kaṉi.
14 ’Naꞌ katꞌ ileꞌile ba zoa daa nak dii zban inlleb latjaꞌ ganaꞌ bi chiyaḻꞌ soan, naꞌch beṉꞌkaꞌ lleꞌ Judeanaꞌ chiyaḻꞌ wxoṉjgakeꞌ shajgakeꞌ lo yaakaꞌlə. (Leꞌ chlable dga, ḻi shajniin.)
15 Naꞌ beenaꞌ llia kollꞌ lilleꞌnaꞌ ni bi gaḻꞌ yiyetjeꞌ lljalejeꞌ dii de ḻoo lilleꞌnaꞌ.
16 Naꞌ beenaꞌ chda lyix̱aa, ni bich gaḻꞌ yiyajeꞌ lilleꞌnaꞌ kwenc̱he lljadoyoeꞌ xeꞌnaꞌ.
17 ¡Nyeshꞌlaz gak c̱he noolkaꞌ noaꞌ naꞌ noolkaꞌ chwallꞌ chx̱op llanaꞌ gak kaꞌ!
18 Ḻi iṉabi Chiozaꞌ bi gak dga katꞌkaꞌ chbeꞌ dii zagaꞌ,
19 ḻaꞌ yeḻꞌ zakꞌziꞌ wal inlleban nak daa yen ileꞌile, daa konoṉꞌ yen ileꞌkzi dezd ka bx̱e bsil Chiozaꞌ yell-lioni ax̱t ṉaa, naꞌ katꞌ ba wde gokan kochno yen ileꞌi ka ḻen.
20 Naꞌ shi X̱ancho Chiozaꞌ bi wzeshee llakaꞌ gak kaꞌ, kono yila sheḻꞌkaꞌ. Per wzesheen daa chakileꞌ beṉꞌkaꞌ ba wlejeꞌ nakgakeꞌ lallꞌ nee.
21 ’Naꞌ katꞌ gak diikaꞌ, shi no iṉa leꞌ: “Ḻi wwia, ni ze Crístonaꞌ”, wa iṉeꞌ, “Ḻi wwia, naꞌ zieꞌ”, bi shajḻeꞌle.
22 Ḻaꞌ wchej beṉꞌ siyeꞌgakeꞌ iṉazgakeꞌ: “Nadaan Crístonaꞌ”, naꞌ beṉꞌ chonz ka chyix̱jee daa cheꞌ Chiozaꞌneꞌ, naꞌ wliꞌgakeꞌ no yeḻꞌ wak kwenc̱he siyeꞌgakeꞌ beṉꞌ, ax̱t sheḻꞌ wxegakileꞌ siyeꞌgakeꞌ beṉꞌkaꞌ ba wlej Chiozaꞌ nakgakeꞌ lo nee.
23 Wsakꞌgale. Ba bzenidꞌ leꞌ ka nak yogꞌ diiki ziꞌ gak.
Katꞌ yiyed Crístonaꞌ dii yoblə
24 ’Naꞌ katꞌ ba biyoll wde yeḻꞌ zakꞌziꞌkaꞌ, lii yic̱hoḻte lao wbillaꞌ naꞌ beoꞌdoꞌnaꞌ bich wzeeniꞌn.
San Marcos 13:24-37
25 Naꞌ beljdoꞌkaꞌ ixopgakan naꞌ yogꞌ diikaꞌ llia xan yabanaꞌ iṉibgakan.
26 Naꞌ ileꞌgakileꞌ nadꞌ, Beṉꞌ Bseḻꞌ Chiozaꞌ Yell-lioni, zizaa ladj bejkaꞌ kon yeḻꞌ wak choo yeḻꞌ wak xen c̱haꞌnaꞌ naꞌ balaaṉ c̱haꞌnaꞌ.
27 Naꞌ wseḻaa anjl c̱haꞌkaꞌ tap ḻaate yell-lioni ax̱t ganaꞌ zeelo chiyollan kwenc̱he yitopgakeꞌ beṉꞌkaꞌ nak lallꞌ naꞌ.
28 ’Ḻi wwia ka chak c̱he yag yix̱wewaꞌ: katꞌ chzolo chigaan naꞌ chibia xḻaguinnaꞌ, naꞌ chakbeꞌile ba zoa yiyoo laꞌo linnaꞌ.
29 Kaꞌkzan, katꞌ ileꞌile ba chak yogꞌ diiki ba wniaꞌ leꞌ gak, naꞌ gakbeꞌile ba zoa gaoshosh te c̱he yell-lioni.
30 Dii ḻi niaꞌ leꞌ, aga ba wit beṉꞌki zoa ṉaa katꞌ gak yogꞌ diiki.
31 Yabanaꞌ naꞌ yell-lioni te c̱hegakin, san choꞌa xtillaanaꞌ aga wde bi gak ka nan.
32 ’Naꞌ kono ṉezi bi lla bi gor gak diiki, ni anjlkaꞌ lleꞌ yabanaꞌ, ni nadꞌ nakꞌ Xiiṉꞌ Chios. Toz X̱aꞌ Chiozaꞌ ṉezileꞌn.
33 ’Ḻi wsakꞌ, naꞌ ḻi se kwas, naꞌ ḻi weꞌḻwill Chiozaꞌ, ḻaꞌ bi ṉezile bat illin lla gakan.
34 Nakan ka ben to beṉꞌ ba zoa see shajeꞌ to yell zitꞌ, naꞌ golleꞌ beṉꞌkaꞌ chon xshineꞌnaꞌ gapgakeꞌ lilleꞌnaꞌ. Naꞌ to togakeꞌ beneꞌ lallꞌ naꞌgakeꞌ daa gongakeꞌ, naꞌ golleꞌ beenaꞌ chap choꞌa leej c̱heꞌnaꞌ bi guetlalleen.
35 Ḻi se kwas, ḻaꞌ bi ṉezile bat yilaꞌ x̱an yoonaꞌ; shi yilee chaldoꞌzə, wa yilee chel, wa katꞌ chbell tezkaꞌ, wa yilee cheeniꞌḻesdoꞌ.
36 Shi tokonganzə yilee naꞌ yidoḻileꞌ leꞌ bich ze kwasle.
37 Dga niaꞌ leꞌ, ḻekzkaꞌ yogꞌḻoḻ beṉaan chepꞌ kaꞌ, ḻi se kwas.