11
Ḻi wsaꞌ to c̱hele ka nsaꞌ c̱haꞌ, ḻaꞌ nadꞌ nsaꞌ c̱haꞌ ka bsaꞌ c̱he Crístonaꞌ.
2 Ḻe wen chonle daa toshiizi chjadinile nadꞌ naꞌ ni zejlenle diikaꞌ bliꞌ bsedidꞌ leꞌ.
3 Per cheenidꞌ shajniile dga: Chiozaꞌ chṉabiꞌe Crístonaꞌ, naꞌ Crístonaꞌ chṉabiꞌe yogꞌḻoḻ beṉꞌ byo, naꞌ beṉꞌ byokaꞌ chṉabiaꞌgakeꞌ nool c̱heꞌkaꞌ.
4 Naꞌ nottezə beṉꞌ byo shi nkwashꞌ yic̱hjeꞌnaꞌ shlak choeꞌḻwilleꞌ Chiozaꞌ wa shlak chyix̱jiꞌe daa cheꞌ Chiozaꞌneꞌ, bi chgwee Crístonaꞌ balaaṉ.
5 San shi nottez nool bi wkwashꞌ yic̱hjeꞌnaꞌ shlak choeꞌḻwilleꞌ Chiozaꞌ wa shlak chyix̱jiꞌe daa cheꞌ Chiozaꞌneꞌ, naꞌ chṉiteꞌ balaaṉ c̱he beṉꞌ c̱heꞌnaꞌ. Naꞌ shi kaꞌ choneꞌ, naꞌ nakeꞌ ka to noolə beṉꞌ nshib ax̱t lo yej.
6 Naꞌ shi to noolə bi wkwashꞌ yic̱hjeꞌnaꞌ, wenlan wshibteguenꞌ ax̱t lo yej. Naꞌ shi chidoꞌileꞌ wshibenꞌ, chiyaḻꞌ wkwasheen.
7 Naꞌ beṉꞌ byonaꞌ bi chiyaḻꞌ wkwashꞌ yic̱hjeꞌnaꞌ daa nakeꞌ lwaa lsakꞌ Chiozaꞌ naꞌ chliꞌe balaaṉ c̱heꞌnaꞌ. Naꞌ noolaꞌ chliꞌe balaaṉ c̱he beṉꞌ c̱heꞌnaꞌ.
8 Ḻaꞌ aga kwit ḻee noolanꞌ wlej Chiozaꞌ beṉꞌ byonaꞌ, san noolanꞌ wlejeꞌneꞌ kwit ḻee beṉꞌ byonaꞌ.
9 Naꞌ ni bi bx̱ieꞌ beṉꞌ byonaꞌ kwenc̱he gakleneꞌ noolaꞌ, san bx̱ieꞌ noolaꞌ kwenc̱he gakleneꞌ beṉꞌ byonaꞌ.
10 Ni c̱heyi daan, naꞌ ni c̱he anjlkaꞌ len ladjchokaꞌ, chiyaḻꞌ wkwashꞌ yic̱hjeꞌkaꞌ kwenc̱he nakbiaꞌ chapgakeꞌ balaaṉ beṉꞌ c̱heꞌkaꞌ.
11 Per choꞌ nakcho X̱ancho Crístonaꞌ txen, ṉezicho noolkaꞌ chyalljgakileꞌ choꞌ beṉꞌ byo, naꞌ choꞌ beṉꞌ byo chyalljicho noolkaꞌ.
12 Ḻaꞌ ka nak daa bchej noolaꞌ kwit ḻee beṉꞌ byonaꞌ, ḻekzkaꞌ beṉꞌ byonaꞌ, noolanꞌ chzaneꞌ ḻeꞌ; per Chiozanꞌ bx̱e bsileꞌ yogꞌḻoḻ.
13 Naꞌ leꞌzə, ḻi wwiakachi shi nakan wen weꞌḻwill noolkaꞌ Chiozaꞌ gaḻꞌ yic̱hjzgakeꞌ.
14 Kon ka yoolocho choncho, chakbeꞌicho nakan yeḻꞌ ztoꞌ weꞌz beṉꞌ byonaꞌ latj igol yishꞌ yic̱hjeꞌnaꞌ.
15 San nakan wen weꞌ noolaꞌ latj igol yishꞌ yic̱hjeꞌnaꞌ naꞌ nakan to balaaṉ c̱heꞌ. Ḻaꞌ Chiozaꞌ noneꞌn kwenc̱he wkwashaꞌn yic̱hjeꞌnaꞌ.
16 Naꞌ shi nole bi chazlallꞌle dga ba wniaꞌ, chiyaḻꞌ iṉezile ka netoꞌ naꞌ ka yogꞌ kwen beṉꞌkaꞌ chdop chllag choeꞌlaꞌogakeꞌ Chiozaꞌ, toz ka yoolontoꞌ chonntoꞌ.
17 Naꞌ ka nak dga iṉiaꞌ leꞌ, bi gak iṉiaꞌ ḻe wen chonle. Ḻaꞌ katꞌ chdop chllagle choeꞌlaꞌole Chiozaꞌ lwaayin dii nan gaklenan leꞌ, chzoaziꞌyaalan leꞌ.
18 Zigaate cheenidꞌ iṉiaꞌ leꞌ daa ba benidꞌ nagakeꞌ c̱hele nan katꞌ chdop chllagle choeꞌlaꞌole Chiozaꞌ nonzə c̱he c̱hel-le. Naꞌ chajḻiꞌa dii ḻiljakz ka chonlen.
19 Naꞌ chakljayile chiyaḻꞌ gakle c̱hop shoṉ kwenlə kwenc̱he wliꞌlawin nolen chazlalli Chiozaꞌ ka chonle.
20 Naꞌ katꞌ chdop chllagle naꞌ cheej chaolen ljwell-le txen kwenc̱he chisaꞌlallꞌle daa wit X̱ancho Jesucrístonaꞌ, bi chonlen ka bllieꞌ biaꞌ.
21 Ḻaꞌ katꞌ yeej gaole, bi chbez ljwell-le kwenc̱he yeej gaole txen, san to tole lii cheej chaotele yeḻꞌ wao c̱helekaꞌ. Naꞌ baḻ-le bibi de gaole naꞌ zi baḻ-le ax̱t chzollile.
22 ¿Abi zoa lill-le ga yeej gaole? ¿Berac̱he chonzile nakzi beṉꞌkaꞌ nakcho txen choeꞌlaꞌocho Chiozaꞌ naꞌ chsiꞌzle yeḻꞌ ztoꞌ beṉꞌkaꞌ bibi de yeej gaogakeꞌ? ¿Bitgui iṉiale, lla? ¿Achakile iṉiaꞌ leꞌ ḻe wen chonle? Bi iṉiaꞌ leꞌ kaꞌ, ḻaꞌ aga wenan chonle.
23 Dga ba bliꞌ bsedidꞌ leꞌ nakan daa bliꞌ bsedi X̱ancho Jesucrístonaꞌ nadꞌ. Lleꞌnaꞌ ben Júdaꞌneꞌ lo naꞌ beṉꞌ malkaꞌ, X̱ancho Jesúzaꞌ bex̱ee yetxtilaꞌ,
24 naꞌ biyoll biꞌe Chiozaꞌ yeḻꞌ chox̱ken, naꞌch bxoxjeꞌn naꞌ chiꞌe: “Dgan kwerp c̱haꞌni daa chzanidꞌ ni c̱hele. Ḻi gox̱ꞌ latꞌ wejan gaolen. Ḻi gon dga kwenc̱he lljadinile nadꞌ.”
25 Naꞌ ḻekzkaꞌ biyoll wdaogakeꞌ xsheꞌnaꞌ, bex̱ee kopaꞌ daa yoll vinonaꞌ, naꞌ chiꞌe: “Dga yollə ḻoo kopi zejin x̱chenꞌnaꞌ daa ḻaljə daa gon ka gakḻi dii kobaꞌ bc̱heb Chiozaꞌ goneꞌ. Ḻi gon dga, naꞌ to to ka yeejlen ḻi lljadini nadꞌ.”
26 Naꞌ to to ka gaole yetxtilaꞌ naꞌ yeejle vinonaꞌ ax̱t llanaꞌ yiyed X̱ancho Crístonaꞌ zejin chyix̱jeꞌile beṉꞌ ka nak daa witeꞌ ni c̱hecho.
27 Nottezə beṉꞌ gaweꞌ yetxtilaꞌ wa yeejeꞌ vinonaꞌ daa chonan ka lljadinicho X̱anchonaꞌ, naꞌ bi chapeꞌ balaaṉ ka nak daa choneꞌ, toz ka nak xtoḻeenaꞌ ka c̱he beṉꞌkaꞌ betgakeꞌ X̱anchonaꞌ naꞌ blaljgakeꞌ xc̱heneꞌnaꞌ.
28 Daan, to tocho chiyaḻꞌ yiya yiyilj kwincho katꞌ ziꞌ gaocho yetxtilaꞌ naꞌ katꞌ zi yeejcho vinonaꞌ.
29 Ḻaꞌ Chiozaꞌ wsakꞌziꞌe nottez beṉꞌ konteḻe yeej gaweꞌn naꞌ bi goneꞌn ka kwee X̱ancho Crístonaꞌ balaaṉ daa bzani kwerp c̱heꞌnaꞌ ni c̱hecho.
30 Daan, zanle bi shaoꞌle wa zoaziꞌyaale, naꞌ baḻ beṉꞌkaꞌ nakle txen ba witgakeꞌ.
31 Per shi yiya yiyilj kwincho, X̱ancho Chiozaꞌ bi wsakꞌziꞌe choꞌ.
32 Naꞌ shi chsakꞌziꞌe choꞌ, choneꞌn kwenc̱he yigooshḻilallꞌcho naꞌ bi wlliayiꞌleneꞌ choꞌ beṉꞌkaꞌ bi nonḻilallꞌgakeꞌneꞌ.
33 Naꞌ leꞌ beṉꞌ bishꞌ naꞌ leꞌ beṉꞌ zanꞌ, katꞌ chdop chllagle kwenc̱he yeej gaole, ḻi kwez ljwell-le.
34 Naꞌ shi nole chbiḻ chdonle, chiyaḻꞌ yeej gaole ḻoo yoo lill-le kwenc̱he bi gonle ka gonan byen tele yeḻꞌ zakꞌziꞌ daa bi chonle wen katꞌ chdop chllagle. Dech diikaꞌ cheenidꞌ wzajniidꞌ leꞌ, naꞌ kwaa xṉezin katꞌ yidwiaꞌ leꞌ.