10
Leꞌ beṉꞌ bishꞌ naꞌ leꞌ beṉꞌ zanꞌ, bi cheenidꞌ gaḻ-lallꞌle daa gok c̱he dii x̱ozxtoꞌchokaꞌ, yogꞌgakeꞌ wloogakeꞌ nez xan bejaꞌ daa bze Chiozaꞌ naꞌ yogꞌgakeꞌ bidegakeꞌ lo nezaꞌ bsaljeꞌ ḻoo nisdoꞌnaꞌ.
2 Naꞌ yogꞌgakeꞌ nakgakeꞌ ka beṉꞌ wchoa nis daa gokgakeꞌ dii Moisézaꞌ txen biyajlengakeꞌneꞌ xan bejaꞌ naꞌ daa bidelengakeꞌneꞌ lo nezaꞌ daa byalj ḻoo nisdoꞌnaꞌ.
3 Naꞌ yogꞌḻoḻeꞌ wdaogakeꞌ toz yeḻꞌ wao daa beꞌ Chiozaꞌ ḻegakeꞌ.
4 Naꞌ yogꞌḻoḻgakeꞌ weejgakeꞌ toz nis daa biꞌe ḻegakeꞌ, nisaꞌ daa gol ḻee yajaꞌ, yajaꞌ daa zaklebi Crístonaꞌ, beenaꞌ wzoaleneꞌ ḻegakeꞌ.
5 Ḻaꞌkzi yogꞌḻoḻgakeꞌ wxiꞌgakeꞌ banez diikaꞌ, zangakeꞌ bi biyoolallii Chiozaꞌ ka bengakeꞌ, naꞌ witgakeꞌ ganaꞌ bibi chashj chḻeb.
6 Naꞌ yogꞌ diikaꞌ gok c̱hegakeꞌ chzajniin choꞌ bi chiyaḻꞌ selallꞌcho goncho dii malaꞌ ka bengakeꞌ.
7 Bi chiyaḻꞌ weꞌlaꞌole diikaꞌ non beṉꞌ lwaa lsakꞌ chios c̱heꞌkaꞌ ka ben baḻgakeꞌ, ḻaꞌ Choꞌa Xtillꞌ Chiozaꞌ nan: “Wcheꞌgakeꞌ weej wdaogakeꞌ naꞌ biyollaꞌ bengakeꞌ kon daa nazan c̱he beli chen c̱heꞌkaꞌ.”
8 Naꞌ bi chiyaḻꞌ gatꞌlencho nottez beṉꞌ, ka ben baḻgakeꞌ, naꞌ daa bengakeꞌ kaꞌ, shllaz wit shoṉichoa milgakeꞌ.
9 Naꞌ bi chiyaḻꞌ wzoacho Chiozaꞌ goneꞌ daa nazan c̱hecho, ka ben baḻgakeꞌ, naꞌ daa bengakeꞌ kaꞌ wdiṉyaa beḻkaꞌ ḻegakeꞌ naꞌ witgakeꞌ.
10 Ni bibi gon iṉazle c̱he Chiozaꞌ ka ben baḻgakeꞌ naꞌ ni c̱heyin bseḻee anjl c̱heꞌnaꞌ beenaꞌ beteꞌ ḻegakeꞌ.
11 Naꞌ yogꞌ diiki gok c̱hegakeꞌ nakan to dii chzajnii choꞌ bi goncho ka bengakeꞌ, naꞌ lliagakan ḻee Choꞌa Xtillꞌ Chiozaꞌ kwenc̱he chsiꞌnin choꞌ mbancho llaki zeelo.
12 Daan, nottezcho shi chakicho zoac̱hec̱hcho nonḻilallꞌcho Crístonaꞌ, chiyaḻꞌ wsakꞌcho kwenc̱he bi ibix̱cho goncho dii malaꞌ.
13 Yogꞌ dii malkaꞌ chdiḻ chllagle nakgakan ka diikaꞌ chdiḻ chllag nottez beṉꞌ. Naꞌ wak wx̱enilallꞌle Chiozaꞌ gakleneꞌ leꞌ, ḻaꞌ ḻenꞌ bi wiꞌe latj idiḻ illagle daa bi so sakile, san katꞌ idiḻ illaglen, ḻekzenꞌ gakleneꞌ leꞌ kwenc̱he so sakile yichejle lawinnaꞌ.
14 Daan, leꞌ beṉꞌ bishꞌdawaa naꞌ leꞌ beṉꞌ zandawaa, bi weꞌlaꞌole diikaꞌ non beṉꞌ lwaa lsakꞌ chios c̱heꞌkaꞌ.
15 Chshaljlenꞌ leꞌ ba nteile, naꞌ kwinkzle gakbeꞌile shi dga chzajniidꞌ leꞌ nakan shḻi.
16 Katꞌ chisaꞌlallꞌcho daa wit Crístonaꞌ ni c̱hecho, naꞌ cheejcho latꞌ wej vinonaꞌ naꞌ choeꞌcho Chiozaꞌ yeḻꞌ chox̱ken, zejin nakcho Crístonaꞌ txen daa blalj xc̱heneꞌnaꞌ ni c̱hecho. Naꞌ katꞌ chxoxjcho yetxtilaꞌ naꞌ chaochon, zejin nakchoneꞌ txen daa bzani kwerp c̱heꞌnaꞌ witeꞌ ni c̱hecho.
17 Naꞌ ḻaꞌkzi nakcho beṉꞌ zan, toz yetxtilanꞌ chaocho, naꞌ zejin nakcho ka toz kwerp.
18 Naꞌ ḻi wwia ka chon beṉꞌ Israelkaꞌ. Yogꞌ beṉꞌkaꞌ chaogakeꞌ xpelꞌ bayix̱ꞌkaꞌ chitgakeꞌ lao Chiozaꞌ nakgakeꞌ toz choeꞌlaꞌogakeꞌneꞌ.
19 Naꞌ bi gakile niaꞌ lwaa lsakꞌ daa non beṉꞌ chios c̱heꞌkaꞌ nakgakan dii zakii, ni bi gakileꞌ belꞌ c̱he bayix̱ꞌkaꞌ chitgakeꞌ lawinkaꞌ zakꞌchgakan ka bittezə belꞌ.
20 San ki zejin daa niaꞌ kaꞌ: katꞌ beṉꞌkaꞌ bi nonḻilallꞌgakeꞌ Chiozaꞌ chitgakeꞌ bayix̱ꞌkaꞌ chlliagakeꞌn lao lwaa lsakꞌ chios c̱heꞌkaꞌ, dii x̱iwꞌkaꞌlan choeꞌgakeꞌn, naꞌ aga Chiozanꞌ. Naꞌ bi cheenidꞌ weꞌlaꞌolenle ḻegakeꞌ dii x̱iwꞌkaꞌ.
21 Bi gak yeej gaocho daa cheej chaocho katꞌ chisaꞌlallꞌcho daa wit X̱ancho Crístonaꞌ, naꞌ ḻekzkaꞌ yeej gaotezcho daa cheej chao beṉꞌkaꞌ choeꞌlaꞌo dii x̱iwꞌkaꞌ.
22 Bi chiyaḻꞌ wshaacho Chiozaꞌ, ḻaꞌ aga wzo wzakichoneꞌ.
23 Dez dillꞌ, nagakeꞌ: “Wak goncho bittez dii cheenicho.” Dii ḻikzan, per aga yogꞌ daa gak goncho nakan wen. Ḻaꞌkzi de latj goncho bittezə, aga yogꞌ daa goncho gaklenan bishꞌ ljwellchokaꞌ gakchachgakeꞌ lao Chiozaꞌ.
24 Ni tocho bi chiyaḻꞌ goncho ka gak wen c̱he tozcho, san chiyaḻꞌ gaklencho beṉꞌ yoblə kwenc̱he gak wen c̱heꞌ.
25 Bittezə belꞌ dii chitꞌgakeꞌ lao yaanaꞌ wakə siꞌlen. Naꞌ bi iṉable shi nakan dii blliagakeꞌ lao lwaa lsakꞌ chios c̱heꞌkaꞌ kwenc̱he bi gakc̱hoplallꞌle c̱heyin.
26 Ḻaꞌ doxen yell-lioni naꞌ yogꞌte daa de lawinnaꞌ nakan c̱he X̱ancho Chiozaꞌ.
27 Shi to beṉꞌ bi nonḻilallee Crístonaꞌ chaxeꞌ leꞌ lljtaole lilleꞌnaꞌ, naꞌ cheenileꞌ shajle, ḻi yeej ḻi gao daa goṉeꞌ, naꞌ bi iṉabileneꞌ shi nakan dii bllieꞌ lao lwaa lsakꞌ chios c̱heꞌnaꞌ kwenc̱he bi gakc̱hoplallꞌle c̱heyin.
28 San shi no iṉa leꞌ: “Beli nakan dii wllia lao lwaa lsakꞌ chios c̱haꞌkaꞌ”, naꞌ bi gaolen ni c̱he beenaꞌ wna leꞌ kaꞌ. Ḻaꞌ beenaꞌ wna kaꞌ wakte gakileꞌ malan chonle shi gaolen.
29 Bi gakile niaꞌ malan gonle gaolen, san niaꞌ kaꞌ ni c̱he beenaꞌ gakileꞌ malan chonle shi gaolen.
Ḻaꞌkzi ṉezidꞌ aga bi nonan gawꞌ bittezə, bi cheenidꞌ gonꞌ ka saꞌlallꞌ beṉꞌ yoblə nan malanꞌ chonꞌ.
30 Naꞌ shi choꞌa Chiozaꞌ yeḻꞌ chox̱ken c̱heyi daa gawꞌ, ¿berac̱he iṉaz beṉꞌ malan chonꞌ daa chawꞌ to dii ba biꞌa Chiozaꞌ yeḻꞌ chox̱ken c̱heyin?
31 Naꞌ bittezə dii chonle, shi cheej chaole wa shi bichlə dii yoblə chonle, chiyaḻꞌ gonlen ka shoꞌ Chiozaꞌ balaaṉ.
32 Bi gonle ka ixop beṉꞌ yoblə goneꞌ to dii mal, ḻaa nakeꞌ beṉꞌ Israel, ḻaa bi nakeꞌ beṉꞌ Israel, ḻaa nakeꞌ beṉꞌ nakcho txen nonḻilallꞌcho Chiozaꞌ.
33 Ḻi gon ka nadꞌ, ḻaꞌ chonꞌ to dii byen toshiizi chonꞌ ka yiyoolallii yogꞌ beṉꞌ. Aga chonꞌ kwenc̱he to nadꞌzə gak wen c̱haꞌ, san chonꞌ ka gak wen c̱he beṉꞌ yoblə kwenc̱he yilagakeꞌ bi kwiayiꞌgakeꞌ.