Kart wchopi daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Coríntonaꞌ
1
Nadꞌ Pablo nakꞌ postl c̱he Jesucrístonaꞌ kon ka chaklallꞌ Chiozaꞌ, naꞌ len beṉꞌ bishꞌcho Timotewi chwapntoꞌ leꞌ chiox, leꞌ chdop chllagle choeꞌlaꞌole Chiozaꞌ yell Coríntonaꞌ. Naꞌ ḻekzkaꞌ chwapntoꞌ chiox yogꞌḻoḻ bishꞌ ljwellchokaꞌ lleꞌ ganaꞌ mbani Acáyanaꞌ, beṉꞌkaꞌ nak lallꞌ naꞌ Chiozaꞌ.
2 Naꞌ chṉabintoꞌ X̱acho Chiozaꞌ len X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
3 Chiyaḻꞌ weꞌlaꞌocho Chiozaꞌ, X̱a X̱ancho Jesucrístonaꞌ, ḻaꞌ ḻenꞌ X̱achonaꞌ, beenaꞌ chiyeshꞌlallileꞌ choꞌ naꞌ chiyonxenlallee choꞌ lao bittezə dii chak c̱hecho.
4 Chiyonxenlallee choꞌ lao yogꞌḻoḻ diikaꞌ chzakꞌziꞌcho kwenc̱he ka choneꞌ c̱hecho, kaꞌkzan goncho yiyonxenlallꞌcho beṉꞌ yoblə katꞌ chzakꞌziꞌgakeꞌ.
5 Daa lenntoꞌ chzakꞌziꞌntoꞌ ka wxakꞌziꞌ Crístonaꞌ, Chiozaꞌ chtipcheꞌ lallꞌntoꞌ daa nonntoꞌ Crístonaꞌ txen.
6 Naꞌ shi netoꞌ chzakꞌziꞌntoꞌ, chak c̱hentoꞌ kaꞌ kwenc̱he gondiplallꞌchle naꞌ yilale bi kwiayiꞌle. Naꞌ shi Chiozaꞌ chtipeꞌ lallꞌntoꞌ, choneꞌ kaꞌ kwenc̱he ḻekzkaꞌ leꞌ gondiplallꞌle naꞌ so sakileꞌ ka yeḻꞌ zakꞌziꞌki chen chleꞌintoꞌ.
7 Nonyeṉꞌntoꞌ lez bi gakc̱hoplallꞌle lao diikaꞌ chen chleꞌile, ḻaꞌ ṉezintoꞌ daa lenle chtiḻ-le yeḻꞌ zakꞌziꞌkaꞌ, ḻekzkaꞌ lenle wtip Chiozaꞌ lallꞌle.
8 Leꞌ beṉꞌ bishꞌ naꞌ leꞌ beṉꞌ zanꞌ, cheenintoꞌ iṉezileꞌ kaꞌkꞌtek dii lalljkaꞌ btiḻntoꞌ ganaꞌ mbani Ásianaꞌ. Gokan to dii lallj wal dii bich nan so sakintoꞌ, naꞌ bich benntoꞌ lez yeḻꞌ mbannaꞌ.
9 Goktekzintoꞌ ni bllin lla guetntoꞌ ṉaa. Gok c̱hentoꞌ kaꞌ kwenc̱he gokbeꞌintoꞌ bi gak wx̱enilallꞌ kwinntoꞌ, san chiyaḻꞌ wx̱enilallꞌntoꞌ Chiozaꞌ, beenaꞌ chisban beṉꞌ wetkaꞌ.
10 Naꞌ Chiozaꞌ bisleꞌ netoꞌ naꞌ wislachkzeꞌ netoꞌ lao dii nxollkaꞌ nsaꞌ yeḻꞌ wit. Naꞌ nx̱enilallꞌntoꞌneꞌ toshiizi wislachkzeꞌ netoꞌ
11 shi gaklenle iṉabileneꞌ gakleneꞌ netoꞌ. Naꞌ shi beṉꞌ zan iṉabeꞌ c̱hentoꞌ, ḻekzkaꞌ beṉꞌ zan weꞌgakeꞌ Chiozaꞌ yeḻꞌ chox̱ken katꞌ ba gokleneꞌ netoꞌ.
12 De to dii chakyiblenntoꞌ: daa ṉezyeṉꞌintoꞌ do yic̱hj do lallntoꞌ nsaꞌ c̱hentoꞌ wen ladj beṉꞌ yell-lioni, ka chazlallꞌ Chiozaꞌ, naꞌ chonntoꞌ to dii byen chonchntoꞌ wen ladjlenaꞌ. Naꞌ aga yeḻꞌ sinꞌ c̱he beṉꞌ yell-lionin chaklenan netoꞌ chonntoꞌ kaꞌ, san Chiozanꞌ chakleneꞌ netoꞌ.
13-14 Diiki chzejntoꞌ leꞌ nakan dii shajniile ka wlablen. Ḻaꞌkzi ṉaa biṉꞌ shajniꞌyeṉꞌile bic̱he nsaꞌ c̱hentoꞌ kaꞌ, chbezꞌ illin lla shajniilen kwasḻoḻ, kwenc̱he katꞌkaꞌ yilaꞌ X̱ancho Jesúzaꞌ, yibaileꞌ daa nonle netoꞌ txen, ka chibaintoꞌ nontoꞌ leꞌ txen.
15 Daa nx̱enlallaa wyajniile dga naꞌ wleble nadꞌ, goklallaa tegaxjꞌ yidwiaꞌ leꞌ, ḻaꞌ gokidꞌ ḻe yiba yizakile yidwiaꞌ leꞌ c̱hop shii.
16 Gokidꞌ tiaꞌ wwiaꞌ leꞌ ka shaa Macedónianaꞌ, naꞌ yidiaꞌ wwiaꞌ leꞌ sto shii ka zizaa. Naꞌ zak goklenle nadꞌ kwenc̱he yigwaa nez yiyaa Judeanaꞌ, sheḻꞌ gokan.
17 Bi gakile aga do yic̱hj do lallaan wniaꞌ yidwiaꞌ leꞌ. ¿Anti chakile chonꞌ ka chon nottezə beṉꞌ yell-lioki chongakeꞌ to “wak” to “bi gakə”?
18 Chiozaꞌ ṉez nḻeꞌileꞌ biga chonntoꞌ to “wak” to “bi gakə” laolenaꞌ.
19 Nadꞌ Pablo, len Timotewi naꞌ Silvánoni beꞌntoꞌ ladjlenaꞌ choꞌa xtillꞌ Cristo Jesúzaꞌ, beenaꞌ nak Xiiṉ Chiozaꞌ. Naꞌ Jesucrístonaꞌ ba bliꞌe toshiizi chon Chiozaꞌ kon ka ba wneꞌ goneꞌ.
20 Naꞌ ni c̱he Crístonaꞌ chak yogꞌḻoḻ dii chc̱heb Chiozaꞌ, naꞌ nacho “kanꞌ nakan” kwenc̱he chgoocho Chiozaꞌ balaaṉ.
21 Naꞌ Chiozaꞌkzan choneꞌ kwenc̱he soatip soashoshcho gonḻilallꞌcho Crístonaꞌ, ka choneꞌ c̱hentoꞌ naꞌ ka choneꞌ c̱hele. Naꞌ wlejeꞌ choꞌ kwenc̱he nakcho lallꞌ nee,
22 naꞌ Espíritu Santo c̱heꞌnaꞌ nakeꞌ ka to sey daa ba ngweeneꞌ ḻoo yic̱hjlallꞌdoꞌchonaꞌ kwenc̱he chakḻiyicho ba nakcho xiiṉeꞌ, naꞌ kwenc̱he ṉezicho wllin lla goṉeꞌ yogꞌ dii wennaꞌ daa ba bc̱hebeꞌ goṉeꞌ.
23 Chiozaꞌ ṉezileꞌ biṉꞌ yidꞌ Coríntonaꞌ yidwiaꞌ leꞌ daa chapꞌ yeḻꞌ chxenlallꞌ c̱hele, naꞌ bi cheenidꞌ wsheshlenꞌ leꞌ.
24 Aga cheenintoꞌ gonntoꞌ byen kon daa iṉazntonꞌ gonle daa nakle Crístonaꞌ txen, ḻaꞌ ba zoac̱hec̱hkzle nonḻilallꞌleneꞌ. San cheenlintoꞌ gaklenntoꞌ leꞌ kwenc̱he gapchle yeḻꞌ chiba chizakinaꞌ.