2
Daan, bc̱hoglallaa bi bidwiaꞌ leꞌ kwenc̱he bi yidzoazꞌ leꞌ nyeshꞌ sto shii.
2 ¿Nora gon ka yiba yizakidꞌ shi ba bidyenyeshꞌzidꞌ leꞌ?
3 Naꞌ bzejchoklə leꞌ daa bi goklallidꞌ yidꞌ naꞌ gonyeshile nadꞌ, ḻaꞌ cheenlidꞌ gonle ka yiba yizakidꞌ. Naꞌ nx̱enlallaa lenle yiba yizaklenile nadꞌ.
4 Bzejꞌ leꞌ daa wzechgaꞌ wṉeyi nlleb naꞌ gokyeshꞌchgaidꞌ ax̱t wchellchgaꞌ. Naꞌ aga bzejaꞌn kwenc̱he gonyeshidꞌ leꞌ san kwenc̱he iṉezile ḻe chakidꞌ lenꞌ.
5 Naꞌ beenaꞌ benyeshileꞌ nadꞌ, aga toz nadaan benileꞌ kaꞌ, san lenkzlen benyeshileꞌ latꞌ. Niaꞌ “latꞌ”, kwenc̱he bi iṉiaꞌ ziꞌtegala ben beenaꞌ c̱hecho.
6 Yeḻꞌ zakꞌziꞌnaꞌ daa ba benle c̱heꞌ ba gokkzə to kaꞌtꞌ.
7 Naꞌ ṉaa chiyaḻꞌ yiziꞌxenle c̱heꞌ naꞌ gaklenleneꞌ kwenc̱he ki gakshejlallee lo yeḻꞌ chakyeshii c̱heꞌnaꞌ.
8 Daan, chatꞌyoidꞌ leꞌ, ḻi wliꞌ ni chakkzileneꞌ.
9 Ba bzejkzꞌ leꞌ kanaꞌ c̱he ka nak dga kwenc̱he wliꞌshkilaole shi leile gonle yogꞌte diikaꞌ niaꞌ leꞌ.
10 Naꞌ beenaꞌ yiziꞌxenle c̱heꞌ, ḻekzkaꞌ nadꞌ wiziꞌxenkzꞌ c̱heꞌ. Naꞌ shi de dii yiyakxen c̱heꞌ, Crístonaꞌ ṉezileꞌ wiziꞌxenkzꞌ c̱he beenaꞌ ni c̱hele,
11 kwenc̱he bi weꞌcho choꞌa xbayi Satanázaꞌ. Ḻaꞌ ṉezkzicho ka nak yeḻꞌ wxiyeꞌ c̱heyinnaꞌ.
12 Ka billinꞌ yell Troazaꞌ kwenc̱he wiꞌa dillꞌ wen dillꞌ kob c̱he Crístonaꞌ, gotꞌchga latj c̱haꞌ kwenc̱he gonꞌ llin c̱he X̱anchonaꞌ, sheḻꞌkaꞌ.
13 Per daa bi billagꞌ beṉꞌ bishꞌcho Títonaꞌ, naꞌch gokshejlallꞌchgaꞌ. Daan, biḻaa beṉꞌkaꞌ dillꞌ naꞌ biyaa Macedónianaꞌ.
14 Chox̱ken Chiozaꞌ choneꞌ kwenc̱he toshiizi chonntoꞌ gan lao diikaꞌ chḻis chta dii x̱iwaa daa nakntoꞌ Crístonaꞌ toz. Naꞌ ngoontoꞌ nez choeꞌntoꞌ xtilleenaꞌ kwenc̱he doxen zbii zkaaṉ yell-lioni illiljan, ka chllilj shii xḻaꞌ to dii chḻaꞌ zix̱ sia, naꞌ gombiaꞌ beṉꞌ ḻeꞌ.
15 Ka bibayi Chiozaꞌ shii xḻaꞌ llen yalaꞌ daa chḻaꞌ zix̱ sia, kaꞌkzan chibaileꞌ daa nzoa Crístonaꞌ netoꞌ choeꞌntoꞌ xtilleenaꞌ ladj beṉꞌkaꞌ yila naꞌ ladj beṉꞌkaꞌ kwiayiꞌ.
16 Beṉꞌkaꞌ kwiayiꞌ, bi chibagakileꞌ dillii choeꞌntoꞌ daa chḻaꞌgakileꞌn zyeḻꞌ wit. Naꞌ beṉꞌkaꞌ yila, chibagakileꞌn daa chḻaꞌgakileꞌn zix̱ sia daa nsaꞌn yeḻꞌ mban c̱hegakeꞌ. ¿Notgui gak goneꞌ dga?
17 Beṉꞌ zan llialallee yibejeꞌ choꞌa xtillꞌ Chiozaꞌ mech. San netoꞌ aga kanꞌ chonntoꞌ. Ṉez nḻeꞌi Chiozaꞌ do yic̱hj do lallꞌntoꞌ choeꞌntoꞌ xtilleenaꞌ ḻega beṉꞌ bseḻee, daa nakntoꞌ Crístonaꞌ toz.