Kart daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ ganaꞌ mbani Galácianaꞌ
1
Nadꞌ Pablo, nakꞌ postl c̱he Jesucrístonaꞌ, naꞌ aga no beṉꞌ yell-lio wlejeꞌ nadꞌ naꞌ bseḻee nadꞌ wiꞌa xtilleenaꞌ, san kwin Jesucrístonaꞌ naꞌ X̱acho Chiozaꞌ, beenaꞌ bisbaneꞌneꞌ ladj beṉꞌ wetkaꞌ, bseḻꞌgakeꞌ nadꞌ.
2 Nadꞌ naꞌ yogꞌ bishꞌ ljwellchoki chwapntoꞌ leꞌ chiox, ka le nonḻilallꞌle Crístonaꞌ to to yellkaꞌ lleꞌ ganaꞌ mbani Galácianaꞌ.
3 Chṉabidꞌ X̱acho Chiozaꞌ naꞌ X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
4 Jesucrístonaꞌ bzani kwineꞌ witeꞌ ni c̱hecho daa nakcho beṉꞌ saaxya, kwenc̱he bisleꞌ choꞌ lao dii malaꞌ de yell-lioni, kon ka goklallꞌ X̱acho Chiozaꞌ goneꞌ,
5 beenaꞌ chidoḻꞌ shoꞌ balaaṉ zejḻi kaṉi. Kanꞌ nakan.
6 Ḻe chibanidꞌ c̱hele daa ba biḻaalaꞌodozle Chiozaꞌ, beenaꞌ gox wṉab leꞌ naꞌ bliileꞌ leꞌ yeḻꞌ chiyeshꞌlalli c̱heꞌnaꞌ daa bseḻee Crístonaꞌ witeꞌ ni c̱hecho, naꞌ ba zjanozle to dii yoblə daa bi nak dillꞌ wen dillꞌ kob c̱heꞌ.
7 Aga iṉacho de sto dillꞌ wen dillꞌ kob yoblan, san zoaz baḻ beṉꞌ cheengakileꞌ gonllej gongangakileꞌ lenꞌ, naꞌ chshaꞌzgakeꞌ dillꞌ wen dillꞌ kob c̱he Crístonaꞌ.
8 Shi ga zaꞌ beṉꞌ yishee dillꞌ wen dillꞌ kob c̱he Crístonaꞌ daa ba wdix̱jeꞌintoꞌ leꞌ, Chiozaꞌ wsakꞌziꞌshgueꞌ zejḻi kaṉi nottezə beenaꞌ gon kaꞌ, ḻaa netoꞌ wa no anjl beṉꞌ zaꞌ yabanaꞌ.
9 Ba wṉiakzəꞌ leꞌ kaꞌ, naꞌ ṉaa chizniaꞌn sto shii: shi no chshaꞌ dillꞌ wen dillꞌ kob c̱he Crístonaꞌ daa ba wdix̱jeꞌintoꞌ leꞌ, Chiozaꞌ wsakꞌziꞌshgueꞌneꞌ zejḻi kaṉi.
10 Aga cheenidꞌ ileꞌshii beṉꞌ nadꞌ daa niaꞌ kaꞌ, san cheenidꞌ gonꞌ daa chazlallꞌ Chiozaꞌ. Shi cheenidꞌ gonꞌ ka chazlallꞌ beṉꞌ, aga wen llin c̱he Crístonaꞌchan nakꞌ.
11 Cheenidꞌ iṉezile dga, leꞌ beṉꞌ bishꞌ naꞌ leꞌ beṉꞌ zanꞌ, dillꞌ wen dillꞌ kob c̱he Crístonaꞌ daa wdix̱jeꞌidꞌ leꞌ bi nakan dii wdiljlallꞌ beṉꞌ yell-lioni.
12 Ni to beṉꞌ yell-lio bi bliꞌ bsedileꞌn nadꞌ, san kwin Jesucrístonaꞌ bliꞌ bsedileꞌn nadꞌ.
13 Ba benkzileꞌ ka bsaꞌ c̱haꞌ kanaꞌ ni noaꞌ ley c̱hentoꞌnaꞌ, netoꞌ beṉꞌ Israel. Naꞌ bsakꞌziꞌa beṉꞌkaꞌ nak lallꞌ naꞌ Chiozaꞌ daa nonḻilallꞌgakeꞌ Crístonaꞌ, goklallaa yisḻengakee.
14 Kanaꞌ ni noaꞌ ley c̱hentoꞌnaꞌ, wlejlawꞌ ladj beṉꞌkaꞌ nak ljwellꞌ daa benꞌ to dii byen wnoaꞌ yogꞌ diikaꞌ bkwaaṉlen dii x̱ozxtoꞌntoꞌkaꞌ netoꞌ.
15 Per Chiozaꞌ, kanaꞌ ziꞌ galjtiaꞌ, ba ngwee xṉez xḻatjin yiyeshꞌlallileꞌ nadꞌ, naꞌ wlejeꞌ nadꞌ kwenc̱he gonꞌ xshineꞌnaꞌ. Naꞌ ka bllin llanaꞌ nllieꞌ biaꞌ,
16 beneꞌ ka bembiꞌa Xiiṉeꞌnaꞌ kwenc̱he lljiꞌa xtilleenaꞌ lao beṉꞌkaꞌ bi nak beṉꞌ Israel. Naꞌ ka gox wṉab Chiozaꞌ nadꞌ, ni tlishꞌ beṉꞌ yell-lio bi wṉabidꞌ wzajniileꞌ nadꞌ daa chiyaḻꞌ gonꞌ.
17 Ni bi biyaa Jerusalénnaꞌ lljawiaꞌ beṉꞌkaꞌ wlej Crístonaꞌ nakgakeꞌ postl c̱heꞌ kanaꞌ ziꞌ kwejeꞌ nadꞌ. San lii wyaatiaꞌ ganaꞌ mbani Arábianaꞌ, naꞌtech biyaa Damásconaꞌ sto shii.
18 Naꞌ ka wde shoṉ yiz, biyaa Jerusalénnaꞌ kwenc̱he bembiꞌa Pédronaꞌ, naꞌ bigaaṉlenee shdaꞌ wbill.
19 Ḻekzkaꞌ bleꞌidꞌ Jacóbonaꞌ, beenaꞌ nak beṉꞌ bishꞌ X̱anchonaꞌ, naꞌ kochno postl yoblə bleꞌidꞌ.
20 Chiozaꞌ ṉezileꞌ dga chzejꞌ leꞌ bi nakan de wxiyeꞌ.
21 Naꞌtech wyaa ganaꞌ mbani Sírianaꞌ naꞌch Cilícianaꞌ.
22 Per beṉꞌkaꞌ nonḻilallꞌ Crístonaꞌ Judéanaꞌ biṉꞌ gombiaꞌgakeꞌ nadꞌ.
23 Zeelo ba bengakileꞌ nagakeꞌ: “Beenaꞌ bsakꞌziꞌe choꞌ kanaꞌ, ba chdeꞌ choeꞌ dillꞌ wen dillꞌ kob c̱he Crístonaꞌ daa goklallee yisol yiṉiteꞌ kanaꞌ.”
24 Naꞌ beꞌlaꞌogakeꞌ Chiozaꞌ daa ba chyix̱jiꞌa xtillꞌ Crístonaꞌ.