Kart daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Éfesonaꞌ
1
Nadꞌ Pablo nakꞌ postl c̱he Jesucrístonaꞌ kon ka chaklallꞌ Chiozaꞌ. Chwapꞌ leꞌ chiox, leꞌ lleꞌle yell Éfesonaꞌ, naꞌ nakle lallꞌ naꞌ Chiozaꞌ daa nakle Cristo Jesúzaꞌ toz, beenaꞌ chonḻilallꞌle.
2 Chṉabidꞌ X̱acho Chiozaꞌ naꞌ X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
3 Chiyaḻꞌ weꞌlaꞌocho beenaꞌ nak Chios c̱he X̱ancho Jesucrístonaꞌ, beenaꞌ nak X̱eꞌ. Ḻaꞌ ba benḻeeyeꞌ choꞌ naꞌ ba naki c̱hecho yogꞌ dii wennaꞌ de yabanaꞌ, daa nakcho Crístonaꞌ toz.
4 Chiozaꞌ wlejeꞌ choꞌ gakcho Crístonaꞌ toz kanaꞌ ziꞌ x̱e silte yell-lioni kwenc̱he gakcho beṉꞌ nxi nyech naꞌ bibi xtoḻꞌcho gatꞌ laweꞌnaꞌ. Daa ḻe chakileꞌ choꞌ,
5 wloꞌe xṉezin kanaꞌ ziꞌ x̱e silte yell-lioni gakcho xiiṉeꞌ kon ka wyazlallee goneꞌ c̱hecho, daan bseḻee Jesucrístonaꞌ ni c̱hecho.
6 Naꞌ daan, toshiizi weꞌlaꞌocho Chiozaꞌ daa beneꞌ to dii wen inlleb c̱hecho daa ba nakcho Xiiṉeꞌnaꞌ toz, beenaꞌ ḻe chakileꞌ.
7 Ba nakchoneꞌ toz daa wdixjeꞌ xtoḻꞌchokaꞌ kanaꞌ blalj xc̱heneꞌnaꞌ ni c̱hecho kwenc̱he Chiozaꞌ biziꞌxeneꞌ saaxya c̱hechokaꞌ daa naklikzeꞌ beṉꞌ wen inlleb.
8 Naꞌ dii xen wal chaklen Chiozaꞌ choꞌ daa noṉeꞌ choꞌ yeḻꞌ sinꞌnaꞌ len yeḻꞌ chajniinaꞌ.
9 Naꞌ ba bliileꞌ choꞌ daa goklallee goneꞌ daa kono wṉezi kaniꞌyi, daa bllieꞌ biaꞌ gon Crístonaꞌ.
10 Naꞌ bllieꞌ biaꞌ illin lla gak ka wyazlallee naꞌch yiyoneꞌ toz yogꞌḻoḻ dii bx̱e bsileꞌ, ka diikaꞌ lleꞌ yabanaꞌ naꞌ ka diikaꞌ lleꞌ lo yell-lioni, kwenc̱he Crístonaꞌ iṉabiꞌe lao yogꞌḻoḻan.
11 Chios, beenaꞌ chon yogꞌḻoḻ daa chaklallee kon ka chgwee xṉezin gak, wlejeꞌ choꞌ kanaꞌ ziꞌ soatecho kwenc̱he gaki c̱hecho dii wennaꞌ wiꞌe beṉꞌkaꞌ nak Crístonaꞌ toz.
12 Naꞌ goklallee zigaate netoꞌ nakntoꞌ beṉꞌ Israel wx̱enilallꞌntoꞌ Crístonaꞌ kwenc̱he shajlawee daa nakeꞌ beṉꞌ choo beṉꞌ xen.
13 Naꞌ ḻekzkaꞌ leꞌ, wyajḻeꞌle c̱he Crístonaꞌ naꞌ bénleneꞌ txen ka benile dillꞌ wen dillꞌ kob c̱heꞌnaꞌ daa nak dii ḻicha daa choeꞌ dillꞌ yisleꞌ choꞌ kwenc̱he bi kwiayiꞌcho. Naꞌ ka wyajḻeꞌle, Chiozaꞌ bliꞌe ba nakle lallꞌ nee daa bzoeꞌ Espíritu Sánto c̱heꞌnaꞌ ḻoo yic̱hjlallꞌdoꞌlenaꞌ kon ka bc̱hebeꞌ goneꞌ. Naꞌ daa beneꞌ kaꞌ, wak iṉacho wloꞌe leꞌ to seṉ daa chliꞌn nakle lallꞌ nee.
14 Naꞌ daa zoa Espíritu c̱heꞌnaꞌ ḻoo yic̱hjlallꞌdoꞌchonaꞌ, ṉezicho gak lo naꞌcho yogꞌ diikaꞌ nc̱hebeꞌ goṉeꞌ choꞌ katꞌ illin lla yiziꞌ yikee choꞌ nakcho lallꞌ nee, kwenc̱he koochoneꞌ balaaṉ daa nakeꞌ beṉꞌ choo beṉꞌ xen.
15 Naꞌ daan, ka wṉezidꞌ nonḻilallꞌle X̱ancho Jesúzaꞌ naꞌ ḻe chakileꞌ yogꞌ beṉꞌkaꞌ nak lallꞌ naꞌ Chiozaꞌ,
16 bi chsanlallaa wiꞌa Chiozaꞌ yeḻꞌ chox̱ken ni c̱hele naꞌ chṉabꞌ gakleneꞌ leꞌ katꞌ choeꞌḻwillee.
17 Choeꞌḻwillꞌ Chios c̱he X̱ancho Jesucrístonaꞌ, beenaꞌ nak X̱acho, beenaꞌ ḻiizelozi chidoḻee shoꞌe balaaṉ xen, chṉabidee goṉ Espíritu c̱heꞌnaꞌ leꞌ yeḻꞌ sinꞌ c̱heꞌnaꞌ naꞌ wzajniileꞌ leꞌ kwenc̱he gombiaꞌchleneꞌ.
18 Naꞌ chṉabidee wzoeꞌ beeniꞌ c̱heꞌnaꞌ ḻoo yic̱hjlallꞌdoꞌlenaꞌ kwenc̱he iṉezile bin nonle lez daa ba gox wṉabeꞌ leꞌ, naꞌ ka mbalaz inlleb nak daa wiꞌe beṉꞌkaꞌ ba nak lallꞌ nee,
19 naꞌ kwenc̱he gakbeꞌile ka nak yeḻꞌ wak choo yeḻꞌ xen c̱heꞌnaꞌ daa bi chiyoll chido daa chaklenan choꞌ nonḻilallꞌchoneꞌ. Ḻennanꞌ yeḻꞌ wak choo yeḻꞌ wak xen
20 daa bliꞌe kanaꞌ bisbaneꞌ Crístonaꞌ ladj beṉꞌ wetkaꞌ naꞌ wlekweꞌneꞌ shḻaa de shḻi c̱heꞌnaꞌ yabanaꞌ,
21 ganaꞌ nzoeꞌneꞌ chṉabiaꞌcheꞌ aga ka yogꞌḻoḻ anjlkaꞌ naꞌ dii x̱iwꞌkaꞌ nap yeḻꞌ wak naꞌ yeḻꞌ wṉabiaꞌ. Naꞌ zeyi c̱heꞌ kochno zoa, ni kochno soa, beṉꞌ gakch beṉꞌ zakꞌchi ka ḻeꞌ.
22 Naꞌ bzoeꞌ xṉiꞌa Crístonaꞌ yogꞌḻoḻte dii de, naꞌ nzoeꞌneꞌ chṉabiꞌe lao yogꞌḻoḻcho choꞌ nakchoneꞌ toz, ka chon yic̱hjchonaꞌ chṉabiꞌan doxen kwerp c̱hechonaꞌ.
23 Ḻaꞌ choꞌ nakchoneꞌ toz, zaklebicho kwerp c̱heꞌnaꞌ. Naꞌ toshiizi zoaleneꞌ choꞌ naꞌ chṉabiꞌe choꞌ, ḻaꞌ ḻenꞌ chṉabiꞌe yogꞌḻoḻte dii de doxen yell-lioni naꞌ yabanaꞌ.