2
Kanaꞌ biṉꞌ gonḻilallꞌle Crístonaꞌ, gokle ka beṉꞌ net lao Chiozaꞌ daa wzoale bx̱iṉj bḻenle.
2 Naꞌ wdale benle kon ka nazan c̱hele, ka chon nottezə beṉꞌ yell-lio, beṉꞌ bi nombiꞌe Chiozaꞌ. Naꞌ bzenagle c̱heyi daa chṉabiaꞌ dii x̱iwꞌkaꞌ ze lo llazə, daa chṉabiaꞌ yic̱hjlallꞌdoꞌ beṉꞌkaꞌ bi chzenag c̱he Chiozaꞌ.
3 Kaꞌkzan ben yogꞌḻoḻcho kanaꞌ, bencho kon daa nazan c̱hecho, beꞌcho choꞌa xbayi beli chen c̱hechoni naꞌ yogꞌḻoḻ diikaꞌ wzaꞌlallꞌ ḻoo yic̱hjlallꞌdoꞌchoni. Naꞌ daa bencho kaꞌ, chidoḻꞌcho yeḻꞌ zakꞌziꞌ c̱he Chiozaꞌ kon ka chidoḻꞌ gak c̱he beṉꞌkaꞌ bi chzenag c̱heꞌ.
4 Per daa nak Chiozaꞌ beṉꞌ lallꞌdoꞌ xen inlleb naꞌ ḻe chakileꞌ choꞌ,
5 beṉeꞌ yeḻꞌ mban c̱hecho zejḻi kaṉi ka benḻilallꞌcho Crístonaꞌ, beenaꞌ biban ladj beṉꞌ wetkaꞌ, ḻaꞌkzi gokcho ka beṉꞌ net daa choncho saaxyakaꞌ. Naꞌ daa nak Chiozaꞌ beṉꞌ wen inlleban, bisleꞌ choꞌ kwenc̱he bi kwiayiꞌcho.
6 Naꞌ daa nakcho Cristo Jesúzaꞌ toz, ka bisban Chiozaꞌneꞌ ladj beṉꞌ wetkaꞌ, lenkzchon bisbaneꞌ daa beṉeꞌ choꞌ to yeḻꞌ mban kob. Naꞌ ba nakten lljaṉabiaꞌlenchoneꞌ yabanaꞌ.
7 Chiozaꞌ beneꞌ kaꞌ kwenc̱he llakaꞌ ziꞌ zaꞌ wliꞌlawin nakeꞌ beṉꞌ wen inlleb daa beneꞌ to yeḻꞌ goklen xen c̱hecho daa bseḻee Crístonaꞌ ni c̱hecho.
8 Ḻaꞌ yeḻꞌ beṉꞌ wen c̱heꞌnanꞌ bisleꞌ choꞌ kwenc̱he bi kwiayiꞌcho daa ba nonḻilallcho Crístonaꞌ. Aga iṉacho daa nakcho beṉꞌ wenan bisleꞌ choꞌ, san nakan to goklen daa beneꞌ c̱hecho kaꞌzə.
9 Naꞌ bi gak gakzcho chaꞌsib, ḻaꞌ aga daa choncho dii wennanꞌ bisleꞌ choꞌ.
10 Ḻaꞌ Chiozaꞌ bikobeꞌ yeḻꞌ mban c̱hechonaꞌ ka beneꞌ choꞌ lallꞌ naꞌ Crístonaꞌ kwenc̱he soacho goncho dii wennaꞌ ba wloꞌe xṉezin goncho.
11 Ka leꞌ bi nakle beṉꞌ Israel, beṉꞌ Israelkaꞌ nsiꞌgakeꞌ leꞌ Beṉꞌ bi yoo seṉ daa le circuncisión, naꞌ ḻegakeꞌ nsiꞌ kwingakeꞌ Beṉꞌ yoo seṉ daa le circuncisión. Ḻi lljadini ka gokle kanaꞌ.
12 Ḻaꞌ kanaꞌ biṉꞌ gombiaꞌle Crístonaꞌ, gokle ka beṉꞌ zitꞌ laontoꞌnaꞌ, netoꞌ wlej Chiozaꞌ kwenc̱he nakntoꞌ yell c̱heꞌ, naꞌ Chiozaꞌ aga bc̱hebeꞌ gakleneꞌ leꞌ ka bc̱hebeꞌ gakleneꞌ netoꞌ beṉꞌ Israel. Naꞌ wzoale yell-lioni bi bembiaꞌle Chiozaꞌ ni bi benle lez gak wen c̱hele.
13 Kanaꞌ, gokle ka beṉꞌ zitꞌ laontoꞌnaꞌ. San ṉaa, ba nakcho toz daa nonḻilallꞌle Cristo Jesúzaꞌ, beenaꞌ blalj xc̱heneꞌnaꞌ witeꞌ ni c̱hecho.
14 Crístonaꞌ beneꞌ ka bizoalen ljwellcho wen. Kanaꞌ, bi bleꞌshii ljwellcho, san ṉaa, ba biyoneꞌ choꞌ toz daa bsol bṉiteꞌ daa benan ka bwiyi ljwellcho.
15 Daa bzani kwin Crístonaꞌ witeꞌ ni c̱hecho, bc̱hogueꞌ daa wna ley c̱hentoꞌnaꞌ chiyaḻꞌ gonntoꞌ. Beneꞌ kaꞌ kwenc̱he netoꞌ beṉꞌ Israel naꞌ leꞌ bi nakle beṉꞌ wlall c̱hentoꞌ biyakcho toz laweꞌnaꞌ. Naꞌ ba bizoeꞌ choꞌ wen.
16 Naꞌ daa witeꞌ ni c̱hecho ḻee yag cruzaꞌ, bizoeꞌ choꞌ wen kon Chiozaꞌ, ka leꞌ naꞌ ka netoꞌ, naꞌ biyakcho toz naꞌ bich chakzbani ljwellcho.
17 Crístonaꞌ bidtix̱jiꞌe dillꞌ wen dillꞌ kobaꞌ daa na yogꞌcho wak soalencho Chiozaꞌ wen, ka leꞌ nakle beṉꞌ zitꞌ naꞌ ka netoꞌ nakntoꞌ beṉꞌ yell c̱heꞌ.
18 Ḻaꞌ daa nonḻilallꞌcho Crístonaꞌ, ka leꞌ naꞌ ka netoꞌ, wak ibigꞌcho lao X̱acho Chiozaꞌ daa ba beṉeꞌ choꞌ Espíritu c̱heꞌnaꞌ.
19 Naꞌ leꞌ bi nakle beṉꞌ Israel bich nakle ka beṉꞌ zitꞌ, san ba lenle beṉꞌkaꞌ nak yell c̱he Chiozaꞌ, naꞌ Chiozaꞌ ba noneꞌ leꞌ ka beṉꞌ ḻoo yoo.
20 Leꞌ nakle ka to yoo, naꞌ netoꞌ postl naꞌ beṉꞌkaꞌ chyix̱jee daa cheꞌ Chiozaꞌ ḻegakeꞌ nakntoꞌ ka len yoonaꞌ, naꞌ kwin Jesucrístonaꞌ nakeꞌ beṉꞌ llialaote ka yajaꞌ daa mbejlawi, yajaꞌ daa ba nc̱hejcha yoonaꞌ.
21 Naꞌ Jesucrístonaꞌ choneꞌ kwenc̱he yogꞌcho choꞌ nakchoneꞌ txen gakcho toz naꞌ gakcho ka to yoodoꞌ ganaꞌ zoa Chiozaꞌ.
22 Naꞌ ḻekzkaꞌ Jesucrístonaꞌ choneꞌ kwenc̱he yogꞌcho, ka netoꞌ naꞌ ka leꞌ, gakcho ka to yoo ganaꞌ zoa Chiozaꞌ daa zoalen Espíritu c̱heꞌnaꞌ choꞌ.