3
Nadꞌ Pablo diaꞌ lillyani daa chyix̱jeꞌidꞌ leꞌ xtillꞌ Crístonaꞌ, leꞌ bi nakle beṉꞌ Israel.
2 Ba ṉezkzileꞌ dii wennaꞌ ben Chiozaꞌ daa beneꞌ lallꞌ naꞌ wiꞌa xtilleenaꞌ laolenaꞌ.
3 Ba bzajniileꞌ nadꞌ daa kono wṉezi, kon ka ba bzejꞌ leꞌ to c̱hop choꞌa.
4 Naꞌ katꞌ wlable yishi, gakbeꞌile ba bzajniileꞌ nadꞌ daa kono wṉezi c̱he Crístonaꞌ.
5 Diakaꞌ ba wde bi wṉezgakileꞌ dga ba bzajnii Espíritu c̱heꞌnaꞌ netoꞌ postl c̱heꞌ len beṉꞌkaꞌ wdix̱jee daa goll Chiozaꞌ ḻegakeꞌ.
6 Naꞌ dga kono wṉezi nan: yogꞌcho choꞌ chajḻeꞌcho dillꞌ wen dillꞌ kob c̱he Cristo Jesúzaꞌ, ka leꞌ bi nakle beṉꞌ Israel naꞌ ka netoꞌ beṉꞌ Israel, nakcho toz naꞌ txen ikaacho dii wennaꞌ bc̱heb Chiozaꞌ goṉeꞌ c̱hecho.
7 Yeḻꞌ beṉꞌ wen c̱he Chiozanꞌ wlejeꞌ nadꞌ naꞌ bzoeꞌ nadꞌ gon xshineꞌnaꞌ, naꞌ chaklentieꞌ nadꞌ kon yeḻꞌ wak c̱heꞌnaꞌ kwenc̱he choeꞌlenꞌ beṉꞌ dillꞌ wen dillꞌ kob c̱he Crístonaꞌ.
8 Nadꞌ chakidꞌ shlas aga no nakꞌ lao yogꞌ beṉꞌ nak lallꞌ naꞌ Chiozaꞌ. Per ḻaꞌkzi aga bi zakaa, Chiozaꞌ wlejeꞌ nadꞌ kwenc̱he weꞌlenꞌ beṉꞌkaꞌ bi nak beṉꞌ Israel dillꞌ wen dillꞌ kob c̱he Crístonaꞌ daa ḻe zakꞌchga naꞌ bich bi de dii wsaklebichon.
9 Chiozaꞌ, beenaꞌ bx̱e bsil yogꞌḻoḻte dii de, kaniꞌyi wloꞌe xṉezin goneꞌ to dii goneꞌ, naꞌ ni to kono golleꞌ ka nak daa goneꞌ. Naꞌ ṉaa ba beneꞌn lallꞌ naꞌ wzajniidaꞌn beṉꞌ
10 kwenc̱he ni c̱hecho, choꞌ nakcho toz nonḻilallꞌcho Crístonaꞌ, gakbeꞌi anjlkaꞌ lleꞌ yabanaꞌ naꞌ dii x̱iwꞌkaꞌ doxen ka nak yeḻꞌ sinꞌ c̱he Chiozaꞌ.
11 Naꞌ daa bseḻee X̱ancho Cristo Jesúzaꞌ, ba beneꞌ ka wloꞌe xṉezin goneꞌ kanaꞌ ziꞌ wx̱e wsiltieꞌ yell-lioni.
12 Naꞌ daa nonḻilallꞌcho Crístonaꞌ naꞌ nakchoneꞌ txen, de latj c̱hecho weꞌḻwillcho X̱acho Chiozaꞌ naꞌ ṉezicho wzenagueꞌ c̱hecho.
13 Naꞌ niaꞌ leꞌ, ḻi gon goklen bi yidiṉjile ni c̱he dga chllagloaꞌ daa beꞌlenꞌ leꞌ xtillꞌ Crístonaꞌ, san ḻi yibayi daa chzakꞌziꞌa ni c̱hele.
14 Daan, chc̱hekꞌ xibꞌ choeꞌḻwillꞌ X̱acho Chiozaꞌ, beenaꞌ nak X̱a X̱ancho Jesucrístonaꞌ,
15 beenaꞌ ben kwenc̱he yogꞌcho choꞌ nakcho xiiṉeꞌ nakcho toz, ka beṉꞌ lleꞌ yell-lioni ka beṉꞌ lleꞌ yabanaꞌ.
16 Naꞌ daa napeꞌ doxen yeḻꞌ wakaꞌ, chṉabidee kwenc̱he Espíritu c̱heꞌnaꞌ, beenaꞌ yoo ḻoo yic̱hjlallꞌdoꞌlenaꞌ, goneꞌ ka gakchachle
17 naꞌ soachle gonḻilallꞌle Crístonaꞌ kwenc̱he toshiizi soaleneꞌ leꞌ, naꞌ yeḻꞌ chakinaꞌ wde loyin lo yeḻꞌ mban c̱helenaꞌ kwenc̱he soatezi soale gakileneꞌ naꞌ gaki ljwell-le,
18 naꞌ gakbeꞌile, leꞌ naꞌ yogꞌ beṉꞌkaꞌ nak lallꞌ naꞌ Crístonaꞌ, ka chakchgaileꞌ choꞌ, naꞌ biga yiyoll yido yeḻꞌ chaki c̱heꞌnaꞌ.
19 Cheenidꞌ gombiaꞌle yeḻꞌ chaki c̱heꞌnaꞌ daa nak ḻiizelozi dii xen inlleb, daa kono illin shajnii kwasḻoḻ, kwenc̱he yiyoll yido gakle doxen ka cheeni Chiozaꞌ.
20 Chiozaꞌ chidoḻee shoꞌe balaaṉ daa chak choneꞌ dii xench aga ka daa chṉabichoneꞌ wa daa chakicho goneꞌ c̱hecho ni c̱he yeḻꞌ wak c̱heꞌnaꞌ daa zoalen choꞌ.
21 Choꞌ nonḻiꞌlallꞌcho Cristo Jesúzaꞌ chiyaḻꞌ koocho Chiozaꞌ balaaṉ toshiizi naꞌ zejḻi kaṉi ni c̱heyi daa bseḻee Crístonaꞌ ni c̱hecho. Kanꞌ nakan.