4
Nadꞌ diaꞌ lillyani daa chyix̱jiꞌa xtillꞌ X̱ancho Jesucrístonaꞌ. Naꞌ chatꞌyoidꞌ leꞌ soale gonle wen kon ka chiyaḻꞌ goncho choꞌ ba gox wṉab Chiozaꞌ.
2 Ḻi gak beṉꞌ gax̱jlallꞌ, ḻi ileꞌshii beṉꞌ, ḻi gap yeḻꞌ chxenlallꞌ c̱hele ganga naꞌ ḻi gaki ljwell-le.
3 Espíritu Sántonaꞌ beneꞌ ka yogꞌcho biyakcho toz, naꞌ ḻi gon byen soalen ljwell-le wen kwenc̱he toshiizi gakcho toz.
4 Yogꞌcho, choꞌ nonḻilallꞌcho Crístonaꞌ, zaklebicho to kwerp daa nakcho toz; naꞌ toz Espíritu yoo ḻoo yic̱hjlallꞌdoꞌchonaꞌ; naꞌ toz ka noncho lez gon Chiozaꞌ c̱hecho daa ba gox wṉabeꞌ choꞌ.
5 Tozə beenaꞌ nak X̱ancho, naꞌ tozeꞌn nonḻilallꞌcho, naꞌ toz ka zeji daa chchoacho nisaꞌ.
6 Tozə Chiozaꞌ zoa, beenaꞌ nak X̱a yogꞌḻoḻcho. Naꞌ ḻenꞌ chṉabiꞌe lao yogꞌḻoḻcho; naꞌ chc̱hineꞌ yogꞌcho kwenc̱he chak daa cheenileꞌ gak, naꞌ zoaleneꞌ yogꞌcho.
Ka biyepeꞌ yabanaꞌ, zinc̱hiꞌe pres c̱heꞌkaꞌ,
naꞌ biꞌe dii wen c̱heꞌnaꞌ beṉꞌ yell-lioki.
9 Naꞌ ka nak daa nan “biyepeꞌ”, zejin zigaate betjeꞌ bideꞌ yell-lioni.
10 Naꞌ beenaꞌ bid yell-lioni, ḻekzenꞌ biyepeꞌ yabanaꞌ ganaꞌ zoeꞌ chṉabiꞌe lao yogꞌḻoḻte dii de.
11 Naꞌ ḻenꞌ bzoeꞌ beṉꞌ nak postl c̱heꞌ, naꞌ beṉꞌ chyix̱jee daa chiꞌeneꞌ, naꞌ beṉꞌ chyix̱jee dillꞌ wen dillꞌ kob c̱heꞌnaꞌ, naꞌ beṉꞌ chap chwieꞌ beṉꞌkaꞌ ba nonḻilallꞌ ḻeꞌ, naꞌ beṉꞌ chliꞌ chsedi choꞌa xtilleenaꞌ,
12 kwenc̱he beṉꞌkaꞌ nak lallꞌ nee gak gongakeꞌ xshineꞌnaꞌ, naꞌ yiyoll yido gakcha yogꞌ beṉꞌkaꞌ nak Crístonaꞌ txen,
13 ax̱t ki yogꞌcho gakcho toz gonḻilallꞌcho Xiiṉ Chiozaꞌ naꞌ gombiaꞌchchoneꞌ. Naꞌ gakyeṉꞌcho ka chiyaḻꞌ gakcho, naꞌ yiyoll yido gakcho dowalj beṉꞌ wen doxen ka nak Crístonaꞌ.
14 Naꞌ bich gakzcho ka biꞌdoꞌ naꞌ shajḻeꞌtezcho bittezə daa chyiljlallꞌ beṉꞌ, naꞌ ni bi gak gon beṉꞌ wxiyeꞌkaꞌ gan siyeꞌgakeꞌ choꞌ kwenc̱he shajḻeꞌcho daa bi nak dii ḻi.
15 San shajlencho dillꞌ ḻi c̱he Chiozaꞌ naꞌ gapcho yeḻꞌ chaki c̱heꞌnaꞌ, naꞌ kaꞌ zej gakchcho beṉꞌ wen ka nak Crístonaꞌ, beenaꞌ chṉabiꞌe choꞌ, ka chon yic̱hjchoni chṉabiaꞌn kwerp c̱hechoni.
16 Ka nak kwerp c̱hechoni, tkwen tkwen wejan nox̱ꞌ ljwellin naꞌ chaklen ljwellin bittezə llin gonan. Kaꞌkzan choꞌ nakcho Crístonaꞌ txen nakcho ka toz kwerp kwenc̱he to tocho goncho daa noṉeꞌ choꞌ, naꞌ yogꞌcho zejch chakchacho naꞌ zejch chakchi ljwellcho.
17 Niaꞌ leꞌ dga kon yeḻꞌ wṉabiaꞌ c̱he X̱ancho Crístonaꞌ: bich soale gonle ka chon beṉꞌkaꞌ bi chonḻilallꞌgakeꞌ Chiozaꞌ, beṉꞌkaꞌ kon chyiljlallꞌgakeꞌ daa bibi zakii,
18 naꞌ nc̱hoḻ nṉiti yic̱hjlallꞌdoꞌekaꞌ naꞌ bi ntegakileꞌ, naꞌ bi napgakeꞌ yeḻꞌ mban daa noṉ Chiozaꞌ choꞌ, ni bi nombiaꞌgakeꞌ daa nak c̱he Chiozaꞌ, daa nakgakeꞌ beṉꞌ lallꞌdoꞌ wal.
19 Bichkzə bi yeḻꞌ ztoꞌ nombiaꞌgakeꞌ, naꞌ biga chjshyagakileꞌ chongakeꞌ yogꞌ diikaꞌ nak zban.
20 San leꞌ, ṉezile aga kanꞌ cheeni Crístonaꞌ goncho,
21 shi dii ḻikzə ba benile xtillꞌ Jesúzaꞌ naꞌ ba nzedile soale gonle ka cheenileꞌ kon ka nak dii ḻi c̱heꞌnaꞌ.
22 Naꞌ chiyaḻꞌ wsanle bich gonle dii malkaꞌ benle, naꞌ kwej yic̱hjle yeḻꞌ mban gol c̱helenaꞌ, ḻaꞌ daa wxiyeꞌ beli chennaꞌ lenꞌ, bx̱iṉj bḻenan leꞌ.
23 Chiyaḻꞌ yikob yic̱hjlallꞌdoꞌlekaꞌ naꞌ bich bi dii mal saꞌlallꞌle.
24 Naꞌ chiyaḻꞌ yikob yeḻꞌ mban c̱helenaꞌ kwenc̱he yiyakle dowalj beṉꞌ ḻi beṉꞌ shaoꞌ ḻega beṉꞌ nak xiiṉ Chios.
25 Daan, bich chiyaḻꞌ siyeꞌle, san to tole chiyaḻꞌ weꞌlen ljwell-le dillꞌ ḻi, ḻaꞌ yogꞌcho ba nakcho toz, ka kwerp c̱hechonaꞌ nakan toz, ḻaꞌkzi zan diikaꞌ ndiḻ nllagan.
28 Naꞌ beenaꞌ chziꞌ chban, bich goneꞌ kaꞌ, san wc̱hineꞌ ṉiꞌa neenaꞌ goneꞌ llin kwenc̱he gapeꞌ dii wiꞌe beṉꞌkaꞌ bibi de c̱heyin.
29 Naꞌ bi chiyaḻꞌ weꞌle dillꞌ zban, san chiyaḻꞌ weꞌle dillꞌ wen dillꞌ shaoꞌ dii gonan ka soatip soashoshch beṉꞌkaꞌ chzenag bin nale naꞌ gaklenan ḻegakeꞌ.
30 Naꞌ bi gonle ka soayeshꞌ Espíritu Santo c̱he Chiozaꞌ, beenaꞌ ba nzoeꞌ ḻoo yic̱hjlallꞌdoꞌchonaꞌ kwenc̱he chakbeꞌicho ba nakcho lallꞌ naꞌ Chiozaꞌ shlak illin lla yikee choꞌ, choꞌ ba biyaꞌo biziꞌe.
31 Chiyaḻꞌ kwej yic̱hjle yogꞌḻoḻ dii malki: bich koolallꞌle, bich illaa ilokle, bi koole beṉꞌ beḻ ban, bibi gon iṉale c̱he beṉꞌ naꞌ ni sto dii malkaꞌ bich gonle.
32 Ḻi gak beṉꞌ wen beṉꞌ shaoꞌ naꞌ beṉꞌ chiyeshꞌlalli bishꞌ ljwellin. Chiyaḻꞌ yiziꞌxen c̱he ljwell-le, ka ben Chiozaꞌ biziꞌxeneꞌ c̱hele daa nonḻilallꞌle Crístonaꞌ.