3 Ka ka chjadinidꞌ leꞌ choꞌa Chios c̱haꞌnaꞌ yeḻꞌ chox̱ken.

4 Naꞌ toshiizi choeꞌḻwillee kon yeḻꞌ xaba katꞌ chṉabidee gakleneꞌ yogꞌle,

5 daa lenle chonle nadꞌ txen, dezd ka wyajḻeꞌle ax̱t ṉaa, kwenc̱he ides dillꞌ wen dillꞌ kob c̱he Jesucrístonaꞌ.

6 Ṉezyeṉꞌidꞌ Chios, beenaꞌ wzolo choneꞌ to dii wen ḻoo yic̱hjlallꞌdoꞌlenaꞌ, goneꞌ kwenc̱he yiyoll yido yiyakle ka chazlallee katꞌ illin lla yilaꞌ Jesucrístonaꞌ.

7 Naꞌ chiyaḻꞌkz yibaidꞌ ka chjadinidꞌ leꞌ, ḻaꞌ toshiizi yoole ḻoo yic̱hjlallꞌdawaani. Naꞌ ḻaꞌkzi diaꞌ lillyani wa choeꞌlenꞌ beṉꞌ dillꞌ wen dillꞌ kob c̱he Jesucrístonaꞌ kwenc̱he gakbeꞌgakileꞌ nakan dillꞌ ḻi naꞌ shajḻeꞌgakeꞌ c̱heyin, ṉezidꞌ toshiizi chaklenle nadꞌ lo llinnaꞌ daa ben Chiozaꞌ lallꞌ naꞌ gonꞌ yeḻꞌ beṉꞌ wen c̱heꞌnaꞌ.

8 Chiozaꞌ ṉez nḻeꞌileꞌ ka chakidꞌ yogꞌle kon ka chaki Cristo Jesúzaꞌ leꞌ.

9 Katꞌ choeꞌḻwillꞌ Chiozaꞌ, chṉabidee zizikli yisgolcheꞌ yeḻꞌ chaki c̱helenaꞌ, naꞌ goṉcheꞌ leꞌ yeḻꞌ sinꞌnaꞌ len yeḻꞌ chajniinaꞌ

10 kwenc̱he gakbeꞌile daa nakch wen naꞌ kaꞌ soale do yic̱hj do lallꞌle naꞌ bibi doḻꞌ gaple katꞌ yiyed Crístonaꞌ.

11 Naꞌ Jesucrístonaꞌ gakleneꞌ leꞌ gonle ḻega beṉꞌ ḻi beṉꞌ shaoꞌ kwenc̱he shoꞌ Chiozaꞌ balaaṉ naꞌ weꞌlaꞌo beṉꞌ ḻeꞌ.

12 Leꞌ beṉꞌ bishꞌ naꞌ leꞌ beṉꞌ zanꞌ, cheenidꞌ iṉezile diiki ba gok c̱haꞌ goklenlan kwenc̱he bdesch dillꞌ wen dillꞌ kob c̱he Jesucrístonaꞌ, naꞌ bi bizogakin wsej wllongakan.

13 Ḻaꞌ ṉaa yogꞌḻoḻ soldadkaꞌ lleꞌ ni naꞌ nochlə beṉꞌ yoblə lleꞌ do ni ṉezgakileꞌ diaꞌ lillyani daa chonḻilallaa Crístonaꞌ.

14 Naꞌ daa diaꞌ lillyani, zan beṉꞌ bishꞌchokaꞌ ba wloolallꞌgakeꞌ chongakeꞌ lallꞌchog choeꞌgakeꞌ xtillꞌ Chiozaꞌ naꞌ bi chllebgakeꞌ.

15 Dii ḻi baḻgakeꞌ choeꞌgakeꞌ xtillꞌ Crístonaꞌ daa chakxeꞌzgakileꞌ nadꞌ naꞌ daa cheenzgakileꞌ gonchgakeꞌ ka nadꞌ. Per zoakz beṉꞌ choneꞌn do yic̱hj do lallee.

16 Beṉꞌkin chongakeꞌn daa chakgakileꞌ nadꞌ naꞌ daa ṉezgakileꞌ Chiozaꞌ ba nzoeꞌ nadꞌ kwenc̱he wiꞌa dillꞌ wen dillꞌ kob c̱he Jesucrístonaꞌ.

17 Naꞌ beṉꞌkaꞌ zi shkwen choeꞌgakeꞌ xtillꞌ Crístonaꞌ daa cheenzgakileꞌ gonchgakeꞌ ka nadꞌ, naꞌ aga chongakeꞌn do lallꞌgakeꞌ. Naꞌ chakzgakileꞌ daa chongakeꞌ kaꞌ gakyeshidꞌ daa nejꞌ lillyani.

18 Per aga bi chon daa c̱haꞌ shi do lallꞌgakenꞌ chongakeꞌn wa aga do lallꞌgakenꞌ; kon daa choeꞌlgakeꞌ xtillꞌ Crístonaꞌ, daalan chibaidꞌ.

19 daa ṉezidꞌ wichejꞌ wen lao yogꞌ diiki chak c̱haꞌ daa chṉable c̱haꞌ lao Chiozaꞌ naꞌ daa chaklen Espíritu c̱he Jesucrístonaꞌ nadꞌ.

20 Naꞌ toshiizi nonꞌ lez Chiozaꞌ gakleneꞌ nadꞌ kwenc̱he bi siaꞌ yeḻꞌ ztoꞌ, san ṉaa naꞌ toshiizi gonꞌ kwenc̱he shoꞌ Crístonaꞌ balaaṉ, ḻaa ibanchꞌ wa ḻaa guetꞌ.

21 Ḻaꞌ shi ibanchꞌ, gonchkzꞌ daa cheeni Crístonaꞌ; naꞌ shi guetꞌ, de to banez c̱haꞌ.

22 Shi dech yeḻꞌ mban c̱haꞌ, gonchkzꞌ xshin Crístonaꞌ kwenc̱he beṉꞌ zanch gombiaꞌgakeꞌneꞌ. Naꞌ bi ṉezidꞌ non nakch wen.

23 Chonan lallj iṉiaꞌ non nakch wen: to cheenidꞌ guetꞌ kwenc̱he lljazoalenꞌ Crístonaꞌ, naꞌ naktechlan wen.

24 Per chonchan byen ibanchꞌ ni c̱hele.

25 Chakidꞌ nakchan wen ibanchꞌ kwenc̱he gaklenchꞌ leꞌ gakchachle gonḻilallꞌle Crístonaꞌ naꞌ yiba yizakchile daa nonḻilallꞌleneꞌ.

26 Naꞌ katꞌ ileꞌile nadꞌ ladjlenaꞌ sto shii, ḻe yiba yizakile weꞌlaꞌole Cristo Jesúzaꞌ.

27 Naktez gak, ḻi se wṉeyi wsaꞌto c̱hele wen ḻega beṉꞌ chajḻeꞌ c̱he dillꞌ wen dillꞌ kob c̱he Crístonaꞌ kwenc̱he ḻaa yidwiaꞌ leꞌ wa ḻaa yenzidꞌ xtillꞌle, iṉezidꞌ ni zoac̱hec̱hle nx̱enilallꞌle Crístonaꞌ naꞌ nakle toz chonle ga zeelo chakle kwenc̱he shajḻeꞌ beṉꞌ dillꞌ wen dillꞌ kob c̱heꞌnaꞌ,

28 naꞌ bi gall illebzle beṉꞌkaꞌ chakziꞌ chakzbani leꞌ. Naꞌ daa gonle kaꞌ, wliꞌn kwiayiꞌchokzgakenꞌ, naꞌ leꞌ yilale, ḻaꞌ Chiozaꞌ bi wiꞌe latj kwiayiꞌle.

29 Ḻaꞌ Chiozaꞌ gokleneꞌ leꞌ kwenc̱he beṉlilallꞌle Crístonaꞌ, naꞌ ḻekzkaꞌ chakleneꞌ leꞌ lo yeḻꞌ zakꞌziꞌkaꞌ chen chleꞌile daa nonḻilallꞌleneꞌ.

30 Ba chsakꞌziꞌgakeꞌ leꞌ ka bleꞌile bsakꞌziꞌgakeꞌ nadꞌ daa chyix̱jiꞌa xtillꞌ Crístonaꞌ, naꞌ ṉezkzile kaꞌkzə ni chak c̱haꞌ.