2
Daa nakle Crístonaꞌ toz, yeḻꞌ goklen c̱heꞌnaꞌ chtipan lallꞌle, naꞌ yeḻꞌ chaki c̱heꞌnaꞌ chonan ka soale mbalaz, naꞌ Espíritu c̱heꞌnaꞌ zoalenkzeꞌ leꞌ, naꞌ lallꞌdoꞌlenaꞌ nakan lallꞌdoꞌ yeshꞌ.
2 Daan, ḻi gak toz, ḻi gaki ljwell-le ganga, naꞌ toz ka dii sele wṉeyi, naꞌ toz ka dii selallꞌle, kwenc̱he yiba yizakchidꞌ ni c̱hele.
3 Bibi sele wṉeyi c̱he tozle wa kwenc̱he gon kwinle beṉꞌ choo beṉꞌ xen, san ḻi gonan kon yeḻꞌ gax̱jlallꞌ, ḻi goni beṉꞌ ka beṉꞌ zakꞌchi ka leꞌ.
4 Ni tole bi chiyaḻꞌ c̱hiljzle dii nak to banez c̱hezle, san ḻekzkaꞌ ḻi gon ka siꞌ beṉꞌ yoblə banez.
5 Ḻi se wṉeyi gonle ka ben Crístonaꞌ.
6 Ḻaꞌkzi nakeꞌ Chios,
bzanileꞌ yeḻꞌ wṉabiaꞌ c̱heꞌnaꞌ naꞌ balaaṉ c̱heꞌnaꞌ daa napleneꞌ X̱eꞌ Chiozaꞌ,
7 naꞌ bzoeꞌ kaꞌlə daa naki c̱heꞌ,
naꞌ ben kwineꞌ ka to beṉꞌ bi zakii,
naꞌ goljeꞌ gokeꞌ to beṉꞌ de beli chen.
8 Naꞌ ka ba nakeꞌ beṉꞌ yell-lio, bḻex̱j yic̱hjeꞌ
beneꞌ kon ka wna Chiozaꞌ
ax̱t biꞌe latj betgakeꞌneꞌ ḻee yag cruzaꞌ.
9 Daan, Chiozaꞌ wloꞌeneꞌ to balaaṉ xen inlleb daa ḻiizelozi zakꞌchi,
naꞌ bzoeꞌneꞌ nakeꞌ x̱an yogꞌḻoḻte dii de,
10 kwenc̱he yogꞌ beṉꞌ lleꞌ yabanaꞌ, naꞌ lo yell-lioni, naꞌ xan yell-lioni
katꞌ yengakileꞌ le Jesúzaꞌ wc̱hekꞌ xibeꞌkaꞌ laweꞌnaꞌ.
11 Naꞌ yogꞌḻoḻ beṉꞌ weꞌgakeꞌ dillꞌ nan Jesucrístonaꞌ nakeꞌ X̱ancho
naꞌ daa gongakeꞌ kaꞌ shoꞌ X̱acho Chiozaꞌ balaaṉ.
12 Daan, leꞌ beṉꞌ bishꞌdawaa naꞌ leꞌ beṉꞌ zandawaa, kon ka ba benkzle toshiizi bzoale dillꞌ kanaꞌ wzoalenꞌ leꞌ, ḻi weꞌḻ-lallꞌch gakchle beṉꞌ wizoa dillꞌ ṉaa bich zoaꞌ ladjlenaꞌ. Ḻi gall illeb Chiozaꞌ, beenaꞌ bisla leꞌ, naꞌ ḻi gon ka dii le gonle daa cheenileꞌ.
13 Ḻaꞌ Chiozaꞌkzan choneꞌ kwenc̱he chalj ḻoo yic̱hjlallꞌdoꞌlenaꞌ gonle dii wennaꞌ daa chaklallee gonle, naꞌ ḻekzkaꞌ chakleneꞌ leꞌ kwenc̱he chonlen.
14 Naꞌ yogꞌḻoḻ daa gonle, ḻi gonan do yic̱hj do lallꞌle, naꞌ bi gaklleshile ni bi gakguedzle,
15 kwenc̱he beṉꞌ malkaꞌ lleꞌ yell-lioni, beṉꞌkaꞌ nxiṉj yic̱hjlallꞌdoꞌekaꞌ, gakbeꞌgakileꞌ bibi dii mal chonle, naꞌ kono bi gak iṉa c̱hele. Naꞌ gaktole beṉꞌ bibi doḻꞌ c̱heyin de, ḻega beṉꞌ nak dowalj xiiṉ Chios. Naꞌ gakle to beeniꞌ laweꞌkaꞌ, ka beljdoꞌkaꞌ chey cheeniꞌ,
16 daa chzoac̱hec̱hle chzenagle c̱he choꞌa xtillꞌ Chiozaꞌ daa nsaꞌ yeḻꞌ mban. Naꞌ shi kaꞌ gonle, katꞌkaꞌ yilaꞌ Crístonaꞌ de dii gonan ka yibaidꞌ daa bi bendadzꞌ xshin Chiozaꞌ ladjlenaꞌ.
17 Daa chzani kwinle sakꞌziꞌle kwenc̱he gonle daa cheeni Chiozaꞌ ṉaa nonḻilallꞌle Crístonaꞌ, zaklebin daa chzani beṉꞌ choeꞌ Chiozaꞌ kwenc̱he choeꞌlaweeneꞌ. Naꞌ daa chzanidꞌ kwinꞌ witgakeꞌ nadꞌ daa chonꞌ xshin Crístonaꞌ, zaklebin ka daa chlaljgakeꞌ lao daa chzani beṉꞌ choeꞌ Chiozaꞌ. Naꞌ ḻaꞌkzi ax̱t witgakeꞌ nadꞌ, chiba chizakidꞌ naꞌ cheenidꞌ yiba yizaklenile nadꞌ.
18 Ḻi yiba yizakleni nadꞌ, naꞌ ḻi soa mbalaz ka zoaꞌ.
19 Nonꞌ lez X̱ancho Jesúzaꞌ wiꞌe latj yobzə wseḻaa Timotewaꞌ ganaꞌ zoale, kwenc̱he yibaidꞌ ka yiyedeꞌ iṉeꞌ chak wen c̱hele.
20 Kochno zoa sto c̱haꞌ ka ḻeꞌ, ḻaꞌ tochga ḻenꞌ zeleneꞌ nadꞌ wṉeyi do yic̱hj do lallee gak wen c̱hele.
21 Ḻaꞌ beṉꞌki sto zoalen nadꞌ, c̱he kwinzgakeꞌ zegakeꞌ wṉeyi naꞌ bi zegakeꞌ wṉeyi daa cheeni Jesucrístonaꞌ.
22 Per ba ṉezkzile ka wen nsaꞌ c̱he Timotewaꞌ naꞌ ka ba gokleneꞌ nadꞌ ba beꞌntoꞌ dillꞌ wen dillꞌ kob c̱he Crístonaꞌ. Ba gokleneꞌ nadꞌ ka beṉꞌ chaklen x̱ayin.
23 Daan, katꞌ ba ṉezidꞌ nakan gak c̱haꞌ, lii wseḻꞌtiaꞌneꞌ ganaꞌ zoale.
24 Naꞌ nx̱enlallaa X̱anchonaꞌ ḻekzkaꞌ yob yidwiaꞌ leꞌ kwinkzꞌ.
25 Naꞌ ṉaa chakidꞌ chonan byen yiseḻaa beṉꞌ bishꞌcho Epafrodítoni, beeni nonleneꞌ nadꞌ txen chdiḻ-lenntoꞌ dii malaꞌ daa chonntoꞌ xshin Chiozaꞌ, beeni bseḻꞌle kwenc̱he gakleneꞌ nadꞌ lao dii chyallj chc̱hinidꞌ.
26 Cheenchgaileꞌ ileꞌileꞌ leꞌ, naꞌ ḻe chakyeshileꞌ daa wṉezile weꞌileꞌ.
27 Naꞌ dii ḻicha zi latꞌzə ki witeꞌ, per Chiozaꞌ biyeshꞌlallileꞌneꞌ biyakileꞌ. Naꞌ aga tozenꞌ biyeshꞌlallileꞌ, san lenanꞌ kwenc̱he bi gakyeshꞌchidꞌ.
28 Daan chiseḻaaneꞌ laolenaꞌ dopiyenzə kwenc̱he yibaileꞌ daa yileꞌileneꞌ sto shii, naꞌ nadꞌ bich gakyeshꞌtekidꞌ c̱hele.
29 Ḻi yilebgacheꞌ kon yeḻꞌ chiba chizaki daa nakeꞌ choꞌ txen nonḻilallꞌcho X̱anchonaꞌ. Naꞌ ḻi gap balaaṉ yogꞌḻoḻ beṉꞌkaꞌ chon ka choneꞌ.
30 Ḻaꞌ zi latꞌzə ki witeꞌ daa choneꞌ xshin Crístonaꞌ. Bzoeꞌ dii nxoll yeḻꞌ mban c̱heꞌnaꞌ goktgui bidyakleneꞌ nadꞌ bidyeneꞌ diikaꞌ bi gok gonle.