Kart daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Colósazaꞌ
1
Nadꞌ Pablo nakꞌ postl c̱he Jesucrístonaꞌ kon ka goklallꞌ Chiozaꞌ. Naꞌ len beṉꞌ bishꞌcho Timotewi
2 chwapntoꞌ leꞌ chiox, ka le nakle lallꞌ naꞌ Chiozaꞌ, leꞌ zoale yell Colósazaꞌ, naꞌ nakle bishꞌ ljwellntoꞌ daa nonḻilallꞌle Crístonaꞌ do yic̱hj do lallꞌle. X̱acho Chiozaꞌ len X̱ancho Jesucrístonaꞌ gaklenshgagakeꞌ leꞌ naꞌ wzoagakeꞌ leꞌ mbalaz.
3 Toshiizi ka chṉabntoꞌ c̱hele, choeꞌntoꞌ Chiozaꞌ yeḻꞌ chox̱ken, beenaꞌ nak X̱a X̱ancho Jesucrístonaꞌ.
4 Ḻaꞌ ba benintoꞌ dillꞌ ba nonḻilallꞌle Cristo Jesúzaꞌ naꞌ ba chakile yogꞌḻoḻ beṉꞌkaꞌ nak lallꞌ naꞌ Chiozaꞌ.
5 Ba nsaꞌ c̱hele kaꞌ daa nonle lez lljazoale yabanaꞌ ganaꞌ zoa Chiozaꞌ. Naꞌ wzolo benlen lez ka wzolo bzenagle dillꞌ wen dillꞌ kob c̱he Crístonaꞌ daa nak dillꞌ ḻi c̱he Chiozaꞌ.
6 Naꞌ dillꞌ wen dillꞌ kobi daa ba bzenagle ba blliljan doxen yell-lioni naꞌ ba chon xshinin ḻoo yic̱hjlallꞌdoꞌ beṉꞌ, kon ka benan ḻoo yic̱hjlallꞌdoꞌlenaꞌ ka benilen naꞌ wyajniile nan dii ḻi Chiozaꞌ chakileꞌ choꞌ.
7 Dgan blii Epáfrazaꞌ leꞌ, beenaꞌ chonleneꞌ netoꞌ xshin Crístonaꞌ naꞌ ḻe chakintoꞌneꞌ, naꞌ zoatezi zoeꞌ choneꞌ xshin Crístonaꞌ ladjlenaꞌ.
8 Naꞌ Epáfrazaꞌ wneꞌ netoꞌ ka ba chaki ljwell-le daa zoa Espíritu c̱he Chiozaꞌ ḻoo yic̱hjlallꞌdoꞌlekaꞌ.
9 Naꞌ daan, ka wṉezintoꞌ ka ba chonle, toshiizi chṉabintoꞌ Chiozaꞌ gaklencheꞌ leꞌ. Naꞌ chṉabintoꞌneꞌ goṉeꞌ leꞌ do ka nak yeḻꞌ sinꞌ c̱heꞌnaꞌ naꞌ yeḻꞌ chajnii c̱heꞌnaꞌ kwenc̱he shajniile kwasḻoḻ daa chaklallee gonle,
10 naꞌ gak wsaꞌ c̱hele ḻega beṉꞌ nonḻilallꞌ X̱anchonaꞌ, naꞌ toshiizi gonle daa chazlallee, naꞌ gak gonle yogꞌḻoḻte daa nak wen, naꞌ zejch gombiaꞌchle Chiozaꞌ,
11 naꞌ gakchachle kon yeḻꞌ wak c̱heꞌnaꞌ daa zeelo nak yeḻꞌ wak choo yeḻꞌ wak xen kwenc̱he kaꞌ gaple yeḻꞌ chxenlallꞌ naꞌ so sakile lao bittezə dii chak c̱hele, naꞌ yibaile
12 weꞌtezi weꞌle X̱acho Chiozaꞌ yeḻꞌ chox̱ken. Ḻaꞌ ḻenꞌ beneꞌ kwenc̱he lljazoalenle yogꞌ beṉꞌkaꞌ nak lallꞌ nee yabanaꞌ ganaꞌ chṉabiꞌe, ganaꞌ de beeniꞌ c̱heꞌnaꞌ.
13 Chiozaꞌ bibejeꞌ choꞌ lo yel c̱hoḻaꞌ ganaꞌ chṉabiaꞌ dii x̱iwaa naꞌ ba bizoeꞌ choꞌ lo naꞌ Xiiṉeꞌnaꞌ, beenaꞌ ḻe chakileꞌ, kwenc̱he iṉabiꞌe choꞌ.
14 Ḻaꞌ ḻenꞌ bisleꞌ choꞌ lao yeḻꞌ zakꞌziꞌnaꞌ chidoḻꞌcho daa blalj xc̱heneꞌnaꞌ witeꞌ ni c̱hecho kwenc̱he biyakxen saaxya c̱hechokaꞌ.
15 Crístonaꞌ bliꞌe ka nak X̱e Chiozaꞌ, beenaꞌ kono chleꞌi, naꞌ Crístonaꞌ ba chṉabiaꞌkzeꞌ kanaꞌ ziꞌ x̱e silte yogꞌḻoḻ dii de.
16 Ḻaꞌ ḻenꞌ bx̱e bsileꞌ yogꞌḻoḻte dii de: diikaꞌ de yabanaꞌ naꞌ diikaꞌ de yell-lioni. Beneꞌ dii chleꞌicho naꞌ bentieꞌ dii bi chleꞌicho, ka no anjlkaꞌ naꞌ len anjlkaꞌ biyak dii x̱iwꞌ diikaꞌ chṉabiaꞌ lo yell-lioni. Beneꞌ yogꞌḻoḻte dii de, naꞌ beneꞌn kwenc̱he shoꞌe balaaṉ.
17 Ba zoakz Crístonaꞌ kanaꞌ ziꞌ x̱e sil yogꞌḻoḻte dii de, naꞌ ḻeꞌ choneꞌ ka chongakan daa bllieꞌ biaꞌ gongakan.
18 Naꞌ ḻenꞌ chṉabiꞌe choꞌ nakcho lallꞌ nee, daa nakchoneꞌ txen. Ḻenꞌ bx̱ieꞌ yeḻꞌ mban daa nak zejḻi kaṉi daa nakeꞌ beṉꞌ nech beṉꞌ biban toshiizi ladj beṉꞌ wetꞌkaꞌ. Daan, nakeꞌ ḻiizelozi beṉꞌ choo beṉꞌ xen naꞌ chṉabiꞌe lao yogꞌḻoḻte dii de.
19 Ḻaꞌ Chiozaꞌ wyazlallee gap Crístonaꞌ doxen yeḻꞌ wṉabiaꞌ, yeḻꞌ wak naꞌ yogꞌ ka diikaꞌ napeꞌ,
20 naꞌ beneꞌ ka yogꞌḻoḻte dii bx̱e bsileꞌ yabanaꞌ len yell-lioni bizoalengakan ḻeꞌ wen daa wit Crístonaꞌ, blalj xc̱heneꞌnaꞌ ḻee yag cruzaꞌ.
21 Naꞌ leꞌ, kananꞌ nḻaalaꞌole Chiozaꞌ ni c̱he dii malkaꞌ chonle naꞌ gokziꞌ gokzbanileneꞌ.
22 San ṉaa, ba beneꞌ kwenc̱he bizoalenleneꞌ wen daa bseḻee Crístonaꞌ witeꞌ ḻee yag cruzaꞌ kwenc̱he gakle beṉꞌ nxi nyech, beṉꞌ bibi ndaꞌ nchen naꞌ beṉꞌ bibi xtoḻiin de laweꞌnaꞌ.
23 Per chonan byen toshiizi soac̱hec̱hle gonḻilallꞌle Crístonaꞌ, beenaꞌ ba wyajḻeꞌle c̱heꞌ, naꞌ bi gakc̱hoplallꞌle c̱heyi daa benle lez gaki c̱hele ka bzenagle dillꞌ wen dillꞌ kob c̱heꞌnaꞌ. Naꞌ dga ba benile, ba choeꞌgakeꞌn dillꞌ doxen yell-lioni, naꞌ nadꞌ Pablo, chaklenꞌ choꞌan dillꞌ.
24 Naꞌ ṉaa chiba chizakidꞌ daa chllagloaꞌ yogꞌ yeḻꞌ zakꞌziꞌki ni c̱hele. Ḻaꞌ daa chak c̱haꞌ ki, chen chleꞌidꞌ ka yeḻꞌ zakꞌziꞌkaꞌ ben bleꞌi Crístonaꞌ ni c̱hecho, choꞌ ba nonḻilallꞌchoneꞌ naꞌ zaklebicho ka kwerp c̱heꞌnaꞌ.
25 Chiozaꞌ bzoeꞌ nadꞌ gak lo naꞌ gaklenꞌ leꞌ ba chonḻilallꞌleneꞌ naꞌ wliidꞌ leꞌ kwasḻoḻ choꞌa xtilleenaꞌ.
26 Kaniꞌteyi kono wṉezi daa wloꞌe xṉezin goneꞌ, per ṉaa ba bliileꞌn beṉꞌkaꞌ nak lallꞌ nee.
27 Chiozaꞌ chaklallee iṉezi beṉꞌkaꞌ nak lallꞌ nee dga kono wṉezi kanaꞌ, naꞌ nakan to dii zakii nlleb nan Crístonaꞌ zoaleneꞌ leꞌ bi nakle beṉꞌ Israel, leꞌ chonḻilallꞌleneꞌ, naꞌ nonle lez lljazoalenle Chiozaꞌ ganaꞌ de balaaṉ xen c̱heꞌnaꞌ.
28 Netoꞌ chyix̱jeꞌintoꞌ beṉꞌ xtillꞌ Crístonaꞌ, naꞌ chatꞌyointoꞌ yogꞌ beṉꞌ wzenaggakeꞌn. Naꞌ chc̱hinntoꞌ do ka nak yeḻꞌ sinꞌnaꞌ daa ba ngwee netoꞌ ka chliꞌ chsedintoꞌ ḻegakeꞌ kwenc̱he yogꞌ beṉꞌkaꞌ gak Crístonaꞌ txen yiyakgakeꞌ kwasḻoḻ ka cheeni Chiozaꞌ.
29 Daan, choeꞌḻ-lallaa chyix̱jiꞌa choꞌa xtilleenaꞌ kon ga zeelo chizoidꞌ, naꞌ Crístonaꞌ chakleneꞌ nadꞌ kon yeḻꞌ wak c̱heꞌnaꞌ.