2
Cheenidꞌ iṉezileꞌ dii xen dii chen chleꞌidꞌ ni c̱hele naꞌ ni c̱he beṉꞌ bishꞌchokaꞌ lleꞌ Laodiceanaꞌ, naꞌ ni c̱he yogꞌḻoḻ beṉꞌ bishꞌchokaꞌ biṉꞌ gombiaꞌ nadꞌ,
2 kwenc̱he yogꞌle wtipꞌ lallꞌle naꞌ gakle toz gaki ljwell-le, naꞌ shajniile kwasḻoḻ daa wloo Chiozaꞌ xṉezin daa kono wṉezi kaniꞌyi. Naꞌ ḻennanꞌ daa bidyen Crístonaꞌ,
3 beenaꞌ blii choꞌ doxen ka nak yeḻꞌ sinꞌ naꞌ yeḻꞌ chajnii c̱he Chiozaꞌ, diikaꞌ nak dii zakii nlleb.
4 Niaꞌ leꞌ kaꞌ kwenc̱he kono siyeꞌ leꞌ weꞌlenzeꞌ leꞌ dillꞌ xochi naꞌ gakile nakan dillꞌ ḻi.
5 Ḻaꞌkzi bi zoalenꞌ leꞌ, chiꞌ yic̱hjkzꞌ leꞌ naꞌ chiba chizakidꞌ daa ṉezidꞌ nsaꞌ c̱hele wen naꞌ zoac̱hec̱hle chonḻilallꞌle Crístonaꞌ.
6 Naꞌ daa ba nonle Jesucrístonaꞌ X̱anle, chiyaḻꞌ wsaꞌ c̱hele ḻega beṉꞌ ba nakeꞌneꞌ txen.
7 Ka zoac̱hec̱h to yag dii ba nde loinnaꞌ zitj, kaꞌkzan leꞌ, ḻi soac̱hec̱h gonḻilallꞌle Crístonaꞌ, kon ka ba bliꞌ bsedintoꞌ leꞌ, naꞌ toshiizi ḻi weꞌ Chiozaꞌ yeḻꞌ chox̱ken.
8 Ḻi wsakꞌ, bi weꞌzle latj no siyeꞌ leꞌ kon yeḻꞌ sinꞌ daa chaljlallꞌ beṉꞌ yell-lioni daa bibi zakii. Ḻaꞌ aga xtillꞌ Crístonanꞌ chliꞌ chsedgakileꞌ san c̱he diikaꞌ chṉabiaꞌ lo yell-lionin.
9 Crístonaꞌ, beenaꞌ goljeꞌ gokeꞌ beṉꞌ de beli chen, napeꞌ doxen yeḻꞌ wṉabiaꞌ, yeḻꞌ wak naꞌ yogꞌ ka diikaꞌ nap Chiozaꞌ.
10 Naꞌ leꞌ, daa nakle Crístonaꞌ txen, yeḻꞌ wak c̱heꞌnaꞌ ba chonan llin lo yeḻꞌ mban c̱helenaꞌ, ḻaꞌ Crístonaꞌ napcheꞌ yeḻꞌ wṉabiaꞌ naꞌ yeḻꞌ wak aga ka yogꞌ anjlkaꞌ wa dii x̱iwꞌkaꞌ chṉabiaꞌ.
11 Naꞌ ḻekzkaꞌ daa nakleneꞌ txen wak iṉacho yoo to seṉ ḻoo yic̱hjlallꞌdoꞌlenaꞌ daa chliꞌn nakle lallꞌ naꞌ Chiozaꞌ, per bi nakan ka seṉnaꞌ daa chgoo beṉꞌ kwerp c̱heꞌkaꞌ daa le circuncisión, san seṉnaꞌ chgoo Crístonaꞌ nakan daa chikobeꞌ yic̱hjlallꞌdoꞌchonaꞌ kwenc̱he dii malaꞌ daa chzelallii beli chennaꞌ bich iṉabiaꞌn choꞌ.
12 Ka wchoale nisaꞌ wak iṉacho witlenle Crístonaꞌ, naꞌ bgashꞌlenleneꞌ ka bgashee, naꞌ ḻekzkaꞌ bibanle ka bibaneꞌ ladj beṉꞌ wetkaꞌ daa wyajḻeꞌle Chiozaꞌ bisbaneꞌ Crístonaꞌ kon yeḻꞌ wak c̱heꞌnaꞌ.
13 Naꞌ leꞌ, gokle ka beṉꞌ net lao Chiozaꞌ ni c̱he saaxya c̱helekaꞌ daa biṉꞌ c̱hooṉlallꞌle daa cheeni beli chen c̱helenaꞌ. San ṉaa, Chiozaꞌ ba beṉeꞌ to yeḻꞌ mban kob c̱hele daa nakle Crístonaꞌ txen, naꞌ biziꞌxeneꞌ yogꞌ saaxya c̱helekaꞌ.
14 Chiozaꞌ bikwaseꞌ daa wdao xya c̱hecho, naꞌ bsol bṉiteꞌn kanaꞌ wdaꞌ Jesucrístonaꞌ ḻee yag cruzaꞌ.
15 Naꞌ bikwaseꞌ yeḻꞌ wak c̱he dii x̱iwꞌkaꞌ, diikaꞌ chṉabiaꞌ beṉꞌ yell-lioki, kanaꞌ wit Crístonaꞌ ḻee yag cruzaꞌ. Naꞌ daa bliꞌe beneꞌ ḻegakan gan, bsiꞌe ḻegakan yeḻꞌ ztoꞌ lao lkweꞌ beṉꞌ.
16 Daan, bi wzenagle c̱he beṉꞌkaꞌ nagakeꞌ bi gak yeej gaole bittez yeḻꞌ wao, wa nagakeꞌ chonan byen gonle lṉikaꞌ, naꞌ koole balaaṉ llanaꞌ chize beoꞌ cheeṉaꞌ, naꞌ gombaaṉle lla sabdkaꞌ.
17 Yogꞌḻoḻ diiki nakan daa wzajniin choꞌ latꞌ c̱he daa ziꞌ gon Chiozaꞌ naꞌ benan llin kanaꞌ ziꞌ wseḻee Crístonaꞌ, naꞌ ṉaa daa bideꞌ bich chongakan llin.
18 Bi weꞌle latj no siyeꞌ leꞌ kwenc̱he bi wṉitle daa ba nonle lez ikaale. Bi wzenagle c̱he beṉꞌkaꞌ chonzə ka ḻe chzex̱j yic̱hjin lao Chiozaꞌ, naꞌ choeꞌlaꞌogakeꞌ anjlkaꞌ, naꞌ nazgakeꞌ chleꞌdogakileꞌ naꞌ chep chaꞌlallꞌlengakeꞌ daa chyiljlallꞌzgakeꞌ.
19 Beṉꞌkaꞌ chon kaꞌ bi nakgakeꞌ Crístonaꞌ txen, beenaꞌ zaklebi yic̱hjchonaꞌ daa chṉabiꞌe choꞌ nonḻilallꞌchoneꞌ. Naꞌ choꞌ nakchoneꞌ txen, chakchacho ka cheeni Chiozaꞌ, ka chak c̱he tkwen wej kwerp c̱hechoni ndiḻ nllagan bec̱hj bniaꞌkaꞌ nox̱ꞌ ljwellin kwenc̱he kaꞌ chgolgakan txen.
20 Daa ba nakcho Crístonaꞌ txen daa witeꞌ ḻee yag cruzaꞌ, wak iṉacho ba netcho lao diikaꞌ chyiljlallꞌ beṉꞌ yell-lioni naꞌ bich chiyaḻꞌ iṉabiaꞌn choꞌ. Naꞌ ¿berac̱he ni chonzle txen diikaꞌ chyiljlallꞌ beṉꞌ yell-lioni,
21 kachakaꞌ daa nagakeꞌ: “Bi wc̱hinoꞌ dga, bi gawoꞌ dga, naꞌ bi gox̱oo dga”?
22 Yogꞌḻoḻ diiki chwaḻꞌ beṉꞌ yell-lioni nakchozgakan dii chibill chido naꞌ dii chde c̱heyin ka zej chc̱hinchogakan.
23 Dii ḻi, diikaꞌ nagakeꞌ chontekzgakan ka dii ḻe zakii, ḻaꞌ katꞌ chongakeꞌn chontekzgakeꞌ ka beṉꞌ ḻe chapshii daa nak c̱he Chios, naꞌ ka beṉꞌ ḻe chzex̱j yic̱hjin lao Chiozaꞌ, naꞌ ka beṉꞌ ḻe chdeziꞌ beli chen c̱heyin, per yogꞌ diikaꞌ chongakeꞌ bi gak yikwasgakan daa chibayi beli chennaꞌ.