Kart nech daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Tesalónicanaꞌ
1
Nadꞌ Pablo naꞌ Silvánoni len Timotewi chwapntoꞌ leꞌ chiox, leꞌ chdop chllagle choeꞌlaꞌole Jesucrístonaꞌ Tesalónicanaꞌ, leꞌ nakle lallꞌ naꞌ X̱acho Chiozaꞌ len X̱ancho Jesucrístonaꞌ. Chṉabintoꞌ ḻegakeꞌ gonshgagakeꞌ ka gak wen c̱hele, naꞌ wzoagakeꞌ leꞌ mbalaz.
2 Toshiizi choeꞌntoꞌ Chiozaꞌ yeḻꞌ chox̱ken c̱he yogꞌḻoḻ-le katꞌ choeꞌḻwillntoꞌneꞌ.
3 Toshiizi ka choeꞌḻwillntoꞌ Chiozaꞌ, beenaꞌ nak X̱acho, chjadinintoꞌ ka choeꞌḻ-lallꞌle chonle dii wennaꞌ daa nonḻilallꞌleneꞌ naꞌ chakileꞌneꞌ, naꞌ daa zoac̱hec̱hle nonle lez X̱ancho Jesucrístonaꞌ.
4 Naꞌ leꞌ beṉꞌ bishꞌ naꞌ leꞌ beṉꞌ zanꞌ, leꞌ nakle beṉꞌ chaki Chiozaꞌ, ṉezintoꞌ ba wlejeꞌ leꞌ.
5 Ḻaꞌ ka beꞌlenntoꞌ leꞌ dillꞌ wen dillꞌ kob c̱he Jesucrístonaꞌ, aga de choꞌa dillꞌzan beꞌlenntoꞌn leꞌ, san kon yeḻꞌ wak c̱he Chiozaꞌ naꞌ c̱he Espíritu Sánto c̱heꞌnanꞌ beꞌntoꞌ dillꞌ do yic̱hj do lallꞌntoꞌ. Naꞌ ṉezkzile ka wen bsaꞌ c̱hentoꞌ ladjlenaꞌ kwenc̱he goklenntoꞌ leꞌ.
6 Naꞌ leꞌ bsedle chonle ka netoꞌ naꞌ ka ben X̱ancho Jesucrístonaꞌ, ḻaꞌ Espíritu Sántonanꞌ beneꞌ ka bibaile bleble Choꞌa xtill Chiozaꞌ ḻaꞌkzi dii zan yeḻꞌ zakꞌziꞌkaꞌ ben bleꞌile.
7 Naꞌ daa bizo bizakile yeḻꞌ zakꞌziꞌkaꞌ, bliile beṉꞌkaꞌ nonḻilallꞌ Crístonaꞌ yellkaꞌ mbani Macedónianaꞌ naꞌ Acáyanaꞌ ka chiyaḻꞌ gongakeꞌ.
8 Naꞌ daa benle kaꞌ, Choꞌa xtillꞌ Chiozaꞌ ba wisḻesan aga to Macedónianaꞌzə, ni aga to Acáyanaꞌzə, san doxente. Naꞌ ḻekzkaꞌ ba bengakile ka nonḻilallꞌle Crístonaꞌ, naꞌ bi chonan byen weꞌnto dillꞌ c̱hele.
9 Ḻaꞌ kwingakeꞌ choeꞌgakeꞌ dillꞌ ka wen benle bleble netoꞌ, naꞌ bsanle bich beꞌlaꞌole lwaa lsakꞌ diikaꞌ bi nak chios kwenc̱he benḻilallꞌle beenaꞌ nak dowalj Chios yaa Chios ban,
10 naꞌ chbezle yiyetj Xiiṉeꞌ Jesúzaꞌ yabanaꞌ, beenaꞌ bisbaneꞌ ladj beṉꞌ wetkaꞌ. Naꞌ Jesúzaꞌ yisleꞌ choꞌ lao yeḻꞌ zakꞌziꞌnaꞌ zizaꞌ daa weꞌ Chiozaꞌ beṉꞌkaꞌ bi bzenag c̱heꞌ.