Kart wchopi daa bzej Páblonaꞌ naꞌ bseḻeen lao beṉꞌkaꞌ nonḻilallꞌ Jesucrístonaꞌ yell Tesalónicanaꞌ
1
Nadꞌ Pablo, naꞌ Silvánoni len Timotewi chwapntoꞌ leꞌ chiox, ka leꞌ chdop chllagle choeꞌlaꞌole X̱acho Chiozaꞌ naꞌ X̱ancho Jesucrístonaꞌ Tesalónicanaꞌ.
2 Naꞌ chṉabintoꞌ ḻegakeꞌ gonshgagakeꞌ ka gak wen c̱hele naꞌ wzoagakeꞌ leꞌ mbalaz.
3 Dii ḻicha toshiizi chiyaḻꞌ weꞌntoꞌ Chiozaꞌ yeḻꞌ chox̱ken ni c̱hele, leꞌ beṉꞌ bishꞌ naꞌ leꞌ beṉꞌ zanꞌ, daa zejch chonḻilallꞌle Jesucrístonaꞌ naꞌ daa to tole zejch chakile beṉꞌ.
4 Daan, choeꞌntoꞌ xtillꞌle lao beṉꞌkaꞌ nonḻilallꞌ Crístonaꞌ to to ganaꞌ chdop chllaggakeꞌ choeꞌlaꞌogakeꞌ Chiozaꞌ ka nak daa zoac̱hec̱hle toshiizi noṉlilallꞌle Crístonaꞌ ḻaꞌkzi chen chleꞌile yeḻꞌ zakꞌziꞌkaꞌ.
5 Naꞌ yogꞌḻoḻ dga chliꞌn ka wen ben Chiozaꞌ wlejeꞌ leꞌ gakle lallꞌ nee, naꞌ chliꞌn dii ḻi nakle beṉꞌ chidoḻꞌ lljazoa ganaꞌ chṉabiꞌe, ḻaꞌ ni c̱heyinnanꞌ chzakꞌziꞌle.
6 Naꞌ Chiozaꞌ, beenaꞌ chc̱hoglo c̱he beṉꞌ ka chiyaḻꞌ, wsakꞌziꞌe beṉꞌkaꞌ chsakꞌziꞌgakeꞌ leꞌ.
7 Naꞌ leꞌ chzakꞌziꞌle ṉaa, Chiozaꞌ goneꞌ ka soale mbalaz, naꞌ kaꞌkz goneꞌ c̱hentoꞌ katꞌkaꞌ zizaꞌ X̱ancho Jesúzaꞌ yabanaꞌ ladj beḻ yiꞌnaꞌ kon anjl c̱heꞌkaꞌ, beṉꞌkaꞌ nap yeḻꞌ wak xen,
8 kwenc̱he wsakꞌziꞌe beṉꞌkaꞌ bi bembiaꞌgakeꞌ Chiozaꞌ ni bi bzenaggakeꞌ dillꞌ wen dillꞌ kob c̱he X̱ancho Jesúzaꞌ.
9 Beṉꞌkin sakziꞌgakeꞌ zejḻi kaṉi naꞌ bi yillingakeꞌ ganaꞌ chṉabiaꞌ X̱anchonaꞌ kon yeḻꞌ wak choo yeḻꞌ wak xen c̱heꞌnaꞌ.
10 Kaꞌ gak c̱hegakeꞌ katꞌ yilaꞌ X̱ancho Jesucrístonaꞌ kwenc̱he beṉꞌkaꞌ nak lallꞌ nee koogakeꞌneꞌ balaaṉ naꞌ yibachgayi yogꞌ beṉꞌkaꞌ wyajḻeꞌ c̱heꞌ, naꞌ lenle, daa wyajḻeꞌle xtilleenaꞌ beꞌlentoꞌ leꞌ.
11 Daan, toshiizi chṉabntoꞌ c̱hele kwenc̱he Chiozaꞌ ileꞌshiileꞌ leꞌ ḻega beṉꞌ gox wṉabeꞌ, naꞌ gakleneꞌ leꞌ kon yeḻꞌ wak c̱heꞌnaꞌ kwenc̱he yiyoll gonle yogꞌ dii wennaꞌ ba yoo yic̱hjle naꞌ bichlə dii wenkaꞌ cheenileꞌ gonle daa nonḻilallꞌleneꞌ
12 kwenc̱he X̱ancho Jesúzaꞌ shoꞌe balaaṉ ni c̱he daa chonle, naꞌ ḻekzkaꞌ kwee leꞌ balaaṉ. Naꞌ Chios c̱hechonaꞌ naꞌ X̱ancho Jesucrístonaꞌ gaklengakeꞌ leꞌ gak kaꞌ.