2
Naꞌ ṉaa, leꞌ beṉꞌ bishꞌ naꞌ leꞌ beṉꞌ zanꞌ, ka nak daa zizaꞌ X̱ancho Jesucrístonaꞌ naꞌ daa yidiꞌa yillagcho yiyakchoneꞌ txen, chṉabintoꞌ leꞌ
2 bi gakllejile ni bi illeble katꞌ yenile iṉagakeꞌ ba bilaꞌlə X̱anchonaꞌ. Ax̱t iṉateḻzgakeꞌ: “Ki ba wna Chiozaꞌ”, wa iṉazgakeꞌ: “Ki wna Páblonaꞌ”, wa, “Ki beneꞌn yish nan ba bilaꞌlə X̱anchonaꞌ.”
3 Bi weꞌle latj no siyeꞌzə leꞌ ka nak diiki. Ḻaꞌ aga wiyedzieꞌ shi beṉꞌkaꞌ chwiyi Chiozaꞌ biṉꞌ yizoshyiꞌgakeꞌneꞌ, naꞌ shi biṉꞌ ichej beenaꞌ nak beṉꞌ mal wal,a beenaꞌ ba nakten kwiayee.
4 Beenin gon kwineꞌ ḻiizelozi beṉꞌ choo beṉꞌ xen naꞌ wsej wlloneꞌ weꞌlaꞌo beṉꞌ Chiozaꞌ wa bittezə dii nonḻilallꞌgakeꞌ. Naꞌ lljc̱hiꞌe ḻoo yoodoꞌ c̱he Chiozaꞌ gon kwineꞌ ka Chios.
5 ¿Abi chjadinile bshaljlenꞌ leꞌ c̱heyi dga kanaꞌ zoalenꞌ leꞌ?
6 Ṉaa ba ṉezile non ni nkwez beeni kwenc̱he bi yobileꞌ wliꞌlaweꞌ.
7 Do ngashꞌzə ba wzolokzə chak dii malaꞌ daa ba yoo xṉezin gakə. Stozə chyallj ikwas beenaꞌ ni nzagueꞌn kwenc̱he wliꞌlawin.
8 Naꞌch wliꞌlao beṉꞌ mal walaꞌ, naꞌ wit X̱ancho Jesúzaꞌneꞌ kon bishbe c̱heꞌnaꞌ naꞌ wlliayeeneꞌ ka zizaꞌleneꞌ yeḻꞌ chey cheeniꞌ c̱heꞌnaꞌ.
9 Ka nak beṉꞌ mal walaꞌ, dii x̱iwaan gaklenan ḻeꞌ goneꞌ biya yeḻꞌ wak diikaꞌ gon ka yibani beṉꞌ kwenc̱he siyee ḻegakeꞌ.
10 Naꞌ wc̱hineꞌ yogꞌ de wxiyeꞌ kwenc̱he siyee beṉꞌkaꞌ ba nakan kwiayiꞌ daa bi goklallꞌgakeꞌ wlebgakeꞌ daa nak dii ḻi kwenc̱he yilagakeꞌ.
11 Daan, Chiozaꞌkzə choꞌe latj shajḻeꞌgakeꞌ c̱he de wxiyeꞌkaꞌ,
12 kwenc̱he kwiayiꞌ yogꞌḻoḻte beṉꞌkaꞌ bi wyajḻeꞌgakeꞌ c̱he daa nak dii ḻi, san bibachgakileꞌ daa nak dii mal.
13 Naꞌ netoꞌ ṉaa, toshiizi chiyaḻꞌ weꞌntoꞌ Chiozaꞌ yeḻꞌ chox̱ken ni c̱hele, leꞌ beṉꞌ bishꞌ naꞌ leꞌ beṉꞌ zanꞌ, beṉꞌ chaki Chiozaꞌ. Ḻaꞌ dii nechte Chiozaꞌ wlejeꞌ leꞌ kwenc̱he yilale bi kwiayiꞌle daa ba bix̱is biyib Espíritu Sánto c̱heꞌnaꞌ leꞌ naꞌ daa chajḻeꞌle dillꞌ ḻi c̱heꞌnaꞌ.
14 Ni c̱heyi dgan, gox wṉab Chiozaꞌ leꞌ ka beꞌlenntoꞌ leꞌ dillꞌ wen dillꞌ kob c̱heꞌnaꞌ, kwenc̱he idoḻꞌle shoꞌlenle X̱ancho Jesucrístonaꞌ balaaṉ.
15 Naꞌ leꞌ beṉꞌ bishꞌ naꞌ leꞌ beṉꞌ zanꞌ, ḻi soac̱hec̱h naꞌ ḻi kooshaoꞌ diikaꞌ bliꞌ bsedintoꞌ leꞌ ka beꞌlenntoꞌ leꞌ dillꞌ naꞌ ka bzejntoꞌ leꞌ.
16 Naꞌ kwin X̱ancho Jesucrístonaꞌ naꞌ X̱acho Chiozaꞌ, beenaꞌ ba gokileꞌ choꞌ naꞌ lo yeḻꞌ beṉꞌ wen c̱heꞌnaꞌ ba beṉeꞌ choꞌ yeḻꞌ chxenlallꞌ zejḻi kaṉi naꞌ to dii wen dii shaoꞌ dii goncho lez,
17 wtipshgagakeꞌ lallꞌle naꞌ wzoac̱hec̱hgakeꞌ leꞌ kwenc̱he toshiizi gonle wen naꞌ weꞌle dillꞌ wen dillꞌ shaoꞌ.