3
Dii zeelo nantoꞌ leꞌ, beṉꞌ bishꞌ naꞌ leꞌ, beṉꞌ zanꞌ, ḻi iṉabshayi X̱anchonaꞌ c̱hentoꞌ kwenc̱he choꞌa xtilleenaꞌ choeꞌlenntoꞌ beṉꞌ illiljan tolbeꞌzə naꞌ wlebgakeꞌn ḻega dii zakii, kon ka benle leꞌ,
2 naꞌ kwenc̱he yisleꞌ netoꞌ lo ṉiꞌa naꞌ beṉꞌ malkaꞌ, beṉꞌkaꞌ chon dii bi yejniꞌalallii. Ḻaꞌ aga yogꞌ beṉꞌ chajḻeꞌgakeꞌ c̱he X̱anchonaꞌ.
3 Per ṉezicho X̱anchonaꞌ choneꞌ ka neꞌ, naꞌ goneꞌ ka soac̱hec̱hchle naꞌ gap wwieꞌ leꞌ lao dii malaꞌ.
4 Naꞌ nx̱enlallꞌntoꞌ X̱anchonaꞌ chakleneꞌ leꞌ chonle ka ba wnantoꞌ, naꞌ toshiizi gonlen.
5 Naꞌ X̱anchonaꞌ gakleneꞌ leꞌ gakileꞌ beṉꞌ, ka chon Chiozaꞌ chakileꞌ choꞌ, naꞌ so sakile gaple yeḻꞌ chxenlallꞌ lao yogꞌ daa yen ileꞌile ka ben Crístonaꞌ.
6 Leꞌ beṉꞌ bishꞌ naꞌ leꞌ beṉꞌ zanꞌ, kon yeḻꞌ wṉabiaꞌ c̱he X̱ancho Jesucrístonaꞌ nantoꞌ leꞌ bi gonle txen nottezə beṉꞌ bishꞌchokaꞌ chdaliazə, ḻaꞌ aga kanꞌ bsedintoꞌ leꞌ.
7 Ḻaꞌ ṉezkzile ka chonntoꞌ, naꞌ kanꞌ chiyaḻꞌ gonle. Netoꞌ biga wzoazntoꞌ ka beṉꞌ lia ladjlenaꞌ.
8 Ni biga wdaozntoꞌ yeḻꞌ wao c̱he beṉꞌ naꞌ bi wdixjntoꞌn, san ka tella ka waḻ bilaḻ bizodintoꞌ benntoꞌ llinnaꞌ kwenc̱he ni tole bi benintoꞌ zed.
9 Naꞌ dii ḻicha, zakꞌkzə wṉabntoꞌ yeḻꞌ goklen c̱helenaꞌ, sheḻꞌkaꞌ, per benntoꞌ llin kweṉche bleꞌile, naꞌ kanꞌ gonle.
10 Kanaꞌ zoalenntoꞌ leꞌ wnantoꞌ: “Beenaꞌ bi cheenileꞌ goneꞌ llin, ḻekzkaꞌ bi gaweꞌ.”
11 Naꞌ ba benintoꞌ baḻ-le kon chdale to ni to naꞌ, ni bi chonle llin, naꞌ chlalltezi c̱hele ga bi chiyaḻꞌ.
12 Naꞌ beṉꞌki chon kaꞌ, chṉabintoꞌ ḻegakeꞌ kon yeḻꞌ wṉabiaꞌ c̱he X̱ancho Jesucrístonaꞌ bich tazgakeꞌ kaꞌz, san gongakeꞌ llin kwenc̱he yeej gaogakeꞌ.
13 Naꞌ leꞌ ṉaa beṉꞌ bishꞌ, naꞌ leꞌ beṉꞌ zanꞌ, bi lljx̱akile gonle dii wennaꞌ.
14 Shi no bi chzoa dillꞌ ka nantoꞌ ḻee yishi, ḻi wwia no beenaꞌ naꞌ bi gonleneꞌ txen kwenc̱he yidoꞌileꞌ.
15 Bi niaꞌ gakzbanileneꞌ, san wzajniileꞌneꞌ ka beṉꞌ bishꞌle.
16 Naꞌ kwin X̱anchonaꞌ, beenaꞌ chzoa choꞌ mbalaz, goneꞌ ka soale mbalaz toshiizi bittezə dii chak c̱hele. X̱anchonaꞌ soalenshgueꞌ yogꞌḻoḻtele.