Kart nech daa bzej Páblonaꞌ naꞌ bseḻeen lao Timotewaꞌ
1
Nadꞌ Pablo, nakꞌ postl c̱he Jesucrístonaꞌ kwenc̱he wiꞌa xtilleenaꞌ, ḻaꞌ Chiozaꞌ, beenaꞌ bisla choꞌ kwenc̱he bi kwiayiꞌcho, len Cristo Jesúzaꞌ, beenaꞌ noncho lez goneꞌ wen c̱hecho, bzoagakeꞌ nadꞌ.
2 Chzejꞌ liꞌ, Timoteo, nakoꞌ ka dowalj biꞌ c̱haꞌ daa nakcho txen chonḻilallꞌcho Jesucrístonaꞌ. X̱acho Chiozaꞌ len X̱ancho Cristo Jesúzaꞌ gaklenshgagakeꞌ liꞌ, naꞌ yiyeshꞌlallꞌgakileꞌ liꞌ, naꞌ gongakeꞌ ka soꞌ mbalaz.
3 Kanaꞌ ba zoa shaa Macedónianaꞌ, wṉabidꞌ liꞌ yigaaṉoꞌ Éfesonaꞌ kwenc̱he yoo beṉꞌkaꞌ chliꞌ chsedi daa bi nak dii ḻi bi gongakeꞌ kaꞌ,
4 naꞌ bi segakeꞌ wṉeyi c̱he dillꞌ golkaꞌ wdiljlallꞌ beṉꞌ naꞌ c̱he diikaꞌ ben dii x̱ozxtoeꞌkaꞌ daa bi chiyoll chido. Ḻaꞌ dillꞌkaꞌ chonan ka chakgued beṉꞌ naꞌ bi chaklenan gombiaꞌgakeꞌ daa cheeni Chiozaꞌ goncho daa nonḻilallꞌchoneꞌ.
5 Yeꞌgakoꞌneꞌ kaꞌ kwenc̱he gapgakeꞌ yeḻꞌ chaki ka daa chalj ḻoo yic̱hjlallꞌdoꞌ beenaꞌ ba bixi biyech naꞌ bibi de chao chdian ḻeꞌ daa ṉezileꞌ choneꞌ ka chazlallꞌ Chiozaꞌ naꞌ nonḻilalleeneꞌ do lallee.
6 Baḻgakeꞌ lwaa segakeꞌ wṉeyi c̱heyi diiki, ba lenzgakeꞌ choeꞌgakeꞌ dillꞌ c̱heyi diikaꞌ bi zakii.
7 Cheenzgakileꞌ gakgakeꞌ beṉꞌ wliꞌ wsedi ley c̱he Chiozaꞌ, per ni ḻekzgakeꞌ bi chajniꞌgakileꞌ daa chliꞌ chsedgakileꞌ ḻaꞌkzi nazgakeꞌ kayeṉꞌnan nakan.
8 Ṉezicho ley c̱he Chiozaꞌ nakan wen, shi wc̱hinchon ka chiyaḻi.
9 Ḻaꞌ ṉezicho aga ben Chiozaꞌ leyaꞌ ni c̱he beṉꞌkaꞌ chon wen, san ni c̱he beṉꞌkaꞌ chyishj xtilleenaꞌ len beṉꞌkaꞌ bi chzenag, beṉꞌkaꞌ bi chall chlleb Chiozaꞌ, beṉꞌ saaxyakaꞌ, beṉꞌkaꞌ chiyit x̱axṉaꞌyin, yogꞌ beṉꞌkaꞌ nak wen xya,
10 beṉꞌkaꞌ chṉelen xiiṉ xool beṉꞌ, beṉꞌkaꞌ nak beṉꞌ xej, beṉꞌkaꞌ chitꞌ chde beṉꞌ, beṉꞌkaꞌ chziyeꞌ, beṉꞌkaꞌ ax̱t chzoagakeꞌ Chiozaꞌ de tasc̱hiw katꞌ chziyeꞌgakeꞌ, naꞌ nottez beṉꞌ bi choneꞌ daa na choꞌa xtillꞌ Chiozaꞌ
11 kon ka chzajnii dillꞌ wen dillꞌ kob c̱heꞌnaꞌ daa nak dii zakii nlleb. Naꞌ Chiozaꞌ, beenaꞌ chidoḻꞌ weꞌlaꞌocho, ba beneꞌn lallꞌ naꞌ wiꞌan dillꞌ.
12 Choꞌa X̱ancho Cristo Jesúzaꞌ yeḻꞌ chox̱ken choneꞌ nadꞌ wal, naꞌ nx̱enlallee nadꞌ wak gon xshineꞌnaꞌ, naꞌ bzoeꞌ nadꞌ gonaꞌn.
13 Ḻaꞌkzi biya dii ben wṉiaꞌ c̱heꞌ, naꞌ bc̱hiꞌ bsakaa beṉꞌkaꞌ benḻilallꞌgakeꞌneꞌ naꞌ bshagdiḻꞌ ḻegakeꞌ, Chiozaꞌ biyeshꞌlallileꞌ nadꞌ daa bi wṉezidꞌ bin chonꞌ kanaꞌ biṉꞌ shajḻiꞌa c̱he Jesúzaꞌ.
14 Naꞌ dii xen gokleneꞌ nadꞌ, beneꞌ ka chonḻilallꞌchee naꞌ beṉeꞌ nadꞌ yeḻꞌ chakinaꞌ daa nakꞌ txen Cristo Jesúzaꞌ.
15 Dillii nakan dii wx̱enlallꞌcho, naꞌ yogꞌḻoḻ beṉꞌ chiyaḻꞌ shajḻiꞌen: Cristo Jesúzaꞌ bideꞌ yell-lioni kwenc̱he yisleꞌ beṉꞌ saaxyakaꞌ, naꞌ nadꞌyeṉꞌ goklikzꞌ beṉꞌ saaxya wal.
16 Per Chiozaꞌ biyeshꞌlallileꞌ nadꞌ kwenc̱he wliꞌ Jesucrístonaꞌ do ka nak yeḻꞌ chxenḻallꞌ xen c̱heꞌnaꞌ naꞌ ileꞌi beṉꞌkaꞌ ziꞌ shajḻeꞌ c̱heꞌ naꞌ gapgakeꞌ yeḻꞌ mban zejḻi kaṉi.
17 Toshiizi shajlaꞌoshga beenaꞌ chṉabiaꞌ zejḻi kaṉi, beenaꞌ biga llia te c̱heꞌ, beenaꞌ zoakz ḻaꞌkzi bi chleꞌichoneꞌ, naꞌ shoꞌshgueꞌ balaaṉ. Zeelo ḻenꞌ nakeꞌ Chios. Kanꞌ gakshgan.
18 Timoteo, xiiṉdawaa, niaꞌ liꞌ chiyaḻꞌ gonoꞌ ka wdix̱jeꞌi beṉꞌkaꞌ liꞌ daa goll Chiozaꞌ ḻegakeꞌ c̱hoꞌ dii nechte, kwenc̱he daa wnagakeꞌ c̱hoꞌ gaklenan liꞌ gonoꞌ ga zeelo yizoiloꞌ gonoꞌ xshin Chiozaꞌ daa nak lallꞌ noꞌ.
19 Toshiizi soꞌ gonḻilalloo Jesucrístonaꞌ naꞌ tlizi gonoꞌ wen kwenc̱he bibi gao idian liꞌ daa ṉeziloꞌ chonoꞌ ka chazlallee. Ḻaꞌ baḻ beṉꞌ dii shaoꞌtekzə chongakeꞌ daa bi chiyaḻꞌ gongakeꞌ naꞌ bich chonḻilallꞌgakeꞌneꞌ.
20 Ka gok c̱he Himenewaꞌ len Alejándronaꞌ, naꞌ wṉabidꞌ Chiozaꞌ gakgakeꞌ lallꞌ naꞌ Satanázaꞌ kwenc̱he wsedgakeꞌ bich bi gon iṉazgakeꞌ c̱he Chiozaꞌ.