2
Ṉaa niaꞌ liꞌ daa llialote gonle: chiyaḻꞌ weꞌḻwill-le Chiozaꞌ naꞌ iṉabileneꞌ daa chyallj chc̱hinile naꞌ daa chyallj chc̱hini beṉꞌ yoblə, naꞌ gatꞌyoileꞌneꞌ gakleneꞌ yogꞌḻoḻte beṉꞌ, naꞌ weꞌleneꞌ yeḻꞌ chox̱ken ka nak daa choneꞌ c̱he yogꞌḻoḻ beṉꞌ yell-lioni.
2 Chiyaḻꞌ iṉabicho Chiozaꞌ gakleneꞌ beṉꞌ wṉabiaꞌkaꞌ naꞌ yogꞌḻoḻte beṉꞌ nak josc̱his, kwenc̱he soacho mbalaz naꞌ kono wsej wllon weꞌlaꞌocho Chiozaꞌ naꞌ goncho daa cheenileꞌ.
3 Ḻaꞌ dgan nakan wen naꞌ chazlalli Chiozanꞌ, beenaꞌ bisla choꞌ kwenc̱he bi kwiayiꞌcho,
4 naꞌ cheenileꞌ yogꞌḻoḻte beṉꞌ yell-lioki yilagakeꞌ naꞌ gombiaꞌgakeꞌ daa nak dii ḻi.
5 Ḻaꞌ toz Chiozanꞌ zoa, naꞌ toz beenaꞌ chizoa beṉꞌ yell-lioni wen kon Chiozaꞌ, ḻenꞌ Cristo Jesúzaꞌ,
6 beenaꞌ bzani kwineꞌ witeꞌ kwenc̱he wdixjeꞌ xtoḻꞌ yogꞌḻoḻ beṉꞌ yell-lioni. Naꞌ dga gokə, gokan llanaꞌ bllia Chiozaꞌ biaꞌ, naꞌ bliꞌe cheenileꞌ yisleꞌ choꞌ.
7 Naꞌ kwenc̱he iṉezi yogꞌ beṉꞌ dga, bzoeꞌ nadꞌ nakꞌ postl c̱heꞌ naꞌ beneꞌ lallꞌ naꞌ chyix̱jiꞌa xtilleenaꞌ. Naꞌ beneꞌ lallꞌ naꞌ wliꞌ wsedidꞌ beṉꞌkaꞌ bi nak beṉꞌ Israel, kwenc̱he shajḻeꞌgakeꞌ dillꞌ ḻi c̱heꞌnaꞌ. Naꞌ dga choꞌa dillꞌ nakan dii ḻi, naꞌ bi chziyaa.
8 Cheenidꞌ yogꞌḻoḻ beṉꞌ byokaꞌ weꞌḻwillgakeꞌ Chiozaꞌ gattezə zoagakeꞌ, naꞌ chiyaḻꞌ gakgakeꞌ beṉꞌ lallꞌdoꞌ nxi nyech, beṉꞌ bi yoo daa nak yeḻꞌ chllaa yeḻꞌ chlok naꞌ yeḻꞌ wishagdiḻ katꞌ wḻis neekaꞌ laweꞌnaꞌ weꞌḻwillgakeꞌneꞌ.
9 Naꞌ ka nak noolkaꞌ, chiyaḻꞌ wsakꞌgakeꞌ gakw xagakeꞌ, naꞌ bi tezgakeꞌ lawin yiyiljlallꞌgakeꞌ naklə yipaa yic̱hjeꞌkaꞌ, ni bi wc̱hingakeꞌ no or wa lechꞌ zakii inlleb.
10 San gonləgakeꞌ to dii byen seyi c̱hegakeꞌ chongakeꞌ wen ḻega beṉꞌ choeꞌlaꞌo Chios.
11 Chiyaḻꞌ kweꞌ noolkaꞌ llizə wzenaggakeꞌ c̱he beṉꞌkaꞌ chliꞌ chsedi choꞌa xtillꞌ Chiozaꞌ naꞌ wzoagakeꞌ xtilleekaꞌ.
12 Bi choꞌa latj wliꞌ wsedzi noolkaꞌ beṉꞌ byokaꞌ, ni bi iṉabiaꞌzgakeꞌ ḻegakeꞌ, san chiyaḻꞌ kweꞌgakeꞌ llizə wzenaggakeꞌ.
13 Ḻaꞌ Chiozaꞌ beneꞌ zigaate Adánnaꞌ, naꞌtechlə beneꞌ Évanaꞌ.
14 Naꞌ aga Adánnanꞌ wxiyeꞌ dii xiwaa, san noolanꞌ wxiyeꞌn naꞌ bxopeꞌ lao saaxyanaꞌ.
15 Naꞌ noolkaꞌ chzoa xiiṉin, bi tegakeꞌ lao yeḻꞌ ziꞌnaꞌ shi toshiizi nx̱enilallꞌgakeꞌ Chiozaꞌ, naꞌ segakeꞌ wṉeyi gakgakileꞌ beṉꞌ, naꞌ soagakeꞌ gongakeꞌ ka cheeni Chiozaꞌ ḻega beṉꞌ nyeeṉ nyeeniyi.