3
Dillii nakan dii wx̱enlallꞌcho: shi no cheeni koo lallꞌ nee gap wwieꞌ beṉꞌkaꞌ nonḻilallꞌ Crístonaꞌ naꞌ wliꞌ wsedileꞌ ḻegakeꞌ, llin wen inlleban llialallee goneꞌ.
2 To beṉꞌ ngoo ḻoo nee chliꞌ chsedileꞌ beṉꞌ, chiyaḻꞌ gakeꞌ beṉꞌ zoa do yic̱hj do lallee, beṉꞌ bibi choꞌa xtillee de. Chiyaḻꞌ soa toz xooleꞌ, naꞌ gakeꞌ beṉꞌ nsaꞌ c̱heyin wen, naꞌ gakeꞌ beṉꞌ nyeeṉ nyeeniyi, naꞌ beṉꞌ chidoḻee gap beṉꞌ ḻeꞌ balaaṉ. Naꞌ chiyaḻꞌ yiyeshile beṉꞌ wiꞌe ga yigaaṉeꞌ, naꞌ gakte wliꞌ wsedileꞌ beṉꞌ.
3 Bi chiyaḻꞌ gakeꞌ beṉꞌ weezo, ni bi gakeꞌ beṉꞌ wishagdiḻ, ni bi selallꞌchgaileꞌ mech, san gakeꞌ beṉꞌ wen, beṉꞌ gax̱jlallꞌ.
4 Chiyaḻꞌ gak kwee xṉez xḻatji dii chak ḻoo yoo lilleꞌ, naꞌ goneꞌ byen wzenag xiiṉeꞌkaꞌ c̱heꞌ naꞌ soagakbꞌ gongakbꞌ daa nak wen.
5 Ḻaꞌ shi to beṉꞌ bi chak kwee xṉez xḻatji dii chak ḻoo yoo lilleꞌ, ¿nakra goneꞌ kwee xṉezi c̱he beṉꞌkaꞌ nx̱enilallꞌ Chiozaꞌ?
6 To beṉꞌ shinzə wzolo chonḻilallee Crístonaꞌ bi chiyaḻꞌ gak lallꞌ nee gap wwieꞌ beṉꞌkaꞌ nonḻilallꞌ Crístonaꞌ, kwenc̱he ki gakzeꞌ beṉꞌ chep chaꞌlallꞌ naꞌ wc̱hoglo Chiozaꞌ c̱heꞌ ka ba nc̱hogloeꞌ c̱he dii x̱iwaa.
7 Ḻekzkaꞌ chiyaḻꞌ seyi c̱heꞌ choneꞌ wen lao beṉꞌkaꞌ bi nonḻilallꞌ Crístonaꞌ kwenc̱he kono biz gon iṉa c̱heꞌ naꞌ gonzə dii x̱iwaa gan wchix̱an ḻeꞌ.
8 Ḻekzkaꞌ beṉꞌkaꞌ gak lo naꞌgakeꞌ gaklengakeꞌ wwiagakeꞌ bin chyallj chc̱hini beṉꞌkaꞌ nakgakeꞌ txen nonlillꞌgakeꞌ Crístonaꞌ, chiyaḻꞌ gakgakeꞌ beṉꞌ chidoḻꞌ gap beṉꞌ ḻegakeꞌ balaaṉ, beṉꞌ chda do lallee, naꞌ bi sollgakileꞌ, ni bi gakzgakeꞌ beṉꞌ wzelallꞌ.
9 Chiyaḻꞌ soac̱hec̱hgakeꞌ shajḻeꞌgakeꞌ dii ḻi daa ba bzajnii Chiozaꞌ choꞌ daa kono wṉezi kanaꞌ. Naꞌ chiyaḻꞌ soagakeꞌ do yic̱hj do lallꞌgakeꞌ naꞌ bibi de gao idian yic̱hjlallꞌdoꞌekaꞌ daa ṉezgakileꞌ chongakeꞌ ka cheeni Chiozaꞌ.
10 Naꞌ ḻekzkaꞌ katꞌ kwejle beṉꞌki, chiyaḻꞌ wwiayeṉꞌle nak nsaꞌ c̱hegakeꞌ. Naꞌ shi bibi de dii chao xya c̱hegakeꞌ, wak gak lo naꞌgakeꞌ wwiagakeꞌ bin chyallj chc̱hini beṉꞌkaꞌ nakgakeꞌ txen nonlillꞌgakeꞌ Crístonaꞌ.
11 Naꞌ noolkaꞌ ḻekzkaꞌ chiyaḻꞌ gakgakeꞌ beṉꞌ chidoḻꞌ gap beṉꞌ ḻegakeꞌ balaaṉ, naꞌ bi gakgakeꞌ beṉꞌ wic̱hitj dillꞌ, san gakgakeꞌ beṉꞌ nsaꞌ c̱heyin wen, naꞌ gakgakeꞌ beṉꞌ gak wx̱enlallꞌcho toshiizi gongakeꞌ wen.
12 To beṉꞌ gak lo nee wwieꞌ bin chyallj chc̱hini beṉꞌkaꞌ nakeꞌ txen nonlillꞌgakeꞌ Crístonaꞌ chiyaḻꞌ soa toz xooleꞌ, naꞌ chiyaḻꞌ gap wwieꞌ xiiṉeꞌkaꞌ kwenc̱he gongakbꞌ wen, naꞌ kweꞌ xṉez xḻatji dii chak ḻoo yoo lilleꞌ.
13 Beṉꞌkaꞌ chak chgoogakeꞌ xṉezi c̱he diikaꞌ chyallj chc̱hini beṉꞌkaꞌ nakgakeꞌ txen nonlillꞌgakeꞌ Crístonaꞌ chidoḻꞌgakeꞌ to balaaṉ, naꞌ soachgagakeꞌ mbalaz daa nonḻilallꞌgakeꞌ Cristo Jesúzaꞌ.
14 Ḻaꞌkzi ba nonꞌ lez yobzə yidwiaꞌ liꞌ, chzejꞌ dga
15 kwenc̱he shi bi chyobzidꞌ yidꞌ, naꞌ ba ṉeziloꞌ nakan chiyaḻꞌ soa beṉꞌkaꞌ nak xiiṉ Chiozaꞌ, ḻaꞌ choꞌ chdop chllagcho choeꞌlaꞌochoneꞌ nakcho xiiṉ Chios yaa Chios bannaꞌ. Naꞌ nak lo naꞌcho goncho ka gombiaꞌ beṉꞌ dillꞌ ḻi c̱heꞌnaꞌ.
16 Dii ḻi dga chzajniin choꞌ c̱he Crístonaꞌ daa kono wṉezi nakan dii zakii nlleb, naꞌ nan:
Bideꞌ goljeꞌ ka choꞌ beṉꞌ yell-lio,
naꞌ Espíritu c̱he Chiozaꞌ bliꞌe nan nakeꞌ beṉꞌ ḻi beṉꞌ shaoꞌ.
Naꞌ bleꞌi anjlkaꞌ ḻeꞌ,
naꞌ wda beṉꞌ beꞌgakeꞌ choꞌa xtilleenaꞌ lao beṉꞌ yell-lioki,
naꞌ benḻilallꞌgakeꞌneꞌ.
Naꞌ biyepeꞌ yabanaꞌ ganaꞌ yoꞌe to balaaṉ xen.