Kart wchopi daa bzej Páblonaꞌ naꞌ bseḻeen lao Timotewaꞌ
1
Nadꞌ Pablo nakꞌ postl c̱he Jesucrístonaꞌ kon ka chaklallꞌ Chiozaꞌ, kwenc̱he wiꞌa dillꞌ nan ba bc̱hebeꞌ wiꞌe yeḻꞌ mban zejḻi kaṉi c̱he nottezə beṉꞌkaꞌ nak Crístonaꞌ txen.
2 Chzejꞌ liꞌ, Timoteo, nakoꞌ ka dowalj biꞌ c̱haꞌ. X̱acho Chiozaꞌ naꞌ X̱ancho Jesucrístonaꞌ gaklenshgagakeꞌ liꞌ, naꞌ yiyeshꞌlallꞌgakileꞌ liꞌ, naꞌ gongakeꞌ ka soꞌ mbalaz.
3 Tlizi choeꞌḻwillꞌ Chiozaꞌ, beenaꞌ chonḻilallaa do yic̱hj do lallaa, ka ben dii beṉꞌ gol c̱haꞌkaꞌ. Ka tella ka waḻ chṉabꞌ gakleneꞌ liꞌ naꞌ choꞌaneꞌ yeḻꞌ chox̱ken ni c̱hoꞌ.
4 Chjadinidꞌ ka wchelloꞌ kanaꞌ zeelo bshaljcho, naꞌ cheenidꞌ ileꞌidꞌ liꞌ kwenc̱he yiba yizakidꞌ.
5 Chjadinidꞌ ka nonḻilalloo Chiozaꞌ do yic̱hj do lalloo, ka ben xṉaꞌgoloꞌ Lóidanaꞌ naꞌ xṉoo, Eunícenaꞌ. Naꞌ ṉezyeṉidꞌ ḻekzkaꞌ liꞌ nonḻilallooneꞌ do yic̱hj do lalloo.
6 Naꞌ daan, chisaꞌlalloo chiyaḻꞌ weꞌḻ-lallꞌcho gonoꞌ xshin Chiozaꞌ kon ka nak yeḻꞌ wakaꞌ daa beneꞌ lallꞌ noꞌ kanaꞌ bx̱oaꞌ naꞌnaꞌ yic̱hjoꞌnaꞌ.
7 Ḻaꞌ Chiozaꞌ beṉeꞌ choꞌ Espíritu c̱heꞌnaꞌ, naꞌ Espíritu c̱heꞌnaꞌ chakleneꞌ choꞌ kwenc̱he bi gall illebcho, naꞌ choṉeꞌ choꞌ yeḻꞌ wak len yeḻꞌ chaki, naꞌ chakleneꞌ choꞌ gakcho beṉꞌ nyeeṉ nyeeniyi.
8 Daan, bi yiyii yidoꞌiloꞌ wiꞌo choꞌa xtillꞌ X̱anchonaꞌ, ni bi yidoꞌiloꞌ ni c̱haꞌ daa diaꞌ lillyani daa chonꞌ xshin Chiozaꞌ. San chiyaḻꞌ gonoꞌ nadꞌ txen illaglocho yeḻꞌ zakꞌziꞌkaꞌ ni c̱he choꞌa xtillꞌ Crístonaꞌ, ḻaꞌ Chiozaꞌ chakleneꞌ choꞌ len yeḻꞌ wak c̱heꞌnaꞌ.
9 Chiozaꞌ bisleꞌ choꞌ naꞌ gox wṉabeꞌ choꞌ kwenc̱he gakcho lallꞌ nee, aga yeḻꞌ chon wen c̱hechonanꞌ, san kon ka goklallileꞌ goneꞌn daa nakeꞌ beṉꞌ wen. Naꞌ daa biyeshꞌlallileꞌ choꞌ wloꞌe xṉezin wseḻee Jesucrístonaꞌ kanaꞌ ziꞌ wx̱e wsiltieꞌ yell-lioni.
10 Naꞌ ṉaa, ba bliꞌlawi yeḻꞌ chiyeshꞌlallii c̱heꞌnaꞌ daa bid Jesucrístonaꞌ, beenaꞌ bisla choꞌ, naꞌ blliayee yeḻꞌ wak c̱he yeḻꞌ witaꞌ, naꞌ dillꞌ wen dillꞌ kob c̱heꞌnaꞌ chzajniin choꞌ nan de to yeḻꞌ mban daa bi te c̱heyin.
11 Chiozaꞌ bzoeꞌ nadꞌ nakꞌ postl naꞌ beneꞌ lallꞌ naꞌ chyix̱jiꞌa dillꞌ wen dillꞌ kobi naꞌ chliꞌ chsedidaꞌn beṉꞌ.
12 Naꞌ ni c̱heyinnanꞌ chzakꞌziꞌa lao dga chak c̱haꞌ ṉaa. Per bi chiyii chidoꞌidꞌ, ḻaꞌ ṉezidꞌ ka nak beenaꞌ ba nx̱enilallaa. Naꞌ ṉezidꞌ napeꞌ yeḻꞌ wak gapshiꞌe dillꞌ ḻi c̱heꞌnaꞌ daa beneꞌ lallꞌ naꞌ, kwenc̱he toshiizi gakan dowalj ax̱t katꞌ illin lla te c̱he yell-lioni.
13 Dillꞌ ḻikaꞌ ba bliꞌ bsedidꞌ liꞌ, bliꞌ bsediꞌn beṉꞌ kon ka nakan. Naꞌ daa ba nakoꞌ txen Cristo Jesúzaꞌ, soac̱hechoꞌ gonḻilallooneꞌ naꞌ gakteiloꞌ beṉꞌ.
14 Espíritu Sántonaꞌ, beenaꞌ zoa ḻoo yic̱hjlallꞌdoꞌchonaꞌ, gakleneꞌ liꞌ kwenc̱he toshiizi wliꞌ wsediloꞌ beṉꞌ dillꞌ ḻinaꞌ daa ba bsedidꞌ liꞌ naꞌ bi wiꞌo latj shi ga zaꞌzə beṉꞌ cheenileꞌ yisheen.
15 Ṉezkziloꞌ yogꞌ beṉꞌ Ásiakaꞌ wchooṉlallꞌgakeꞌ nadꞌ, naꞌ lentez Figélonaꞌ naꞌch Hermógenezaꞌ.
16 Chṉabidꞌ Chiozaꞌ yiyeshꞌlallileꞌ Onesíforonaꞌ len xiiṉ xooleꞌnaꞌ, ḻaꞌ zan shii bidtipeꞌ lallaa naꞌ bi bidoꞌileꞌ bidwieꞌ nadꞌ ḻoo lillyani.
17 To ka bidzeꞌ Rómani, lii biyiljdotieꞌ nadꞌ ax̱t ki billelileꞌ nadꞌ.
18 Chṉabidꞌ X̱anchonaꞌ yiyeshꞌlallileꞌneꞌ katꞌ illin llanaꞌ wc̱hogloeꞌ c̱he beṉꞌ. Ṉezkziloꞌ dii xen gokleneꞌ choꞌ Éfesonaꞌ.