Kart daa bzej Páblonaꞌ naꞌ bseḻeen lao Títonaꞌ
1
Nadꞌ Pablo chzejꞌ liꞌ, nakꞌ wen llin c̱he Chiozaꞌ naꞌ nakꞌ postl c̱he Jesucrístonaꞌ, naꞌ bseḻee nadꞌ kwenc̱he gaklenꞌ beṉꞌkaꞌ ba wlej Chiozaꞌ gonḻilallꞌgakeꞌneꞌ naꞌ gombiaꞌgakeꞌ daa nak dii ḻi daa chzajniin choꞌ goncho ka cheenileꞌ.
2 Naꞌ zoacho noncho lez to yeḻꞌ mban zejḻi kaṉi. Kanaꞌ ziꞌ wx̱e wsiltieꞌ yell-lioni, Chios, beenaꞌ biga chziyeꞌ, bc̱hebeꞌ goṉeꞌn choꞌ.
3 Naꞌ ṉaa ba bllin lla, Chiozaꞌ, beenaꞌ chisla choꞌ kwenc̱he bi kwiayiꞌcho, chzenileꞌ yogꞌ beṉꞌ choꞌa xtilleenaꞌ daa beneꞌ lallꞌ naꞌ chyix̱jiꞌa, kon ka wneꞌ gonꞌ.
4 Chzejꞌ liꞌ, Tito, nakoꞌ ka dowalj xiiṉꞌ daa nakcho toz chonḻilallꞌcho Jesucrístonaꞌ. X̱acho Chiozaꞌ naꞌ Jesucrístonaꞌ, beenaꞌ bisla choꞌ lao saaxya c̱hechokaꞌ kwenc̱he bi kwiayiꞌcho, gaklenshgagakeꞌ liꞌ naꞌ gongakeꞌ ka soꞌ mbalaz.
5 Bkwaaṉaꞌ liꞌ Crétanaꞌ kwenc̱he wzeeloꞌ koo xṉezi daa bi biyollicho, naꞌch kwejoꞌ beṉꞌ koo lo naꞌgakeꞌ beṉꞌkaꞌ nakgakeꞌ txen nonḻilallꞌgakeꞌ Crístonaꞌ to to yell, kon ka ba wniaꞌ liꞌ gonoꞌ.
6 Beenaꞌ gak lallꞌ nee beṉꞌkaꞌ nonḻilallꞌ Crístonaꞌ chiyaḻꞌ wsaꞌ c̱heꞌ wen kwenc̱he bibi de iṉa beṉꞌ c̱heꞌ, naꞌ gakeꞌ beṉꞌ zoa toz xoolin, naꞌ gonḻilallꞌ xiiṉeꞌkaꞌ Crístonaꞌ, naꞌ bi gakgakbꞌ biꞌ mal ni biꞌ widenag kwenc̱he bi wx̱aꞌgakbꞌ choꞌalao beṉꞌ.
7 Daa ngoo lallꞌ nee xshin Chiozaꞌ, chiyaḻꞌ gakeꞌ dowalj beṉꞌ wen, beṉꞌ bibi de iṉa beṉꞌ c̱heꞌ, naꞌ bi gakeꞌ beṉꞌ chep chaꞌlallꞌ, ni bi gakeꞌ beṉꞌ lok, ni weezo, ni wishagdiḻ, ni beṉꞌ wzelallꞌ.
8 San chiyaḻꞌ wiꞌe ga yigaaṉ beṉꞌ, naꞌ yibaileꞌ goneꞌ dii wen, naꞌ gakeꞌ beṉꞌ nyeeṉ nyeeniyi, naꞌ beṉꞌ nxi nyech, naꞌ beṉꞌ chṉabiaꞌ kwinin.
9 Chiyaḻꞌ gonleneꞌ xtillꞌ Chiozaꞌ daa nak dii ḻi daa ba nsedeꞌ, kwenc̱he wtipeꞌ lallꞌ beṉꞌ yoblə daa wliꞌ wsedileꞌ ḻegakeꞌ daa nak dii ḻi, naꞌ goneꞌ ka shajḻeꞌ beṉꞌkaꞌ nagakeꞌ aga kanꞌ nakan.
10 Ḻaꞌ beṉꞌ zan inlleb beṉꞌ widenag zoa, beṉꞌ bizə chon chna, naꞌ beṉꞌ chziyeꞌ, naꞌ zangakeꞌ nakgakeꞌ beṉꞌ Israel, beṉꞌkaꞌ na yogꞌḻoḻte beṉꞌ byokaꞌ chonḻilallꞌgakeꞌ Crístonaꞌ chiyaḻꞌ shoꞌgakeꞌ seṉ daa le circuncisión.
11 Beṉꞌkanꞌ bi chiyaḻꞌ weꞌcho latj wliꞌ wsedgakileꞌ beṉꞌ, ḻaꞌ daa chzelallꞌgakeꞌ gongakeꞌ gan mechanꞌ chdagakeꞌ to to yoo chliꞌ chsedgakileꞌ daa bi nak shḻi, naꞌ chonllejgakileꞌ do bxooṉtegakeꞌ.
12 To beṉꞌ Creta, beṉꞌ chṉeyaa, wneꞌ c̱he beṉꞌ wlall c̱heꞌkaꞌ: “Beṉꞌ Cretaki nakgakeꞌ beṉꞌ wxiyeꞌ, beṉꞌ mal ga zeelo, beṉꞌ cheej chao ka nḻaꞌ ka nte, naꞌ beṉꞌ lia.”
13 Naꞌ dii ḻikzə ka nakannanꞌ. Daan, bsheshlengakeꞌ ka chiyaḻi kwenc̱he shajniꞌgakileꞌ daa nak dii ḻi daa ba wyajḻeꞌgakeꞌ,
14 naꞌ bich wzenaggakeꞌ c̱he dillꞌ golkaꞌ daa wdiljlallꞌ beṉꞌ Israelkaꞌ, ni bi wzenaggakeꞌ daa nazə beṉꞌkaꞌ chzoa kaꞌlə daa nak dii ḻi.
15 Beṉꞌkaꞌ ba nxi nyech yic̱hjlallꞌdoꞌekaꞌ lao Chiozaꞌ, ni daa cheej chaogakeꞌ ni daa chox̱ꞌgakeꞌ bi chsej chllonan gak yic̱hjlallꞌdoꞌekaꞌ dii nxi nyech. San beṉꞌkaꞌ nxiṉj yic̱hjlallꞌdoꞌekaꞌ naꞌ bi chajḻeꞌgakeꞌ c̱he Crístonaꞌ, bibi dii nxi nyech de laweꞌkaꞌ, ḻaꞌ yic̱hjlallꞌdoꞌekaꞌten lleꞌ llaꞌ dii malaꞌ, naꞌ ni bi chao chdian ḻegakeꞌ katꞌ chx̱iṉj chḻengakeꞌ.
16 Nazgakeꞌ nombiaꞌgakeꞌ Chiozaꞌ, per diikaꞌ chongakeꞌ chiliꞌn laogakeꞌ bi nombiaꞌgakeꞌneꞌ. Ḻaꞌ nakgakeꞌ beṉꞌ mal ga wdelawin, naꞌ nakgakeꞌ beṉꞌ bi chzoa dillꞌ, naꞌ biga gakkzə gongakeꞌ daa nak dii wen.