4
Lao Chiozaꞌ naꞌ lao Cristo Jesúzaꞌ, beenaꞌ yiyedeꞌ iṉabiꞌe naꞌ wc̱hogloeꞌ c̱he to to beṉꞌ, ka beṉꞌ ni mban naꞌ ka beṉꞌ ba wit, chon dga lo noꞌ:
2 Beꞌlen beṉꞌ Choꞌa Xtillꞌ Chiozaꞌ, naꞌ toshiizi benan katꞌ de xḻatjin gonoꞌn, ḻaa cheengakileꞌ wzenaggakeꞌn ḻaa bi cheengakileꞌ. Ben ka yiyakbeꞌi beṉꞌ nan ba bx̱iṉj bḻeneꞌ, bsheshlen beenaꞌ bi zej shḻi, naꞌ btip lallꞌgakeꞌ gongakeꞌ wen, naꞌ wdap yeḻꞌ chxenlallꞌ c̱hegakeꞌ naꞌ bliꞌ bsedi ḻegakeꞌ.
3 Ḻaꞌ wllin lla katꞌ beṉꞌ yell-lioki bich gaklallꞌgakeꞌ wzenaggakeꞌ daa nak dii ḻicha. Naꞌ daa cheengakileꞌ gongakeꞌ kon ka nan yic̱hjlallꞌdoꞌekaꞌ, yiyiljgakeꞌ wde wdeli beṉꞌkaꞌ chliꞌ chsedi daa chiyoolallꞌgakeꞌ wzenaggakeꞌ.
4 Naꞌ yiḻaalaꞌogakeꞌ daa nak dii ḻi naꞌ wzenaggakeꞌ bizə dillꞌ gol.
5 Per liꞌ, gokto ḻega beṉꞌ nyeeṉ nyeeniyi lao yogꞌḻoḻte dii chak, naꞌ so sakiloꞌ wtiḻoo yeḻꞌ zakꞌziꞌkaꞌ. Ben ka dii le beꞌ dillꞌ wen dillꞌ kob c̱he Crístonaꞌ, naꞌ ben xshin Chiozaꞌ daa ba nak lallꞌ noꞌ.
6 Ḻaꞌ ba zoa witgakeꞌ nadꞌ daa chonꞌ xshin Crístonaꞌ, naꞌ ba zoa gaoshosh lljazoalenee.
7 Ba benꞌ ga zeelo bizoidꞌ, naꞌ ba biyoll benꞌ daa ben Chiozaꞌ lo naꞌ gonꞌ, naꞌ toshiizi wzoac̱hec̱hꞌ benḻilallaaneꞌ.
8 Naꞌ ṉaa ba chbezꞌ llanaꞌ ikaa daa chidoḻaa daa ba benꞌ dii wennaꞌ. Naꞌ X̱anchonaꞌ, beenaꞌ chc̱hoglo c̱he beṉꞌ kon ka nakan, goṉeꞌn nadꞌ, naꞌ aga toz nadꞌ, san len yogꞌ beṉꞌkaꞌ do yic̱hj do lallꞌgakeꞌ nongakeꞌ lez llanaꞌ yiyedeꞌ sto shii.
9 Ben to dii byen lii yidwiatezoꞌ nadꞌ,
10 ḻaꞌ Démazaꞌ, daa ngoo yic̱hjeꞌ daa de yell-lioni, ba wchooṉlallee nadꞌ naꞌ ba ziyajeꞌ Tesalónicanaꞌ. Naꞌ Crescéntenaꞌ zejeꞌ zjiꞌe choꞌa xtillꞌ Chiozaꞌ Galácianaꞌ, naꞌ Títonaꞌ zejeꞌ Dalmácianaꞌ.
11 Tochga Lúcazi zoaleneꞌ nadꞌ. Jadilj Márconaꞌ naꞌ daleneꞌ ni kwenc̱he gakleneꞌ nadꞌ lo xshin Crístonaꞌ.
12 Ba bseḻaa Tíquiconaꞌ Éfesonaꞌ.
13 Katꞌkaꞌ tioꞌ Tróazaꞌ ikaashoꞌ xachelaꞌ chdobꞌ daa bkwaaṉꞌ lill Cárponaꞌ; naꞌ ḻekzkaꞌ bex̱ꞌ librkaꞌ, naꞌ dii llialote gox̱oo libr de yidkaꞌ.
14 Alejandro, beṉꞌ wic̱hekw yanaꞌ, ḻe michian beneꞌ c̱haꞌ, naꞌ X̱anchonaꞌ wiꞌeneꞌ daa chidoḻee.
15 Ḻekzkaꞌ liꞌ, wsakoꞌ ki goneꞌ c̱hoꞌ kaꞌ, ḻaꞌ ḻe chakzbanileꞌ daa chliꞌ chsedicho.
16 Dii nech ka bdegakeꞌ nadꞌ lao beṉꞌkaꞌ chṉabiaꞌ ni, ni to beṉꞌ bishꞌchokaꞌ bi goklengakeꞌ nadꞌ; yogꞌzgakeꞌ wchooṉlallꞌgakeꞌ nadꞌ. Chṉabidꞌ Chiozaꞌ siꞌxeneꞌ c̱hegakeꞌ.
17 Per X̱anchonaꞌ gokleneꞌ nadꞌ gokꞌ wal kwenc̱he biaꞌ choꞌa xtilleenaꞌ lao beṉꞌkaꞌ biṉꞌ gonḻilallꞌgakeꞌneꞌ, naꞌ bisleꞌ nadꞌ lao yeḻꞌ witaꞌ.
18 Naꞌ X̱anchonaꞌ yisleꞌ nadꞌ lao yogꞌḻoḻ dii mal, naꞌ lljazoalenee yabanaꞌ ganaꞌ chṉabiꞌe. Ḻenꞌ chidoḻee shoꞌe balaaṉ zejḻi kaṉi. Kanꞌ nakan.
19 Bwapsha nadꞌ chiox Príscanaꞌ len Aquílanaꞌ, naꞌ yogꞌ beṉꞌ lleꞌ ḻoo yoo lill Onesíforonaꞌ.
20 Erástonaꞌ bigaaṉeꞌ Coríntonaꞌ, naꞌ bkwaaṉaꞌ Trófimonaꞌ Milétonaꞌ daa bi shawee.
21 Btalalloo yidoꞌ ka ziꞌ yizoloꞌ dii zagaꞌ. Eubúloni, Pudénteni, Línoni, Cláudiani, naꞌ yogꞌḻoḻ beṉꞌki nakcho txen nonḻilallꞌcho Jesucrístonaꞌ, chwapgakeꞌ liꞌ chiox.
22 X̱ancho Jesucrístonaꞌ soalenshgueꞌ liꞌ. Naꞌ goneꞌ ka gak wen c̱he yogꞌle.