3
Ḻekzkaꞌ chiyaḻꞌ iṉeziloꞌ dga: katꞌ ba zoa te c̱he yell-lioni, dii zan dii nxoll gatꞌ.
2 Ḻaꞌ beṉꞌ zan c̱he to kwinzgakeꞌ segakeꞌ wṉeyi, naꞌ lillinzi selallꞌgakeꞌ gatꞌ kweꞌgakileꞌ mech, naꞌ gakgakeꞌ beṉꞌ llalj naꞌ beṉꞌ chep chaꞌlallꞌ. Biz gon iṉagakeꞌ c̱he Chiozaꞌ, naꞌ bi wzoagakeꞌ xtillꞌ x̱axṉeekaꞌ, ni bi weꞌgakeꞌ yeḻꞌ chox̱ken beṉꞌ gaklen ḻegakeꞌ, naꞌ ni bi yoo yic̱hjgakeꞌ gongakeꞌ ka cheeni Chiozaꞌ.
3 Naꞌ bi yiyeshꞌlallꞌgakileꞌ beṉꞌ, ni bi siꞌxen c̱he bishꞌ ljwellgakeꞌ, naꞌ ḻe c̱hilj sangakeꞌ dillꞌ c̱he beṉꞌ. Naꞌ bi sakgakileꞌ iṉabiaꞌ kwingakeꞌ, naꞌ ḻe yibagakileꞌ wc̱hiꞌ wsakꞌgakeꞌ beṉꞌ, naꞌ gakzbangakileꞌ yogꞌḻoḻte daa nak wen.
4 Gakgakeꞌ beṉꞌ c̱hop choꞌa dillꞌ, naꞌ beṉꞌ bibi nalli, naꞌ gon kwingakeꞌ beṉꞌ choo beṉꞌ xen. Naꞌ ḻe yibachgakileꞌ gongakeꞌ kon ka chzelallꞌgakeꞌ latjin dii nan gongakeꞌ ka cheeni Chiozaꞌ.
5 Ḻaꞌkzi gonzgakeꞌ ka beṉꞌ ḻe nx̱enilallꞌ Chios, naꞌ to kwinzgakeꞌ wliꞌ wze c̱hegakeꞌ nan biṉꞌ weꞌgakeꞌ latj wshaa Chiozaꞌ yic̱hjlallꞌdoꞌekaꞌ.
Naꞌ liꞌ ṉaa, bi chiyaḻꞌ gonoꞌ ni to beṉꞌki txen.
6 Ḻaꞌ kanꞌ nak beṉꞌ wxiyeꞌkaꞌ chda to to yoo, naꞌ chziyeꞌgakeꞌ noolkaꞌ bi nteyi, beṉꞌkaꞌ lallꞌ lao saaxyanaꞌ naꞌ chongakeꞌ biya dii mal.
7 Noolki tlizi chzenaggakeꞌ daa chliꞌ chsedi nottezə beṉꞌ ḻegakeꞌ naꞌ biga llia chombiaꞌgakeꞌ daa nak dii ḻi.
8 Ka ben beṉꞌkaꞌ le Janes naꞌch Jambres, wzoshyiꞌgakeꞌ dii Moisézaꞌ, kanꞌ chon beṉꞌki chsej chllongakeꞌ c̱heyi daa nak dii ḻi daa nxiṉj nḻen yic̱hjlallꞌdoꞌekaꞌ. Naꞌ bi nde beṉꞌki kwent lao Chiozaꞌ ḻaꞌkzi nazgakeꞌ noṉlilallꞌgakeꞌneꞌ.
9 Naꞌ aga wgol daa chongakeꞌ, ḻaꞌ yogꞌ beṉꞌ gakbeꞌi nakgakeꞌ beṉꞌ bi yejniꞌalallii, ka gok c̱he beṉꞌkaꞌ c̱hop, beṉꞌkaꞌ wzoshyiꞌ dii Moisézaꞌ.
10 Naꞌ liꞌ, ṉaa lla, ba ṉezkziloꞌ ka nak daa chliꞌ chsedidꞌ, ka nsaꞌ c̱haꞌ, ka nak daa llialallaa gonꞌ, ka nonḻilallaa Chiozaꞌ, naꞌ ka nak yeḻꞌ chxenlallaa naꞌ yeḻꞌ chakinaꞌ napꞌ, naꞌ ka chtip lallaa kwenc̱he chzo chzakidꞌ yeḻꞌ zakꞌziꞌki chtiḻꞌ.
11 Naꞌ ṉeziloꞌ ka nak yeḻꞌ zakꞌziꞌkaꞌ diikaꞌ ba bllagloaꞌ, ka diikaꞌ btiḻꞌ Antioquíanaꞌ, naꞌ Icónionaꞌ, naꞌch Lístranaꞌ. Ḻaꞌkzi dii zan dii ba bllagloaꞌ, X̱anchonaꞌ ba bisleꞌ nadꞌ lao yogꞌḻoḻten.
12 Dii ḻi, yogꞌḻoḻ beṉꞌkaꞌ cheengakileꞌ gongakeꞌ ka cheeni Chiozaꞌ daa nakgakeꞌ txen Cristo Jesúzaꞌ, wsakꞌziꞌ beṉꞌ ḻegakeꞌ.
13 Naꞌ beṉꞌ wen dii malkaꞌ len beṉꞌ wxiyeꞌkaꞌ, zizikli gongakeꞌ mal, naꞌ gakleləgakileꞌ siyeꞌchgakeꞌ beṉꞌ naꞌ ax̱t kwingakeꞌ ba chiyajḻeꞌgakeꞌ c̱he yeḻꞌ wxiyeꞌ c̱heꞌkaꞌ.
14 Naꞌ liꞌ, ṉaa, wzoac̱hec̱h lawi daa ba nsedoꞌ naꞌ ba wyajḻiꞌo. Ḻaꞌ nombiaꞌkzoꞌ beṉꞌkaꞌ bliꞌ bsedi liꞌ.
15 Jadini kanaꞌ naktioꞌ biꞌdoꞌ nombiꞌo Choꞌa Xtillꞌ Chiozaꞌ, naꞌ ḻennanꞌ goṉan liꞌ yeḻꞌ sinꞌnaꞌ daa chsedin liꞌ gonḻilalloo Cristo Jesúzaꞌ kwenc̱he yiloꞌ naꞌ bi kwiayoo.
16 Kwin Chiozaꞌ bzajniileꞌ dii beṉꞌkaꞌ bzej doxen Choꞌa Xtilleenaꞌ, naꞌ zakaan wliꞌ wsedin beṉꞌ, wsheshlenan beṉꞌ bi chon wen, yigoon shḻi lallꞌ beṉꞌ naklleji, naꞌ wzajniin beṉꞌ kwenc̱he gakeꞌ beṉꞌ ḻi beṉꞌ shaoꞌ,
17 kwenc̱he beenaꞌ chon ka cheeni Chiozaꞌ zizikli gakchacheꞌ naꞌ gak goneꞌ yogꞌ diikaꞌ nak wen.