2
Naꞌ liꞌ, ṉaa, xiiṉdawaa, gok wal daa chaklen Cristo Jesúzaꞌ liꞌ.
2 Daa ba beniloꞌ bliꞌ bsedidꞌ beṉꞌ, bzajniin beṉꞌkaꞌ nx̱enlalloo, beṉꞌkaꞌ ṉezteiloꞌ wak wliꞌ wsedgakileꞌn beṉꞌ yoblə kon ka nakan.
3 Wzoac̱hec̱h btiḻ yeḻꞌ zakꞌziꞌkaꞌ chllagloꞌ ḻega beṉꞌ chon xshin Cristo Jesúzaꞌ, ka chonꞌ nadꞌ.
4 Ni to beṉꞌ zejeꞌ lo wdiḻaꞌ aga dii yoblə zezeꞌ wṉeyi, san chiyaḻꞌ kwej yic̱hjeꞌ yogꞌḻoḻte kwenc̱he goneꞌ daa yiyoolallii beenaꞌ wlejeꞌ ḻeꞌ gakeꞌ soldad.
5 Ḻekzkaꞌ beenaꞌ chxoṉj, bibi goneꞌ gan shi bi chzoeꞌ dillꞌ goneꞌ yogꞌḻoḻte daa llia biaꞌ goneꞌ.
6 Naꞌ beenaꞌ cheeni yiziꞌ yilapeꞌ chiyaḻꞌ wwaꞌgaxjeꞌ llin c̱heyin.
7 Wze wṉeyi dga niaꞌ liꞌ, naꞌ X̱anchonaꞌ wzajniꞌchileꞌn liꞌ kwasḻoḻ.
8 Jadini Jesucrístonaꞌ, beenaꞌ biban ladj beṉꞌ wetkaꞌ, beenaꞌ nak xiiṉ dia c̱he dii Davinaꞌ, kon ka na dillꞌ wen dillꞌ kob c̱heꞌnaꞌ daa chliꞌ chsedidꞌ.
9 Naꞌ ni c̱heyinnanꞌ chzakꞌziꞌa, ax̱t ba wdix̱jgakeꞌ nadꞌ lillyani ka to beṉꞌ wen dii mal. Per aga len choꞌa xtilleenanꞌ nej lillyani, san zejchlə chlliljan.
10 Daan chzo chzakidꞌ yogꞌ yeḻꞌ zakꞌziꞌ dii chak c̱haꞌ, kwenc̱he beṉꞌkaꞌ ba wlej Chiozaꞌ gakgakeꞌ lallꞌ nee gonḻilallꞌgakeꞌ Jesucrístonaꞌ naꞌ yilagakeꞌ kwenc̱he bi kwiayiꞌgakeꞌ, naꞌ lljazoalengakeꞌneꞌ zejḻi kaṉi.
11 Dillii nakan dii wx̱enlallꞌcho:
Shi ba witlencho Crístonaꞌ, ḻekzkaꞌ wbanlenchoneꞌ.
12 Naꞌ shi so sakicho lao bittezə yeḻꞌ ziꞌ yen ileꞌicho daa nakchoneꞌ txen, ḻekzkaꞌ iṉabiaꞌlenchoneꞌ.
Shi choꞌ bi wc̱hebcho nakchoneꞌ txen, kaꞌkzə ḻeꞌ iṉeꞌ bi nakeꞌ choꞌ txen.
13 Ḻaꞌkzi choꞌ bi choncho daa chc̱hebcho, ḻeꞌ choneꞌ ka ba bc̱hebeꞌ,
ḻaꞌ toshiizi choneꞌ kon ka chc̱hebeꞌ goneꞌ.
14 Bi guetlalloo yisoo dga lallꞌ beṉꞌkaꞌ chliꞌ chsediloꞌ. Naꞌ kon yeḻꞌ wṉabiaꞌ c̱he Chiozaꞌ daa ba beṉeꞌ liꞌ bsiꞌngakileꞌ bi chiyaḻꞌ gakguedlenzə ljwellgakeꞌ ni c̱heyi diikaꞌ bibi zakii. Ḻaꞌ bi chaklenan beṉꞌ, san chlliayiꞌlan beṉꞌkaꞌ chzenagan.
15 Ben to dii byen gonoꞌ ka chazlallꞌ Chiozaꞌ kwenc̱he bibi wsiꞌn liꞌ yeḻꞌ ztoꞌ lo xshineꞌnaꞌ, naꞌ bliꞌ bsedi dillꞌ ḻi c̱heꞌnaꞌ kon ka nakan.
16 Bi wzenagoꞌ dillꞌkaꞌ bi yejniꞌalallii naꞌ bite bi zakgakan, ḻaꞌ beṉꞌkaꞌ choeꞌ dillꞌ ka diikaꞌ zizikli chongakeꞌ daa bi choolallꞌ Chiozaꞌ.
17 Ḻaꞌ daa chliꞌ chsedgakileꞌ nakan ka to yillweꞌ dii nak lech naꞌ chlliayiꞌn beṉꞌ. Kaꞌ ben Himenewaꞌ len Filétonaꞌ,
18 biḻaalaꞌogakeꞌ dillꞌ ḻi c̱he Chiozaꞌ naꞌ nazgakeꞌ ba bisbanleꞌ beṉꞌ wetkaꞌ. Naꞌ chonllejgakileꞌ beṉꞌkaꞌ ba nonḻilallꞌgakeꞌ Crístonaꞌ.
19 San dillꞌ ḻi c̱he Chiozaꞌ nakan ka to len yoo dii zoac̱hec̱h. Naꞌ dillꞌ ḻi c̱heꞌnaꞌ nan ki: “X̱anchonaꞌ nombiꞌe beṉꞌkaꞌ nak lallꞌ nee.” Naꞌ ḻekzkaꞌ nan: “Nottezə beenaꞌ na nakeꞌ Crístonaꞌ txen, chiyaḻꞌ yikwaseꞌ lawi dii malaꞌ.”
20 To ḻoo yoo lill beṉꞌ wniꞌa aga chc̱hineꞌ shgaḻꞌ dii nak de or wa de plat, san nc̱hix̱gakan de yag len de yo. Baḻan naki ganaꞌ chc̱hineꞌn, naꞌ baḻan chonan llin gattez.
21 Kaꞌkzan beenaꞌ chon daa chazlallꞌ Chiozaꞌ, saklebileꞌ diikaꞌ nak de or wa de plat, naꞌ zakee wc̱hin Chiozaꞌneꞌ goneꞌ dii zan dii wen.
22 Bi gonoꞌ txen ni to dii malkaꞌ cheeni beli chennaꞌ katꞌ zoan lo yeḻꞌ wewaa. Naꞌ ben to dii byen gakoꞌ beṉꞌ ḻi beṉꞌ shaoꞌ, naꞌ gonḻilalloo Crístonaꞌ, naꞌ gakiloꞌ beṉꞌ, naꞌ soalenoꞌ bishꞌ ljwelloꞌkaꞌ mbalaz, ka chon yogꞌ beṉꞌkaꞌ nxi nyech yic̱hjlalldoeꞌkaꞌ, beṉꞌkaꞌ choeꞌḻwillgakeꞌ X̱anchonaꞌ.
23 Bi wzenagoꞌ dillꞌkaꞌ biz chon chna, dillꞌkaꞌ bibi zakꞌ, ḻaꞌ ba ṉezkziloꞌ chx̱egakan wdiḻ.
24 To beṉꞌ nḻaneꞌ choneꞌ xshin X̱anchonaꞌ bi chiyaḻꞌ wshagdiḻeꞌ beṉꞌ, san chiyaḻꞌ gonileꞌ yogꞌḻoḻ beṉꞌ wen. Naꞌ chonan byen gak wliꞌ wsedileꞌ beṉꞌ, naꞌ chiyaḻꞌ gapeꞌ yeḻꞌ chxenlallꞌ.
25 Naꞌ chiyaḻꞌ weꞌleneꞌ dillꞌ xochi beṉꞌkaꞌ chzoshyiꞌ daa nak dillꞌ ḻi daa chliꞌ chsedileꞌ, naꞌ goneꞌ lez shicholə Chiozaꞌ gakleneꞌ ḻegakeꞌ kwenc̱he yiyaj yilengakileꞌ naꞌ gombiaꞌgakeꞌ daa nak dii ḻi,
26 naꞌ yiyeeṉ yiyeeṉigakileꞌ naꞌ yilagakeꞌ lo ṉiꞌa naꞌ dii x̱iwaa daa ntakw nc̱hejan ḻegakeꞌ daa chongakeꞌ ka cheenin.