2
Naꞌ liꞌ ṉaa, bliꞌ bsedi beṉꞌ daa nak dii ḻi.
2 Bzajnii beṉꞌ golkaꞌ gakgakeꞌ beṉꞌ nsaꞌ c̱heyin wen, beṉꞌ chidoḻꞌ gap beṉꞌ ḻegakeꞌ balaaṉ, beṉꞌ nyeeṉ nyeeniyi, naꞌ soac̱hec̱hgakeꞌ gonḻilallꞌgakeꞌ Crístonaꞌ, naꞌ gakgakileꞌ beṉꞌ, naꞌ so sakgakileꞌ bittez dii yen ileꞌgakileꞌ.
3 Ḻekzkaꞌ nool golkaꞌ chiyaḻꞌ gall illebgakeꞌ Chiozaꞌ, naꞌ bi gakzgakeꞌ beṉꞌ wic̱hitj dillꞌ, ni bi weꞌgakeꞌ latj gonzə yeḻꞌ weezonaꞌ ḻegakeꞌ gan, san chiyaḻꞌ gongakeꞌ wen kwenc̱he ileꞌi beṉꞌ ka chiyaḻꞌ gongakeꞌ.
4 Naꞌ wliꞌ wsedgakileꞌ nool xkwidꞌkaꞌ gaki beṉꞌ c̱heꞌkaꞌ naꞌ gaki xiiṉeꞌkaꞌ,
5 naꞌ gakgakeꞌ beṉꞌ nyeeṉ nyeeniyi, beṉꞌ bi ndaꞌ nchen dii mal, naꞌ gap wwia ḻoo yoo lillgakeꞌ, gakgakeꞌ beṉꞌ chiyeshꞌlallii, naꞌ wḻex̱j yic̱hjgakeꞌ lao beṉꞌ c̱heꞌkaꞌ kwenc̱he kono iṉe zban c̱he xtillꞌ Chiozaꞌ ni c̱hegakeꞌ.
6 Naꞌ ḻekzkaꞌ goll biꞌ wewꞌkaꞌ gakgakbꞌ biꞌ nyeeṉ nyeeniyi.
7 Liꞌyeṉꞌan chiyaḻꞌ wliꞌo chonoꞌ wen lao yogꞌḻoḻte daa chonoꞌ. Naꞌ wsaꞌ c̱hoꞌ bash bal katꞌ wliꞌ wsediloꞌ beṉꞌ naꞌ benan do yic̱hj do lalloo,
8 naꞌ wsakoꞌ wiꞌo dillꞌ kwenc̱he bibi de iṉa beṉꞌ c̱heyin. Naꞌ yidoꞌi beṉꞌkaꞌ chakzbani choꞌ daa bibi de gon iṉagakeꞌ c̱hecho.
9 Bzajnii beṉꞌkaꞌ yoo x̱anin wḻex̱j yic̱hjgakeꞌ lao x̱aneꞌkaꞌ, naꞌ gongakeꞌ ka yiyoolallꞌgakeꞌ, naꞌ bi yilliizgakeꞌ ḻegakeꞌ dillꞌ.
10 Naꞌ bibi siꞌ kwangakeꞌ c̱he x̱aneꞌkaꞌ, san soa do lallꞌgakeꞌ kwenc̱he wliꞌgakeꞌ lao yogꞌḻoḻ daa chongakeꞌ nan ḻe wen nak choꞌa xtillꞌ Chiozaꞌ, beenaꞌ bisla choꞌ kwenc̱he bi kwiayiꞌcho.
11 Chiozaꞌ ba bliileꞌ yogꞌḻoḻ beṉꞌ yeḻꞌ goklen c̱heꞌnaꞌ kwenc̱he yilagakeꞌ naꞌ bi kwiayiꞌgakeꞌ.
12 Naꞌ yeḻꞌ goklennaꞌ daa beneꞌ c̱hecho chliꞌ chsedin choꞌ kwej yic̱hjcho daa bi nak wen naꞌ diikaꞌ chzelallꞌ beli chennaꞌ, naꞌ soacho yell-lioni nyeeṉ nyeeniyicho, goncho ka chiyoolallꞌ Chiozaꞌ, naꞌ gall illebchoneꞌ,
13 shlak noncho lez illin lla choo lla xennaꞌ yilaꞌ Jesucrístonaꞌ, beenaꞌ nak beṉꞌ choo beṉꞌ xen, naꞌ nakeꞌ Chios c̱hecho naꞌ bisleꞌ cho.
14 Ḻenꞌ bzani yeḻꞌ mban c̱heꞌnaꞌ ni c̱hecho kwenc̱he bisell biḻee choꞌ lao yogꞌḻoḻ dii malaꞌ, naꞌ bix̱is biyibeꞌ choꞌ kwenc̱he gakcho lallꞌ nee naꞌ selallꞌcho goncho daa nak wen.
15 Dgan chiyaḻꞌ wliꞌ wsediloꞌ beṉꞌ, naꞌ wtipoꞌ lallꞌgakeꞌ gongakeꞌ ka cheeni Chiozaꞌ, naꞌ wsheshlenoꞌ beṉꞌkaꞌ bi chon wen, naꞌ benan ḻega beṉꞌ nzoa Chiozaꞌ. Naꞌ kono chiyaḻꞌ gonzi liꞌ nakzi.